ས་སྐྱ་ལེགས་བཤད། ༼༡༦༽
བློ་གྲོས་ལྡན་པ་གཉིས་བགྲོས་ན། །
བློ་གྲོས་ལེགས་པ་གཞན་འབྱུང་སྲིད། །
ཡུང་བ་དང་ནི་ཚ་ལ་ལས། །
ཁ་དོག་གཞན་ཞིག་སྐྱེ་བར་འགྱུར། །
བློ་གྲོས་དང་ལྡན་པ་གཉིས་ང་རྒྱལ་མེད་པའི་ཐོག་ནས་ཕན་ཚུན་ཉམས་མྱོང་སྤེལ་རེས་བྱས་པ་ཡིན་ན། སྔོན་མེད་ཀྱི་བློ་གྲོས་ཁྱད་པར་ཅན་འབྱུང་བར་བསྟན་པ་དེ་ཡིན། །
དེ་ཡང་རྣམ་དཔྱོད་དང་ལྡན་ཞིང་བློ་གཟུ་བོར་གནས་པ་གཉིས་ཕན་ཚུན་བགྲོས་ན་སྟེ། འདྲི་བརྩད་གླེང་མོལ་བྱས་པ་ན་སྔོན་མེད་པའི་བློ་གྲོས་ལེགས་པ་གཞན་འབྱུང་སྲིད་དེ། དཔེར་ན། ཡུང་བ་སྟེ་སྒ་སེར་དང་ཚ་ལ་ལས་སྔར་མེད་ཀྱི་ཁ་དོག་བཟང་པོ་གཞན་ཞིག་བྱུང་བ་བཞིན་ནོ། ཞེས་པའོ། །
སྔར་ལུང་པ་ཞིག་ན་རྡོ་བཟོའི་ལག་རྩལ་མཆོག་ཏུ་གྱུར་ལ། ཤིང་བཟོའི་ལག་རྩལ་དེ་ཙམ་རང་མེད་པ་ཞིག་དང་། ཤིང་བཟོའི་ལག་རྩལ་མཆོག་ཏུ་གྱུར་ལ། རྡོ་བཟོའི་ལག་རྩལ་དེ་ཙམ་རང་མེད་པ་གཉིས་ཡོད་པ་ལ། ཕན་ཚུན་ལེགས་ཆ་ལེན་རེས་མི་བྱེད་པར་ཁེར་རྐྱང་དུ་ཨར་ལས་ཁང་པ་བཟོ་སྐྲུན་གྱི་ལས་ཀ་བྱེད་བཞིན་ཡོད་པ་ན། སྐྱེ་བོ་འགའ་ཞིག་གིས་ངའི་ཁང་པ་རྡོ་བཟོ་ལེགས་ཀྱང་ཤིང་བཟོ་མི་ལེགས་ཞེས་དང་། ལ་ལས་ངའི་ཁང་པ་ཤིང་བཟོ་ལེགས་ཀྱང་རྡོ་བཟོ་མི་ལེགས། ཞེས་ལབ་གླེང་མང་དུ་བྱུང་བ་ཁོ་གཉིས་ཀྱིས་ཐོས་པས། ཕན་ཚུན་མཉམ་དུ་འཚོགས་ནས་ལེགས་ཆ་ལེན་རེས་ཀྱི་བགྲོ་གླེང་བྱས་པས། ཁང་པ་བཟོ་སྐྲུན་གྱི་ལག་རྩལ་སྔར་མེད་ཕུལ་དུ་བྱུང་བས། རང་གཞན་གཉིས་ཀའི་དོན་གྲུབ་པ་བཞིན་ནོ། ཞེས་པའོ། །
|