ཕ་རོལ་བོའི་རྒོལ་བའི་འོག་ཏུ་བསྟན་པ་གནས་ཐབས། རྫོང་གསར་མཁྱེན་བརྩེ།


     ཕ་རོལ་བོའི་རྒོལ་བའི་འོག་སངས་རྒྱས་ཀྱི་བསྟན་པ་མུ་མཐུད་ཉམས་ལེན་བྱེད་ཐུབ་པའི་ཆེད་དུ། ང་ཚོས་ཐོས་བསམ་སྒོམ་གསུམ་བྱེད་དགོས་པ་རེད། དེ་ལྟར་ན་ད་གཟོད་སངས་རྒྱས་ཀྱི་བསྟན་པ་རྒྱུན་གནས་ཐུབ་རྒྱུ་རེད།

 རྫོང་གསར་མཁྱེན་བརྩེ།

 འཇིགས་མེད་ཐུབ་བསྟན་གྱིས་རྒྱ་ཡིག་ནས་བསྒྱུར།

     བླ་རྫུན་ནི་སངས་རྒྱས་སྐུ་འཚོ་བའི་དུས་ནས་ཡོད་པ་ཞིག་རེད། འདི་ནི་གསར་དུ་བྱུང་བ་ཞིག་མ་རེད། དོན་དངོས་ཐོག་གནའ་དུས་ཀྱི་བླ་རྫུན་དག་ལ་འཇོན་ཐང་ཡག་པོ་ཡོད་པ་རེད། དེ་ཚོ་དང་གཤིབ་ན་དེང་དུས་ཀྱི་བླ་རྫུན་ཚོ་དངོས་གནས་ཅི་ཡང་མ་རེད། ཐ་ན་བླ་རྫུན་དེ་ཚོའི་བླ་མ་ཡང་རྫུན་མར་ཆགས་ཡོད་པ་རེད། གནའ་དུས་ཀྱི་བླ་རྫུན་དག་ཅིའི་ཕྱིར་དུ་དམིགས་གསལ་གྱི་མི་སྣ་ཞིག་ཏུ་བརྩི་དགོས་པ་རེད། རྒྱུ་མཚན་ནི་དེའི་དུས་ཀྱི་སློབ་མ་དག་ནི་ཧ་ཅང་གིས་གཟབ་ནན་ཆེ་ཞིང་། སྐྱོན་འཚོལ་བར་བྱང་ཐག་ཆོད་པོ་ཡོད་པས་རེད། ད་ལྟའི་སློབ་མ་ནི་ཧ་ཅང་གིས་མགོ་སྐོར་ཐེབས་སླ་ཞིང་། མང་པོ་ཞིག་མགོ་ཡང་སྐོར་ཟིན་པ་རེད།

   ད་ལྟའི་ནང་ཆོས་སློབ་མཁན་ཚོའི་གནས་ཚུལ་གང་འདྲ་ཞིག་ཡིན་ནམ་ཞེ་ན། མི་ཞིག་ལ་གོ་གནས་ག་གེ་མོ་ཞིག་ཡོད་ན། བླ་མ་ག་གེ་མོ་ཞིག་གི་ཡང་སྲིད་དུ་ངོས་འཛིན་བྱེད་ཅིང་། ནང་བསྟན་གྱི་སློབ་མ་ཚོས་ཀྱང་དེར་དད་པ་བྱེད། ཡང་སྲིད་ཀྱི་གོ་གནས་ཤིག་ཡོད་དུས་ཁོ་ཚོས་དད་པ་འཇོག་པ་རེད། འདིའི་རིགས་ཀྱི་ནང་བསྟན་གྱི་བར་ཆད་དག་ཀྱང་གསར་བྱུང་ཞིག་མ་རེད། ནང་བསྟན་ཉིད་འཇིག་རྟེན་འདིར་འཁྲུངས་པའི་ཉི་མ་དང་པོ་ནས་བཟུང་བར་ཆད་དེ་དག་ཡོད་བསྡད་པ་རེད།

      བདུད་དགའ་རབ་དབང་ཕྱུག་གིས་སངས་རྒྱས་ཀྱི་ཆོས་ལ་རྟག་པར་རྒོལ་བ་བྱས་པ་མ་ཟད། སངས་རྒྱས་སྐུ་མྱ་ངན་ལས་འདའ་ཁའི་ཆེས་མཐའ་འཇུག་ཉིན་མོར་ཚུན་ཆད་དུ་བར་ཆད་བྱས་པ་རེད། སྔོན་གྱི་ནང་བསྟན་པའི་རླབས་ཆེན་གྱི་གནས་ཆེན་དག་སྟེ། བི་ཀྲ་མ་ལ་ཤཱི་ལ། དཔལ་ནཱ་ལེནྡྲའི་གཙུག་ལག་ཁང་སོགས་ཀྱི་གནས་ཤུལ་དུ་ཁྱེད་རང་ད་ལྟ་སོང་ན་ཐལ་རྡུལ་ཙམ་མ་གཏོགས་ཅི་ཡང་མེད།

     འགལ་རྐྱེན་དེ་རིགས་ད་དུང་མུ་མཐུད་ནས་ཡོང་སྲིད་མོད། འོན་ཀྱང་དེ་དག་གིས་སངས་རྒྱས་ཆོས་ལུགས་ལ་འགོག་རྐྱེན་གང་ཡང་བཟོ་མི་ཐུབ། ང་ཚོར་སྔར་བཞིན་ཡོན་ཏན་དང་བཟང་སྤྱོད་ཡོད་བསྡད་ན། སངས་རྒྱས་ཀྱི་བྱམས་དང་སྙིང་རྗེའི་བདག་ཉིད་དུ་གྱུར་པའི་ཆོས་ལུགས་འདི་དང་ལེན་བྱས་བསྡད་ན། གནས་ཚུལ་དེ་འདྲའི་འོག་ཏུ་ཡང་། སངས་རྒྱས་ཆོས་ལུགས་སྔར་ལྟར་གནས་སྲིད།

     དེར་བརྟེན་ངོས་ནས་གནས་ཚུལ་འདི་འདྲའི་འོག་བསམ་འཆར་ག་རེ་འདོན་གི་ཡོད་ཟེར་ན། ཉིན་ཤས་སྔོན་རྣམ་རྒྱལ་མའི་ཆོས་ཚོགས་སྐབས། ཚོགས་པ་གཞན་རེ་ཟུང་གི་མིས་དེབ་ཆུང་འགའ་བཀྲམ་སྟེ་སྔགས་རྡོ་རྗེ་ཐེག་པར་རྒོལ་བ་བྱེད་ཀྱིན་འདུག་ཅེས་ང་ལ་མི་ཞིག་གིས་བཤད་སོང་། དེ་དུས་ངས་ཁོ་ཚོས་འདི་ལྟར་འགྲེམ་ན་དཀའ་ཚེགས་ཧ་ཅང་ཆེ་སོང་བས། འགའ་ཤས་རེ་ཁྱེད་ཀྱིས་ཁྱེར་ཡོང་དེ་གང་སར་དགྲམ་རོགས་དགོས་པ་རེད་ཅེས་བཤད་པ་ཡིན།

    འདི་ལྟར་ཕ་རོལ་བོའི་རྒོལ་བའི་འོག་སངས་རྒྱས་ཀྱི་བསྟན་པ་མུ་མཐུད་རྒྱུན་འཁྱོངས་བྱེད་ཐུབ་པའི་ཆེད་དུ། ང་ཚོས་ཐོས་བསམ་སྒོམ་གསུམ་བྱེད་དགོས་པ་རེད། དེ་ལྟར་ན་གཟོད་སངས་རྒྱས་ཀྱི་བསྟན་པ་རྒྱུན་གནས་ཐུབ་རྒྱུ་རེད། དེ་ཅིའི་ཕྱིར་ཞེ་ན། སངས་རྒྱས་སྐུ་མྱ་ངན་ལས་འདའ་བར་བརྩམས་པའི་དུས་སུ། རང་ཉིད་རང་གི་སྐྱབས་དང་རང་ཉིད་རང་གི་མགོན་ཡིན་པ་ལས། མི་སུ་ཞིག་གིས་ཀྱང་ཁྱོད་ཀྱི་མགོན་མི་ཐུབ་ཅེས་གསུངས་ཡོད་པ་རེད།

     ཁྱོད་རང་ཉིད་ཀྱི་རྗེས་དཔག་དང་། རྣམ་འགྱུར། དབྱེ་ཞིབ་ཀྱི་བློ་བཅས་ཀྱིས་གང་ཞིག་འགྲིག་པ་ཡིན་མིན་ཁྱོད་རང་ཉིད་ལ་གོ་བརྡ་སྤྲོད་ཐུབ་པ་རེད། དེའི་ཕྱིར་ན་ཐོས་བསམ་སྒོམ་གསུམ་བྱེད་དགོས་ཞེས་བཤད་པ་རེད། ཐོས་བསམ་སྒོམ་གསུམ་གྱི་གོ་རིམ་བརྒྱུད། ཁྱོད་རང་ཉིད་ཀྱི་དབྱེ་ཞིབ་བརྒྱུད། ཁྱོད་ཀྱིས་རང་ཉིད་ལ་གཟོད་གོ་བརྡ་སྤྲོད་ཐུབ། ཁྱོད་ཀྱིས་ཆང་གིས་ར་རོ་བར་གྱུར་བའི་ཏེ་ཝ་པ་ཞེས་པའི་མི་ཞིག་དང་ལེན་བྱེད་མིན་དང་། ཡང་ན་ཏཻ་ལོ་པ་ཞེས་པའི་ཉ་བ་ཞིག་དང་ལེན་བྱེད་མིན། ཡང་ན་ས་ར་ཧ་ཞེས་པའི་རྔོན་པ་ཞིག་དང་ལེན་བྱེད་མིན་དང་། མི་འདི་དག་དང་ལེན་བྱས་ཏེ་ཁྱོད་ཀྱི་ལམ་སྟོན་པ་བྱེད་དུ་འཇུག་མིན་སོགས་ནི་རང་ཉིད་ཀྱི་དབྱེ་ཞིབ་བརྒྱུད་ཐག་གཅོད་དགོས་པ་ཞིག་རེད། དེ་ནི་ཁྱོད་ཀྱི་གདམ་གསེས་ཤིག་རེད།

    ད་ལྟ་མི་ཧ་ཅང་མང་པོ་ཞིག་གིས། སྔགས་རྡོ་རྗེ་ཐེག་པ་དང་། བོད་བརྒྱུད་ནང་བསྟན་གཉིས་གཅིག་ཏུ་འདོད་ཀྱིན་ཡོད། འདི་ནི་ནོར་འཁྲུལ་ཤིན་ཏུ་ཆེན་པོ་ཞིག་རེད།  འོན་ཀྱང་གང་འདྲ་ཞིག་ཡིན་རུང་། སྔགས་རྡོ་རྗེ་ཐེག་པ་དང་ཡང་ན་བོད་བརྒྱུད་ནང་བསྟན་ལ། ལོ་ངོ་སྟོང་ཕྲག་རིང་སྐྱོན་བརྗོད་འདྲ་མིན་སྣ་ཚོགས་ཤིག་བྱས་ནས་ཡོང་པ་རེད། དེའི་ཕྱིར་ན་འདི་གནད་དོན་གསར་པ་ཞིག་ཁྱོན་ནས་མ་རེད། དེང་སྐབས་མི་མང་པོ་ཞིག་གིས། སྔགས་རྡོ་རྗེ་ཐེག་པའི་བསྟན་པ་ལ་ཇི་ལྟར་སྐྱོན་བརྗོད་གནང་གིན་ཡོད་པ་རེད་ཟེར་ན། ཁོ་ཚོས་སྔགས་ཉམས་ལེན་བྱེད་བཞིན་པའི་གང་ཟག་འགའ་རེའི་སྒེར་གྱི་ནོར་འཁྲུལ་རེ་ཁྱེར་ཡོང་ནས་སྔགས་ཀྱི་བསྟན་པ་སྤྱི་ལ་སྐྱོན་བརྗོད་གནང་གིན་ཡོད་པ་རེད། འོན་ཀྱང་མི་གཅིག་ནི་མི་གཅིག་རང་རེད།

    ཐོག་མར་མི་སྒེར་བ་ཞིག་མ་གཞི་ནས་སྐྱོན་མེད་ཅིང་ཡོན་ཏན་ཀུན་དང་ལྡན་པ་ཞིག་མ་རེད། གལ་ཏེ་ཁྱོད་ཀྱིས་མཐོང་བའི་ཕ་རོལ་བོ་དེ། སྐྱོན་མེད་ཡོན་ཏན་ཀུན་དང་ལྡན་པ་ཞིག་ཡིན་པའི་དབང་དུ་ཆུགས་ཀྱང་། ཁྱོད་རང་ཉིད་སྐྱོན་མེད་ཡོན་ཏན་ཀུན་ལྡན་ཞིག་མ་ཡིན་པའི་ཕྱིར་ན། ཁྱོད་ཀྱིས་མཐོང་སྣང་གི་ཁོ་ཡང་སྐྱོན་མེད་ཅིང་། ཡོན་ཏན་ཀུན་དང་ལྡན་པ་ཞིག་ཏུ་སྣང་སྲིད་པ་མ་རེད།

    དེའི་ཕྱིར་ན། མི་གང་ཡང་རུང་བ་ཞིག་གི་སྒེར་གྱི་བྱ་སྤྱོད་རྒྱུ་མཚན་དུ་བྱས་ཏེ། སྤྱི་ཡོངས་དང་། ནང་བསྟན་ཡོངས་ལོག་པར་བལྟ་བ་ནི་ཧ་ཅང་མི་ལེགས་པའི་བྱ་བ་ཞིག་རེད། འབྲུག་ཡུལ་གྱི་མི་ཞིག་ཐེ་ལན་དིར་སོང་སྟེ་ཕྱིར་ཡོང་དུས་ང་ལ་ཐེ་ལན་དིའི་མི་དག་ཧ་ཅང་ཐབས་ཆགས་རེད་ཅེས་བཤད་སོང་། ངས་ཁོ་ལ་དེ་ལྟར་བཤད་དོན་འདྲི་དུས། ཁོས་ཐེ་ལན་དིའི་མི་དག་གིས་ཐ་མག་བཞེས་ཀྱིན་འདུག་ཅེས་བཤད་སོང་། འདི་ནི་རིག་གནས་ཀྱི་སྟེང་གི་ཁྱད་འགྱུར་ཞིག་རེད། འདི་ལྟ་བུའི་རིག་གནས་ཀྱི་ཁྱད་འགྱུར་དབང་གིས་དོན་དག་གཅིག་ཤན་འབྱེད་བྱེད་པ་ནི། དང་དུ་ལེན་པར་བྱ་བ་ཞིག་ཁྱོན་ནས་མ་རེད།

     དེའི་ཕྱིར་ན་ཁྱོད་ཀྱིས་བོད་ཀྱི་སྔགས་ཉམས་ལེན་བྱེད་མཁན་གྱི་གང་ཟག་སྒེར་བ་ཞིག་གི་བྱ་སྤྱོད་རྒྱུ་མཚན་དུ་བྱས་ཏེ། སྔགས་རྡོ་རྗེ་ཐེག་པའི་ཆོས་དེ་ཉིད་ལོག་པར་བལྟ་བ་ནི། ཧྲོ་ལིན་དགོན་པའི་གྲྭ་བ་དག་རྒྱུ་མཚན་དུ་བྱས་ནས། གྲྭ་བས་དྲག་རྩལ་སྤྱད་དེ་མི་རྡུང་ཆོག་གམ་ཞེས་པ་དང་མཚུངས་ཤིང་། དེ་ལྟ་བུའི་བྱ་སྤྱོད་ཀྱིས་ཐེག་པ་ཆེན་པོའི་ཆོས་ལ་ཤན་འབྱེད་བྱེད་པ་ནི་གནས་ལུགས་དང་མཐུན་པ་ཞིག་མ་རེད།

     སྒེར་གྱི་ངོས་ནས་བཤད་ན་མི་ནི་ཕུན་སུམ་ཚོགས་པ་ཞིག་མ་རེད། གལ་ཏེ་ཁྱོད་ཀྱིས་མི་སྐྱོན་ཅན་ཞིག་འཚོལ་དགོས་ན། ཁྱེད་ཀྱིས་དཀའ་ཚེགས་བརྒྱབ་སྟེ་གང་སར་འཚོལ་མི་དགོས་ཏེ། ཁྱོད་ཀྱི་མདུན་འདིར་ད་ལྟ་རང་གཅིག་འདུག་པ་འདི་རེད། ང་ལ་རང་ཉིད་ཀྱི་སྐྱོན་ཆ་ཐམས་ཅད་སྦ་གསང་མེད་པར་ཕྱིར་མངོན་པའི་སྙིང་སྟོབས་མི་འདུག འདིས་ནི་ང་རང་མི་སྐྱོན་ཅན་ཞིག་ཡིན་པ་ཏན་ཏན་མཚོན་བཞིན་ཡོད་པ་རེད། ཁྱེད་ཚོས་ཀྱང་ངས་རྒྱུན་དུ་ཅི་ཞིག་བྱེད་ཀི་ཡོད་པ་དང་ང་མི་སྒེར་གྱི་གསང་བའི་འཚོ་བ་སོགས་ཤེས་མི་སྲིད་ཅིང་། ང་ལ་ཡང་ཁྱེད་ཚོར་སྦ་གསང་མེད་པར་དེ་དག་བཤད་པའི་སྙིང་སྟོབས་མི་འདུག  གལ་ཏེ་དེ་འདྲ་བྱས་ན་ང་ལ་ལས་ཀ་མེད་པར་ཆགས་རྒྱུ་རེད།


རྩོམ་སྒྲིག་པ།  ཁཱ་ཤེས་རབ་རྒྱ་མཚོ།  སྤེལ་དུས། 2020/8/7 བལྟ་ཀློག (10640)