|
དུས་ཐོག་ཆར་བ།
བོད་མི་རིགས་ནི་དུས་ཆེན་ལ་གཙིགས་འཛིན་བྱེད་པའི་མི་རིགས་ཤིག་ཡིན་ལ། དུས་ཡུན་རིང་པོའི་ལོ་རྒྱུས་ཀྱི་ཆུ་རྒྱུན་ཁྲོད་བོད་མི་རིགས་ལ་ཐུན་མོང་དང་ཐུན་མོང་མ་ཡིན་པའི་དུས་ཆེན་མང་པོ་ཞིག་ཡོད་པར་མ་ཟད། ཆོས་དང་འཇིག་རྟེན་གཉིས་ཀའི་དུས་ཆེན་མང་པོ་ཞིག་ཀྱང་ཡོད་པ་དང༌། མདོ་དབུས་ཁམས་གསུམ་གྱི་ཡུལ་སྲོལ་གོམས་འདྲིས་དང་བསྟུན་ནས་དེ་ལ་རོལ་སྟངས་ཀྱང་སྣ་ཚོགས་ཤིག་བྱུང་ཡོད།
གཤམ་དུ་བོད་ཀྱི་དུས་ཆེན་སོ་སོ་མཚམས་སྦྱོར་རགས་བསྡུས་ཤིག་བྱེད་ན།
བོད་ཟླ་དང་པོའི་ཚེས་གཅིག
ཉིན་འདིར་དབུས་གཙང་དང་ཁམས་ཕྱོགས་ཀྱིས་བོད་ལུགས་ལོ་གསར་ལ་རོལ། གྲོ་སོ་ཕྱེ་མར་སོགས་མཆོད་པ་བཤམས། གླུ་ལེན་གར་རྩེ་བྱེད།
མདོ་སྟོད་དང་མདོ་སྨད་གཉིས་རྒྱ་རྩིས་ཀྱི་ལུགས་དང་བསྟན་ནས་ལོ་གསར་ལ་རོལ།ཉིན་འདིར་རྒྱ་ལོ་ཚེས་གཅིག་ཟེར་ཞིང༌།
ཟས་དཀར་གསུམ་མངར་གསུམ། ཤ་མར་ཐུད་གསུམ་སོགས་ཀྱིས་སྡེར་ཀ་བསྒྲིགས། མི་རྣམས་མགྲོན་དུ་འབོད། གླུ་ལེན་གར་རྩེ་བྱེད།
ལྷ་རྩེད་ཀླུ་རྩེད་དང་མདའ་རྩལ་འགྲན། འདི་ནས་ཚེས་བཅོ་ལྔའི་བར་ལོ་གསར་བྱེད། བག་མ་གཏོང་ལེན་ཡང་ཕལ་ཆེ་བས་འདིའི་རིང་ལ་བྱེད།
བོད་ཟླ་དང་པོའི་ཚེས་གཅིག་ནས་བཅོ་ལྔའི་བར།
དགེ་ལུགས་པའི་དགོན་པ་སོ་སོ་ན་སྨོན་ལམ་ཆེན་མོ་ཞེས་པའི་ཆོས་ཀྱི་མཛད་སྒོ་བསྡུ། དེ་ཡང་སྔོན་སྟོན་པ་ཤཱཀྱ་ཐུབ་པས་མུ་སྟེགས་སྟོན་པ་དྲུག་ཟླ་བ་འདིར་ཆོ་འཕྲུལ་བསྟན་ནས་བཏུལ་པས་རྗེས་སུ་རྗེས་འཇུག་རྣམས་ཀྱིས་ཟླ་འདི་ལ་ཆོ་འཕྲུལ་མཆོད་རྟེན་བཞེངས་པ་དང༌། རྗེ་རིན་པོ་ཆེས་སྦྱི་ལོ་༡༤༠༩ལ་སྨོན་ལམ་ཆེན་མོའི་སྲོལ་བཙུགས་པ་ནས་དར་བ་རེད།
འདི་ལ་རྒྱ་ལོའི་སྨོན་ལམ་ཡང་ཟེར།
བོད་ཟླ་གསུམ་པའི་ཚེས་བཅོ་ལྔ།
དགེ་ལུགས་པའི་དགོན་པ་ཁག་ཅིག་གིས་གསུམ་པའི་སྒྲུབ་མཆོད་ཅེས་པའི་མཛད་སྒོ་བསྡུ། སྔོན་སྟོན་པས་ཆོས་རྒྱལ་ཟླ་བཟང་གིས་ཞུས་པ་ལྟར་དུས་འཁོར་རྩ་རྒྱུད་ཉིན་འདི་ལ་གསུངས་པས་དགོན་པ་སོ་སོའི་དུས་འཁོར་གྲྭ་ཚང་གིས་དུས་འཁོར་སྒྲུབ་མཆོད་བཙུགས་ཡོད། དཀྱིལ་འཁོར་བཞེངས་པ་དང་སྦྱིན་སྲེག་ལྡག་པའི་སྲོལ་ཡོད།
བོད་ཟླ་བཞི་པའི་ཚེས་བརྒྱད།
དམངས་ཁྲོད་དུ་བཞི་པའི་མ་ཎིའམ་བཞི་པའི་སྨྱུང་གནས་ཞེས་པའི་མཛད་སྒོ་བསྡུ། འདི་ནི་ཚེས་བཅོ་ལྔ་ནས་བྱེད་པ་སོགས་མི་འདྲ། དགོན་པར་བཞི་པའི་ལྷ་མཇལ་ཞེས་པའི་ཆོ་ག་ཡོད། འདི་ནི་སྟོན་པ་སྐུ་འཁྲུངས་པའི་ཉིན་མོ་ཡིན་པས་དེ་ལ་རྗེས་དྲན་གྱི་ཕྱིར་དུ་དགོན་པ་སོ་སོ་ནས་དུས་རྒྱུན་སྒོ་མི་འབྱེད་པའི་ལྷ་ཁང་རྣམས་ཀྱང་ཉིན་འདིར་སྒོ་ཕྱེས་ཏེ་ལྷ་མཇལ་གཏོང་བའི་མཛད་སྒོ་བསྡུ། ཁམས་དར་མདོའི་གདན་ཐོག་གནས་སྐོར་བའི་ལོ་ཧྲིལ་པོའི་དུས་སྟོན་ཆེས་ཆེ་བ་དེ་ཡིན།
བོད་ཟླ་བཞི་པའི་ཚེས་བཅོ་ལྔ།
ཉིན་འདིར་བཟང་པོ་སུམ་འཛོམས་ཀྱི་ཉིན་མོ་ཟེར། དེ་ཡང་སྟོན་པ་ཤཱཀྱ་ཐུབ་པ་སྐུ་བལྟམས་པ་དང༌། སངས་རྒྱས་པ། ཡུལ་རྩྭ་མཆོག་གྲོང་དུ་མྱ་ངན་ལས་འདས་པ་བཅས་དུས་ཆེན་གསུམ་ག་བཞི་པའི་བཅོ་ལྔར་ཁེལ་བས་ཉིན་འདི་ལ་དགོན་པ་ནས་བཞི་པའི་སྨོན་ལམ་ཞེས་ཆོས་ལུགས་ཀྱི་ཆོ་ག་མཛད། ཡི་དམ་ཆོས་སྐྱོང་གི་འཆམ་རྒྱགགྲོང་པར་སྨྱུང་གནས་སྲུང༌། བཞི་པའི་མ་ཎི་ཞེས་གྲོང་སྡེ་སོ་སོས་མ་ཎི་དུང་མང་བསྒྲུབས་ཏེ་ཡ་རབས་ཀྱི་མཛད་སྒོ་བསྡུ།
གྲོང་པས་ཆོས་བསྐོར་ཀྱང་བྱེད།
བོད་ཟླ་བཞི་པའི་ཚེས་བཅོ་ལྔ།
ཉིན་འདིར་བོད་ལྗོངས་སྤོ་བོའི་སྤོ་ཆུ་ལུང་དྲུག་གཅིག་གྱུར་གྱིས་དུས་ཆེན་འདི་ལ་རོལ། དེ་ནི་དམག་དོན་དགྲ་ལྷ་གསོལ་བའི་བྱེད་སྒོ་ཞིག་ཡིན་ཞིང༌། འདས་པའི་དུས་ཤིག་གི་ཟླ་ཚེས་འདི་ལ་སྤོ་བོ་ཆུ་ལུང་དྲུག་གི་དམག་གཡུལ་སར་ཆས་ཤིང་ཐེངས་དེར་རྒྱལ་ཁ་ཆེན་པོ་བླངས་པ་དེ་ནས་ལོ་ལྟར་ཉིན་འདིར་དགྲ་ལྷ་གསོལ་བའི་བྱེད་སྒོ་སྤེལ་བ་ནས་རིམ་བཞིན་དུས་ཆེན་དུ་གྱུར། དེ་ནི་གཙོ་བོ་རྟ་རྒྱུག་མདའ་འཕེན་སོགས་དམག་རྩེད་འགྲན་སྡུར་དང་ཆབས་ཅིག་ཟས་གོས་ལོངས་སུ་སྤྱོད་པའི་དུས་སྟོན་ཞིག་ཡིན།
བོད་ཟླ་ལྔ་པའི་ཚེས་ལྔ།
ཉིན་འདི་ལ་ཨ་མདོའི་ས་ཆ་ཁ་ཤས་སུ་བ་མ་བ་བཞི་ཞེས་པའི་དུས་ཆེན་རོལ། སྔོ་ཚལ་གྱི་ཚོད་མ་བཟའ། འཁྲུས་ལ་འཇུག་སྒོ་ཁར་སྡོང་བོའི་ཡལ་གས་གཡོགས།
བོད་ཟླ་ལྔ་པའི་ཚེས་བཅོ་ལྔ།
ཉིན་འདིར་འཛམ་གླིང་སྤྱི་བསང་ཞེས་མཆོད་པ་ཆེན་པོ་བཞིའི་ཡ་གྱལ་དེ་ཐོན་པ་ཡིན། ཉིན་དེར་དབུས་གཙང་དུ་སྐུ་དྲག་དང་ཚོང་པ་ཆེ་ཁག་རྣམས་ཀྱིས་ཟླ་གཅིག་རིང་ལ་དུས་སྟོན་རྒྱ་ཆེར་ཤོམ་སྲོལ་ཡོད།
བོད་ཟླ་དྲུག་པའི་ཚེས་བཞི།
ཉིན་འདི་ནི་སྔོན་སྟོན་པར་ཚངས་པས་གསེར་གྱི་འཁོར་ལོ་དང༌། བརྒྱ་བྱིན་གྱིས་དུང་དཀར་གཡས་འཁྱིལ་ཕུལ་ཏེ་ཆོས་འཁོར་བསྐོར་བར་གསོལ་བ་བཏབ་པས་ཡུལ་ཝཱ་ར་ཎ་སིར་བཀའ་དང་པོ་བདེན་པ་བཞིའི་ཆོས་འཁོར་བསྐོར་བས། དེ་ལ་རྗེས་དྲན་གྱི་ཕྱིར་དགོན་པ་སོ་སོ་ནས་འདོན་པ་རྒྱས་པ་གསུང་པ་དང༌།
གོས་སྐུ་བཤམས་པ་སོགས་ཀྱི་ཆོ་ག་ཕྱག་ལེན་བྱེད།
བོད་ཟླ་དྲུག་པའི་ཚེས་བཅུ།
ཉིན་འདི་ནི་སློབ་དཔོན་པདྨ་བོད་ནས་སྲིན་ཡུལ་དུ་བྱོན་པའི་དུས་སུ་གྲགས་པས་རྙིང་མ་དང་བཀའ་བརྒྱུད་སོགས་ཀྱིས་ཚེས་བཅུའི་འདོན་འཚོགས་དང་འཆམ་སོགས་རྒྱས་པ་བྱེད། ཚེས་བཅུ་བདུན་ནས་ཉེར་ལྔའི་བར་དམངས་ཁྲོད་དུ་ལྷ་རྩེད་དང་ཀླུ་རྩེད་བྱེད།
མདའ་རྩལ་འགྲན། རྟ་རྒྱུགས་འགྲན། གོས་བཟང་པོ་གྱོན། ཤིང་སློང༌། བསང་གཏོང༌།
བོད་ཟླ་དྲུག་པའི་ཚེས་བཅོ་ལྔ།
ཉིན་འདིར་མདོ་སྨད་རྔ་བ་ཁུལ་དུ་རྫ་ཁྲོམ་དུས་ཆེན་རོལ། དུས་ཆེན་འདིའི་ཐོག་མའི་ལམ་སྲོལ་ནི་རྔ་བ་རྨེ་ཚང་གི་དཔོན་པོ་སྐལ་བཟང་གིས་ཕྱེས་ཤིང༌། རིམ་གྱིས་ཟླ་ལྔ་པའི་ཚེས་གཅིག་དེ་༡༩༨༥ལོ་ནས་བོད་ཟླ་དྲུག་པའི་ཚེས་བཅོ་ལྔར་བསྒྱུར། དུས་ཆེན་དེར་ཞིང་ཆེན་ཕྱི་ནང་ནས་ཐོན་པའི་རྫ་ཆས་མང་པོ་ཁྲོམ་རར་བཤམས་པས་མིང་དེ་ལྟར་ཐོགས་ཤིང༌། ཚོང་འདུས་རྒྱ་ཆེ་ཞིང༌། མི་རྣམས་མ་བསྡུས་གཅིག་ཏུ་འདུས་ནས་དུས་སྟོན་རོལ། ཉིན་འདི་ཙམ་ནས་མདོ་སྨད་བླ་བྲང་སོགས་ཡུལ་ཁ་ཅིག་ཏུ་ཤིང་སློང་གི་དུས་སྟོན་ཟླ་གཅིག་ཙམ་ལ་རོལ།
བོད་ཟླ་དྲུག་པའི་ཚེས་བཅུ་བདུན།
ཉིན་འདི་ཙམ་ནས་མགོ་བརྩམས་ཏེ་མདོ་སྨད་ཀྱི་རེབ་གོང་དང་ཁྲི་ཀའི་ཡུལ་དུ་དྲུག་པའི་གླུ་རོལ་ཞེས་པའི་དུས་སྟོན་རྒྱ་ཆེན་པོ་ཤོམ་སྲོལ་ཡོད། མི་ཐམས་ཅད་ཀྱིས་རྒྱན་གོས་རིན་ཐང་བྲལ་བ་གྱོན་ཞིང་ཟས་རིགས་གྱ་ནོམ་པ་ལ་རོལ་བར་མ་ཟད། ལྷ་གསོལ་བསང་གཏོང༌།
བདུན་ཕྲག་གཅིག་ལྷག་གི་རིང་བར་མ་ཆད་པར་རྩེད་མོ་རིགས་སྣ་ཚོགས་སྔར་སྲོལ་མ་ཉམས་པར་རྩེད་སྲོལ་ཡོད།
བོད་ཟླ་དྲུག་པའི་ཚེས་བཅོ་བརྒྱད།
ཉིན་འདིར་རྒྱལ་རོང་ས་ཁུལ་དུ་དབྱར་ཁར་ཇ་སྐོལ་ཞེས་པའི་དུས་ཐོན། ས་དེར་མཛེས་པའི་སྤང་ལྗོངས་སུ་རས་གུར་སྣ་ཚོགས་ཕུབ་སྟེ་ཟས་གོས་ལ་རོལ་ཞིང་སྦེ་ག་སོགས་འགྲན་པར་བྱེད།
བོད་ཟླ་བདུན་པའི་ཚེས་གཅིག
ཉིན་འདིར་ལྷ་སར་ཞོ་སྟོན་བྱེད། འབྲས་སྤུངས་སུ་ལྷ་མོ་བ་རྣམས་ཀྱིས་ལྷ་མོ་འཁྲབ་ནས་གཟིགས་མོ་འབུལ། སེ་རར་འཆམ་རྒྱག དེ་བཞིན་ཚེས་གཅིག་ནས་བཞི་བར་ནོར་བུ་གླིང་གར་ལྷ་མོའི་གཞུང་རྣམ་ཐར་མང་པོ་འཁྲབ། ཚེས་ལྔ་ནས་བདུན་བར་སྐུ་དྲག་ཆེ་ཁག་གི་སྐུ་སྒར་དུ་ལྷ་མོ་འཁྲབ། ཟླ་བ་བདུན་པར་ཞོ་ལེགས་པའི་དུས་ཡིན་པ་དང་ཞོ་འགྱེད་བྱེད་པས་ཞོ་སྟོན་ཟེར།
བོད་ཟླ་བརྒྱད་པ།
ཟླ་འདིས་ནང་དབུས་གཙང་དུ་འོང་སྐོར་རམ་ཆོས་སྐོར་རན་པ་ཡིན། དེ་ནི་ལོ་ལེགས་ལེན་ཁའི་སྐྱིད་ཅེས་ཡུལ་དེའི་འབྲོག་ཁུལ་དུའང་དུས་སྟོན་དེ་རོལ་སྲོལ་ཡོད།
བོད་ཟླ་དགུ་པའི་ཚེས་ཉེར་གཉིས།
ཉིན་འདིར་སྟོན་པ་སུམ་ཅུ་རྩ་གསུམ་པའི་གནས་སུ་བྱོན་ཏེ་ཡུམ་ལ་ཆོས་གསུངས་པ་དང་ཕྱིར་འཛམ་བུ་གླིང་དུ་བབས་པར་གྲགས་པས་ལྷ་བབས་དུས་ཆེན་ཟེར། འདི་ལ་དགེ་ལུགས་པའི་དགོན་པ་ན་དགུ་པའི་སྨོན་ལམ་ཞེས་པའི་མཛད་སྒོ་བསྡུ་བ་དང༌། རྟེན་མཇལ་བྱེད།
བོད་ཟླ་བཅུ་པའི་ཚེས་བཅོ་ལྔ།
ཉིན་འདིར་དབུས་གཙང་དུ་དཔལ་ལྷའི་རི་ཁྲོད་ཅེས་ལྷ་ལྡན་གཙུག་ལག་ཁང་གི་དཔལ་ལྷ་དང་གྲིབ་རྫོང་བཙན་གཉིས་ཞལ་འཛོམས་པ་ཡིན་ཟེར་བའི་དུས་སྟོན་ཐོན།ཉིན་དེ་བུད་མེད་ཚོས་རང་ཉིད་ཀྱི་དུས་སྟོན་ལྟ་བུར་བརྩི་སྲོལ་ཡོད།
བོད་ཟླ་བཅུ་པའི་ཚེས་ཉེར་ལྔ།
ཉིན་འདིར་དགེ་ལུགས་པའི་དགོན་པ་ན་བཅུ་པའི་ལྔ་མཆོད་ཆེན་མོ་ཞེས་པའི་ཆོས་ལུགས་ཀྱི་ཆོ་ག་མཛད་ཚུལ་ཡོད། དེ་ནི་དགེ་ལུགས་པའི་ཤིང་རྟའི་སྲོལ་འབྱེད་རྗེ་ཙོང་ཁ་པ་སྐུ་གཤེགས་པའི་ཉིན་ཡིན་པས་རྗེས་འཇུག་རྒྱལ་ཚབ་རྗེ་དང་མཁས་གྲུབ་རྗེ་གཉིས་ཀྱིས་དགའ་ལྡན་གདུང་མཆོད་ཆེན་མོ་ཞེས་ཀུན་ཏུ་གྲགས་པ་མཛད་པ་དང༌།མཆོད་པ་མཆོད་མེས་གླིང་བཀང་བས་གླིང་མེ་ཞེས་པ་བྱུང་ངོ་། །
བོད་ཟླ་བཅུ་གཅིག་པའི་ཚེས་གཅིག
ཉིན་འདིར་བོད་ལྗོངས་སྤོ་བོའི་ཡུལ་དུ་བྱིས་པའི་ལོ་གསར་གཏོང་མགོ་བརྩམས་པ་ཡིན། ཉིན་གཉིས་ཀྱི་རིང་ལོ་བཅུ་བཞིའི་མན་གྱི་ལོ་ཆུང་རྣམས་ལ་གང་དགའི་ཟས་གོས་དང་རྩེད་མོར་རོལ་དུ་འཇུག་སྲོལ་མཆིས།
བོད་ཟླ་བཅུ་གཉིས་པའི་ཚེས་གཅིག
ཉིན་འདིར་སྤོ་བོའི་ཡུལ་དུ་མི་ནག་ལོ་གསར་གྱི་དུས་སྟོན་ཡིན་ཞིང༌། དེ་ནི་ཡུལ་དེར་རྒྱ་ཆེ་ཤོས་ཀྱི་ལོ་གསར་ཞིག་སྟེ་སོ་ནམ་པའི་ལོ་གསར་ཡིན། འདི་ནི་ཕལ་ཆེར་བོད་ཟླ་དང་པོའི་སྐབས་སྤོ་ཡུལ་གྱི་སོ་ནམ་འདེབས་ལས་བྱེད་པ་ཡིན་པས་ལོ་གསར་གྱི་དུས་སྟོན་སྔོན་བསྣུར་བྱས་པ་ཡིན་འདུག་སྙམ།
བོད་ཟླ་བཅུ་གཉིས་པའི་ཚེས་ཉེར་དགུ།
བོད་ཁམས་སུ་དགུ་གཏོར་ཞེས་དགོན་ཁག་མི་ཉུང་བ་ཞིག་ཏུ་ལོ་འཁོར་གྱི་གདོན་བགེགས་བར་ཆད་སེལ་བའི་གཏོར་རྒྱག་ཆོ་ག་སྒྲུབ་སྲོལ་ཡོད།
| 