ཨ་ཆེན།
སྤྲིན་གྱི་ཁུག་མ་ཐད་པས།།
ཉི་ཟླ་ས་ལ་ལྷུང་འདུག།
ནུ་མོ་གངས་དཀར་ལྷ་མོས།།
འོད་ཀྱིས་ལག་པ་བཀྲུ་རེད།།
གནམ་གྱི་རྫ་མ་ཆག་པས།།
ཆར་ཆུ་སྤང་ལ་ལུད་འདུག།
ནུ་མོ་གངས་དཀར་ལྷ་མོས།།
ཟིལ་བས་རྐང་བ་བཀྲུ་རེད།།
རྩྭ་ལྗང་ལོ་མའི་ཁུད་དུ།།
རྐང་རྗེན་མེ་ཏོག་རྫི་མཁན།།
ནུ་མོ་གངས་དཀར་ལྷ་མོར།།
འཇའ་ཡི་གདུ་བུ་ཡོད་རེད།།
སྔོ་སང་ནམ་མཁའི་ཤོད་དུ།།
ལག་རྗེན་སྤྲིན་པ་བསལ་མཁན།།
ནུ་མོ་གངས་དཀར་ལྷ་མོར།།
ཉི་ཟླའི་རྣ་ཆ་ཡོད་རེད།།
གངས་དང་ནགས་རིའི་མཚམས་ནས།།
ལུག་ཁྱུ་རི་ལ་གཏོར་ན།།
ནུ་མོ་གངས་དཀར་ལྷ་མོ།།
སྙན་འཇེབ་རྫི་གླུ་ཡིན་རེད།།
སྤང་དང་མཚོ་མོའི་མཐའ་ནས།།
བཞོན་འབྲི་རྡང་ལ་བསྒྲིག་ན།།
ནུ་མོ་གངས་དཀར་ལྷ་མོ།།
བསུང་ཞིམ་འོ་དྲི་ཡིན་རེད།།
རི་མགོ་མཐོ་ལ་འཛེགས་ནས།།
གཡང་དཀར་རྫི་གླུས་བསྐྱོར་ན།།
ནུ་མོ་གངས་དཀར་ལྷ་མོའི།།
ལན་བུ་རླུང་བུས་ཤད་རེད།།
ཡངས་པའི་སྤང་ལ་བབ་ནས།།
ཐུ་དཀར་བཞོ་གླུས་ཀློད་ན།།
ནུ་མོ་གངས་དཀར་ལྷ་མོའི།།
འགྲམ་ཆུང་ཆར་བས་ཕྱི་རེད།།
ཤིང་ལ་འདབ་ལོ་འདོགས་མཁན།།
སྤང་ལ་མེ་ཏོག་འབྲི་མཁན།།
ནུ་མོ་གངས་དཀར་ལྷ་མོ།།
དཔྱིད་འགོའི་རླུང་བུ་རེད་འདུག།
སྦྲང་ཆུང་གླུ་ཡིས་འཁོར་ས།།
བྱེ་ལེབ་བྲོ་ཡིས་འབབ་ས།།
ནུ་མོ་གངས་དཀར་ལྷ་མོ།།
དྲུག་པའི་མེ་ཏོག་རེད་འདུག།
| 