རྩྭ་ཐང་གི་རླུང་བུ།
གྱང་ཆག 〔ཡུལ་ཤུལ〕
ལྷིང་འཇགས་ཀྱིས་མཐའ་བྲལ་བའི་རྨི་ལམ་གཤོག་པས་བཏེགས
རྩྭ་ཐང་གི་རླུང་བུས་སྐྱོ་ངལ་གྱི་ན་བུན་འཕྲེད་དུ་བཅད
རྒྱུས་ཡོད་ཀྱི་ས་ཆ་འདི་ནས
ངས་རྩྭ་ཐང་གི་རླུང་བུར་སྨོན་ལམ་བཏབ
མཚན་ཆར་རེ་རེ་རྩྭ་གསེང་ལ་ལྷུང་ཤུལ་དུ
རེའུ་ལྕག་མེ་ཏོག་གི་མཛེས་སྡུག་དང་གཏམ་རྒྱུད་ཁ་ཤས
རྩྭ་ཐང་གི་རླུང་བུ་དང་ལྷན་དུ་ཁོད་ཡངས་ལ་ཡང་ཡང་འཕུར
རྩྭ་ཐང་གི་རླུང་བུ ཧ་ཅང་ཞི་འཇམ་ངང་ལྡང་བས
ངའི་སེམས་པའི་ངོགས་སུ་དབྱར་ཁ་དང་མེ་ཏོག་གཞན་ཞིག་སྨིན
རྩྭ་ཐང་གི་རླུང་བུ ཤིན་ཏུ་ཡིད་འོང་སྒོས་ལྡང་བས
ངའི་སྐྲ་ལོ་དང་གྲོམ་འགྲོས་མཛེས་པར་བཏང
དབྱར་དགུན་སྟོན་དཔྱིད་ཀྱི་ཁ་དོག་གཞི་གཅིག་ཏུ་བསྲེས་པའི་རྩྭ་ཐང་གི་རླུང་བུ
མ་འོངས་པའི་ནམ་མཁའ་དང་རྨི་ལམ་ནང་དྲག་ཏུ་ལྡང
༢༠༢༣-༧-༢༤ཨག་ཆུའི་འགྲམ་དུ།
《རྔ་བའི་ཚགས་པར》དུ་བཀོད།
སྐར་མ་སྨིན་དྲུག
ཟླ་བདུན་པའི་མཚན་ལྗོངས་ཀྱི་ལྷིང་འཇགས་ཟོམ་གང
སྒོ་ཁྱིའི་ཟུག་སྐད་ལྷང་ལྷང་གིས་དཀྲོགས་སོང
དབྱར་གཞུང་གི་སྐྱོ་ངལ་ཐ་དག
སྐར་མ་སྨིན་དྲུག་གི་མངའ་ཐང་དུ་གཤར
དྲན་ཚུལ་ཞིག་ལ་ངས་སྨིན་དྲུག་གི་གཤོག་བར་ནས
སྙན་ངག་དང་རྨི་ལམ་བསྒྲུགས་མྱོང
དྲན་ཚུལ་ཞིག་ལ་ངས་མཚན་སྨག་དང
ཆར་རླུང་གི་རྔམས་ཁ་བརྒལ་མྱོང
༢༠༢༣-༧-༢༠མཐོ་གཞུང་དུ་བྲིས།
༢༠༢༣-༩-༡༦ཀན་ལྷོའི་ཚགས་པར་དུ་བཀོད།
ཁེར་རྐྱང་ཀློག་པ།
མགོ་བོ་དགྱེས་ནས་བལྟས་ན
ནམ་མཁའ་འདི་ལྷིང་ཞིང་འཇགས
གནམ་འོག་ནས་ཐུར་དུ་དཔྱངས་པའི་ཟླ་འོད་ཀྱི་སྣེ་རུ
ཁེར་རྐྱང་གི་ཞེ་རྩ་འཁྱག་སིབ་སིབ།
མཚམས་མཚམས་སུ་ལྡང་བའི་རླུང་བུ་དག
ཉིན་མཚན་གྱི་རྨ་ཁ་དང་སྨྲེང་བ་ཆགས
རས་གར་གྱི་ཐོག་ཏུ་ལྷུངས་པའི་ཆར་ཐིགས་ཀྱི་སྒྲ་ལས
མཚན་ཐོག་ཐག་ཅིག་གི་རྨི་ལམ་དང་ཆོ་འཕྲུལ་དུམ་བར་ཆག
དུར་ཁྲོད་ཀྱི་རྡོ་འབུམ་འཁྲིས་སུ་མཆེད་པའི་ཝ་མོའི་ངུ་སྐད་ལས
རོ་ལངས་ཀྱི་རང་རྣམ་དང་ཁེར་རྐྱང་འཐོར
འདི་ནི་སྤྱིར་བཏང་བའི་ཁེར་རྐྱང་གི་མཚན་མོ་ཞིག་གོ
འདི་ནི་སྐྱོ་གར་གྱིས་རྨས་པའི་ཁེར་རྐྱང་གི་ནང་སེམས་དང་དྲན་གདུང་ངོ
༢༠༢༣-༧-༢༥རྩྭ་ཐང་དུ་གྲུབ།
༢༠༢༣-༨-༡༡རྔ་བའི་གསར་འགྱུར་ཚགས་པར་དུ་བཀོད།
སྟོན་ཁ།
གྱང་ཆག〔ཡུལ་ཤུལ〕
སེར་ཐིག་ལྷུང་བའི་ལོ་མ་རེ་རེའི་རྨི་ལམ
དུར་ཁྲོད་ལྟ་བུའི་སྟོན་གྱི་དུས་ཚིགས་ནང་དུམ་བུར་ཆག
ནང་སེམས་སྐྱོ་བས་བཏེགས་པའི་ཁེར་རྐྱང་གི་སྙན་ངག
ཉིན་མཚན་གྱི་གསང་བའི་རྩེ་ན་ཚག་ཚག་འབར
སྐྱེ་འཆིའི་གཏམ་རྒྱུད་ཤོང་བའི་རོ་སྒམ་གྱི་མཐའ་ན
དུས་ཚིགས་ཤིག་གི་སྡུག་བསྔལ་གྱིས་གྲུབ་བའི་མེ་ཏོག་ཁྲུ་གང་བཞད
༢༠༢༣-༨-༡༢
༢༠༢༣-༩-༢༠《བོད་ལྗོང་ཉིན་རེའི་ཚགས་པར》་དུ་བཀོད།
|