| འབྲོག་བུ་དཀོམ་བཀྲ།
-- ཨ་མདོའི་གཞས་མ་ཞིག་ལ་དམིགས་སུ་བྲིས་པ།
གོས་འདབས་ཟིལ་ཆུ་ཤིག་ཤིག།
མིག་ཟུང་གྲོང་ཤ་ཀྲིག་ཀྲིག།
དྲན་པའི་རྐང་གདུབ་སིལ་སིལ།།
རི་རྒྱབ་གང་ནས་ལྷགས་བྱུང་།།
སྐྱེངས་པའི་ལག་བརྡ་གཡུག་གཡུག།
འཁྲེན་པའི་གཟུགས་པོ་ཀེར་ཀེར།།
རྒྱང་གི་ཨ་ཇོར་འབོད་དུས།།
ཁ་ངོ་མཆི་མས་རླན་རླན།།
ཁུ་བྱུག་གྲེ་འགྱུར་མིན་པའི།།
རྒྱ་གླིང་གདངས་དབྱངས་མིན་པའི།།
འཇིག་རྟེན་མི་མོའི་སྐད་ཅིག།
ད་རེས་སེམས་ལ་ལྷུང་བྱུང་།།
སྤྲིན་པས་མིག་ཆུ་བསིལ་འདྲའི།།
མིག་ཆུ་སྲོག་ལ་འཐིམ་འདྲའི།།
ཚོར་བའི་བརླན་གཤེར་གཞུང་ནས།།
ང་ཡི་དབང་རྩ་བེར་བེར།།
སྨུག་པ་རླུང་གིས་བསེད་འདྲའི།།
རླུང་བུ་ལུས་ལ་འཁྱུད་འདྲའི།།
ཚོར་བའི་དགུ་ཚིགས་ངོགས་ནས།།
ང་ཡི་སྣང་བ་གྲང་གྲང་།།
དབྱར་ཟླའི་ཆར་དང་འགྲོགས་པའི།།
དགུན་ཁའི་གངས་དང་འཐབ་པའི།།
གཞས་མའི་འཛུམ་གྱི་འོད་ཀོར།།
འཚོ་བའི་མར་ལོ་ཡིན་སོང་།།
སྟོན་ཀའི་སྤྲིན་དང་འདྲེས་པའི།།
དཔྱིད་མགོའི་རླུང་དང་བསྡེབས་པའི།།
གཞས་མའི་སྙན་དབྱངས་རེ་རེ།།
རང་བྱུང་མཆོད་པ་རེད་དོ།།
ལྗོན་པ་སྔོན་པོའི་དྲུང་ནས།།
ཏིང་འཛིན་ཁྲུས་ལ་ཞུགས་དུས།།
གཞས་མའི་ངག་གི་འདབ་ལོ།།
བསིལ་མོའི་ཉི་གདུགས་རེད་བཞག།
མྱི་ཁའི་འཁྱག་དར་ཀློང་ནས།།
སེམས་པ་གྲང་བས་བཅུམས་ཚེ།།
གཞས་མའི་གར་གྱི་འཕྲུལ་སྟབས།།
དྲོད་ཀྱི་རླངས་སྦུག་རེད་དོ།།
མི་ཚེ་ལན་གཅིག་རྙེད་པ།།
འཁོར་བའི་རྡོ་ལ་ཐོགས་ཀྱང་།།
གླུ་སྐད་ཐེངས་གཅིག་གསན་པས།།
ཚེ་འདིའི་ཉེས་དམིགས་དག་སོང་།།
དབང་རྩ་ཆང་གིས་བད་དེ།།
གཅོང་ནད་སྙིང་ལ་ཞུགས་དུས།།
དྲན་པའི་སྒྲོམ་དུ་ལྷག་པ།།
ཁྱེད་ཀྱི་གླུ་སྐད་ཡིན་སོང་།།
སྤྲིན་པ་སྔོ་སྨུག་འཐིབས་པའི།།
དགུང་དེ་བང་རིམ་བཅོ་བརྒྱད།།
བདག་ལུས་བྱིའུ་ཆུང་རྨས་མ།།
གནམ་འཕང་གཅོད་སྙིང་ཆེ་འང་།།
ཆུ་དང་ལ་མོའི་ཕར་རྒྱབ།།
གྲོང་དང་མཁར་གྱི་བས་མཐའ།།
གཞས་མའི་གསང་བའི་ཕྱག་རྒྱ།།
ཨུག་ཆོས་སེར་པོའི་ཡག་རེད།།
མུ་ཏིག་སྔོན་པོའི་མཐིལ་གྱི།།
ཉ་མོ་བྱེ་བ་འབུམ་ཕྲག།
གཞས་མའི་ལན་བུར་འཁྱུག་པའི།།
ཚེ་སྔོན་བག་ཆགས་ཨེ་ཡིན།།
སྡིག་པའི་རྒྱ་མཚོའི་ཁ་ནས།།
གྲུ་ཤན་བོར་བའི་གླ་བ།།
ཟོང་སྐྱེལ་ལས་ཀྱིས་ངལ་ཡང་།།
གཞས་མའི་ཚིག་ལ་ཆགས་ཡོད།།
༢༠༡༢/༦/༡༡ལ།
| 