༄༅། །རྔ་ལྗོངས་ཁོར་ཡུག་མྱུར་སྐྱོབ་ཚོགས་པ།
阿 坝 环 保 急 敉 组
acceleration in environment of protection
committee in Nangwa region
གསར་འགོད་པ་ཡོབ་ཤུལ་གཤོག་སྒྲ།
རབ་རྒྱན་ཤིང་ལུག་ལོ་སྟེ་ཕྱི་ལོ་2016-ཟླ་12-ཚེས་15-ཉིན་མདོ་སྨད་རྔ་ཡུལ་སྒོ་མང་དགོན་མདོ་སྔགས་བཤད་སྒྲུབ་འཕེལ་རྒྱས་གླིང་གི་ཕྱི་ནང་བར་གསུམ་དུ་《རྔ་ལྗོངས་ཁོར་ཡུག་མྱུར་སྐྱོབ་ཚོགས་པའི་》གཤིས་བཟང་གི་མི་བུ་600.ལྷག་ལ་“བཀའ་གནམ་ལྕགས་ཀྱི་རྟ་རེ་དང་གསུང་གསེར་ནག་གི་འཛེར་མ་”མ་ཡིན་པར་གཞི་ནས་སོ་སོས་མ་བསྐུལ་དང་བླངས་ཀྱིས་སྒོ་ནས་སྤྱིར་ས་ཆེན་གྱི་མ་ཡུམ་འདི་ཉིད་རང་ངོས་ནས་སྲུང་སྐྱོབ་དང་གཅེས་སྐྱོང་བྱེད་པའི་གོམ་སྟབས་སྒྱུར་དང་བསྒྱུར་བཞིན་པ་ལགས་ཏེ། ལྷག་པར་དུ་དེ་རིང་ནས་བཟུང་སྒོ་མང་དགོན་མདོ་སྔགས་བཤད་སྒྲུབ་འཕེལ་རྒྱས་གླིང་འདི་ཉིད་ད་ལོའི་དགུན་མོ་ཆེན་མོའམ་ཕར་ཕྱིན་སྟོན་མོ་ལ་ཚོགས་རྒྱུ་ཁེལ་ཡོད་པས། མདོ་སྨད་བསྟན་པའི་འབྱུང་གནས་མ་དགོན་བླ་བྲང་བཀྲ་ཤིས་འཁྱིལ་གྱི་མཁས་གྲུབ་གསེར་རིའི་ཕྲེང་བ་དག་གཙོ་བོར་གྱུར་བའི་ཕྱོགས་ཡོངས་ཀྱི་དགོན་སྡེ་ཆེ་ཕྲ་མང་བོའི་དགེ་འདུན་པ་གདན་འདྲེན་བྱས་ཡོད། ཆོས་ཚོགས་དེ་དང་འབྲེལ་ནས་རྔ་ལྗོངས་ཁོར་ཡུག་མྱུར་སྐྱོབ་ཚོགས་པས་ཁོར་ཡུག་གཙང་སྦྲ་དང་རང་ས་བདག་སྐྱོང་གི་བྱ་འགུལ་ཕུན་སུམ་ཚོགས་པ་ཞིག་སྤེལ་ཡོད།
གཤམ་དུ་ཚོགས་པ་དང་འབྲེལ་བའི་དོན་ཚན་འགའ།
༼དོན་ཚན་དང་བོ།༽ཚོགས་པའི་ཁ་ཕྱོགས།
རིགས་རྒྱུད་གཙང་མ་ལྷ་ལས་ཆད་ཅིང་ཤ་རུས་ཁྲག་གསུམ་བོད་ནས་དར་བའི་འབྲེལ་ཡོད་ཀྱི་ཕུ་ནུ་མིང་སྲིང་རྣམ་པ། དེང་དུས་འཛམ་གླིང་ཁྱིམ་གཅིག་ཅན་དུ་འགྲོ་བའི་སྐབས་འདིར་མི་སོ་སོས་རང་གི་ཡུལ་ལུང་ན་ཁོར་ཡུག་སྲུང་སྐྱོབ་དང་རང་ས་བདག་སྐྱོང་གི་ཕྱོགས་ལ་གཅིག་ཏུ་བརྩོན་པའི་མི་སྣ་ནི་གྲངས་ཀྱིས་མི་ལོང་བའི་ཚད་དུ་ཡོད་པ་སུ་ཞིག་སྙོན། དེའི་ཕྱིར། ང་ཚོས་ཀྱང་མི་དང་རང་བྱུང་ཁམས་བར་གྱི་མཐུན་སྒྲིལ་ལ་ཆེད་དུ་གཞིག་ནས་《རྔ་ལྗོངས་ཁོར་ཡུག་མྱུར་སྐྱོབ་ཚོགས་པ་》ཞེས་པ་ཞིག་བཙུགས་ཏེ། ཕ་ཡུལ་མི་དམངས་ཀྱི་གཙོས་དབུགས་ལྡན་སྐྱེ་འགྲོ་ཡོངས་ལ་ནགས་སིལ་ཏོག་གི་མགོ་ལྕོག་ལྡེམ་ཞིང་རྩྭ་མེ་ཏོག་གི་ངམ་ཁ་འཕྱུར་བའི་ཡིད་འོང་དག་ཞིང་གི་ཁོར་ཡུག་ཤིག་བསྐྲུན་རྒྱུ་སོགས་ལ་འབད་བརྩོན་ལྷོད་མེད་བྱ་རྒྱུ་ནི་ང་ཚོའི་ཚོགས་པ་འདིའི་ཁ་ཕྱོགས་ཡིན།
༼དོན་ཚན་གཉིས་པ།༽ཚོགས་པའི་དམིགས་ཡུལ།
ཚོགས་མི་སུ་དང་སུ་ཡིན་ན་སོ་སོའི་བར་ལ་བརྩེ་སེམས་ཀྱི་འོ་མཚོ་བསྐྱིལ་ཞིང་མཐུན་སྒྲིལ་གྱི་དཔུང་རྡང་བསྒྲིགས་པ་གཞིར་བཞག་གི་སྟེང་དུ་རང་ཉིད་ས་གང་དུ་སོང་ཡང་གནས་གང་དུ་བསྡད་ཀྱང་གད་སྙིགས་གང་སར་མི་འཕེན་པའི་དམ་བཅའ་དང་རང་ངོས་ནས་འགོ་བརྩམས་ཏེ་མི་གཙང་བའི་གད་སྙིགས་མང་བོ་གཙང་དག་བཟོས་ཏེ་མི་དམངས་ཀྱི་སེམས་སུ་སྒུལ་ཤུགས་ཐེབས་སུ་འཇུག་རྒྱུ། ད་དུང་ལོ་རེ་རེ་བཞིན་ཚོགས་པ་རང་ངོས་ནས་དོ་དམ་བྱས་ཏེ་སློབ་གསོ་བ་དང་བསམ་བློ་བ་རྣལ་མ་རེ་གདན་འདྲེན་ཞུས་ཏེ་ཁོར་ཡུག་སྲུང་སྐྱོབ་དགོས་ཚུལ་དང་རང་ས་བདག་སྐྱོང་བྱེད་ཚུལ་སོགས་ཀྱི་བསླབ་བྱ་སློབ་སྟོན་རེ་གནང་རྒྱུ་སོགས་རང་གཞན་གཉིས་ཕན་གྱི་བྱ་འགུལ་་གང་ལེགས་རེ་སྤེལ་རྒྱུའི་དམིགས་ཡུལ་ཡོད།
༼དོན་ཚན་གསུམ་པ།༽ཁོར་ཡུག་སྲུང་སྐྱོབ་མ་བྱས་པའི་ཉེས་སྐྱོན།
མི་ལོ་སྟོང་ཕྲག་གི་རིང་ལ་རིག་དངོས་ཞིབ་འཇུག་མཁན་དང་ཁོར་ཡུག་སྲུང་སྐྱོབ་པ་དག་གིས་དཔྱད་འབྲས་ལྟར་ན་ང་ཚོས་གད་སྙིགས་གང་འདོད་དུ་ཆུ་ལ་འཕང་ན་ནམ་ཞིག་ང་ཚོ་ལ་འཐུང་ཆུ་དཀོན་པའི་དཀའ་ཁག་ལ་ཐེ་ཚོམ་མེད་པར་འཕྲད་ངེས་རེད་ཅེས་མང་དུ་བཤད་འདུག རྒྱུ་མཚན། འགྲོ་བ་མིའི་རིགས་ཀྱི་འཚོ་བའི་ཁྲོད་དུ་ཆུའི་སྤྱོད་སྒོ་ནི་བརྒྱ་ཆའི་ཟིན་འདུག་པས་རེད། དེ་དག་ལས་ཀྱང་སུམ་ཆམ་གཏོགས་ཚང་མ་འཕྲོ་རླག་ཏུ་གཏོང་གིན་འདུག ད་དུང་གད་སྙིགས་གང་འདོད་དུ་ས་ལ་འཕང་ན་ལོ་ངོ་སྟོང་ཕྲག་གི་རིང་དུ་རང་ཉིད་སྡོད་སའི་ཡུལ་ལུང་དེར་འབག་བཙོག་བཟོས་ནས་འདུག དཔེར་ན། དུད་སྣེ་ལོ་ཤོག་ཕོར་ལོ་ཤོག་སྒམ་ཟླ་བ་གློགས་རྫས་ལོ་འགྱིག་ཁུག་ལོ་སྟབས་ཐུག་གི་ཤུབས་ལོ་གཙང་ཤོག་གཟའ་འཁོར་ཤེལ་གྱི་རིགས་སོགས་ནི་ལོ་གྲངས་མེད་ཀྱི་རིང་དུ་ཁོའི་ཚེ་སྲོག་མི་འགག་པར་ཁོར་ཡུག་ལ་འབག་བཙོག་བཟོས་པ་དང་བཅོས་དཀའ་བའི་ནད་རིགས་འདྲེན་པ་སོགས་ནི་ཁ་སང་གང་འདོད་དུ་དོར་བའི་གད་སྙིགས་ཀྱིས་དེ་རིང་མི་འདོད་པའི་སྡུག་བསྔལ་ཐོག་ཏུ་དྲངས་པ་གདོན་མི་ཟའོ། །
༼དོན་ཚན་བཞི་བ།༽ཁོར་ཡུག་སྲུང་སྐྱོབ་བྱས་པའི་དགེ་མཚན།
ང་ཚོས་ནམ་རྒྱུན་འཚོ་བའི་ཁྲོད་ན་སྤྱོད་བཞིན་པའི་དངོས་པོ་དག་ལ་ངེས་པར་དུ་དོ་སྣང་ནན་མོ་བྱས་ཏེ་རང་ཉིད་ནས་མགོ་བརྩམས་ཏེ་རྐང་གཉིས་མི་ཡི་རིགས་དང་ཁྱད་པར་དུ་ཕ་ཡུལ་མི་དམངས་ཀྱི་སེམས་ཁམས་སུ་ཁོར་ཡུག་སྲུང་སྐྱོབ་དང་རང་ས་བདག་སྐྱོང་གི་འདུ་ཤེས་གསོན་པོ་ཞིག་དང་རྒྱུན་ཤེས་རྣལ་མ་རེ་ཆགས་སུ་འཇུག་ཐུབ་ན། རང་རེ་ཁ་བ་གངས་ཅན་གྱི་ལྗོངས་འདི་ཉིད་འཛམ་གླིང་གི་རྒྱ་ཕིབས་དང་ཆུ་བོའི་མཆོད་རྟེན་དུ་གྲགས་པ་དོན་ལ་གནས་འདུག མ་ཟད་རི་མཐོ་ས་གཙང་གི་ཡུལ་གྲུ་འདིའི་མཚོན་པའི་ཡངས་པའི་རྒྱལ་ཁམས་ཀུན་ཏུ་བཀྲ་ཤིས་ལོ་ལེགས་འབྱུང་བ་སོགས་ངོ་མཚར་རྨད་བྱུང་གི་དག་ཞིང་ཞིག་ཏུ་འགྱུར་བའི་རེ་བ་དང་ཡིད་ཆེས་ཡོད།
༼དོན་ཚན་ལྔ་བ།༽ཚོགས་མི་ཞུགས་སྟངས་ཀྱི་རིམ་པ།
ཚོགས་པ་འདིར་ཞུགས་མཁན་མི་སུ་ཡིན་ནའང་བསམ་བློ་ཉི་ཚེ་རེ་དང་ལྟ་བ་ལྟར་སྣང་བ་ཞིག་གི་ཀློང་དུ་ཧོལ་རྒྱུག་མི་བྱེད་པར་དངོས་གནས་ཁོར་ཡུག་སྲུང་སྐྱོབ་ཀྱི་འདུ་ཤེས་རྣལ་མ་ཞིག་ཡོད་པའི་སྟེང་དུ་ཚོགས་མི་ནང་ཕན་ཚུན་ལ་མཐུན་སྒྲིལ་དང་ཚོགས་པའི་ལས་སྣེ་ཚོ་ལ་བརྩི་བཀུར་ཡོད་དགོས། གཅིག ཐོག་མར་ཚོགས་གཙོ་རྒན་གཞོན་ལ་ཚོགས་པ་འདིར་ཞུགས་འདོད་ཀྱི་སྙན་ཞུ་ཕུལ་དགོས། གཉིས། ཚོགས་གཙོ་རྒན་གཞོན་གཉིས་ཀྱི་ཆོག་མཆན་ཐོབ་རྗེས་དྲུང་ཡིག་པའི་ལག་ཏུ་སྒོར་ལྔ་བཅུ་སྤྲད་ནས་རང་གི་མིང་ཐོ་འགོད་རྒྱུ་དང་ལག་རྟགས་ལེན་རྒྱུ། གསུམ། ཚོགས་པ་འདིར་ཞུགས་ནས་བཟུང་ཚོགས་གཙོ་གཞོན་བཀོད་སྒྲིག་འོག་དུས་ལྟར་ལས་ཀ་གང་ཡོད་ལ་ངེས་པར་དུ་ཐོན་དགོས་པ་དང་།གལ་ཏེ་བྱ་འགུལ་དང་ལས་ཀ་ཐེངས་གཅིག་ནས་གསུམ་གྱི་བར་མ་ཡོང་ན་རང་སྒེར་ནས་ཕྱིར་འབུད་བྱས་པ་ཡིན། མ་ཟད་ལག་རྟགས་ཀྱང་དྲུང་ཡིག་པའི་ལག་ཏུ་ངེས་པར་འབྱོར་དགོས།
སྤྱི་ལོ་ཟླ་ཚེས་2016.12.15.ཉིན།
|