བཛྲ་ཚུལ་ཁྲིམས་རྒྱ་མཚོས།
        འདི་ནི་ངས་ང་རང་ལ་གདམས་པ་ཡིན།
མཆོག་གསུམ་གཏན་གྱི་སྐྱབས་ཡིན། །

གནས་ལུགས་དོན་གཉེར་གཞི་ཡིན། །

ལྷག་བསམ་སེམས་ཀྱི་བཅུད་ཡིན། །

རྩོད་ཉོག་སྤོང་རྒྱུའི་ཐལ་ཡིན། །

མ་དག་འཁོར་བའི་གནས་ནས། །

རང་སེམས་དག་པར་བསྲུང་ན། །

དྭངས་གཙང་པད་མའི་མདངས་ལ། །

སྨྲ་ངན་འདམ་གྱིས་ཅི་བྱེད། །

དམ་ཆོས་བདུད་རྩི་གཞིབས་པའི། །

ཆོས་པ་དག་མ་ཡིན་ན། །

བསམ་སྦྱོར་ངན་པའི་རྒོལ་བར། །

ཡ་ལན་སྤྲོད་དགོས་མི་འདུག །

རྒོལ་ལ་རྒོལ་ལན་སྤྲད་ན། །

རྒོལ་ངན་འཇག་རྩྭ་འཕྱུར་འཕྱུར། །

རྒོལ་བ་དབང་རྣོན་ཡིན་ན། །

ལུང་རིགས་གནད་ལ་འཁེལ་མོད། །

རྒོལ་ངན་ཡ་ཁོག་མེ་རེད། །

མེ་ལ་མར་སྣུམ་བླུག་ན། །

མེ་ལྕེ་དྲག་ཏུ་འབར་ནས། །

རྒོལ་བའི་སེམས་རྒྱུད་འཚིག་འགྲོ། །

དེ་བས་བློ་ཁོག་ཡོད་ན། །

རྒོལ་ངན་འཛུམ་གྱིས་བསུས་དང་། །

རྩོད་ངན་རང་སར་ཞི་འགྲོ། །

གནས་ལུགས་རྩོད་དགོས་མི་འདུག །

གནས་ལུགས་སེམས་ལ་བཟུང་ནས། །

གུས་ལུགས་ལུས་ལ་མངོན་པའི། །

ཆོས་མཐུན་གྲོགས་ཀྱི་སྙིང་གཏམ། །

ནམ་ཡང་སྙིང་ལ་ལོས་འཛིན། །

   

གནས་ལུགས་གནས་ལ་བཤད་དགོས། །

གནས་ལུགས་མི་མཐོང་མི་ལ། །

གནས་ལུགས་བཤད་ཀྱང་ཅི་ཕན། །

གནས་དང་གནས་མིན་ཤེས་དགོས། །