ཇོ་ནང་ཁྲིད་བརྒྱ་གསུང་རྒྱུའི་གསལ་བརྡ།

ཇོ་ནང་ཁྲིད་བརྒྱ་གསུང་རྒྱུའི་གསལ་བརྡ།

           དཔལ་རྒྱལ་བ་ཇོ་ནང་བ་གཙོ་བོར་གྱུར་བའི་ཆོས་བརྒྱུད་ཁག་གི་མཁན་སྤྲུལ་དང་དགེ་བཤེས་གྲྭ་ཚང་ཡོངས་ལ་གུས་པས་ཞུ་གསོལ།

           བྱམས་བརྩེའི་བདག་ཉིད་དམ་པ།   ངེས་དོན་སྤྲུལ་བའི་སྐུ་རིན་པོ་ཆེ་༧འབྲོག་དགེ་སྤྲུལ་སྐུ་ངག་གི་དབང་ཕྱུག་མཆོག་གིས་བོད་མེ་སྤྲེལ་ལོའི་ཟླ་དགུ་བའི་ཚེས་བརྒྱད་དེ།   ཕྱི་ལོ་2016,11,7,ཉིན་ནས།   མགོ་ལོག་ཁང་སར་ཇོ་ནང་དགོན་ནས་ཇོ་ནང་ཁྲིད་བརྒྱ་གསུང་རྒྱུ་གཏན་ཁེལ་བྱུང་ཡོད་པས།    ཁྲིད་ལུང་ཤིན་ཏུ་དཀོན་པའི་ཟབ་ཆོས་འདི་ལ་དོན་གཉེར་བྱེད་འདོད་པ་རྣམས་ཀྱིས་དུས་ཚོད་དམ་འཛིན་བྱེད་པར་ཞུ།

           ཇོ་ནང་ཁྲིད་བརྒྱ་ཞེས་པ་དེའི་སྐོར་འགྲེལ་བཤད་མདོར་བསྡུས།  

           <<ཇོ་ནང་ཁྲིད་བརྒྱ>>ཟེར་བ་ནི།  ཇོ་ནང་རྗེ་བཙུན་ཀུན་དགའ་གྲོལ་མཆོག་གིས་མཛད་ཅིང་།  མཚན་རྒྱས་པར<<ཟབ་ཁྲིད་བརྒྱ་དང་བརྒྱད་ཀྱི་ཡི་གེ>>ཟེར།  དེ་ལ་གཙོ་བོ་མདོ་སྔགས་གཉིས་ཀྱི་གནད་གསང་མན་ངག་ཟབ་མོའི་བཅུད་ཀུན་ལེགས་པར་བསྡུས་ཏེ།  ཁྲིད་ཡིག་བརྒྱ་དང་བརྒྱད་དུ་གཏན་ལ་ཕབ་ཡོད་པས།  དོན་ལ་བཀའ་བསྡུ་གནང་བ་རེད་ཅེས་བཤད་ན་ཡང་མི་ཆོག་པ་མེད།  དེ་ལ་ཁྲིད་བརྒྱའི་བརྒྱུད་འདེབས་བརྗོད་བདེ་བརྒྱུད་པའི་མཚན་སྡོམ།  ཟབ་ཁྲིད་བརྒྱ་དང་བརྒྱད་ཀྱི་ཁུངས་གླེང་བའི་ཞབས་རྟེན་ཚིགས་སུ་བཅད་པ།  ཁྲིད་བརྒྱའི་སྤྱི་ཆིངས་རྣམ་པར་སྤེལ་བ་ངོ་མཚར་ཆོས་ཀྱི་སྒོ་མང་།  ཁྲིད་བརྒྱའི་བརྒྱུད་པའི་ལོ་རྒྱུས།  ཁྲིད་བརྒྱའི་སྔོན་འགྲོ་ཐུན་མོང་བ།  ཁྲིད་བརྒྱའི་སྔོན་འགྲོ་ཐུན་མོང་མ་ཡིན་པ།  ཟབ་ཁྲིད་བརྒྱ་དང་བརྒྱད་ཀྱི་ཡི་གེ  ཁྲིད་བརྒྱའི་ས་འགྲེལ་ཡ་མཚན་འཕྲུལ་གྱི་ལྡེ་མིག  ཁྲིད་བརྒྱའི་མཚན་ཐོ་བཅས་ཆོས་ཚན་དགུ་དང་།  ཕྱིས་སུ་རྗེ་བཙུན་ཏཱ་ར་ནཱ་ཐས་མཛད་པའི་ཁྲིད་བརྒྱའི་བརྒྱུད་པའི་ལོ་རྒྱུས་ཁ་སྐོང་བཅས་ཆོས་ཚན་བཅུ་བཞུགས་ཤིང་།  རྩ་བའི་ཟབ་ཁྲིད་བརྒྱ་དང་བརྒྱད་ཀྱི་ཡི་གེར་ཁྲིད་ཡིག་བརྒྱད་དང་བརྒྱད་ཡོད་པས་ཇོ་ནང་ཁྲིད་བརྒྱ་ཞེས་གྲགས་པ་རེད།  རྗེ་བཙུན་ཀུན་དགའ་གྲོལ་མཆོག་གི་ཕྱག་བཞེས་སུ།  ཐོག་མར་ཀྱེ་རྡོ་རྗེའི་དཀྱིལ་འཁོར་དུ་སྨིན་བྱེད་ཀྱི་དབང་བསྐུར་ནས།  བཀའ་སྲོལ་མཆོག་གི་ཁྲིད་ཚུལ་དང་།  དམར་ཁྲིད་དམ་ཞིབ་ཁྲིད།  ཐུན་མིན་རྟོགས་པ་མཆོག་གི་ཁྲིད་ཚུལ་དེ་གསུམ་གྱི་སྒོ་ནས་ཁྲིད་སྲོལ་ཡོད།  དེའི་དང་པོ་བཀའ་སྲོལ་མཆོག་གི་ཁྲིད་ཚུལ་ནི།  བཀླག་ལུང་ངམ་ལུང་རྒྱུན་ཙམ་ཡིན་ལ།  གཉིས་པ་དམར་ཁྲིད་ནི་ཁྲིད་ཚུལ་རྒྱས་པ་ཡིན་མོད།  བཀླག་ལུང་བཞིན་བྱས་ཀྱང་ཁྲིད་ཀྱི་གོ་ཆོད་པར་གསུང་སྲོལ་ཡོད་པས་བྱིན་རླབས་དོན་བརྒྱུད་དུ་གྲགས།  གསུམ་པ་ཐུན་མིན་རྟོགས་པ་མཆོག་གི་ཁྲིད་ཚུལ་ནི།  སྔོན་འགྲོའི་ཁྲིད་སོང་རྗེས།  དངོས་གཞིར་མདོར་བསྟན་པ།  རྒྱས་པར་བཤད་པ།  དོན་བསྡུ་བ་སྟེ་ས་བཅད་གསུམ་གྱི་སྒོ་ནས་འཆད་སྲོལ་ཡོད།  ཕྱིས་སུ་ཀ༔ཐོག་རིག་འཛིན་ཆེན་པོའི་སྐུ་དུས་སུ་ཇོ་ནང་ཁྲིད་བརྒྱའི་པོད་དབང་བསྐུར་བའི་ཕྱག་སྲོལ་ཞིག་བྱུང་ཡོད་ལ།  དེའི་ཆོ་ག་ས་སྐྱ་བ་བློ་གསལ་བསྟན་སྐྱོང་གིས་མཛད་པ<<ཁྲིད་བརྒྱའི་པོད་དབང་བྱེད་ཚུལ་བླ་མའི་ཞལ་ཤེས་ཡི་གེར་བཀོད་པ་བྱིན་རླབས་ཀྱི་ཟ་མ་ཏོག>>ཅེས་བྱ་བ་ཞིག་བཞུགས། ཁྲིད་ཚུལ་གསུམ་གྱི་དང་པོའི་བརྒྱུད་རིམ་ནི།  རྗེ་བཙུན་ཀུན་དགའ་གྲོལ་མཆོག  མཁན་ཆེན་ལུང་རིགས་རྒྱ་མཚོ།  རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐ་ནས་རིམ་བཞིན་འཇམ་མགོན་ཀོང་སྤྲུལ་ཡོན་ཏན་རྒྱ་མཚོ།  དེ་ནས་ཇོ་ནང་འཛམ་ཐང་གི་ཕྱོགས་སུ་བརྒྱུད།

           གཉིས་པའི་བརྒྱུད་རིམ་ནི།  རྗེ་བཙུན་ཀུན་དགའ་གྲོལ་མཆོག  ལུང་རིགས་རྒྱ་མཚོ།  ལྷ་དབང་གྲགས་པ།  རྗེ་བཙུན་ཏཱ་ར་ནཱ་ཐ།  རྗེ་བཙུན་མ་འཕྲིན་ལས་དབང་མོ་ནས་རིམ་བཞིན་ཀུན་བཟང་དབང་བོ།  རིག་འཛིན་ཚེ་དབང་ནོར་བུ།  གོང་བླ་ཀུན་དགའ་རྣམ་རྒྱལ་ནས་འཛམ་ཐང་གི་ཕྱོགས་སུ་བརྒྱུད་ཅིང་།  ཡང་ཀུན་བཟང་དབང་བོ་ནས་ལྕགས་ཟམ་པ་བློ་བཟང་དཔལ་གྲུབ།  ལྕགས་ཐང་བ་བཀྲ་ཤིས་འབྱུང་གནས།  འཇམ་དབྱངས་བཞད་པ་འཇིགས་མེད་དབང་བོ་སོགས་རི་བོ་དགེ་ལུགས་པའི་ཕྱོགས་སུ་བརྒྱུད།

གསུམ་པའི་བརྒྱུད་རིམ་ནི།  རྗེ་བཙུན་ཀུན་དགའ་གྲོལ་མཆོག  ལྷ་དབང་གྲགས་པ།  རྗེ་བཙུན་ཏཱ་ར་ནཱ་ཐ།  རྗེ་བཙུན་མ་འཕྲིན་ལས་དབང་མོ་ནས་རིམ་གྱིས་ཇོ་ནང་འཛམ་ཐང་གི་ཕྱོགས་སུ་བརྒྱུད་ཅིང་།  ཡང་སྤོ་ར་བ་བློ་བཟང་མཐུ་སྟོབས་ནས་དགེ་ལུགས་པའི་ཕྱོགས་སུ་བརྒྱུད་ཚུལ་ཞིག་ཀྱང་ཡོད།

           དེ་ལྟ་བུའི་ཇོ་ནང་ཁྲིད་བརྒྱའི་ཁྲིད་ལུང་ལེགས་པར་ཐོབ་ན།  ནང་བསྟན་མདོ་སྔགས་གཉིས་ཀྱི་ཟབ་ཁྲིད་ཕལ་ཆེར་ཐོབ་ཡོད་ལ།  དེའི་རྒྱབ་ཆོས་ནི་འཇམ་མགོན་ཀོང་སྤྲུལ་རིན་པོ་ཆེས་ལེགས་བསྒྲིགས་མཛད་པའི་མཛོད་ལྔའི་ཡ་གྱལ<<གདམས་ངག་མཛོད>>དེ་སྒྲུབ་བརྒྱུད་ཤིང་རྟ་བརྒྱད་ཀྱི་ཆོས་བཀའ་ལེགས་བསྒྲིགས་མཛད་པ་དེ་ཡིན་ལ།  དེའི་ཁྲིད་ལུང་ཀྱང་ཐོབ་ན།  དེ་གཉིས་ཀྱི་ནང་དུ་མ་འདུས་པའི་ནང་བསྟན་ཆོས་ལུགས་ཀྱི་ཟབ་ཁྲིད་ཅིག་ཧ་ལམ་མེད་ཅེས་བཤད་ཆོག  དཔེར་ན།  ཇོ་ནང་ཁྲིད་བརྒྱའི་ནང་དུ་བློ་སྦྱོང་དོན་བདུན་མ་སོགས་བློ་སྦྱོང་གི་སྐོར་དང་།  མ་ཅིག་གཅོད་ཀྱི་ཁྲིད་ཡིག་སོགས་ཞི་བྱེད་ཀྱི་ཆོས་སྐོར།  སེམས་ཉིད་ངལ་གསོ་སོགས་རྫོགས་ཆེན་གྱི་སྐོར།  སྐྱེས་བུ་གསུམ་གྱི་ཁྲིད་ཡིག་སོགས་ལམ་རིམ་གྱི་སྐོར།  དབུ་མ་ཆེན་པོའི་ཁྲིད་ཡིག་སོགས་དབུ་མའི་ལྟ་ཁྲིད་སྐོར།  བཀའ་གདམས་ལྐོག་ཁྲིད་སོགས་བཀའ་གདམས་ཀྱི་སྐོར།  ཤེས་ཕྱིན་བཀའ་བབས་ཁྲིད་ཡིག་སོགས་འཁོར་ལོ་བར་བའི་སྐོར།  བྱམས་ཆོས་སྡེ་ལྔའི་ཁྲིད་ཡིག་སོགས་འཁོར་ལོ་ཐ་མའི་དགོངས་འགྲེལ་གྱི་སྐོར།  ལམ་འབྲས་སོགས་ས་སྐྱའི་ཆོས་སྐོར།  ནཱ་རོ་ཆོས་དྲུག་སོགས་བཀའ་བརྒྱུད་པའི་ཆོས་སྐོར།  དུས་འཁོར་སྦྱོར་དྲུག་སོགས་ཇོ་ནང་ཆོས་སྐོར།  སྟག་ལུང་པའི་ཆོས་དྲུག་སོགས་སྟག་ལུང་ཆོས་སྐོར།  རང་སྟོང་གི་ལྟ་ཁྲིད་སོགས་ཐལ་འགྱུར་བའི་སྐོར།  བསྙེན་སྒྲུབ་སོགས་ཨོ་རྒྱན་པའི་ཆོས་སྐོར།  གསང་འདུས་རིམ་ལྔ་སོགས་རྒྱུད་སྡེའི་བསྐྱེད་རྫོགས་ཀྱི་སྐོར།  སྤྱན་རས་གཟིགས་ཀྱི་ཁྲིད་ཡིག་སོགས་ཡི་དམ་གྱི་སྐོར།  དཔལ་གུར་གྱི་མགོན་པོའི་ནང་ཁྲིད་སོགས་ཆོས་སྐྱོང་སྲུང་མའི་སྐོར་སོགས།  མདོར་ན་ནང་བསྟན་གྲུབ་མཐའ་རིས་སུ་མ་ཆད་པའི་མན་ངག་ཟབ་མོའི་ཁྲིད་ཡིག་མ་ཚང་བ་མེད་པ།  གང་ལས་བརྒྱུད་པའི་ཁུངས་བཅས་གསལ་བོར་སྟོན་པའི་བསྟན་བཅོས་རྨད་དུ་བྱུང་བ་ཞིག་ཡིན།

གསལ་བཤད།   ཕྱོགས་ནས་ཕེབས་པ་དག་ལ་བཞུགས་ཤག་སོགས་ཀྱི་མཐུན་རྐྱེན་ཅི་ནུས་དགོན་པ་གཞུང་གིས་བསྒྲུབ་རྩིས་ཡོད།  

འབྲེལ་གཏུག་ཁ་པར།    180 0975 5111    13897555308

མགོ་ལོག་ཁང་སར་ཇོ་ནང་དགོན་པས་བོད་མེ་སྤྲེལ་ལོའི་ཟླ་བརྒྱད་པའི་ཉེར་གཉིས་ཉིན་སྤེལ།  

ཕན་ཚུན་ལ་བརྒྱུད་སྐུར་གནང་རོགས།