ང་རྟ་ནག་བྱ་ནག་དོང་ལྡན།།
ཁོ་སྔ་དྲོ་དར་གི་དུས་ན།།
ཕ་བཟང་དཔོན་པོའི་བཅིབས་པ།།
སྐེ་རྩིད་ལྡོམ་གསུམ་རེ་འདོགས་ཀི།
དབྱར་ཟླ་གསུམ་སེར་ལ་ཕུད་ཐལ།།
དགུན་ཟླ་གསུམ་ཆོས་ཀྱིས་གསོས་ཐལ།།
ངའི་ཟ་རྒྱུ་གྲོ་དང་ནས་རེད།།
མགོ་འཇོག་རྒྱུ་དངུལ་དཀར་སྲབ་རེད།།
རྟ་འདོ་བ་གྱ་ཅུའི་ནང་ན།།
ངའི་སྐྱིད་ཀི་རྟ་ཞི་མེད་ཀི།
ཁོ་ཕྱི་དྲོ་གུད་ཀི་དུས་ན།།
སྡུག་མི་ངན་ལག་ལ་ལྷུང་ཐལ།།
ཁོའི་མགོ་ལ་ཐུར་སྲབ་བཞག་ཐལ།།
ཁོའི་མགོ་ལ་ཀོ་སྒ་བསྟད་ནི།།
ས་ཐང་ཆེན་བྷ་ཡུལ་ཐང་གི།
དབྱར་ཟླ་གསུམ་བུ་མོས་རྫོའུ་རྟ།།
དགུན་ཟླ་གསུམ་མཁོ་མེད་ལྡོམ་པོ།།
རྩྭ་ཁམ་གང་མེད་ས་ཞིག་ནས།།
ཉྭ་བཀུག་བཀུག་ས་ནག་ལྡག་ནི།།
ང་ལས་ངན་དུད་འགྲོའི་ལུས་ལངས།།
ཚིག་བཤད་འདོད་སྨྲ་མེད་ལྐུགས་པ།།
ངའི་ལས་སྡུག་རི་མ་ཕྲ་མོ།།
ངའི་ཡ་ཁོ་སེམས་ཆུང་དཀྱིལ་ནས།།
བསུབ་དང་ན་འཇིག་རྒྱུ་མེད་ཀི།
ངའི་ལས་དབང་ཁམ་རྩེ་འདྲ་བོ།།
ངས་ཚེ་འདིར་མ་མྱོང་ནི་མེད།།
གོམས་འཕྲེད་ལ་སྤོ་རྒྱུ་མེད་ཀི།
ཆུ་ཧུབ་གང་ཁ་ལ་མ་རེག།
ས་འགག་དོག་འགག་འཕྲང་ནང་ནས།།
བྱ་ལྟོགས་སྡུག་ཤར་བའི་ཁྱུ་ལ།།
ངའི་ལུས་སྐམ་རུས་པ་སྤར་གང་།།
གནང་སྦྱིན་པའི་ལས་ཤིག་བསྒྲུབ་རྒྱུ།།
འཕྲོ་ཡང་ཡང་རྟ་ལས་མི་ལེན།།
རིགས་ང་འདྲ་དག་ལ་མ་ཎི།།
ལམ་དཀར་པོའི་ཆོས་ལ་གསོལ་འདེབས།།
སྐྱིད་བར་དོར་མཇལ་གི་སྨོན་ལམ།།
<<བོད་ཀྱི་ངག་རྒྱུན་གཏམ་རྒྱུན་ཕྱོགས་བསྒྲིགས།>>ལས་བཤུས།
|