ལྡོག་འཆར།

ཁ་བས་རི་ཐང་བསྣུབས་པ་དེས།།

བདག་ལ་གྲང་སྣང་མ་བྱིན་ཡང་།།

གནམ་གྱི་སྐར་མ་འགུལ་བ་དེས།།

གློ་བུར་འདར་ནས་གྲང་ཤུམ་བོར།།

བྱམས་པ་རྒྱང་ལ་བཞུད་པ་དེས།།

གུས་པོར་སྐྱོ་སྣང་མ་སྟེར་ཡང་།།

སྡོང་ལོ་རླུང་གིས་ཁྱེར་བ་དེས།།

ང་ལ་ཁེར་རྐྱང་སྣང་བ་སྤྲད།།

ཇག་མས་ངག་གི་ཤུགས་གླུ་དེས།།

བྱམས་པས་དུང་ཚིག་མ་དྲན་ཡང་།།

འགྲོ་ཁའི་བདེ་མོའི་ལག་བརྡ་དེས།།

ང་ཡི་མིག་ལམ་བསྒྲིབས་ཏེ་ཡོད།།

སྙིང་གཏམ་ཚིག་གི་མགོ་རྐང་དེ།།

སེམས་ནས་ཡལ་བ་མ་ཡོད་ཀྱང་།།

མི་ཐེག་མི་ཁའི་རླུང་འཚུབ་དེ།།

གདོད་ནས་རྡུལ་དུ་ཟེགས་པར་གྱུར།།

སེམས་ཀྱི་དྲན་པ་ལྗང་ཁུ་དེས།།

ཁྱོད་རང་བསུ་བར་མ་བརྩམ་ཡང་།།

ལས་ཀྱི་ལམ་བུ་ཀྱ་ཀྱུ་དེས།།

ནམ་མཁའི་སྤྲིན་ལ་འཕྲིན་ཞིག་བཏང་།།

                             ༢༠༡༤/༠༣/༢༡ཉིན།