རྨ་ཁེར་ཉལ།
༡
ལུས་ངག་ཡིད་གསུམ་ཉལ་དྲག་པའི༎
ལྷུག་པོར་བཞད་པའི་མེ་ཏོག་དང་༎
གསོང་བོར་སྨྲ་བའི་གྲོགས་མཆོག་ལ༎
མཇལ་བའི་བསྐལ་བ་འཕྱི་བས་སྐྱོ༎
ཡིན་ཡང་དྲན་རིག་གསལ་ཙམ་དུས༎
ཚེ་སྔོན་ལས་ཀྱི་ཁ་ཆད་བསླེབས༎
མཛའ་དུངས་ཟབ་མོས་བཞད་སྒྲའི་ཁྲོད༎
ཅོལ་ཆུང་གཡམ་གྱི་རྒྱུག་ཚུལ་བསྟན༎
འདི་ནས་ཕྱིན་པའི་ནངས་ཀ་ནས༎
ཅི་བཤད་ཅི་ལས་གནད་ལ་རྩོན༎
དེ་དང་བརྒལ་བའི་སང་ཉིན་ན༎
མི་ཚེའི་ཡང་སྙིང་རྟོགས་པར་སྨོན༎
༢
དཀར་ནག་ལས་ཀྱི་གཡུལ་ས་ནས༎
འཇིག་རྟེན་ཁྲ་ཁྲའི་བདེན་པ་འཚོལ༎
ཨོཾ་སྒྲ་མཆེད་པའི་སོ་བར་ནས༎
ཕ་མའི་ཤ་ཚིལ་འཐོར་འདི་ཅི༎
༣
རང་རློམ་དབྱེན་ཀྱིས་མདའ་ཁ་འདི༎
གོང་ཆེན་ཤྭ་བོར་མི་སྐོར་བར༎
སེམས་ཚེགས་རྐང་ཚེགས་མྱང་མྱང་ནས༎
ན་ཀོང་སྦལ་བར་གཏད་དོན་ཅི༎
༤
དང་པོ་རང་ཉིད་འཚོལ་སྙིང་མཆིས།།
བར་ཏུ་གཞན་ཏེ་སྐྱོབས་སྣང་འཕེལ།།
མཐའ་མར་འཇིག་རྟེན་གཅིག་ཏུ་རྩོམ༎
འདི་ནི་བདག་གི་ལྟ་བ་འོ༎
༥
ཕྱི་ན་ཟིན་མེད་སྒྱུ་མའི་རོལ་གར་གཅིག །
ནང་ན་མགུ་མེད་རང་དོན་རྡོག་རྡོག་གཉིས། །
སྟེང་ན་མི་ཆེན་ཐམ་ཀའི་ལས་བགོས་གསུམ། །
འོག་ན་ཉམ་ཐག་འགྲོ་བས་མཁུན་སྒྲ་བཞི ། །
ཐམས་ཅད་བྱོལ་མེད་སེམས་ཀྱི་ཁུར་རོ་གཅིག །
ལྟོགས་སྐད་དབྱིངས་སུ་གཏོང་བས་རི་སྤྱང་གཅིག།
ཧམ་པའི་འཇིག་རྟེན་བཟུང་བས་མི་ལག་གཉིས། །
ཤ་ཁྲག་གཞན་ལ་མི་དབང་མི་ཤ་གསུམ། །
རང་ཤ་རང་ལ་མི་དབང་དུད་འགྲོ་བཞི། །
ཐམས་ཅད་འདྲ་མཉམ་མིན་པའི་འགྲོ་སྟངས་གཅིག །
|