སྤྱི་ལོ་༢༠༡༣.༡༢.༡༥ཉིན་ནི་གངས་ལྗོངས་འཇིགས་མེད་ཤེས་རིག་ནོར་བུའི་སློབ་གླིང་མི་ཡུལ་ལ་འཁྲུངས་ནས་ལོ་འཁོར་བཅུ་དགུ་འཁོར་བའི་བཀྲ་ཤིས་དུས་བཟང་གི་ཉིན་མོ་ལ་ཕུལ་བའི་སྐར་ཚོམ་གྱི་ཤིས་ཚིག

    དེ་རིང་གངས་ལྗོངས་ཤེས་རིག་ནོར་བུའི་སློབ་གླིང་དངོས་སུ་དབུ་བརྙེས་ནས་མི་ལོ་བཅུ་དགུ་འཁོར་བའི་རྗེས་དྲན་གྱི་བཀྲ་ཤིས་དུས་བཟང་གི་ཉིན་མོ་རེད། སློབ་མ་ཚོས་མིག་དབང་འཕྲོག་པའི་རིག་རྩལ་སྣ་ཚོགས་འཁྲབ་སྟོན་བྱས་ཤིང་། སློབ་དཔོན་འཇིགས་མེད་རྒྱལ་མཚན་མཆོག་གིས་མི་རིགས་སློབ་གསོ་དང་དཔལ་འབྱོར་གྱི་སྒྲིག་གཞི་སོགས་ལས་འཕྲོས་ཏེ་ཕུགས་རྒྱང་རིང་བའི་གསུང་བཤད་ཡིད་འཁུལ་བ་བསྩལ། གོ་ཐོས་སུ་མི་ལོ་བཅུ་དགུའི་ཡར་སྔོན་གྱི་དེ་རིང་ཡང་ཁོང་གིས་དངོས་སུ་༼ ཤེས་རིག་ནོར་བུའི་གླིང་༽ཞེས་པའི་སྒོ་བྱང་ཞིག་ཤིང་ལེབ་སྟེང་ལ་ཕྱག་བྲིས་གནང་སྟེ་ཚེས་ཐོག་མའི་སློབ་བུ་དྲུག་ཅུར་ཉེ་བ་ཞིག་དང་མཉམ་དུ་སློབ་གླིང་འདི་མི་ཡུལ་དུ་བསླེབས་པ་ཆེས་ཐོག་མར་བསྒྲགས་པ་རེད་ཟེར། དེ་རིང་འདི་ལྟར་བལྟས་ཡོང་དུས་ད་ལྟ་དངོས་སུ་སློབ་མཐར་ཕྱིན་པ་སྟོང་ལ་ཉེ་བས་རང་རང་གི་ས་ན་མི་རིགས་ལ་ཞབས་ཞུ་ཆེ་ཕྲ་སྣ་ཚོགས་བསྒྲུབས་ཏེ་རང་གི་མ་ཡུམ་སློབ་གྲྭའི་སྙིང་སྟོབས་དར་སྤེལ་གཏོང་བཞིན་ཡོད་ལ། ད་ལྟ་སློབ་གླིང་རང་ན་ཡང་སློབ་བུ་སྟོང་ལྷག་གིས་གནའ་དེང་ཟུང་ལ་སྦྱོང་བའི་བརྩོན་པ་རྨ་ཀློང་རིང་མོའི་རྒྱུན་ལ་སྲིང་བཞིན་ཡོད། དེ་བས་ང་ཚོས་དེ་རིང་གི་ཉིན་མོ་འདི་ལ་ཕྱིར་དྲན་བྱ་འོས་ལ། རྟེན་འབྲེལ་ཡང་ཞུ་འོས་ཏེ། འདི་ནི་དམ་པ་ཞིག་ཁ་བཤད་ལས་བརྒལ་ཏེ་ལག་ལེན་ལ་ཞུགས་ཤིང་དངོས་སུ་ལམ་ལ་ཆས་པའི་ཉིན་མོ་ཁྱད་པར་བ་ཞིག་རེད། ང་ཡང་མ་ཡུམ་འདིས་བསྐྱངས་ཏེ་མི་གྲལ་དུ་བཙུད་པ་ཡིན་པས། བདག་གིས་འདི་ནས་རང་ཉིད་ཀྱི་མི་ཚེ་དང་ཕུགས་འདུན་ཡོད་ཚད་ཕུལ་ནས་མ་ཡུམ་ལ་རྟེན་འབྲེལ་ཞུ།

                                                               གྱི་ལིང་འཇིགས་མེད།

          ཤིས་སྨོན།

གནའ་དེང་རིག་གཞུང་འོ་མའི་ཆུ་གཏེར་ངོགས།།
མཁྱེན་ལྡན་ངང་ཁྱུ་མངོན་པར་རྩེན་པའི་གནས།།
མ་ཡུམ་ཤེས་རིག་འོད་ཀྱི་ཞིང་ཁམས་ཆེ།།
ས་ཆེན་མཛེས་པའི་དཔལ་དུ་བརྟན་པར་སྨོན།།
གངས་ལྗོངས་ཤེས་རིག་ནོར་བུའི་སློབ་གླིང་གི་སྐབས་བཅུ་བའི་མཐར་ཕྱིན་སློབ་བུ་གཙང་སྐྱེས་རོལ་དབྱངས་ཀྱིས་མ་ཡུམ་སློབ་གྲྭའི་འཁྲུངས་སྐར་ལ་གུས་ཕུལ།

འཇིགས་མེད་རིག་པའི་སྙིང་སྟོབས་གོ་ཆས་ས་ཆེན་འདི་ཡང་འཕྲེད་དུ་གཤེགས།།

རིགས་ཞེན་ལ་རྒྱའི་མེ་ལྕེ་དམར་བོ་གངས་ལྗོངས་འཛིན་མའི་མཁའ་ན་འབར།། 

ཉམ་ཐག་སློབ་བུ་ཁྲི་སྟོང་མང་བོར་ཤེས་རིག་འོད་སྣང་དཔལ་དུ་སྒྲོན།། 

གནའ་དེང་ཟུང་གི་སློབ་གསོའི་བྱ་བཞག་གོང་ནས་གོང་དུ་འཕེལ་བར་ཤོག།   

               ཅེས་སྐབས་བཅུ་བའི་མཐར་ཕྱིན་སློབ་མ་སྐལ་བཟང་དོན་གྲུབ་ཀྱིས་གུས་ཕུལ།

                                              ཤིས་ཚིག

མ་ཡུམ་སློབ་གླིང་གི་འཁྲུངས་སྐར་ལ་རྟེན་འབྲེལ་ལན་བརྒྱར་ཞུ་བ་དང་ཆབས་ཅིག་མགོན་དགེ་བའི་བཤེས་གཉེན་རྣམས་ཀྱི་སྐུ་ཚེ་བརྟན་ཅིང་།   གཞོན་སློབ་བུ་རྣམས་ཀྱི་རིག་པ་རྒྱས་པ་དང་། ལྷག་དོན་སློབ་གླིང་འདི་ནས་སྤྱི་ཚོགས་ལ་ནུས་པ་བླ་ལྷག་ཐོན་པའི་སློབ་བུ་ས་སྟེང་ཡོངས་ལ་གང་བའི་བཀྲ་ཤིས་ཁ་གཡང་ཞུ་བ་བོ་སློབ་བུ་ཡང་གསང་གིས་ལྷ་ས་ནས་གུས་ཕུལ།

                སྨོན་ཚིག

ཤེས་བྱའི་མཚོ་མོ་ལྷོག་ལྷོག་གདུ་བའི་ཤེས་རིག་ནོར་བུའི་གླིང་ག་རུ།།
ཤེས་བྱའི་བང་མཛོད་དྲིན་ཆེན་བླ་མས་ཤེས་རབ་ནོར་མཆོག་གནང་བའི་དྲིན།།
ཤེས་ནས་ངེད་ཅག་སློབ་བུ་སྟོང་གིས་ཤེས་རིག་གླིང་གི་འཁྲུངས་སྐར་ལ།།
ཤིས་ཚིག་མེ་ཏོག་མཐོ་རུ་བཏེགས་ནས་ཤེས་རིག་གླིང་ལ་རྟེན་འབྲེལ་ཞུ།།

ཞེས་ཨ་རིག་མཁས་བཟང་དུ་འབོད་པས་ཕ་ཡུལ་མདོ་ལ་རིང་མོ་ནས་མ་ཡུམ་སློབ་གྲྭ་སྟེ་གངས་ལྗོངས་ཤེས་རིག་ནོར་བུ་གླིང་བཙུགས་ནས་ལོ་འཁོར་བཅུ་དགུ་ལོན་པར་བཀྲ་ཤིས་བདེ་ལེགས་ཞུ་རྟེན་དུ་ཕུལ།

             ཤིས་ཚིག

ཁྱེད་ནི་དགུང་གི་སྐར་རྒྱན་ལེན་པའི་སྐས་གདང་རེད།།
ཁྱེད་ནི་སྟོད་ཀྱི་རིག་གཞུང་འདྲེན་པའི་ལམ་ཆེན་རེད།། 
ཁྱེད་ནི་ཤེས་རིག་སྣོད་དུ་བརྫང་བྱའི་བང་མཛོད་རེད།།
ཁྱེད་ནི་སྐྱེས་ཆེན་དཔའ་བོས་བསྐྲུན་པའི་ཞིང་ཁམས་རེད།།
མ་ཡུམ་སློབ་གྲྭའི་འཁྲུངས་སྐར་ལ་སློབ་བུ་བསོད་ནམས་དཔལ་གྱིས་གུས་ཕུལ།
                         ༢༠༡༣ ༡༢ ༡༥ཉིན།

              ཤིས་ཚིག

གངས་རིའི་གཟི་འོད་གླིང་འདིར་འཕྲོས་པའི་ལོ་འཁོར་བཅུ་དགུ།  །
རྔུལ་ཆུའི་ཐིགས་པ་རེ་རེར་བཞུར་བའི་ལོ་འཁོར་བཅུ་དགུ།  །
མེས་པོའི་སྲོལ་རྒྱུན་དམ་དུ་བཟུང་བའི་ལོ་འཁོར་བཅུ་དགུ།  །
ལོ་འཁོར་བཅུ་དགུའི་རྟེན་འབྲེལ་འཛོམས་པ་སྐྱིད་པའི་བཀྲ་ཤིས།  །
གདོང་དམར་བས་གུས་ཕུལ།
 
     ཁྱེད་ཀྱི་འཁྲུངས་སྐར་ལ་རྟེན་འབྲེལ་ཞུ།
_____________________________
           __ཧི་མ་ལའི་ལྗང་མྱུག

རྒྱལ་ཀུན་མཁྱེན་རབ་གཟི་འོད་གཅིག་བསྡུས་སྐུ།།
ཟབ་གསལ་བརྩེ་བའི་འོད་ཞགས་མྱུར་བའི་གཾསུང་།།
རྨོངས་མུན་རྩད་ནས་གཞོམ་པའི་བདེ་སྟོང་ཐུཾགས།།
འཇམ་དཔལ་གཞོན་ནུས་དགེ་ལེགས་ཤིས་པ་ཾསྩོལ།།

འཇིགས་མེད་གདོང་ལྔའི་རིག་པའི་རྣམ་དཔྱོད་ལས།།
རྨད་བྱུང་ཤེས་རིག་འདོད་དགུ་འཇོ་བའི་གླིང་།།
གངས་ཀྱི་རི་ཾཚོམཾ་བསྟར་བའི་དཀྱིལ་དབུསཾ་སུ།།
རབ་གནས་ཤིང་ཁྱིའི་དཔལ་ལ་ལེགས་པར་བལྟམས།།

ལོ་ཟླའི་ཉི་གཞོན་འཛུམ་པའི་སྟངས་སྟབས་ལས།།
ལུགས་ལྡོག་མི་ལོ་ཉི་ཤུར་ཉེ་བའི་དུས།།
ཁྱེད་ཉིད་ཁ་བའི་ལྗོངས་སུ་ཚེ་འབར་བཞིན།།     
ལམ་ལམ་འོད་དུ་འཚེར་བ་ཨེ་མ་ཧོ།།

འཆད་ལ་ངལ་མེད་ཉིན་བྱེད་འཛུམ་པའི་སྐུ།།
རྩོདཾ་ལ་ཟླ་མེད་ཅི་འདོད་སྩོལ་བའི་གསུང་ཾ།།
རྩོམཾ་ལ་ཐོགས་མེད་བཅུ་ཕྲག་རིག་པའིཾ་ཐུགས།།       
གཞཾན་ཕན་ལྷག་བསམ་གྲོལ་བའི་བཤེས་ཾརྣམས་རྒྱལ།།

གཟུར་བོའི་གནས་ཡི་བློ་གྲོས་དཔལ་འབར་ཞིང་།།
གཙོ་མ་གསེར་གྱི་སྦྱང་བྱར་དོན་གཉེན་ཆེ།།
མ་བཅོས་རྒན་བཀུར་ཆུང་བྱམས་ཡིད་དུ་འཛུམ།།
སྣོད་ལྡན་རྐང་དྲུག་གཤོག་ཟུག་རྒྱས་གྱུར་ཅིག།

ལྷ་གཅིག་ཕྱག་ན་པདྨོའི་གཟི་བྱིན་ལས།།
དོན་གཉིཾས་ཡོངས་རྫོགས་བཤེས་གཉེན་མཆོག་རྣམས་དང་།།
ཆོལ་གསུཾམ་སློབ་མའི་བརྩེ་བ་མཚོ་ལས་ཟབ།།
ཕྱོགས་བཞིཾར་མཛད་བཟང་འབྲུག་སྟོང་ལྡིར་བར་ཤོག།
          ཾ
ནང་སེམས་སྲོལ་རྒྱུན་རིག་པའི་སྲོག་ཤིང་བརྟན།།
ཕྱི་ལུས་དེང་རབས་ཤེས་བྱའི་དོ་ཤལ་མཛེས།།
ཤེས་རིག་འདོད་དགུ་འཇོ་བའི་ནོར་བུའི་གླིང་།།
གཾངས་ཾདཀར་ལྷུན་པོ་བཞིན་དུ་བཾརྟནཾ་པརཾ་སྨོན།།

བཀྲ་ཤིས་ཉིན་གཞོན་དགུང་ནས་འཆར་བ་དང་།།
རྟེན་འབྲེལ་ཟླ་བ་མཁའ་རུ་འཛུམ་པར་ཤོག།
ཕུན་ཚོགས་རྒྱུ་སྐར་མཐའ་རུ་རབ་བཀྲ་ཞིང་།།
དགེ་ལེགས་ཅི་བསམ་ལྷུན་གྱིས་འགྲུབ་པར་ཤོག།

       ༢༠༡༣ ༡༢  ༡༥ཉིན་མ་ཡུམ་གངས་ལྗོངས་ཤེས་རིག་ནོར་བུའི་སློབ་གླིང་དབུ་བརྙེས་ནས་བགྲང་བྱ་བཅུ་དགུ་ལོན་པའི་བཀྲ་ཤིས་འཁྲུངས་སྐར་ལ་ཞོགས་པར་བྲིས་པ་དགེའོ།།

དུས་རབས་ཤིག་གི་སྒྲོན་མེ་འོད་ཆེན་དེ།།
གཟིམ་མེད་གངས་ཀྱི་སྤོ་ན་འགྱིང་དེ་ལགས།།

གཤིས་ཀྱི་འདབ་མ་མཛེས་པའི་གྲྭ་ཞིག་ན།།
ལུང་རིགས་ངད་པ་འཐུལ་བའི་གླིང་ཞིག་ན།།
མི་ལོ་བཅུ་དགུའི་ཞབས་རྗེས་གཟི་བྱིན་ཅན།།
བསིལ་ལྡན་ཁ་བ་ཚང་གི་མིག་ལ་ཡག།

རུས་པའི་གཏིང་ལ་རིགས་ཀྱི་སྣུམ་ཁ་མཐུག།
དགོངས་པའི་དབྱིངས་སུ་ཆོས་ཀྱི་བྱམས་ཤ་ཆགས།།

ཆེར་སྙིགས་དུས་ཀྱི་མཐའ་ན་འཚེར་བ་ཡི།།

མགོན་ཁྱོད་སྡོམ་བཙུན་འདུས་པའི་གཙུག་རྒྱན་ལགས།།

ཁ་བའི་རྒུད་པ་གསོ་ལ་མི་འཇིགས་པའི།།
སྤོབས་པ་རབ་མཐོ་གངས་སེང་དཀར་མོའི་བུ།།
ཐུགས་བཞེད་འགྲུབ་ཅིང་འཕྲིན་ལས་ཉི་མའི་འོད།།
བསིལ་ལྡན་རི་བོའི་ལྗོངས་སུ་ཁྱབ་གྱུར་ཅིག།

དེ་རིང་ཁྱེད་ཀྱི་བཀྲ་ཤིས་དུས་བཟང་སྟེ།།
ཁྱེད་ཀྱི་རྔུལ་ནག་ཐིགས་པ་ཁྲོམ་ཁྲོམ་གྱིས།།
བསྐྲུན་ཅིང་འཚར་བའི་མ་ཡུམ་སློབ་གླིང་གང་།།
ན་ཚོད་བཅུ་དགུར་སོན་པའི་ཉི་མ་ཡིན།།

ཁྱེད་ཀྱིས་བསྐྱངས་ཤིང་ཁྱེད་ཀྱི་བཀའ་དྲིན་གྱིས།།
མི་རུ་སྐྱེས་པའི་རིན་ཐང་རྙེད་པ་ཡི།།
ཁྲེལ་དང་ཕྱི་ཐག་འབར་བའི་གངས་ཕྲུག་ཁྱུ།།
མདོ་དབུས་ཁམས་ན་རིགས་ཀྱི་ཆེད་དུ་འདུར།།

ཁྱེད་ཀྱི་དུས་གསུམ་ཁ་བའི་དར་རྒུད་དེ།།
ཁྱེད་ཀྱི་ལོ་རྒྱུས་བོད་ཀྱི་གཟི་བརྗིད་ཡིན།།
ཁྱེད་ལ་དུང་བ་རིགས་ལ་དུང་བ་སྟེ།།
ཁྱེད་ལ་གཅེས་པ་རང་ལ་གཅེས་པ་ཡིན།།

ཨ་ཕའི་སེར་ག་ཁྱེད་ཀྱི་འོད་ཀྱིས་གསོས།།
ཨ་མའི་མགོ་བོ་ཁྱེད་ཀྱིས་གནམ་ལ་བཏེགས།།
ཁྱེད་རང་བོད་པ་ཚང་གི་ཀ་བ་སྟེ།།
ཁྱེད་ཉིད་ཡོད་པ་བོད་ཀྱི་རེ་བ་ཡིན།།

         ~  ཅེས་པ་འདིའང་མ་ཡུམ་ཤེས་རིག་གླིང་གི་སྐབས་བཅོ་ལྔ་བའི་མཐར་ཕྱིན་སློབ་བུ་གླིང་རུ་བསམ་འགྲུབ་ཚེ་རིང་ངམ། གླིང་བུའི་སྙེ་མར་འབོད་པ་དེས་ཕ་ཡུལ་ནང་ཆེན་ནས་ཁྱེད་ཀྱི་འཁྲུངས་སྐར་བཅུ་དགུ་བར་བཏེགས་པའོ།།

         ཤིས་སྨོན།

གཞོམ་མེད་གངས་སེང་གངས་རི་མཛེས་པའི་ཏོག།
ལྷད་མེད་ལྷག་བསམ་མཐུ་ལས་ལེགས་འཁྲུངས་ཏེ།།
བསུབ་མེད་མཛད་རྗེས་འཛམ་པུ་གླིང་ལ་བཀོད།།
འཇིགས་མེད་བླ་མའི་ལས་དོན་ངོ་མཚར་ལྡན།།

གངས་ལྗོངས་སྨག་གིས་ཟ་བའི་མཚན་དཀྱིལ་དུ།།
རིག་པའི་ཉི་ཟླ་བསྐོར་བ་དཔའ་བོའི་གདེངས།།
བརྒྱ་སྟོང་ཁྲི་འབུམ་ཀུན་ཏུ་སྤྲུལ་བའི་གནས།།
མ་ཡུམ་སློབ་གླིང་དུས་ཀུན་རྒྱལ་གྱུར་ཅིག།

---མ་ཡུམ་གངས་ལྗོངས་ཤེས་རིག་ནོར་བུའི་སློབ་གླིང་སྒེར་གྱིས་བཙུགས་ནས་ལོ་འཁོར་བཅུ་དགུ་ལོན་པའི་འཁྲུངས་སྟོན་ཤིས་སྨོན་དུ།  དེ་གའི་སློབ་བུ་གང་ཇི་སྙེད་ཅིག་ཡོད་པ་ཀུན་གྱི་ཐ་མར་གྱུར་བ་བོན་བརྒྱ་སྟག་ལ་འབུམ་གྱིས་སྒོ་གསུམ་གུས་པ་ཆེན་པོས་ཕུལ་བ་དགེའོ།།

མི་རིགས་སློབ་གསོ་དར་ཞིང་རྒྱས་པར་ཤོག །

སློབ་གྲོགས་རྣམས་ཀྱིས་བསམ་དོན་འགྲུབ་པར་ཤོག །

གངས་ལྗོངས་ཤེས་རིག་དར་ཞིང་རྒྱས་པར་ཤོག །
                        ཅེས་སེམས་པ་དཀར་པོ་ནས་གུས་ཕུལ།

    ཤེས་རིག་ནོར་བུའི་འཁྲུངས་སྐར་དང་འགྲོགས་ནས། གངས་ལྗོངས་ཁ་བའི་ལྗོངས་ལ་ཤེས་རིག་གི་འོད་སྣང་སྦྱིན་མཁན་རྒན་འཇིགས་མེད་རྒྱལ་མཚན་མཆོག་གཙོ་བྱས་རི་ཁ་བ་ཅན་གྱི་དགེ་བའི་བཤེས་གཉེན་རྣམས་ཀྱི་སྐུ་ལུས་རི་རྒྱལ་བཞིན་བརྟན་ཅིང་མཛད་འཕྲིན་ཕྱོགས་མཐར་རྒྱས་པ་དང་།  ཤེས་རིག་ནོར་གླིང་གི་ཤེས་བྱས་བདུད་རྩིའི་ཟེགས་མ་རེ་རེ་ཇོ་མོ་གླིང་མའི་དབུ་རྩེ་ལ་འཐོར་ཏེ་གངས་ཀྱི་མི་རྒྱུད་གཙོ་བྱས་བདུད་རྩིའི་ཆབ་རྒྱུན་གོ་ལ་ཟླུམ་པོའི་ཤར་ནུབ་ཀུན་ཏུ་ཁྱབ་པའི་སྨོན་འདུན་ཁྲི་ཕྲག་སྙིང་ནས་ཞུ།   

       ཞེས་དམེ་ཤུལ་བ་འཕྲིན་ལས་རྒྱ་མཚོས་༢༠༡༣་ ༡༢་ ༡༥་འཁྲུངས་སྐར་ཉིན་ལ་གུས་པས་འཕུལ། 

        སྨོན་ཚིག
འཇིགས་མེད་སྤོབས་པའི་རྒྱལ་མཚན་གངས་རྩེ་རུ་བསྒྲེངས་ཏེ།།
ཤེས་རིག་སྣ་མང་ནོར་བུའི་གཏེར་མཛོད་ཀྱི་གླིང་ག།

གདོང་དམར་བོད་པའི་སྲོག་གི་སྣོན་མ་རུ་ཕྱེས་ནས།།
འཁྲུངས་སྐར་བཅུ་དགུ་པ་འདི་རྟེན་འབྲེལ་གྱིས་བསུ་འོ།།

              -------རྨ་དུག་སྦྲང་།

              ཤིས་ཚིག
                 ___གངས་ལྗོངས་ཤེས་རིག་ནོར་བུའི་སློབ་གླིང་བཙུགས་ནས་ལོ་འཁོར་བཅུ་དགུ་ལོན་པའི་རྟེན་འབྲེལ་མཚོན་བྱེད་དུ།

རྣམ་དཔྱོད་སྟོང་གི་དཔལ་ལས་འཁྲུངས་ཤིང་གོ་ལའི་ཁྱོན་ན་མཚན་སྙན་འབར།།
རྨོངས་མུན་མཐའ་རུ་སྟོབས་ཀྱིས་འགྱིངས་ཏེ་ས་ཆེན་ཁམས་སུ་འོད་སྣང་བསུས།།
ལྷག་བསམ་འོ་མའི་བཞུར་རྒྱུན་གཙང་མས་བུ་སློབ་གྲངས་མེད་ལམ་སྟོན་མཛད།།
འགྱུར་མེད་རྡོ་རྗེ་གཤིས་སུ་གྲུབ་པས་སྙིང་སྟོབས་སྲོག་གི་ཀ་ཆེན་བཙུགས།།

བསྐལ་བ་བརྒྱ་ཡི་སྲིད་མཐའི་བར་དུ་མི་འཇིག་ཚེ་ལ་ཡུན་བརྟན་ཤོག།
མཐུན་སྒྲིལ་གསེར་གྱི་རང་མདངས་མ་ཉམས་རེ་བའི་རླུང་རྟ་ཡུན་དར་ཤོག།
བརྩོན་འགྲུས་རྟ་ཕོའི་བང་རྩལ་མ་འགྱུར་ཤེས་བྱ་རྒྱ་མཚོ་ཡུན་རྒྱས་ཤོག།
དཀའ་སྡུག་ཁྲི་ཡི་རྔུལ་ཁྲག་ཀློང་ནས་མ་ལུས་རྒྱལ་ཁ་ཡུན་ཐོབ་ཤོག།

        ༢༠༡༣•༡༢•༡༥ཉིན་ལམ་སྐྱ་བོས་ཕུལ་བ་དགེ་ལེགས་འཕེལ།

     ཤེས་རིག་ནོར་བུའི་གླིང་གི་འཁྲུངས་སྐར་ལ་འབུལ།

ཤེ༵ས་བྱའི་གནས་ལ་རབ་ཏུ་འཇུག་པའི་དགའ་ཚལ་དེ།།
རི༵ག་པའི་གནས་ལྔ་དཔག་བསམ་ལྗོན་ཤིང་ཡབ་འདབ་རྒྱས།།
ནོ༵ར་བུ་བཞིན་དུ་བསམ་པའི་དོན་ཀུན་གེགས་མེད་ཅིང་།།
གླིང༵་བཞིའི་ཕུན་ཚོགས་དཔལ་ལ་རོལ་བའི་ཤིས་པ་རྩོལ།།

ཤེས་ལ་ཤེས་པའི་གནས་ལྔ་རིག་པའི་དགའ་ཚལ་ན།།
མཚན་ཉིན་རིག་པའི་སྙན་པ་དཀར་པོ་ཡུལ་འདིར་ཁྱབ།།
དུས་རབས་ཉེར་གཅིག་མི་བུ་དག་གིས་ཡིད་སྨོན་བྱེད།།
ཁྱེད་ཀྱི་མཛད་འཕྲིན་རྒྱལ་མཚན་བཞིན་དུ་འཛམ་གླིང་ཁྱབ།།

མི་རིགས་འདི་ཡི་སྐད་ཡིག་ཉམ་པར་སླར་ཡང་གསོ།།
སྒྲ་དང་ཚད་མ་རིག་པས་དུས་འདིར་དཔལ་ཡོན་རྩལ།།
བཟོ་དང་གསོ་བ་རིག་པས་ཡུལ་འདིར་དགེ་མཚན་འབར།།
ཁྱེད་ཀྱི་སྙན་པ་གངས་རིའི་ལྗོངས་ཀྱི་གཟི་བརྗིད་ལགས།།

༢༠༡༣-༡༢-༡༥ཉིན་རྔ་སྙུག་རྩེ་ནས།

ཁྱོད་ཚེ་རིང་ཤོག

ལོ་ན་བཅུ་དགུར་སོན་པའི་ཁྱོད་ཚེ་རིང་ཤོག
རེད་དེ།  བགྲང་བྱ་བཅུ་དགུ་ནི་རིང་བོ་ཞིག་མིན་ཀྱང་།
ངས་ཁྱེད་ཀྱི་འཁྲུངས་སྐར་ལ་རྟེན་འབྲེལ་ཞུ།

གངས་ཀྱི་པང་ནས་བལྟས་ན།
ཁྱོད་མེས་པོའི་གླུ་གཞས་རེད།
གོ་ལའི་ལྒང་ནས་བལྟས་ན།
ཁྱོད་ཕ་ཡུལ་གྱི་ནམ་མཁའ་རེད།

བསྐལ་བ་ནས་བསྐལ་བའི་བར་དུ་ཁྱོད་ཁྲི་ལོར་ཤོག
ལོ་ན་བཅུ་དགུར་སོན་པའི་ཁྱོད་ཚེ་རིང་ཤོག
                 2013.12.15           _____ཐ་གུ

                           ཤིས་ཚིག
 སྔོན་བྱོན་མེས་པོའི་བཀའ་དྲིན་སྐྱོང་བའི་འགྲན་མེད་ཤེས་བྱའི་གླིང་ག་སྟེ།།
རིག་པའི་ནོར་མཆོག་ཅི་དགར་སྩོལ་བའི་སློབ་དཔོན་རྣམ་པའི་མཛད་འཕྲིན་དང་།།
གྲངས་མེད་སློབ་བུའི་དགའ་སྟོན་རོལ་བས་མ་ཡུམ་སློབ་གྲྭའི་འཁྲུངས་སྐར་དེ།།
འཛམ་གླིང་གོ་ལའི་རྩེ་ནས་སླེབས་པའི་དགའ་སྤྲོ་སྟོང་གིས་བསུ་མ་བྱེད།།

 ཅེས་མ་ཡུམ་སློབ་གྲྭའི་འཁྲུངས་སྐར་ལ་སྐབས་བཅུ་བའི་མཐར་ཕྱིན་སློབ་མ་གཡོན་གཞུའི་རིག་འཛིན་གྱིས་གངས་རིའི་འདབས་སུ་གུས་ཕུལ།
               ༢༠༡༣/༡༢/༡༥

      ཤིས་ཚིག 
 
 

འཇི༵གས་མེ༵ད་སྙིང་སྟོབས་སྲོག་གི་ཀས།།
སློབ་གསོའི་རྒྱ༵ལ་མཚ༵ན་མཁའ་རུ་བསྒྲེངས།།
ལྷག་བསམ་མེ་ཟླུམ་མཆེད་པ་ཡིས།།
གངས་རིའི་ཟོམ་གྱི་མུན་པ་དཀྲོགས།།

གནའ་དེང་ཤེས་རིག་བདུད་རྩིའི་བཅུད།།
བགྲང་ཡས་བུ་སློབ་དཔལ་དུ་ཤར།།
འོད་ཀྱིས་ཁེངས་པའི་མ་ཡུམ་གླིང་།།
ས་ཆེན་རྒྱན་དུ་བརྟན་པར་ཤོག།

མ་ཡུམ་གངས་ལྗོངས་ཤེས་རིག་ནོར་བུའི་སློབ་གླིང་དབུ་བརྙེས་ནས་ལོ་འཁོར་བཅུ་དགུ་འཁོར་བར་དགའ་སྤྲོའི་ངང་རྟེན་འབྲེལ་ཞུ་བ་དང་ཆབས་གཅིག་ཏུ་སློབ་དཔོན་རྣམ་པའི་སྐུ་ཚེ་བསྐལ་བརྒྱར་བརྟན་ཞིང་ཐུགས་བཞེད་ལྷུན་གྱིས་འགྲུབ་པ་དང་། སློབ་གྲོགས་རྣམས་ཀྱི་སློབ་སྦྱོང་གི་འབྲས་བུ་གཡུར་དུ་སྨིན་ཞིང་བསམ་དོན་འགྲུབ་པའི་བཀྲ་ཤིས་སྨོན་འདུན་ཞུ་ཞུ།
   ཞེས་སྐབས་བཅུ་བཞི་བའི་མཐར་ཕྱིན་སློབ་བུ་འཇིགས་མེད་རྒྱ་མཚོས་རྒྱ་ནག་རྒྱལ་ས་པེ་ཅིན་ནས།

                                         ༼  1
       དེ་རིང་ནི་མ་ཡུམ་གངས་ལྗོངས་འཇིགས་མེད་ཤེས་རིག་ནོར་བུའི་སློབ་གླིང་གླིང་འདིར་འཁྲུངས་ནས་མི་ལོ་བཅུ་དགུ་ལོན་པའི་དུས་དྲན་ཉིན་མོ་ཡིན་པས་ངས་འདི་ནས་མ་ཡུམ་ལགས་ལ་བཀྲ་ཤིས་རྟེན་འབྲེལ་ཞུ་འོས་ཏེ།
ང་ནི་མ་ཡུམ་སློབ་གླིང་གི་པང་ཁུག་ནས་ཡར་འགྲེང་ཐུབ་སོང་ལ།  མ་ཡུམ་ལགས་ལ་གཟི་འོད་ཇི་ཙམ་འཕྲོས་པ་དེ་སྲིད་དུ་ང་ལའང་གཟི་འོད་འཕྲོ་མྱོང་བས་སོ།།
                      ༼ 2
        ད་དུང་སྐད་ཆ་གཞན་ཞིག་དམིགས་ཀྱིས་ཞུ་རྒྱུ་ཡོད་པ་ནི་ང་ལ་བརྩེ་བའི་སྐྱོང་མྱོང་བའི་སློབ་དཔོན་རྣམ་པའི་སྐུ་ཚེ་བརྟན་ཞིང་བཞེད་དོན་མཐའ་དག་ལྷུན་འགྲུབ་ཡོང་བའི་སྨོན་འདུན་ལན་བརྒྱར་ཞུ་འོས་ཏེ།
ཁོ་ཚོ་ནི་ང་ཡི་བྱིས་དུས་ཀྱི་བླ་དང་སྲོག་གི་བདག་པོ་ཁོ་ན་ཡིན་པས་སོ།།
                       ༼ 3
      དེ་མིན་ང་དང་མཉམ་པོར་ཕ་མ་དྲན་རོགས་དང་།   རྩམ་པ་ཟ་རོགས། ཀ་ཁ་སྐྱོར་རོགས་ཀྱི་སློབ་གྲོགས་དག་གི་སྙིང་སྟོབས་ལས་འབུས་པའི་ཐོས་བརྩོན་ལ་ལྷོད་པ་མེད་པའི་བཀྲ་ཤིས་ཁ་གཡང་སྒྲོག་འོས་ཏེ།   ཁོ་ཚོ་ནི་ང་ཡི་དུས་གསུམ་གྱི་ལས་གྲོགས་ཡག་ཤོས་ཡིན་པས་སོ།།
                      ༼ 4
     ལྷག་དོན་ཕྱོགས་སོ་སོ་ནས་དགའ་བཞིན་སྤྲོ་བཞིན་ཕེབས་པའི་རྒྱ་ཆེ་བའི་ལྟད་མོ་བ་ལྷན་རྒྱས་ལ་ཆེད་དུ་ཁ་དྲོ་ཞུ་འོས་ཏེ།  ཁྱེད་ཅག་གི་བླ་མེད་ཀྱི་རྒྱབ་སྐྱོར་ནི་ངེད་ཚང་ལ་ཧ་ཅང་མཁོ་སྟེ།   ངེད་ཚང་ནི་ཁྱེད་ཅག་ཡོད་པས་ད་གཟོད་འཇིག་རྟེན་འདིར་འཚོ་ཐུབ་སོང་ངོ་།།
                        ༼ 5
     གཞན་ཡང་འདི་ནས་ཆེད་དུ་རང་ཉིད་ལའང་འདི་ལྟར་ལབ་འོས་ཏེ།  ཝེ་་་ར་མདའ་བ་ལགས་ཁྱེད་ཉིད་ཧ་ལས་པའི་བུ་རྒོད་ཅིག་རེད་དེ།
ཁྱེད་རང་ཉིད་ཀྱིས་ལམ་ཁ་འདི་གདམས་པས་ད་གཟོད་ཁྱེད་ཀྱིས་མ་ཡུམ་སློབ་གྲྭའི་འཁྲུངས་སྟོན་ངོ་ཤེས་སོང་ལ།
རང་ཉིད་ཀྱང་ངོ་ཤེས་པས་སོ།།
       2013/12/15

          སྨོན་ཚིག

ལྔ་རིག་འོ་མའི་རྒྱ་མཚོ་འཁྱིལ་བའི་དབུས། །

 ལུང་རིག་རླབས་དཀར་གཡོ་བའི་རྩེ་དགའ་ཡིས། །

མ་ཡུལ་གངས་རིའི་དབུ་འཕང་བསྟོད་པའི་གཉེན། །

ཤེས་རིག་ནོར་གླིང་གངས་རིའི་གཟི་བརྗིད་ཡིན། །

འཁྲུངས་སྐར་སྐོར་བྲོ་ཤེས་རིག་གླིང་ནས་སྤུར། །

བསྟོད་ཚིག་མེ་ཏོག་རྒྱང་རིང་ཡུལ་ནས་འཐོར། །

ཡང་ནས་ཡང་དུ་དར་བའི་སྨོན་ཚིག་ཅིག །

སླར་ཡང་ཆེ་དྲུག་རི་བོའི་ཡུལ་ནས་སྤེལ། །

                             ཧི་མ་ལའི་གསེར་སྦྲང་།

གངས་ལྗོངས་ཤེས་རིག་ནོར་བུའི་སློབ་གླིང་བཙུགས་ནས་ལོ་འཁོར་བཅུ་དགུ་ལོན་པའི་དགའ་སྟོན་རྟེན་འབྲེལ་དུ་སྐབས་བཅུ་བའི་མཐར་ཕྱིན་སློབ་མ་རྩེ་ཤེས་རབ་ཀྱིས་ཨ་མདོ་རེབ་གོང་ནས།

མ་ཡུམ་དང་ཡབ་ཆེན།  ད་དུང་ལོ་ངོ་བཅུ་དགུ།

ས༵་ཆེན་སྟོབས་ཀྱིས་འདེགས་པའི་ཤེས་རབ་ཀྱི་དཔུང་ཤུགས།།

 ཤ༵་རུས་གཙན་པོ་བོད་ཀྱི་གདུང་རྒྱུད་ལ་འཁྲུངས་ཏེ།།
 ལ༵་མོར་བོད་པ་གཙང་མའི་ཤེས་རིག་གི་གཟི་འོད།། 
ར༵་ལྟར་གོ་ལའི་གཙུག་ཏུ་སུ་ཞིག་གིས་བཀོད་སོང་།། 

ང༵་ཚོ་བཙན་པོ་བོད་ཀྱི་ཁ་རྗེ་དང་ཀླུང་རྟ།།
ག༵་དུས་ཤིག་ནས་གཉོམ་པའི་ཐ་མ་རུ་གྱུར་ཚེ།། 
ཁ༵་བཤད་དོན་དུ་གནས་པའི་འཇི༵གས་མེ༵ད་ཀྱི་སྤོབས་པས།། 

ཀ༵་མད་རིག་པའི་རྒྱ༵ལ་མཚ༵ན་སྤྲིན་དཀར་ལ་མཉམ་སོང་།།

          ——སློབ་གླིང་འདིའི་སློབ་མཐའ་ཨ་སྲས་དུག་སེལ་གྱིས་མ་ཡུམ་སློབ་གླིང་གི་བཀའ་དྲིན་དྲན་བཞིན་སེམས་དོན་མཚོན་བྱེད་ཙམ་དུ་འཁྲུངས་སྐར་ལ་ཕུལ།

ཤིས་ཚིག

གངས་ལྗོངས་ཤེས་རིག་ནོར་བུའི་སློབ་གླིང་གི །

བགྲང་བྱ་བཅུ་དགུའི་འཁྲུངས་སྟོན་མཛད་སྒོ་ལ། །

སྦྲ་ནག་སྐད་ཡིག་ཞབས་ཞུ་ཚོགས་པ་ཡིས། །
བཀྲ་ཤིས་རྟེན་འབྲེལ་བསྐལ་བརྒྱའི་བར་དུ་ཞུ། ། 

 གཞན་ཕན་ལྷག་བསམ་ཐུགས་རྒྱུད་སྟོང་ལས་འཁྲུངས་པའི་ཤེས་རིག་ནོར་བུའི་གླིང་།།

གནའ་དེང་ཟུང་འབྲེལ་སློབ་གསོས་སྔར་མེད་དུས་རབས་གསར་བའི་སྟོང་ཆ་བསྐངས།།

བགྲང་བྱ་བཅུ་དགུའི་མཛད་རྗེས་གླུ་རུ་ལེན་པའི་བསྐལ་བཟང་དུས་ལེགས་འདིར།།

དྲི་མེད་ལྷ་དར་ཁ་བའི་འདབ་མར་བསྡོངས་ཏེ་བཀྲ་ཤིས་རྟེན་འབྲེལ་ཞུ།།

 ཞེས་གངས་ལྗོངས་སྦྲ་ནག་སྐད་ཡིག་ཞབས་ཞུ་ཚོགས་པའི་ཚོགས་མི་ཡོངས་ནས་སྐབས་བཅུ་དགུ་བའི་ཤེས་རིག་ནོར་བུའི་སློབ་གླིང་གི་འཁྲུངས་སྟོན་ལ་རྟེན་འབྲེལ་ཞུ་མཚོན་དུ།