རིམས་ནད་སྔོན་འགོག་ཕྱོགས་ལ་འབད།
ཨར་མའི་སྨོན་ལམ།
སྔོན་གྱི་དུས་ནས་ད་ལྟའི་བར་དག་ཏུ།།
ས་ཕྱོགས་སོ་སོར་འཚོ་བ་རོལ་སྟངས་ཀྱིས །
བྱ་བྱེའུ་འབུ་སྲིན་སྣ་ཚོགས་ཟོས་པའི་རྐྱེན།།
འགྲོ་བ་མི་ལ་རྣམ་སྨིན་འཁོར་བ་འདྲ།།
པྲོག་ཞུའི་རིམས་གསར་བྱུང་བའི་སྐབས་འདི་ལ།།
སེམས་ཅན་ཚེ་འདས་རྣམས་ལ་བསྔོ་སྨོན་དང་།།
ནད་པ་ཉམ་ཐག་དག་ལ་སྨན་བཅོས་བཅས།།
སྙིང་རྗེ་བྱམས་སེམས་ལྡན་ན་རོགས་རམ་གཙོ།།
བླ་མ་མཁན་པོ་གྲྭ་རྐྱང་ཤེས་ཡོན་པ།།
ལྷ་རྗེ་དང་བཅས་འབྲེལ་ཡོད་སྡེ་ཁག་གིས།།
འཕྲོད་བསྟེན་བྱ་བར་མཛུབ་སྟོན་གང་མང་བགྱིས།།
ཀུན་གྱིས་འབད་པ་བྱེད་དགོས་གྲོགས་པོ་ཚོ།།
བླ་མ་ཡིད་དམ་མཁའ་འགྲོ་ཆོས་སྐྱོང་དང་།།
ཁྱད་པར་དགེ་འདུན་འདུས་ཚོགས་བྱིན་རླབས་ཀྱིས།།
པྲོག་རིམས་ནད་ངན་ནམ་མཁའི་མཐར་སྤྱུགས་ནས།།
འཇིག་རྟེན་བདེ་དགའི་དཔལ་གྱིས་འཚོ་བར་ཤོག།
ཀུན་གྱིས་པྲོག་རིམསས་སྔོན་འགོག་ཕྱོགས་ལ་ལྷོད་ཡངས་མི་གཏོང་བར་དྲན་སྐུལ་གྱི་ཚུལ་དུ་རང་ཤག་ནས་ཐོལ་བྱུང་དུ་སྨྲས་པ་དགེ་ལེགས་འཕེལ། ༢༠༢༠.༡.༢༣ཉིན།
|