༄༅།།བཀའ་སློབ་གནད་བསྡུས།
གཅའ་གངས་བུས་ཟིན་བྲིས་སུ་བཏབ།
དེ་ཡང་ཕྱི་ལོ༢༠༡༤/༩/༢༠ཉིན་གདན་ས་གསུམ་གྱི་དགེ་བཤེས་ལྷ་རམས་པ་དགའ་ལྡན་ཤར་རྩེའི་མཁན་ཟུར་ཆོས་ཚན་ཟུང་འབྲེལ་གྱི་ཤིང་རྟ་བ་ཆེན་པོ་རང་ཅག་རྣམས་ཀྱི་མགོན་སྐྱབས་དང་དཔུང་གཉེན་དམ་པ་སྐྱབས་རྗེ་ཨ་མཆོག་རིན་པོ་ཆེ་སྐུ་ཕྲེང་བཞི་བ་རྗེ་བཙུན༧བློ་བཟང་ཐུབ་བསྟན་འཕྲིན་ལས་མཁྱེན་རབ་ཡེ་ཤེས་རྒྱ་མཚོ་དཔལ་བཟང་བོ་མཆོག་གིས་ཨ་མཆོག་མཚན་ཉིད་དགོན་མ་ལག་དང་རྔ་ཡུལ་བཙུན་མའི་དགོན་བདེ་ཆེན་ཆོས་འཁོར་གླིང་སོགས་ཀྱི་གཙོའི་ཕྱོགས་རིས་མེད་ཀྱི་དད་ལྡན་སེར་སྐྱ་མང་བོར་བསྩལ་བའི་བཀའ་སློབ་གནད་བསྡུས་འགའ།
ཁོང་རིན་པོ་ཆེས་གསུངས་རྒྱུར་དེ་རིང་དགེ་འདུན་མང་ལ་ཞུ་བྱ་ནི་ང་རང་ལོ་བཅོ་ལྔའི་སྟེང་ཕྱིའི་རྒྱལ་ཁབ་ལ་སོང་ཞིང་ད་ལོ་རང་ལོ་བདུན་ཅུའི་སྟེང་རང་ཡུལ་ལ་ཉེ་གཏུག་ལ་ཡོང་བ་ཡིན། སྐབས་དེར་མགོ་དཀར་བོར་གྱུར་མཚན་ཉིད་དགོན་པའི་གྲྭ་རྒན་ལ་ལོག་དབྱུག་རྟེན་བཟུང་ཡོང་རྒྱུའི་གོ་སྐབས་ལྡན་པ་དེ་རང་གི་ངོས་ནས་བསོད་ནམས་ཆེན་པོ་རེད་བསམ་གྱིན་ཡོད།
འདི་ང་རང་ཉེ་གཏུག་ལ་ཡོང་བ་ ཐེངས་བཞི་བ་དེ་ཡིན། ཉེ་གཏུག་ལ་ཐེངས་དང་བོ་དང་གཉིས་པ་གསུམ་པ་བཅས་ལ་ཡོང་སྐབས་རྒྱལ་ཁབ་ཀྱི་ཆོག་མཆན་གནང་བ་དང་ད་ཐེངས་ཐུག་འཕྲད་ལ་ཡོང་སྐབས་ཀྱང་རྒྱལ་ཁབ་ཀྱིས་ཆོག་མཆན་གནང་བ་ཡིན་པས་རྒྱལ་ཁབ་ལ་ཡང་ངས་བཀའ་སྐུ་དྲིན་ཤིན་ཏུ་ཆེ་ཞུས་པ་ཡིན། ལོ་ལྔ་བཅུ་ང་བཞི་ང་ལྔ་ཞིག་གི་རིང་ལ་ངས་ཕྱི་རྒྱལ་ནས་མི་ཚེ་བསྐྱལ་བ་ཡིན། ཡིན་ན་ཡང་ང་ཚོ་མཚན་ཉིད་པའི་སྐད་ཆར་ཇ་འཐུང་ཟ་མ་གང་ཞིམ་པོ་ཟོས་ལས་ཀ་མེད་པར་སྐྱིད་པོ་བྱས་ནས་བསྡད་ཟེར་བ་ལྟར་ང་རང་བསྡད་པ་མ་རེད། སྐབས་དེར་ངའི་ཟ་མ་གང་ཞིམ་པོ་ཟོས་པ་དང་འདུག་ས་གང་བཟང་ལ་བསྡད་པ་མིན་པར་ངས་དཀའ་སྤྱད་ཀྱིས་སློབ་སྦྱོང་བྱས་པ་ཡིན་ཞེས་ང་ལ་བཤད་རྒྱུའི་སྤོབས་པ་ཡོད། ཟ་མ་གང་ཞིམ་པོ་ཟོས་འཐུང་རྒྱུ་གང་ཞིམ་དེ་འཐུང་ལས་ཀ་མེད་པར་འདུག་མཁན་དེ་ཚོ་ལ་ང་སྨོན་གི་མ་རེད། དེ་ཚོ་སྐྱིད་པོ་རེད་ཟེར་གི་མ་རེད་དེ་ལྟས་ངན་རེད་ཟེར་གི་རེད།
རབ་ཏུ་བྱུང་ཚར་དུས་བྱ་བ་ཅི་ཞིག་བཞག་ཡོད་ཟེར་ན་སློབ་སྦྱོང་གྱིས་ཤིག་དང་སྡེ་སྣོད་གསུམ་ལ་སྦྱོངས་ཤིག་ཅེས་གསུངས་ཡོད་པ་རེད།
དེ་རྣམ་པ་ཚོས་ཕར་ཆེར་མཁྱེན་གྱིན་ཡོད་པ་རེད། རབ་བྱུང་བ་དང་དགེ་ཚུལ་སློང་རྐྱང་རྐྱང་རེད། དགེ་ཚུལ་སློང་གི་སྡོམ་པ་བསྒྲུབས་ཚར་བ་ནས་བཟུང་སྟེ་དགེ་ཚུལ་སློང་གི་བསླབ་པར་བྱ་བ་ཅི་ཞིག་ཡོད་པ་དེ་བསླབ་རྒྱུ་མ་གཏོགས་རང་རང་ལ་ཟ་འཐུང་ཉལ་ནས་བསྡད་པ་དེ་སྐྱིད་པོ་རེད་ཟེར་བའི་རྩ་བའི་ཐུགས་འདང་གནང་ཚུལ་གྱི་བསམ་བློའི་ཁ་ཕྱོགས་ཏེ་ཡིན་གཅིག་མིན་གཅིག་བསྒྱུར་བཅོས་གནང་དགོས་པ་རེད་བསམ་བྱུང་། དེ་ཧ་ལས་པའི་གལ་ཆེན་པོ་རེད། དེ་དང་གཅིག་དཔེ་ཆ་ལ་མི་ལྟ་བའི་དཀོན་གཉེར་དང་ལས་བྱེད་མཁན་འགས་ཕྲག་སྟེང་ལ་དཔེ་ཆ་བཞག་ནས་དཔེ་ཁྲིད་ལ་སོང་ན་དེ་ཚོ་འཕྱ་སྨོད་བྱེད་པའི་གནས་མ་རེད། དེ་ལ་རྗེས་སུ་ཡི་རང་བྱེད་དགོས་པ་མ་གཏོགས་འཕྱ་རྒྱུ་ཞིག་མ་རེད།
འཕྱ་རྒྱུ་ངོ་མ་དེ་གང་རེད་ཟེར་ན་དགེ་ཚུལ་སློང་གི་སྡོམ་པ་བླངས་ཚར་བ་ནས་ཤག་ཏུ་བསྡད་ནས་གང་ཞིམ་པོ་འཐུང་
ཟོས་ཉལ་ནས་བསྡད་པ་དེ་ངོ་མའི་འཕྱ་སྨོད་ཀྱི་གནས་རེད། ངོ་ཚ་དགོས་པ་རེད། རང་གི་ཅི་ཤེས་གང་ཤེས་བྱས་ཏེ་ཕྲག་སྟེང་ལ་དཔེ་ཆ་བཞག་ནས་དཔེ་ཁྲིད་ལ་སོང་ན་དེ་ལ་རྗེས་སུ་ཡི་རང་དང་ཐལ་མོ་སྦྱར་དགོས་པ་རེད། དེ་ལྟར་ཡིན་མིན་དམ་ཆོས་འདུལ་བ་དང་སྡེ་སྣོད་གསུམ་བྱང་ཆུབ་ལམ་རིམ་སོགས་ལ་གཅིག་ལྟོས་དང་ང་ཚོ་མཐུན་དགོས་ས་དེ་དེ་རེད།
དཔེ་ཆ་མི་ཤེས་པའི་གྲྭ་པ་དཀོན་གཉེར་སོགས་ཡིན་ན་ཡང་དགེ་བའི་བཤེས་གཉེན་རེའི་མདུན་ནས་བློ་སྐྱེད་རེ་ཨེ་ལོན་བལྟས། དེའི་སྟེང་ལ་གཙོ་བོ་ལྷག་པ་ཚུལ་ཁྲིམས་ཀྱི་བསླབ་པ་དང་དེའི་སྟེང་ལ་ལྷག་པ་ཏིང་ངེ་འཛིན་གྱི་བསླབ་པ་དེའི་སྟེང་ལ་ལྷག་པ་ཤེས་རབ་ཀྱི་བསླབ་པ་དེ་གསུམ་ཚང་སོང་ན་སངས་རྒྱས་ཀྱི་བསྟན་པ་རེད། སངས་རྒྱས་ཀྱི་བསྟན་པའི་ནང་ནས་ཡར་རྒྱས་སྣ་གཅིག་འཁྱོངས་སོང་བ་ཡིན་ན་དེ་ལ་རྗེས་སུ་ཡི་རང་བྱེད་རྒྱུ་རེད། དེ་ལྟར་མ་ཡིན་པར་དེ་དག་གི་རྒྱུད་ལ་སྐྱེ་རུ་མི་འཇུག་པར་ཁ་གསོད་ཚིག་གསོད་བྱས་ན་དེ་ཡ་རབས་ཀྱི་བྱ་བ་ཞིག་དང་ཆོས་དང་མཐུན་པའི་བྱ་ཞིག་རྩ་བ་ནས་མ་རེད། བདུད་ཀྱི་བྱེད་ལས་རེད། དེ་གསུངས་མཁན་ཁོ་རང་བདུད་ཀྱི་སྤྲུལ་བ་ཡིན་རྒྱུ་མ་རེད་བླ་མ་གྲྭ་ཚང་གི་གྲལ་གདན་སྟེང་ལ་བཞུགས་མཁན་ཞིག་ཡིན་དུས་བདུད་ཅིག་ཡིན་གི་མ་རེད། ཡིན་ན་ཡང་ལས་སྟེང་དེ་ཆོས་དང་མཐུན་པ་ཞིག་ཆགས་ཀི་ཡོད་པ་མ་རེད།
དེ་སྡིག་པའི་ལས་ཚབས་པོ་ཆེ་རེད། རྩ་བའི་ཐུགས་འདང་གནང་སྐབས་ཐུགས་འདང་ཧ་ཅང་རྒྱག་དགོས་པ་རེད་ཞལ་ནས་ཚིག་གཅིག་གསུང་རྒྱུ་ཡིན་ན་མ་བཤད་གོང་ལ་ཐུགས་འདང་གནང་དགོས་པ་མ་གཏོགས་ཁ་ནས་བཤད་ཚར་བ་ནས་བཟུང་ད་ཚར་སོང་བ་རེད། རབ་བྱུང་བ་ཟེར་བ་དེ་གནས་ཤིང་གྲོང་བ་གོས་དུར་ཁྲོད་པའམ་ཕྱགས་བདར་ཁྲོད་པ་ཟས་བསོད་སྙོམས་པ་མ་གཏོགས་སྐྱིད་ཡིན་ཟེར་ནས་ཤག་ལ་སོང་ནས་ཉལ་བསྡད་པ་དེ་དམ་ཆོས་འདུལ་བའི་འགྲོ་སྟངས་གཏན་ནས་མ་རེད།
དགེ་ཚུལ་སློང་ངམ་རབ་ཏུ་བྱུང་བ་ནས་བཟུང་འབད་དགོས་ས་དེ་གང་རེད་ཟེར་ན་སངས་རྒྱས་ཀྱི་བསྟན་པ་ལ་ཞབས་འདེགས་ཞུ་རྒྱུ་དང་སློབ་སྦྱོང་ཡག་པོ་བྱེད་རྒྱུ་དེ་རེད།
དཔལ་ལྡན་སྨྲ་སེང་གླིང་ལ་ལས་བྱེད་མཁན་མང་བོ་ཡོད་པ་རེད་ཚོང་ཁང་ནང་གི་གྲྭ་པ་དེ་ཚོ་དང་དཀོན་གཉེར་སོགས་མང་བོ་ཡོད།
ངས་བརྒྱད་ཅུ་གྱ་གསུམ་ལོ་ནས་བཟུང་དཔལ་ལྡན་སྨྲ་སེང་གླིང་གི་ཚོང་ཁང་དང་དཔལ་འབྱོར་ཕྱོགས་ལ་འཛུགས་སྐྲུན་བྱས་པ་ཡིན་པས་དེ་ཚོ་ལ་ཡོན་ཏན་གཞི་གྱུར་མ་སོགས་ཀྱི་དོན་རེ་བཤད་དགོས་པ་རེད་མ་གཏོགས་ཁོ་ཚོས་ལོ་མང་བོར་དགོན་པ་ལ་བྱ་བ་བསྒྲུབས་ཏེ་ཚེ་འཕོས་སོང་བ་ཡིན་ན་ཧ་ལས་པའི་སེམས་སྐྱོ་དགོས་པ་དང་ངའི་སེམས་ཡང་སྐྱོ་རྒྱུ་རེད། དཔལ་འབྱོར་བསྒྲུབ་སྟངས་དེ་དགོན་པ་གྲྭ་ཚང་མི་སེར་གྱི་ཁུར་བོར་མི་ལོག་པ་བྱེད་དགོས་པ་རེད། ཆོས་ཀྱི་བསླབ་བྱ་ཟེར་བ་དེ་གང་ཡིན་ཟེར་ན་སྐྱོན་ལ་མཛུབ་མོ་འཛུགས་དགོས་པ་དེ་རེད། དེ་ང་གཅིག་བུས་བཤད་པ་མ་རེད་ཇོ་བོ་རྗེ་ནས་བཟུང་ཚང་མ་གཅིག་མཐུན་རེད།
དགེ་འདུན་པའི་སྡེ་གནས་དགོས་ན་ཁྲིམས་འགྲིག་ལམ་དེ་དགོས་པ་རེད་དགོན་པ་གྲྭ་ཚང་ཞིག་ཡིན་ན་དགོན་པའི་ཁྲིམས་བསྲུངས་པ་དང་རྒྱལ་ཁབ་ཀྱི་ཁྲིམས་བསྲུང་དགོས་པ་རེད།
དཔལ་ལྡན་སྨྲ་སེང་གླིང་གི་ལྷ་ཁང་སོ་སོ་ཉམས་གསོ་བྱེད་རྒྱུའི་ཐད་ལ༢༠༡༢ལོ་འཆར་གཞི་བཏང་བ་ཡིན་སྐབས་དེར་དོ་དམ་མི་སྣ་འགའ་ལ་རི་མོ་བྲི་མཁན་གྱི་ཆེད་ལས་མཁས་པ་གདན་འདྲེན་བྱེད་རྒྱུའི་འགན་བཞག་པ་ཡིན། འཛུགས་སྐྲུན་དེ་ལོ་ལྔ་ནས་བཅུའི་བར་ཡིན་འཛུགས་སྐྲུན་དེ་ལ་མཚོན་ན་རྒྱལ་ཁབ་དང་དད་ལྡན་མང་ཚོགས་དགེ་འདུན་པ་ཚང་མ་ལ་འབྲེལ་བ་ཧ་ཅང་ཟབ་དགོས་པ་རེད། དེ་ལ་དགོན་གྲོང་ཚང་མས་ཐུགས་ཁུར་དང་རྒྱབ་སྐྱོར་གནང་དགོས་པ་རེད། ཅེས་དང་དཔལ་ལྡན་སྨྲ་སེང་གླིང་གི་སློབ་གླིང་ཤེས་བྱའི་དཀྱིལ་འཁོར་གསར་འཛུགས་སྐབས་ཀྱི་གནས་བབ་དང་ས་ཆ་གང་ཡིན་ལ་གནོད་སྐྱོན་དང་འབག་བཙོག་མི་བཟོ་བར་ཁོར་ཡུག་ལ་སྲུང་སྐྱོབ་བྱེད་དགོས་པ་བླ་སྤྲུལ་དགེ་འདུན་པ་ཚོའི་ལམ་བསླབ་པ་གསུམ་ལ་ཉམས་ལེན་དང་ལུང་སྡེ་སྣོད་གསུམ་ལ་འཆད་ཉན་རྣམ་དག་བྱེད་དགོས་ཚུལ་སོགས་བཀའ་སློབ་གནད་དུ་སྨིན་པ་མང་བོར་བསྩལ་ཏོ།།