| རོང་བརྩོན།（ཞལ་ཤུལ）
བློ་ཆེན་ཀུན་བཟང་སྤྱོད་པའི་རྩ་བ་བརྟན།།
བསླབ་གསུམ་ཚུལ་ཁྲིམས་གཙང་མའི་ཡལ་འདབ་རྫོགས།།
ཐར་འདོད་རྒྱ་མཚོའི་སྙིང་གི་གདུང་སེལ་བ།།
བཤེས་གཉེན་དཔག་བསམ་ལྗོན་པར་སྙིང་ནས་འདུད།།
སྔོན་བསགས་བསོད་ནམས་དཀར་བོའི་ལེགས་བྱས་ཀྱིས།།
མགོན་ཁྱོད་ཞབས་ཟུང་གཙུག་གི་རྒྱན་དུ་ཐོབ།།
འོན་ཀྱང་ཐ་མལ་སྣང་ངོར་རྗེ་ཁྱོད་དང༌།།
བྲལ་བའི་གདུང་བ་བུ་ཡི་སྙིང་ལ་ལྕི།།
ནོར་དང་དབང་གིས་དྲེགས་པའི་འཁོར་སློབ་ལས།།
ཉམ་ཆུང་བདག་ལ་བརྩེ་བའི་དགྱེས་ཞལ་ཅན།།
ཟང་ཟིང་རྒྱུ་ནོར་སྟོང་ཕྲག་འབུལ་བ་ལས།།
སྒྲུབ་པའི་མཆོད་པར་མཉེས་པའི་བླ་མ་མཆོག།
དགེ་བཅུའི་དཔལ་ཡོན་དར་བ་དངུལ་དཀར་གཞོང༌།།
ཆུ་སྐྱེས་འདབ་བརྒྱ་བཞད་པའི་ར་བ་རུ།།
གཟུགས་སྐུའི་མཛེས་སྡུག་གསར་དུ་གྲོལ་བའི་ཚེ།།
ཡ་མཚར་གར་གྱི་རི་མོ་མངོན་པར་བཀྲ།།
བཀྲ་ཤིས་གཡས་སུ་འཁྱིལ་བའི་ཆོས་ཀྱི་གྲྭར།།
བཀའ་པོད་དགོངས་དོན་ཐོས་བསམ་ཚུལ་བཞིན་མཛད།།
ཆོས་གྲྭར་ཆག་མེད་འགྲིམས་པའི་རྣམ་ཐར་སོགས།།
གཟུར་གནས་དགའ་བ་བསྐྱེད་བྱེད་མང་དུ་མཐོང༌།།
འཇམ་དབྱངས་མཁྱེན་རབ་གཅིག་བསྡུས་མི་ཡི་གར།།
ཁྲིམས་ལྡན་རྒྱ་མཚོའི་ཏོག་གྱུར་མགོན་དེ་ལས།།
ཉེས་ལྟུང་དྲི་མ་འདག་བྱེད་བསླབ་གསུམ་ཆབ།།
ངོམས་མེད་འཐུང་བའི་ངོ་མཚར་དཔལ་ལ་གུས།།
སྣང་མཐའ་དགུ་བ་ཆོས་ཀྱི་ཉི་མ་དང༌།།
བསྟན་པའི་མངའ་བདག་བླ་ཁོ་རྡོ་རྗེ་འཆང༌།།
མཐོང་གྲོལ་བཤེས་གཉེན་གསེར་རི་མང་བསྟེན་པས།།
དུས་མཐར་རྒྱལ་བསྟན་འཛིན་ལ་མངའ་དབང་འབྱོར།།
སྨིན་བྱེད་ཟབ་མོའི་དབང་དང་གྲོལ་བྱེད་ཁྲིད།།
སྲད་དབེན་སྙན་བརྒྱུད་མཛོད་ལ་དབང་བསྒྱུར་བས།།
སྙན་པའི་གྲགས་པ་རང་བྱུང་ལྷའི་རྔ་བོས།།
ཕྱོགས་ཀྱི་མཛེས་མའི་སྒྲ་འཛིན་ཅི་ཡང་དཀྲིགས།།
ཞལ་ཤུལ་གོང་མའི་ཐུགས་བསྐྱེད་ཉལ་འགྲོའི་ཀླུང༌།།
གང་ཐུགས་རྒྱ་མཚོར་འཁྱིལ་བའི་བསོད་ནམས་རླབས།།
ཁྲོ་སྨད་གདུལ་བྱའི་དཔལ་དུ་ཉེར་ཐོབ་པས།།
ཞབས་ཟུང་གསེར་འཁོར་གླིང་དཀར་སྟོད་ལ་བསྒྱུར།།
དབེན་གསུམ་ལྷ་ཡི་དགའ་ཚལ་མ་ཉམས་པ།།
གསང་ཆེན་མཛོད་འཛིན་འཁོར་ལོ་སྡོམ་པའི་གནས།།
གྲུབ་པའི་གནས་མཆོག་གད་སྐྱའི་རི་ཁྲོད་དེར།།
མི་ལའི་རྣམ་ཐར་སྐྱོང་བཞིན་སྒྲུབ་ལ་གཞོལ།།
ཁྱད་པར་བདག་པས་གཞན་གཅེས་བྱང་ཆུབ་སེམས།།
འབྲལ་མེད་ཐུགས་དམ་མཐིལ་དུ་བསྒོམ་པས་མཐུས།།
མི་བསྲུན་ལས་ལ་གཞོལ་བའི་གཤེད་མ་ཡང༌།།
སྡུག་པའི་བུ་བཞིན་དགོངས་འདི་མཛད་པའི་ཕུལ།།
ཕྱི་ཡི་སྤྱོད་པ་གནས་བརྟན་ཉེ་བར་འཁོར།།
ནང་གི་རྟོགས་པ་ས་ར་ཧ་དང་མཉམ།།
ནག་ཕྱོགས་འདུལ་ལ་གྲུབ་དབང་སཾ་བྷ་ཝ།།
ང་ཡི་བླ་མའི་རྣམ་པར་ཐར་བ་དྲན།།
ཆོས་སྲིད་རླབས་འཕྲེང་འཕྱུར་བ་དེང་གི་ཆར།།
ཕྱོགས་ཀྱི་དགོན་སྡེ་རྒྱུ་སྐར་ལྟ་བུའི་དབུས།།
ཉིད་ཀྱི་གདན་ས་ཆོས་སྡེ་ཞལ་ཤུལ་དགོན།།
ཆོས་འབྱོར་གདེངས་ཀ་མཐོ་བ་ཁྱེད་ཀྱི་དྲིན།།
སྙིགས་མའི་རང་མཚང་བརྡོལ་བའི་དུས་མཐའ་རུ།།
བསླབ་གསུམ་འཛིན་པའི་དགེ་སློང་འདི་འདྲ་ཞེས།།
ཀུན་མཁྱེན་བཞད་པའི་རྡོ་རྗེས་བསྔགས་བརྗོད་ཀྱིས།།
རྒྱ་མཚོའི་རྡུལ་གྱི་སྐྱེས་རབས་སྙན་པ་འཕྲོག།
རྐུ་འཕྲོག་རྫུན་ལ་གཞོལ་བའི་སྐྱེ་བོ་ཡང༌།།
ཞལ་གསུང་བདེན་པའི་སྙིང་བོ་ཚངས་པའི་དབྱངས།།
ཐོས་པའི་མོད་ལ་ལས་འབྲས་དྲང་ལམ་དུ།།
འཇུག་པའི་ངོ་མཚར་སྤྱོད་པ་བགྲང་ལས་འདས།།
དབུས་ཀྱི་གདན་ས་གསུམ་སོགས་གཙོར་མཛད་པའི།།
མདོ་སྨད་ཡུལ་གྱི་དགོན་སྡེ་ཆེ་ཕྲ་ཀུན།།
ཟང་ཟིང་ནོར་གྱིས་མཆོད་པའི་སྤྲིན་ཕུང་གིས།།
ཀུན་བཟང་སྤྱོད་པ་ཡོངས་སུ་རྫོགས་པར་མཛད།།
གདོད་ནས་ཟུང་འཇུག་དག་པའི་སྐུ་བརྙེས་པས།།
སྐྱེ་འཆིའི་རྒུད་པ་ཀུན་ལས་འདས་ན་ཡང༌།།
ཐ་མལ་སྣང་ངོར་ཐ་མའི་མཛད་པ་དེ།།
སྐྱོ་ཤས་ངེས་འབྱུང་བསྐྱེད་པའི་རྒྱུ་རུ་འཁུམ།།
རང་བཞིན་གཤིས་སུ་སྣང་བའི་ཡོན་ཏན་དགའ།།
མཐུན་སྣང་རི་མོར་བཀོད་པའི་ཉ་གང་ཟླ།།
དད་པའི་འོ་མཚོར་ཤར་བའི་གཏམ་ཡིན་གྱི།།
སྒྲོ་བཏགས་ཚེས་རིས་འཁྱོག་པོའི་འུད་བསྟོད་མིན།།
འདྲེན་པ་ཁྱེད་ཉིད་གང་ན་བཞུགས་ཀྱང་རུང༌།།
བདག་སོགས་འཁོར་གྱི་ཐོག་མར་སྐྱེ་བར་ཤོག།
སྨོན་ལམ་འདི་དག་སུ་ཡིས་ཐོས་ན་ཡང༌།།
ཁྱེད་ཀྱི་ཐུགས་རྗེའི་ལྕགས་ཀྱུས་བཟུང་དུ་གསོལ།།
བླ་མ་མཆོག་གསུམ་ཡི་དམ་ལྷ་ཚོགས་དང༌།།
དམ་ལྡན་ཆོས་སྐྱོང་སྲུང་མའི་མཐུ་བྱིན་གྱིས།།
ཕྱི་ནང་འགལ་རྐྱེན་མཐའ་དག་ཀུན་ཞི་ཞིང༌།།
བློ་བཟང་བསྟན་པའི་དཔལ་དུ་མྱུར་འབྱོན་ཤོག།
ཅེས་བཀའ་དྲིན་མཚུངས་མེད་རྗེ་བཙུན་བླ་མ་མཚན་བརྗོད་པར་དཀའ་བ༧རྗེ་རི་ཁྲོད་པ་བློ་བཟང་ཚུལ་ཁྲིམས་རྒྱ་མཚོ་མཆོག་གི་རྣམ་ཐར་རྗེས་སུ་དྲན་པའི་གཏམ་འདི་འདྲ་ཞིག་འབྲི་བ་བོ་ནི་གུས་འབངས་འདུ་ཤེས་གསུམ་པ་བརྩོན་འགྲུས་ཀྱིས་བྲིས་པ་ཡིན་ལ༧རྗེ་སངྒའི་མཚན་ཅན་ གྱི་གསུང་ཤོ་ལོ་ཀ་གཅིག་བྱིན་རླབས་ཀྱི་གནད་ལ་བསམ་སྟེ། མཇུག་མཐར་བཀོད་པ་འདིས་ཀྱང་ཚེ་རབས་ཀུན་ཏུ་བླ་མའི་རྗེས་སུ་འཛིན་པའི་རྒྱུར་གྱུར་ཅིག།
༡༠༡༠ལོའི་རིག་གནས་ཡར་སྤེལ་ལས་བཤུས།
|