ས་སྐྱ་ལེགས་བཤད། ༼༢༠༽
དཔའ་ཞིང་མཐུ་རྩལ་ཆེ་ན་ཡང་། །
མཁས་པ་མིན་པས་དཔའ་མི་ཐོབ། །
འབྱོར་བ་ཐོབ་པར་གྱུར་ན་ཡང་། །
བསོད་ནམས་མེད་ན་ག་ལ་རྟག།།
ཐབས་ལ་མཁས་པ་དང་མི་ལྡན་ན། དཔའ་རྩལ་ཇི་ལྟར་ཆེ་ཡང་འཐབ་ཟླའི་དབང་དུ་གྱུར་ཏེ་དཔའ་བའི་མིང་མི་འཐོབ་པ་དེ་བསྟན་པའོ། །
དཔའ་ཞིང་སྟེ་མི་ཞུམ་པའི་བློ་རྩ་བརྟན་ཞིང་དགྲ་འཐབ་ཀྱི་མཐུ་རྩལ་ནུས་པ་ཤིན་ཏུ་ཆེ་ན་ཡང་། དཔའ་རྩལ་དེ་སྤྱོད་པའི་ཐབས་ལ་མཁས་པ་མིན་པས། དཔའ་བའི་མིང་དོན་མི་འཐོབ་སྟེ། དཔེར་ན། ནོར་ལོངས་སྤྱོད་སོགས་འབྱོར་པ་ཐོབ་པར་གྱུར་ན་ཡང་། བསོད་ནམས་མེད་ན་ལྟག་ཆུ་ཆད་པའི་རྫིང་བུ་ལྟར་ག་ལ་རྟག་སྟེ་མི་བརྟན་པ་བཞིན་ནོ། ཞེས་པའོ། །
དེ་ཡང་སྔོན་ལུང་པ་ཞིག་ན། དཔའ་མཐུ་རྩལ་འགྲན་ཟླ་དང་བྲལ་བའི་དཔའ་བོ་ཞིག་ཡོད་པས། ཁོས་བརྙས་བཅོས་ཇི་ལྟར་བྱས་ཀྱང་བཟོད་བསྲན་བྱས་ནས་སྡོད་པ་ལས་འཐབ་པའི་རྩལ་མེད་པར་གྱུར། དེ་ནས་སྐྱེ་བོ་བློ་གྲོས་དང་ལྡན་པ་ཞིག་ཡོད་པ་དེས། ཁོ་དཔའ་རྩལ་དང་ལྡན་ཡང་ཐབས་ལ་མི་མཁས་པས། ཐབས་ཀྱིས་གདུལ་དགོས་ཟེར་བས། ཐབས་ཇི་ལྟར་ཡོད་ཅེས་སྨྲས་པས། ས་དོང་གཏིང་རིང་ཞིག་དྲུས་ཏེ། དེའི་ཁ་བཀབ་སྟེ་མི་མངོན་པར་བྱས་ཏེ། ཁོ་དེར་ཚུད་ཐབས་བྱ་དགོས་ཞེས་བརྗོད་པས། ཁོ་ཚོས་ས་དོང་བཟོས་ཟིན་པ་དང།་ ཁོ་ལ་ཚིག་ངན་བརྗོད་དེ་ས་དོང་དེ་ཕྱོགས་སུ་བྲོས་ཕྱིན་པས། ཁོས་རྗེས་འདེད་བཏང་བས་ཁོ་པ་ས་དོང་ནང་ལྷུངས་ཏེ། ཀུན་དེར་འདུས་ཏེ་ཁོ་སྲོག་དང་ཕྲལ་བ་བཞིན་ནོ། །
|