ཨ་མདོ་རྔ་བའི༼འབར་ཞུན༽ཚགས་པར་དང་ཁྲམ་རྟགས་དོན་རྐྱེན་གྱི་གསར་འགྱུར་ཆེད་བཀོད།
ངེད་དྲ་བའི་གསར་འགོད་པ་མགར་དམག
བདེན་པའི་དཔུང་རོགས།
ཅོ་ལེབ་ཟླ་བ།
སྤྱི་ཟླ་གཉིས་པའི་ནང་དུ་ཨ་མདོ་རྔ་བ་རུ་
གཏུམ་གཅོད་ཁྲག་བཞུར་གྱི་དོན་རྐྱེན་ཡ་ང་བ་ཞིག་བྱུང་སོང་།
གོ་ཐོས་ལྟར་ན་དེ་ནི་ཀ་ཤུལ་སྡེ་བ་སོགས་ཀྱི་རྒས་གཞོན་སྐོར་ཅིག་གིས་གྲི་དང་སྟ་རེ་ཐོགས་ཏེ་ན་གཞོན་སློབ་མ་ཞིག་ལ་འཇིགས་སྐུལ་དང་སྡུག་མོད་ཚ་ནན་བྱས་མཐར།
མི་སྣ་བཅུ་ཕྲག་འགས་ཁ་རུབ་ལག་རུབ་བྱས་ཏེ་གསར་བུ་སློབ་མ་དེའི་ཐོད་པར་གྲི་མཚོན་གྱིས་ཁྲམ་རྟགས་ཤིག་འཐེན་པ་རེད།
དེ་ལྟར་བྱེད་དོན་ནི་གསར་བུ་སློབ་མ་དེ༼
འབར་ཞུན༽ཞེས་པའི་ཚགས་ཤོག་ཅིག་གི་རྩོམ་སྒྲིག་པ་དང་རྩོམ་པ་པོ་ཡིན་པས་རེད་འདུག
ཁོ་བོས་གནས་ཚུལ་ལ་རྒྱུས་ལོན་བྱས་པ་ལྟར་ན།
ཚགས་ཤོག་དེའི་རྩོམ་སྒྲིག་པ་དང་རྩོམ་པ་པོ་མི་བཞི་འདུག་ལ།
ཁོ་ཚོ་ནི་སྤྱི་ཚོགས་ལ་འགན་འཁྲི་བླ་ལྷག་མངའ་བའི་ན་གཞོན་སློབ་མ་ལྕེ་གསུམ་པ་
དངོས་མིང་ལ་རིན་ཆེན། སྒང་གཤེན་སྨྱུག་དངོས་མིང་ལ་དབང་ལྡན། ཏོག་ཡུང་།
གཡུང་གོ་བཅས་རེད་འདུག
ཁོ་ཚོས་ཤེས་རིག་གི་ལྡང་ཀ་རྩེན་སའི༼འབར་ཞུན༽ཞེས་པའི་ཚགས་ཤོག་ཆུང་ཆུང་ཞིག་
གསར་སྤེལ་བྱས་ཏེ།
ཕ་ཡུལ་གྱི་དགོན་སྡེ་དང་སྤྱི་ཚོགས་ལ་འགན་ཁུར་གྱི་འདུ་ཤེས་བླ་རུ་བླངས་ཤིང་།
ད་ལྟའི་དགོན་སྡེ་དག་གིས་ལུགས་མེད་དང་། རུལ་སུངས།
སྒེར་གཅོད་སོགས་སྤྱི་ཚོགས་ཀྱི་ཟུར་རེ་རེ་ན།
སྐྱུག་བྲོ་བའི་དོན་དག་དག་མཐོང་དུས།
ན་ཟུག་དྲག་པོ་ཞིག་གིས་མ་བཟོད་པར༼འབར་ཞུན༽ཞེས་པའི་ཚགས་ཤོག་ཏུ་ཅོག་ལོ་དགོན་
དང་སྣང་ཞུགས་དགོན་གྱི་དྲང་བདེན་མིན་པའི་གནས་ཚུལ་དག་ལ་རང་གི་བསམ་ཚུལ་བཏོན་པ་
རེད་འདུག
ཐད་པར་གྲི་མཚོན་གྱིས་ཁྲམ་རྟགས་འཐེན་ས་དེ་ནི་གོང་གི་ན་གཞོན་བཞི་ཡི་གྲས་ཏེ་
ལྕེ་གསུམ་པར་འབོད་པའི་གསར་བུ་སློབ་མ་དེ་ཡིན་འདུག
མ་གཞི་ཁོ་ཚོས་བདེན་པ་ཞིག་དང་དགོན་པ་དང་སྤྱི་ཚོགས་ལ་འགན་ཁུར་བའི་གཏམ་དུ་
འཁུམ་ན་ཡང་།
རྨོངས་ཤིང་བརྟུལ་བའི་དམུ་བློ་བ་དག་ལ་ནི་གངས་རི་དཀར་པོར་ནད་མིག་གིས་བལྟས་
ཤིང་སྔོན་པོར་སྣང་བའི་དོན་ལས་ཅི་ལ་ཡོད།
སྤྱི་ཚོགས་འདི་ལྟར་ཡ་མ་བརླ་ཞིག་ཏུ་འཁུམ་པ་ནི་ཅི་ཡི་སླད་དུ་རེད།
རྒྱལ་ཁྲིམས་ཀྱི་དོ་དམ་མེད་ལ་དྲང་བདེན་དང་གནས་ལུགས་ཀྱི་མཁའ་དབུགས་དབེན་
ཞིང་། ཤེས་རྨོངས་ཀྱི་རྫོང་མཐུག་པས་ལན་འདུག
ཁོ་བོ་ལོ་དུ་མར་ལྟོག་སྐོམ་གྱི་ལས་མྱོང་སྟེ་ཕྱིར་སྤྱི་ཚོགས་སུ་གོམ་པ་འདེག་མ་ཐག་ཏུ།
ཟ་འཐུང་གསོལ་སྟོན་གྱི་ལོངས་སྤྱོད་ཅིག་ལ་མ་འཁྲེང་པར་ངའི་ཕ་ཡུལ་གྱི་འགྱུར་ལྡོག་དང་འཕེལ་རྒྱས་ལ་ལྟ་འདོད་ཀྱི་འདུན་པ་འགོག་ཏུ་མེད། ཡིན་ནའང་།
ངའི་ཕ་ཡུལ་དུ་ན་གཞོན་སེམས་ཤུགས་ཅན་དང་།
སྤྱི་ཚོགས་ལ་འགན་འཁྲི་མངའ་བའི་སྐྱེས་བུ་སྐོར་ཞིག་ལྟོས་བཅས་ཀྱི་ཆ་ནས་ཇེ་མང་
དུ་སོང་ཡོད་པ་དགའ་ཚོར་གྱི་གནས་ཤིག་ཅི་ལ་མིན།
ཟུར་གཞན་ཞིག་ནས་ཆོས་སྲིད་ཟུང་སྡེབ་ཀྱི་བག་ཆགས་རྙིང་བ་རོ་ལངས་བརྒྱབ་སྟེ།
བོད་སྤྱི་ཚོགས་ཀྱི་ལས་སྒོ་སྣ་ཚོགས་སུ་འདྲེ་ལག་བརྐྱངས་བའི་གནས་ཚུལ་འདིས་ཁོ་བོའི་ཕ་ཡུལ་གྱི་རེ་བ་ཆུ་ནང་ལ་གཡུག་སོང་། བླ་མ་དང་སྤྲུལ་སྐུ།
དགོན་སྡེ་དང་དགོན་སྡེ།
གྲུབ་མཐའ་དང་གྲུབ་མཐས་དབང་བསྒྱུར་རམ་དབང་རྩ་བསྟན་པའི་ཕྱིར།
ཁོ་པ་ཅགགིས་ལས་ཀྱི་སྦྱོར་བ་འདྲ་མིན་བརྩམས་ཤིང་སྒེར་གཅོད་དབང་བསྒྱུར་གྱི་
བསམ་བློ་མི་གཙང་གད་སྙིགས་ཀྱི་ཐ་རྡུལ་ཇི་བཞིན་ཕ་ཡུལ་གྱི་ངོ་གདོང་ལ་འཐིམས་
ཤིང་འཐིམ་གྱིན་འདུག
འདི་དག་མཐོང་ཐེངས་རེར་ཁོ་བོ་ཡུད་གཏིང་ནས་ཆད་ཅིང་བློ་ཕུགས་ནས་མུག
འུ་ཚོས་ནམ་ནམ་ཞར་ཞར་དུ་གཞན་གྱི་སྒེར་གཅོད་དང་།
བཙུར་གནོན་ལ་མཐའ་གཅིག་ཏུ་རྒོལ་བ་མ་ཡིན་ནམ།
ཁ་ནང་ལ་བསྐོར་དུས་འདི་འདྲའི་གཏུམ་སྤྱོད་ཅིག་སྤེལ་དགོས་པ་གང་ལ་ཐུག
གནད་ཀྱི་དོན་པོ་ནི་དོན་རྐྱེན་དེའི་གསར་བུ་ཧོལ་འགྲོས་ཅན་དང་མགོ་སྟོང་འགས་ལས་ཀྱི་སྦྱོར་བ་ཙམ་མ་ཡིན་པར།
དེའི་ལྟག་རྒྱབ་ཏུ་མི་ཆེན་དང་དཔོན་ཆེན་དུ་འབོད་པ་གང་རུང་ཞིག་གིས་རྒྱབ་བརྟེན་མེད་པའང་ངེས་པ་མ་མཆིས། ཡང་གཅིག་བཤད་ན།
འུ་ཚོའི་གནས་བབས་འདི་ལྟ་བུའི་དུས་ལ“ ནང་འགལ”འདྲ་མིན་བྱུང་བར་གཞན་དང་གཞན་འཛུམ་མོལ་ལེར“ གཞན་གྱི་རྒུད་པ་མཐོང་བ་ན།།
རང་ཉིད་དགའ་བའི་རྒྱུ་རུ་མི་གྱུར”བའི་ངེས་པའང་ག་ལ་ཡོད།
རང་དབང་དང་དམངས་གཙོ།
འདྲ་མཉམ་དང་བདེན་པ་ལ་ཁྱོད་པ་ཚོ་སྒེར་གཅོད་ཁྱུ་ཚོགས་ཀྱིས་ནམ་ཡང་དང་ལེན་བྱེད་
པ་དངངས་སྐྲག་སྐྱེ།
གལ་ཏེ་དེ་དག་དར་སོང་ན་ཁྱོད་པ་ཚོ་སྒེར་གཅོད་ཁྱུ་ཚོགས་ཀྱི་ཁེ་ཕན་མཐའ་དག་ལ་བརྡབ་གསིག་ཐེབས་པས་སོ། ། དོན་རྐྱེན་འདི་ཡང་དེ་ག་ནང་བཞིན་ལས་མ་འདས་ཏེ།
གལ་སྲིད་དགོན་པ་དམངས་གཙོ་ཅན་དང་འདྲ་མཉམ་ཅན།
རང་དབང་ཅན་དུ་གྱུར་ན་དགོན་གྱི་བདག་པོ་གཙོས་པའི་ལས་སྣ་དབང་ཤེད་ཅན་ཚོའི་ཁེ་ཕན་ལ་བརྡབ་གསིག་ཐེབས་པའོ། །
ཁོ་ཚོས་ཐབས་སྣ་མང་གིས་དད་ལྡན་གྱི་དམངས་རྣམས་རྨོངས་པ་ལས་རྨོངས་པར་གཏོང་བའོ། ། དེ་ནི་དམངས་རྣམས་ཇི་ལྟར་རྨོངས་ན་ཁོ་པ་ཚོས་དེ་ལྟར་བཀོལ་བདེ་ལ།
མཛུབ་མོ་གར་བསྟན་ཤར་ཡིན་པས་སོ། །
ཁོ་པ་ཚོས་སྨྲ་བརྗོད་རང་དབང་གི་ཞལ་ལྕེ་ཡོངས་སུ་གཅོད་འདོད་ནའང་།
སྨྲ་བརྗོད་རང་དབང་ནི་ཆེས་མ་མཐའི་འགྲོ་མིའི་རང་དབང་གི་རྩ་བ་ཞིག་ཡིན་པས།
ཇི་ལྟར་དགག་ན་དེ་ལྟར་ཡུན་གྱིས་ཉི་མ་ཤར་ཤར་དང་ཟླ་བ་ཚེས་ཚེས་སུ་འོང་བ་གདོན་མི་ཟའོ།།
མདོར་དྲིལ་ན་གནམ་འོག་ན་རང་དབང་དང་དམངས་གཙོ། འདྲ་མཉམ་དང་གནས་ལུགས།
བདེན་པ་དང་ཞི་བདེར་འབོད་པ་གཏོང་མཁན་རྣམས་ཀྱིས་གང་ཐུབ་ཐུབ་ཀྱིས་ལས་ཀ་ཏོག་ཙམ་རེ་གནང་དགོས་པ་དེའོ།།
ཁོ་བོར་མཚོན་ན་བདག་དབང་དང་སྲིད་དབང་སུ་ཞིག་གི་ཡིན་པ་གཙོ་བོ་མ་ཡིན་པར།
རང་དབང་དང་འདྲ་མཉམ།
དམངས་གཙོ་དང་བདེན་པ་ལ་ལྡོག་བརྫིས་གཏོང་མཁན་གྱི་སྒེར་གཅོད་བཙན་པོ་ཕྱི་ནང་གང་ཡིན་ཀྱང་།
ཁོ་བོས་མཐའ་གཅིག་ཏུ་རྒོལ་བ་རྒྱག་པའི་གནས་ཡིན་ནོ། །
འབར་ཞུན་ཚགས་པར་ལ་སྤྲངས་པའི་འཕྲིན།
མགར་མི།
གུས་པར་འོས་པའི༼འབར་ཞུན༽ཚགས་པར་གྱི་རྩོམ་སྒྲིག་པ་དང་རྩོམ་པ་པོ་རྣམ་པ་ལགས།
ཉེ་ལམ་ཁྱེད་ཅག་གི་མགོ་ཐོག་ལ་འོང་བའི་ཐ་ཆད་ཀྱི་ལས་དེ་གོ་མ་ཐག་ཞེ་གཏིང་ནས་ཨ་
ཁ་བསམ་བྱུང་།
དམུ་རྒོད་པ་དག་ལ་ཡི་ཆད་ཀྱིས་སྙིང་མི་བདེ་བར་རེ་ཞིག་ལྷག
དུས་ཀྱི་འགྱུར་བ་ལྡོག་ཏུ་མེད་པའི་ཆོས་ཉིད་ཀྱི་གདོང་པར་གྲིས་བསྣུན་ཏེ།
གྲི་ཁ་ནས་སྒེར་བསྡམས་དང་དད་པ་གླེང་བའི་ལས་འདི་ཁ་བའི་ཡུལ་གྲུ་ལ་གནའ་སྔ་མོ་
ནས་གནམ་སྔོན་པོར་སྤྲིན་ནག་གིས་སྒྲིབ་པ་བཞིན་ཤིན་ཏུ་རབ་ཏུ་མི་སྡུག་པར་གནས་
ཡོད་ཨང་།
བདེན་པ་ལ་འཇུག་པའི་ཕོ་རབ་དེ་ཚོར།
གྲི་དམ་ལ་འཆིང་སྟེ་ངར་རྫིག་བསྟོན་མཁས་པའི་རང་མྱི་ཐ་མལ་བ་དེ་དག་གི་རྩེད་ཆས་
སུ་གྱུར་བ་བསམ་མ་ཆད་པར་གནས་པ་འདིས་ང་ཚོར་ག་རེ་ཞིག་ལབ་སོང་ལ།
མ་འོངས་པའང་གནས་སྲིད་པར་བསམ་ན།
ང་ཚོས་གནས་ལུགས་ཀྱི་གོ་ཁྲབ་བསྐོན་ཏེ་འཐབ་པར་རྩོམ་དགོས་པས།
བདེན་པ་ཡི་དོན་དུ་མདའ་མདུང་གང་གིས་བསྣུན་ཏེ་སར་འགྱེལ་ཡང་ཞེ་རྩེད་ནས་མི་དགའ་
བ་ག་ལ་མཆིས།
གཏན་ནས་མ་མཆིས་སོ། །
དེ་ན་ཁོ་བོས་ལས་ཀྱི་འཇིགས་པ་འདི་ཉིད་ཕ་ཡུལ་དུ་བྱུང་བ་ཐོས་ཐོག
དཔལ་ཡོན་དང་ལྡན་པའི་བསམ་བློ་ལ་རེ་ཞིང་སྙེག་པ།
བརྩོན་ཞིང་རྩོད་པའི་ཚེ་འདིར་ནང་གི་སྒེར་གཅོད་ལ་རང་ནུས་ཀྱིས་རྩོམ་ཞིག་འབྲི་
འདུན་ཆེ་ཡང་།
བར་སྐབས་སུ་ས་མཐར་ཡོད་པས་འཕྲིན་ཐུང་འདི་བདེན་པ་དང་གནས་ལུགས་ཀྱི་ཕྱིར་རྒྱང་རིང་ནས་ཕུལ། ཉི་མ་ལྷ་ས་ནས།༢༠༡༤/༢/༢༧
གཞོན་ནུ་ཁྱེད་ཚོ་ལོ་རྒྱུས་ཀྱི་རྡོ་རིང་རེད།
ཨ་མདོ་བློ་གྲོས།
དེ་རིང་བདག་དབུས་ཉི་མ་ལྷ་ས་ན་ཡོད།
བདག་ལ་གློ་བུར་དུ་གནས་ཚུལ་ཞིག་འབྱོར་སོང་བ་ནི་རང་ཡུལ་ནས་དོན་དག་ཆེན་མོ་ཞིག་བྱུང་ཡོད་པ་གོ་ཐོས་བྱུང་སྐབས་སེམས་ཚོར་མ་བདེ་བའི་ཕྱིར་དུ་འཕྲིན་ཡིག་ཞིག་གི་ཚབ་དུ་གཏམ་ཐུང་བ་ཞིག་གི་གླེང་སློང་བ་ཡིན།
བདག་གི་གོ་ཐོས་ལྟར་ན་བོད་ཨ་མདོ་རྔ་བ་རྔ་སྨད་ཨ་ཁམས་ནས་ཡིན་པའི་གཞོན་སྐྱེས་ཤེས་ཡོན་ལ་དུང་བ་བཞིའི་འབར་ཞུན་ཚགས་པར་ཟེར་བ་ཞིག་སྤེལ་ནས་གནས་ཚུལ་བྱུང་བ་འདི་ལྟར་རོ། །གཞོན་སྐྱེས་དག་གི་མཚན། ཏོག་གཡུང། སྒང་གཤེན་སྨྱུག གཡུང་གོ ལྕེ་གསུམ་པ།
བརྩམས་ཆོས་སྤེལ་བའི་མཚན་བྱང་། ༼རང་དགོན་ལ་ཕུལ་བའི་སྙིང་གཏམ་གསེར་གྱི་ཐུག་པ།
དོན་ངོ་མའི་བསྟན་བཤིག་སུ་ཡིན་ནམ།
ཅོག་ལོ་གཙོས་སྣང་ཞིག་ཚང་ལ་དད་མོས་ཁེ་དབང་རྩོད་པ།
དགོན་པའི་ལམ་ལུགས་ནས་ཡོངས་ཁྱབ་རིན་ཐང་ལ་ལྟ་བ།
༽ནང་དོན་མདོར་བསྡུས།
རྩོམ་ཡིག་འདི་དག་དགོན་པའི་ལམ་ལུགས་དང་འབྲེལ་ནས་སྐྱེས་བུ་སྒེར་གྱི་ཐོབ་ཐང་
གཙོ་བོ་བཟུང་ནས་དགག་སྒྲུབ་རྩོམ་ཡིག་བཞིའི་གྲུབ་པ་ཞིག་ཡིན།
ཆག་སྒོ་བྱུང་བའི་རྐྱེན་རིམ།
རྩོམ་ཡིག་དེ་དག་འཇིག་རྟེན་ན་སྤེལ་མ་ཐག་མྱི་ཁ་ཤས་དངངས་ཚབས་
ཆེན་པོ་སྐྱེས་ནས།
དོན་དག་དེ་དངོས་ཤུགས་རྒྱུད་གསུམ་ནས་ཚགས་པར་དེ་ཕྱིར་བསྡུས་ནས་མེ་ལ་བསྲེག
ད་དུང་མི་ཡུལ་ན་ཚགས་པར་དྲུག་ཙམ་ཤོར་ཡོད་པ་དེ་ལོ་རྒྱུས་བདེན་དཔང་དུ་ཆགས་ཡོད།
གཉིས་པ་གཞོན་སྐྱེས་དེ་དག་ལ་མི་ཁ་ཤས་ཀྱིས་འཇིགས་སྐུལ་བ་དང་གནོན་ཤུགས་གང་མང་གིས་རང་ཁྱིམ་དང་གྱེས་ཏེ་རི་མགོར་བྲོས་བྱོལ་བྱས་པ་རེད་འདུག
དེའི་ནང་ནས་སྐུ་ཞབས་ལྕེ་གསུམ་པ་ཚང་གི་ཁྱིམ་དུ་གྲི་མཚོན་ཐོགས་པའི་མི་ཁ་ཤས་རྒྱུགས་ནས་གདོང་ལ་གྲི་ཡིས་རི་མོ་སོགས་བྲིས་ཡོད།
གནས་ཚུལ་དེ་དག་ཐོས་མ་ཐག་ཏུ་བདག་གི་སེམས་ངོར་རོ་མའི་སྒེར་གཅོད་ལོ་རྒྱུས་དང་ཉེ་སྔོན་བོད་ཀྱི་སྐྱེས་ཆེན་དམ་པ་དགེ་འདུན་ཆོས་འཕེལ་དང་ལུང་ཤར་བ་ཚེ་རིང་རྡོ་
རྗེ།
ད་དུང་སྡེ་སྲིད་སངས་རྒྱས་རྒྱ་མཚོ་སོགས་ཀྱི་སྐྱེས་ཆེན་གསེར་རིའི་འཕྲེང་འདྲ་བ་དག་གི་ལོ་རྒྱུས་ལས་སྐུ་ཚེ་སྨད་ཀྱི་སྐྱོ་གར་དེ་དག་དྲན་སོས་ཏེ་བསམ་གཞིགས་ཨེན་ཙམ་མི་བྱེད་ཐབས་མེད་བྱུང་། མཐར་རང་ཡིད་དུ་འཁོར་བ་ནི་སྐྱོ་གདོང་ཤུགས་ཆེན་དང་བཅས་ཏེ་གོང་གི་སྐྱེས་ཆེན་དེ་དག་དང་གཞོན་སྐྱེས་ཁོང་ཅག་འཇིག་རྟེན་དུ་སྐྱེ་བའི་དུས་མ་འདྲ་བ་ཙམ་ལས།
དོན་དུ་སྒེར་གཅོད་པ་དག་གི་ལུས་ངག་ཡིད་གསུམ་དུ།
དུས་ཚོད་དང་མིའི་རིགས་ཀྱི་ཤེས་རིག་ལོ་རྒྱུས་ཀྱིས་འགྱུར་བ་ཐེབས་མ་ཐུབ་པ་ཡིད་
རེ་ཕངས་ལ་བློ་རེ་འགྱོད་དོ།།
འབར་ཞུན་ཚགས་པར་དང་ལམ་གྱི་དཔུང་རོགས།
སྙུག་བཅུད་ལེན།
ཤེས་ཡོན་པ་གསོད་པ་ནི་མིའི་རིགས་ཀྱི་ཚེ་སྲོག་ཡོད་དོ་ཅོག་གི་ལག་དམར་དུ་གྱུར་ཡོད་པ་རེད་ལ།
རང་ཅག་ནི་ཤེས་ཡོན་པ་གསོད་མཁན་ཨང་དང་པོ་ཞིག་ཏུ་གྱུར་འདུག་པ་རེད།
ཁ་བྱང་གི་རྒྱབ་ཀྱི་དོན་དང་འབྲེལ་བའི་གཏམ།
གླེང་གཞི།
གནའ་བོའི་ཀེ་རི་སི་ནས་འགོ་འབུས་ཏེ་མིའི་རིགས་ཀྱི་ཞི་བདེ་དང་འདྲ་མཉམ་མ་ཡིན་པའི་འབག་བཙོག་གི་ཞིང་ས་ཆེན་མོའི་ཁྲོད་དུ་དམངས་གཙོའི་ལམ་ལུགས་ཀྱི་རྩི་ཤིང་སྣ་ཚོགས་སྨིན་པ་ནས།
དེའི་རླབས་རྒྱུན་གྱི་ཁུག་པ་དག་ཡོ་རོབ་ཀྱི་རིག་རྩལ་བསྐྱར་དར་དང་དེའི་གཞུག་
གི་འཛམ་གླིང་སྟེང་བསྟུད་མར་བྱུང་བའི། བློ་འབྱེད་ལས་འགུལ་དང་མི་
བུའི་ཐོབ་ཐང་གི་བསྒྲགས་གཏམ་སོགས་ཀྱི་བྱ་འགུལ་མང་པོ་ཞིག་ལ་བརྒྱུས་ནས།
འདྲ་མཉམ་དང་དྲང་བདེན་མ་ཡིན་པ་དག་བདེ་ལ་བཀོད་ནས་ཐོན་པ་རེད་ལ།
དེ་དག་ནི་མིའི་རིགས་ཀྱི་ཀླད་ཤུགས་ངལ་རྩོལ་ཁོ་ནར་བརྟེན་ཞིང་དཀའ་ལས་གྲངས་མེད་
མྱང་མཁན་གྱི་ཤེས་ཡོན་པའི་སྡེ་ཡིས་སྣ་དྲངས་ནས་བྱུང་བ་ཡིན་པ་དེ་སུ་ཡིས་ཀྱང་གཡོལ་མི་ནུས་སོ། །དེ་དང་འབྲེལ་འཛམ་གླིང་གི་མི་རིགས་མང་ཙམ་ཞིག་གི་ཁྲོད་ཤེས་ཡོན་པའི་བསམ་བློ་དང་སྐད་ཆ་དག་ཀློག་པོའམ་དེའི་འབྲེལ་ཡོད་མང་དག་ཅིག་གི་བློ་ཁོག་ཏུ་མ་ཤོང་པར་དམར་
གསོད་བྱས་སོང་བ་བགྲང་གིས་མི་ལངས།
དེ་བཞིན་དུ་རང་ཅག་བོད་ཀྱི་ཉེ་རབས་ལོ་རྒྱུས་ཁྲོད་དུའང་། ལུང་ཤར་དང་དགེ་ཆོས་རང་གྲོལ་སོགས་ཀྱིས་མཚོན་པའི་ཤེས་ཡོན་པའི་སྡེ་ཡི་བརྒྱུད་ལམ་དག་གིས་ཀྱང་ར་སྤྲོད་ཆེན་
པོ་བྱས་ཡོད་པ་རེད་ལ།
འདི་ལྟར་ཤེས་ཡོན་པའི་སྙིང་སྟོབས་དང་དམངས་ཀྱི་རྨོངས་བརྟུལ་གྱི་བར་ཐག་ལས་བསྐྲུན་པའི་ལོ་རྒྱུས་ཀྱི་སྐྱོ་གར་དག་གིས།
མི་རིགས་དང་རྒྱལ་ཁབ་གང་དག་གི་མ་རྩ་ཆེན་པོ་རྣམས་གཏོར་བཅོམ་བྱས་སོང་བ་དེ་བདེན་དུ་གྲུབ། དེ་ནི་ཏག་ཏག་ཤེས་ཡོན་པ་དེ་དག་གི་བར་ཐག་ཧ་ཅང་ཉེ་བའི་རྨོངས་འཐོམ་པ་དག་གིས་བསྐྲུན་པའི་ལོ་རྒྱུས་ཀྱི་སྐྱོ་གར་རེད་ལ།
དེ་ནི་ཆ་མ་སྙོམས་པའི་རིག་གནས་ཤིག་གིས་བསྐྱེད་པའི་ཤེས་ཡོན་པ་དང་དམངས་ཀྱི་བར་ཐག་ཏུ་བསྐྲུན་པའི་ལོ་རྒྱུས་ཀྱི་སྐྱོ་གར་རེད།
སྐབས་དོན།
ཉེ་རབས་ཀྱི་གསར་ལམ་ཁག་དང་ཇ་ཁ་ཆང་ཁ་གང་གི་ཁྲོད་ནས་ཀྱང་ཨ་མདོ་རྔ་བ་ནི་དཔའ་ངར་
ལྡན་ཞིང་བསམ་བློའི་ཕྱུག་པའི་དམིགས་བསལ་གྱི་ཡུལ་ལུང་ཞིག་ཏུ་ངོས་འཛིན་པར་གནས་ལ། ཨ་མདོ་རྔ་བའི་སྐྱེས་བུ་སྐོར་
ཞིག་གི་ལྷག་བསམ་དང་ཆོད་སེམས་ཀྱིས་བསླངས་པའི་རྐང་རྗེས་གང་ཞིག་གིས།
ཏག་ཏག་བོད་ཟེར་བ་འདི་འཛམ་གླིང་སྟེང་ངོ་ཤེས་སུ་བསྒྱུར་སོང་བ་རེད།
འོན་ཏེ།
དེ་ལས་ལྡོག་པའི་རྔ་བའི་གླེན་རྨོངས་པ་དང་སེམས་རྒྱ་དོག་པའི་ཐབས་སྡུག་སྐོར་
ཞིག་གིས་ཉེ་བའི་ལོ་འདི་འགའི་རིང་། རང་ཉིད་ཀྱི་ཁེ་ཕན་འབའ་ཞིག་
གི་དོན་དུ་རྔ་བའི་ཤེས་ཡོན་པ་དག་མཐའ་སྤྲོད་བཏང་བ་བགྲང་གིས་མི་ལངས་ཞིང་།
མངོན་ལྐོག་གང་རུང་ནས་ཤེས་ཡོན་པ་དག་དམར་གསོད་ཀྱི་སྦྱོར་བ་ཆེས་ཆེར་སྤེལ་བ་
རེད་ལ།
ད་དུང་རྔ་བའི་ཤེས་ཡོན་པའི་སྡེས་བསྐྲུན་པའི་དཔེ་དེབ་དང་བགྲོ་གླེང་བྱ་འགུལ་
སོགས་བགྲང་གིས་མི་ལངས་བ་ཞིག་ཚད་མཐོན་པོས་བཀག་འགོག་བྱས་པ་དང་།
དེ་དག་གི་སྡུག་ཡོས་འོག་ནས་རྔ་བའི་བོད་ཡིག་དཔེ་ཁང་དག་ཀྱང་ནང་མི་རང་གིས་མེད་
བརླག་དང་གཏོར་བཅོམ་གྱི་སྦྱོར་བ་ཆེས་ཆེར་སྤེལ་བ་དེ་ཧ་ཅང་ཡིད་སྐྱོ་བའི་ལས་ལམ་ཞིག་ཡིན།
དེ་བཞིན་དུ་ཐེངས་འདིར་ཡང་རྔ་བའི་ན་གཞོན་སློབ་སྦྱོང་བ་བཞི（ ལྕེ་གསུམ་པ། སྒང་གཤེན་སྨྱུག ཏོག་གཡུང་།
གཡུང་གོ། ）ཡིས༼འབར་ཞུན༽ཞེས་པའི་ཚགས་ཤོག་ཅིག་གི་འབྲེལ་ལམ་བརྒྱུད་ནས། རང་ས་རང་ཡུལ་གྱི་ཡུལ་མི་སྤུན་ཟླ་དང་ཕུ་ནུ་མིང་སྲིང་ཚོའི་འཚོ་བའི་རྒྱུན་ཐག་དང་ཧ་ཅང་འབྲེལ་ཆགས་པའི་དགོན་པ་གང་ཞིག་སྟེ“རྔ་བ་སྣང་ཞིག་དགོན” དང“རྔ་བ་ཅོག་ལོ་དགོན”གཉིས་ཀྱིས་མང་ཚོགས་དང་དགོན་པའི་བར་གྱི་་འདྲ་མཉམ་མ་ཡིན་པའི་སྦྱོར་ལམ་ཐད། ལྟ་ཚུལ་གང་ཞིག་རྩོམ་ཡིག་གི་ལམ་ནས་ལྷུག་བརྗོད་བྱས་པ་ལ།
དགོན་པ་དེ་གཉིས་ཀྱི་མང་ཚོགས་སྐོར་ཞིག་གིས་རྩོམ་པོ་གང་དེ་རྡུང་
རྡེག་ཚད་མེད་བྱས་ཤིང་།
ཡ་ཐོད་དུ་གྲི་ཡིས་ཁྲམ་རྟགས་རྒྱབ་པ་སོགས་གདུག་རྩུབ་ཀྱི་དྲག་ལས་ཧང་སང་བ་བྱས་
པས་མི་ཚད།
ད་དུང་ཁྱེད་ཚོས་དགོན་པ་ལ་མགྱོག་མྱུར་གྱིས་ངོས་ལེན་ཡི་གེ་མ་བྲིས་ཚེ།
ཁྱེད་ཅག་གི་ཁྱིམ་ཚང་དག་མེར་
བསྒྲོན་རྒྱུ་ཡིན་རབས་དང་།
ཁྱེད་ཅག་གི་ཤ་ཉེ་སྤུན་ཟླ་དག་གི་ཚེ་སྲོག་ལ་ཉེན་ཁ་བཟོ་རབས་སོགས་ཀྱི་འཇིགས་
སྐུལ་གྱི་སྦྱོར་བ་ཆེས་ཆེར་སྤྲད་པ་རེད།
འདི་ལྟར་རང་ཅག་གི་རྐང་ལམ་ནི་ཉམས་ང་ཡིད་སྐྱོ་བའི་གནས་བབས་འཇིགས་སུ་རུང་བའི་ཁྲོད་དུ།
ཆེས་ཧང་སང་བའི་གནད་ཀྱི་རྩ་བ་ཞིག་ནི་རང་ཅག་གི་ཡུལ་མི་སྤུན་ཟླ་དག་ནི།
ནང་མི་རང་གི་སྤུན་ཟླ་དག་གི་མགོར་ཐོན་དུས་
དཔའ་ངར་གྱི་སྤོབས་པ་གཟེངས་སུ་མཐོ་ཞིང་རྩུབ་དྲག་གི་ལག་རྩལ་ཆེས་ཆེར་མཐོ་བ་
རེད། ཏག་ཏག་ད་ནི་ང་ཚོས་བསམ་བློ་ཞིག་ཞིབ་ཀྱིས་གཏོང་མི་རན་ནམ།
འཇིག་ལ་ཉེ་བའི་འུ་ཚང་གི་སྤང་ཐང་སྐྱ་བོ་རུ་གསེར་མདོག་གིས་འཚེར་བའི་མེ་ཏོག་
ཁ་ཁེར་ཞིག་ཡོད་པ་དག་ཀྱང་ད་དུང་འདི་ལྟར་ནང་མི་རང་གིས་གཏོར་བཅོམ་བྱས་སོང་བ་ཡིན་ན།
ད་ནི་ང་ཚོས་སུ་དང་གང་དག་ལ་སྐྱབས་རེ་འཛིན་དགོས་པ་རེད།
ཀྭ་ཡེ་བདག་གི་སྙིང་ཉེ་བའི་གངས་ཅན་སྤུན་ཟླ་ཚོ་ཡ། རྟོགས་ཨེ་སོང་ལགས།
རེད་དེ།
ང་ཚོས་ཕར་གཞན་ལ་བལྟས་ཏེ་རང་སེམས་ལ་བསྐོར་བ་ཞིག་རྒྱབ་པ་ཡིན་ན།
དཔེར་ན།
ལོ་ངོ་ཉིས་སྟོང་ལྷག་གི་རིང་ཁ་འཐོར་དུ་གྱུར་ཀྱང་དཔའ་མ་ཞིམ་པར་ཧུར་བརྩོན་བྱས་འབྲས་སུ།
ད་ལྟ་འཛམ་གླིང་སྟེང་མཚན་སྙན་གྱི་གྲགས་པ་ཤུགས་ཀྱིས་འབར་བའི་རང་དབང་རྒྱལ་ཁབ་ཏུ་གྱུར་པ“ཡ་ཧུ་ཏྰ་པ་མི་རིགས”ལ་མཚོན་ན།
ཁོ་ཚོས་ཆེས་བརྩི་མཐོང་བྱེད་པ་ནི་ཤེས་ཡོན་ཅན་གསོ་སྐྱོང་བྱེད་རྒྱུ་དེ་ཡིན་པ་རེད་ལ།
དེ་འདྲའི་ལས་སྦྱོར་གྱི་མཇུག་འབྲས་ཀྱིས་ད་གཟོད་ཁོ་པ་ཚོ་དཔའ་མཛངས་གཉིས་ལྡན་གྱི་མི་རིགས་སྟོབས་ལྡན་ཞིག་ཏུ་གྱུར་སོང་བ་མ་ཡིན་ནམ།
རང་ཅག་བོད་ནི་དེ་ལས་ལྡོག་སྟེ་ཤེས་ཡོན་པ་མཐའ་སྤྲོད་དང་མེད་བརླག་བྱེད་པ་ལ་དགའ་མཁན་ཞིག་ཏུ་གྱུར་སོང་བ་དེ་ཅི་ཞིག་མ་འགྲིག་པ་རེད་ལགས།
འདི་ལྟར་སེམས་ཚེགས་དང་ཕང་སེམས་ཀྱི་ན་ཟུག་དག་ཚོར་བ་རྒོད་པོས་ངང་ཡིག་ངོས་སུ་ཕབ་
བཞིན་པའི་སྐབས་སུ།
ཁོ་བོས་གྲོགས་བླུན་པོ་སྨྱུག་ཐོགས་ཀྱི་སྐད་ཆ་ཞིག་དྲན་ཡོང་སྟེ། “⑴བོད་ལ་ཡོད་པ་ནི་ས་རེད་ལ། མེད་པ་ནི་མྱི་རེད།”ཟེར་བ་བཞིན།
ཏག་ཏག་བོད་ལ་ཡོད་པ་ནི་དགོན་པ་དང་གྲྭ་པ་ཡིན་པ་ལས།
མེད་པ་ནི་ཤེས་ཡོན་ཅན་རེད་འདུག
འདས་པའི་ལོ་རྒྱུས་ཁྲོད་ཕྱིར་རྟོག་ཅིག་བྱས་པ་ཡིན་ན།
བོད་ཀྱི་མཁས་པ་ཡིན་ཟེར་བ་མཐའ་དག་ཆོས་ལུགས་རྒྱུན་འཛིན་གྱི་རང་རློམ་མཁན་ཤ་
སྟག་ལས།
དོན་གྱིས་ཤེས་ཡོན་ཅན་རྣལ་མ་ཞིག་ཁ་ཁེར་ཞིག་ལས་འཁྲུངས་མྱོང་མེད་པ་རེད།
འོན་ཀྱང་།
ཁ་ཁེར་ཞིག་ཡོད་མྱོང་བ་དག་ཀྱང་འུ་ཅག་རང་གིས་ངན་ལམ་དུ་བརྫངས་སོང་བ་རེད་ལ།
དེའི་ནད་རོ་དེ་ད་ལྟ་ད་དུང་ཡང་ཤུགས་ཀྱིས་མཆེད་ཅིང་སྟོབས་ཀྱིས་འབར་བཞིན་ཡོད་
པ་མ་རེད་དམ།
མ་གཞི་གོང་གི༼འབར་ཞུན༽ཚགས་པར་གྱི་རྒྱབ་ནས་མཆེད་པའི་ཡིད་སྐྱོ་བའི་གནད་དོན་
དེས་ང་ཚོ་ལ་དྲི་རྟགས་ག་འདྲ་ཞིག་རྒྱབ་ཡོད་པར་བསམ་བློ་ཞིག་བཏང་བ་ཡིན་ན།
གོང་གི་རྡུང་རྡེག་བྱེད་མཁན་གྱི་མི་དག་ལ་རིག་གནས་ཤེས་ཡོན་གྱི་ཚད་གཞི་ག་འདྲ་
ཞིག་ཡོད་པ་རེད།
དེ་ཚོའི་བསམ་བློའི་གོ་རྟོགས་ཀྱི་ཚད་གཞི་ག་འདྲ་ཞིག་ཡིན་པ་རེད།
ད་དུང་རྩོམ་པོ་དེ་དག་གིས་དགོན་ཁག་གཉིས་ལ་ལྟ་ཚུལ་བཏོན་པའི་བྲིས་རྩོམ་གྱི་
བརྗོད་བྱ་དེ་འགྲིག་དང་མ་འགྲིག་གི་དབྱེ་ནུས་ཀྱི་ཚད་གཞི་ཅི་ཙམ་ཞིག་ཡོད་པ་
རེད། མེད་མོད།
མ་གཞི་ནས་འུ་ཅག་བོད་ཀྱི་མང་ཚོགས་དག་རྨོངས་པ་ཡིན་པས།
འདི་དག་ནི་དུངས་ཞེན་དང་ངོ་སོ་ཙམ་གྱི་དོན་དུ་ཧོལ་རྒྱུགས་ཀྱི་ཅལ་འགྲོག་བྱས་པ་
ལས།
དོན་གྱིས་ཁོ་ཚོར་རྩོམ་ཡིག་དག་དབྱེ་ཞིབ་ཀྱི་ནུས་པ་ཞིག་ཕར་བཞག
འགྲོ་མིའི་རྩིས་ཐང་དང་ཐོབ་ཐང་ཙམ་ལའང་བརྩི་བཀུར་བྱེད་ནུས་མེད་ཕྱིར།
བོད་ཀྱི་མང་ཚོགས་དག་ནི་དགོན་པའི་རྒྱུགས་ཁྱི་ཁོ་ནར་གྱུར་ཡོད་པ་རེད་ལ།
ཁོ་ཚོས་ཁྱུ་སྤྱང་ངན་འབྲེལ་གྱིས་བོད་ཀྱི་ཤེས་ཡོན་པའི་སྡེ་ལ་རྨ་ཁ་བཏོད་ཅིང་
མཐའ་སྤྲོད་གཏོང་གིན་ཡོད་པ་མ་རེད་དམ།
ལོ་ངོ་འདི་འགའི་རིང་དུ་རང་ཅག་ལ་ཅིག་ཡོད་པ་མཐའ་དག་གིས་རང་རང་ས་ནས་ཧུར་བརྩོན་
ཆེན་པོས། རང་དབང་དམངས་གཙོ་ཡི་ས་བོན་དང་།
རིན་ཐང་ལྟ་ཚུལ་གྱི་ཁ་དོག་ཡོད་ཚད་ནང་འདྲེན་གྱི་ལས་ལ་ཤུགས་ཆེན་རྒྱག་ཅིང་།
རང་ཅག་གི་ཁོར་ཡུག་ཆེན་པོའི་ཁྲོད་དུ་ལྟ་བ་མཉམ་གནས་དང་བསམ་བློ་དཀྱེལ་ཡངས་ཀྱི་
མཁའ་དབུགས་ཤིག་ལ་ཧུར་གྱིས་འབད་བརྩོན་བགྱིས་པ་ཡིན་ཞིང་།
རང་རང་སོ་སོའི་འཚོ་བ་དང་བདེ་སྐྱིད་མཐའ་དག་རྒྱབ་ཏུ་བསྐྱུར་ཏེ་ཡོངས་ཁྱབ་རིན་
ཐང་གི་སྒྲོམ་གཞི་བརྟན་པོ་ཞིག་ལ་ཚེ་སྲོག་ཀྱང་གཏའ་མར་བཞག་ཏེ་བརྩོན་ནའང་།
འདི་ལྟ་བུའི་ལས་སྦྱོར་དག་གིས་ནི་ཏག་ཏག་ཡོད་ཚད་སྨག་མེད་དུ་བརླག་གིན་ཡོད་པ་མ་
ཡིན་ནམ།
མཇུག་ཏུ་ཁོ་བོའི་རང་རྩོམ༼ ཞོགས་དུང་སྙིང་སྟོབས༽སུ་བཀོད་པའི་རྩོམ་ཡིག་ཅིག་གི་ཚན་པ་ཞིག་འདིར་བཀོད་དེ་མཇུག་བསྡུ་བར་བྱའོ།།
⑴འུ་
ཚང་ལ་ཡོད་མྱོང་བའི་དཔའ་བོ་དང་དཔའ་མོ་ཚོ་རང་གིས་བརླགས་ཤིང་།
འུ་ཚང་ལ་སྐྱེས་མྱོང་བའི་མཐའ་ཆོད་ཀྱི་བློ་མིག་ཅན་ཚོ་སྟེ། དཔའ་སྤོབས་ལྡན་པ།
སྙིང་རུས་ལྡན་པ། ཐབས་རྩལ་ལྡན་པ། བཤད་ཕོད་པ།
སྒྲུབ་ཕོད་པ། ལངས་ཐུབ་པ། འབོད་ཐུབ་པ།
བརྩོན་འགྲུས་ཆེ་བ།
ཕུགས་འདུན་རིང་བ།
མིག་རྒྱང་ཡངས་བ། འཇོན་ནུས་ཅན། ཡོན་ཏན་ཅན།
ཚན་རིག་པ་ལ་སོགས་ཐམས་ཅད་རང་གིས་ངན་ལམ་དུ་བརྫངས་ཤིང་། སྐབས་འདིར།
ཉི་འོད་ཀྱི་འདབ་མ་མེད་ས། ཚན་རིག་གི་འོད་མདངས་མེད་ས།
ལྷན་འཛོམས་ཀྱི་དཀར་འོད་ཙམ་ཡང་མེད་པའི་སྨག་རིམ་ཁྲོད་བགྲོད་དགོས་བྱུང་བ་འདི་
སུས་ཀྱང་ཤེས་གསལ་ལྟར་ཡིན་ཕྱིར།
ད་ནི་ང་ཚོས་བསམ་བློ་གཏོང་རན་པའི་དུས་ལ་ཐོན་ཡོད།
ད་ནི་ང་ཚོས་གོམས་ཁ་བསྒྱུར་རན་པའི་དུས་ལ་ཐོན་ཡོད་དོ།།
⑴ བླུན་པོ་སྙུག་ཐོགས་ཀྱི༼
རྐང་་བའི་སྒྲུང ༽ལས་དྲངས།
⑵ རང་རྩོམ ༼
འགྲོ་མིའི་ཐོབ་ཐང་གི་བསྒྲགས་གཏམ་དང་བོད་ཀྱི་ཆོས་ལུགས་པའི་སྒེར་གཅོད་ལམ་ལུགས། ༽
ལས་དྲངས།
ཁྲམ་རྟགས་དོན་རྐྱེན།
འཚིག
རིག་གནས།
རིག་གནས་སྣ་གཅིག་གིས་བསྡམས་པའི་མི་ལ་ཁོག་རྒྱ་ཧ་ཅང་ཆུང་།
དེ་ནི་རིག་གནས་ལན་པ་རེད་ལ་མི་སྒེར་རེ་རེ་ལན་པའང་རེད། བརྒྱ་ལ་མི་ཞིག་གསོན་པའི་གོ་རིམ་ཁྲོད་བྱུང་དང་འབྱུང་འགྱུར་གྱི་གནད་དོན་དེ་དག
རིག་གནས་སྣ་གཅིག་གི་རིན་ཐང་འཁྱེར་སྟངས་ཀྱིས་ཁེབས་མི་སྲིད་ལ།
ལྷག་ཏུ་"འཚོ་གནས་ཀྱི་ཕྱིར་དུ་མངོན་པར་རྒྱུག་གིན་པའི་"མི་སེར་ཡིན་པ་སྐད་ཀྱི་ང་ཚོའི་འཚོ་གནས་ཏེ། འཁོར་བ་སྡུག་བསྔལ་འབའ་ཞིག་ཏུ་ལྟ་བའི་ཆོས་ལུགས་ཤིག་གིས་ཇི་ལྟར་ཁེབས་ཨང་ལོ་རྒྱུས་ཁྲོད་རྐང་རྗེས་ནག་པོ་ཕབས་པའི་མྱི་རྣམས་ལགས།
མི་རྣམས་ཀྱིས་དུས་རབས་འདིའི་ཁྲོད་དུ་འཚོ་བ་སྐྱེལ་དུས།
རིག་གནས་གང་མང་གི་ཆ་དང་འབྲེལ་བ་ཡོད་པའི་གནད་དོན་བྱེ་བྲག་པ་ཏག་ཏག་འབྱུང་སྲིད་པས། དེ་དག་གང་ཡོད་ལ་རིག་གནས་སྣ་གཅིག་གི་རིན་ཐང་འཁྱེར་སྟངས་ལྟར་བལྟས་པ་ཡིན་ན་དེ་ནི་དགོད་སྤྱད་ཅིག་མ་ཡིན་ནམ།
སྒེར་གྱི་བསམ་ཚུལ་ལྟར་ན་མི་རྣམས་རིག་གནས་ག་གེ་མོའི་ཆེད་དུ་གསོན་པ་མ་ཡིན་པར། རིག་གནས་གང་ཡོད་མི་རྣམས་ཀྱི་འཚོ་བའི་ཟུར་རེ་རེར་ཞབས་ཞུ་སྒྲུབ་ཕྱིར་གནས་པ་ཙམ་མོ།
དེ་ལྟར་བལྟས་ཚེ་མི་རྣམས་ལ། རང་བྱུང་ཁྲིམས་ཀྱི་དགོངས་པ་དང་མ་འགལ་བའི་རང་ཉིད་དང་འབྲེལ་མ་འབྲེལ་གྱི་རིག་གནས་མཐའ་དག་སྲུང་སྐྱོབས་བྱེད་པའི་ཁེ་དབང་ཡོད་ལ། དེ་བཞིན་དུ་མི་རྣམས་ལ་རིག་གནས་གང་ཡོད་ལ་དགག་པ་དང་དབྱེ་འབྱེད་བྱེད་པའི་ཁེ་དབང་ཡོད་པའང་ཞོར་ལ་ཤེས་ཐུབ། སྦྱོར་བ་སྔ་གཞུག་གང་གི་སྐབས་སུའང་མི་དང་མི་ཕན་ཚུན་གྱི་བར་དུ། ཧ་ཅང་དཀྱེལ་ཡངས་དང་སྡང་སེམས་མེད་པར་གཟབ་ནན་དུ་ཡོང་ཐུབ་ན།
གནད་དེ་ལ་དཔལ་ཡོན་གྱི་རིག་གནས་གྲོས་བསྡུར་ཟེར་ལ།
རྣམ་པ་དེ་འདྲའི་འོག་ཏུ་དཔལ་ཡོན་ལྡན་པའི་རིག་གནས་དང་མི་ཡང་འབྱུང་སྲིད་པའོ།།
སྐད་ཆ་དེ་ལྟར་བཤད་ཆོག་མོད།
དོན་དངོས་དེ་ལས་གཟུར་འདུག་ནའང་ང་ཚོར་བློ་འགྱོད་སྐྱེ་མི་རིགས།
ཁྲམ་རྟགས་དོན་རྐྱེན།
"ཁྲམ་རྟགས་དོན་རྐྱེན་"ནི་རིག་གནས་དང་ལོ་རྒྱུས་འགྱུར་མཚམས་ཀྱི་རྡོ་རིང་ཞིག་གི་ཁ་བྱང་ཡིན། མི་གསོན་པོ་ཞིག་གི་ངོ་གདོང་དུ་"ཁྲམ་རྟགས་"ཤིག་ཕབས་འདུག་ཟེར།
ཁྲམ་རྟགས་ཕབས་མཁན་གྱི་མི་དེ་དག་གིས་ད་ལྟ་ཡོངས་སུ་རྒྱལ་ཁ་ལོན་སོང་བ་རེད་དམ།
ཉིན་ཤས་འགོར་བའི་དེ་རིང་ཁྱོད་ཚོས་ཅི་ཞིག་བསམ་གྱིན་ཡོད་པ་ངས་ཚོད་དཔག་དཀའ་ཡང་། ཁྱོད་ཚོས་ཕབས་པའི་"ཁྲམ་རྟགས་"དེ་ནི་ཁྱོད་ཚོས་ཕབས་པ་ཙམ་མ་ཡིན་པར་རིག་གནས་ཤིག་གིས་ཕབས་པ་ཡིན་པས། སྐད་ཆ་ཉ་ཉོག་འདི་བཤད་མཁན་གྱི་ང་ལ་ཁྱོད་ཚོར་སྡང་སེམས་ཅི་ཡང་མེད།
ཡིན་ཡང་ཁྱོད་ཚོར་བརྩེ་བ་ཞིག་སྐྱེ་འོང་། དེ་ནི་དུས་རབས་ཉེར་གཅིག་པའི་ཉི་འོད་ཐོད་ལ་བཞག་པའི་ཉི་མའི་དཀར་ངོགས་འདི་ནས།
ཁྱོད་ཚོ་རང་གི་མི་ཚེ་དང་འཚོ་བ་དེ་ཁྱོད་ཚོ་རང་ཉིད་ལ་དབང་གི་མི་འདུག་བསམ་པ་དེའོ།།
ཁྱོད་ཚོས་ཁྲམ་རྟགས་ཕབས་པའི་མི་དེ་ཡང་ཁྱོད་ཚོར་སྡང་སེམས་མེད་པར།
ཁོས་"ཁྲམ་རྟགས་"ཏེ་གདོང་ལ་ཁུར་ནས་ལོ་རྒྱུས་ཀྱི་ཀློང་དུ་སྔར་བཞིན་གཟི་བརྗིད་ཀྱིས་གསོན་པར། ང་ཡིས་རེ་བ་འཆིང་གི་ཡོད།
ལྕེ་གསུམ་པ།
རིག་གནས་དང་མི་སྒེར་གྱི་འབྲེལ་བ། དེ་གཉིས་ཕན་ཚུན་གྱི་བར་གྱི་དགོས་མཁོ་དང་། བེད་སྤྱོད་བྱེད་སྟངས་སོགས་ངོས་ཟིན་གསལ་བོ་མ་ཐོན་པའི་ས་གནས་དེ་དག་དང་མི་ཚོགས་དེ་དག"དཔལ་ཡོན་དུ་བསྐྱོད་པར། "རྨི་ལམ་ཟུར་གསུམ་རྨིས་མཁན་གྱི་ང་ཚོས་"མནར་གཅོད་གང་མང་མྱོང་དགོས་ཡོད།
དེ་ནི་ལོ་རྒྱུས་མདུན་སྐྱོད་ཀྱིས་ང་ཚོར་བསྩལ་བའི་རེ་བ་དང་ང་ཚོས་དཔེ་ཆ་བཀླགས་དང་ཀློག་པའི་ཡོང་འབབ་རེད། དེའི་ཕྱིར་ང་ཚོས་རང་ཉིད་ལ་ཡིད་ཆེས་བྱས་ན་རེད།
ཁྱོད་ཚོས་གཞི་ནས་དུས་རབས་དང་ལོ་རྒྱུས་ལ་བདག་པོ་བརྒྱབས་སོང་བ་རེད།
ས་མཐའ་འདི་ནས་མིག་ཟུང་བཙུམ་ན་ངོ་མི་ཤེས་པའི་ཁྱོད་ཚོའི་རྒྱབ་གཟུགས་མཐོང་ཐུབ། དེ་ནི་དཔལ་ཡོན་དང་དུས་རབས་ལ་འཕྱར་བའི་དར་ཆ་ཞིག་རེད། དར་ཆ་དེར་"ན་གཞོན་"ཞེས་བྲིས་འདུག
༢ / ༢༦ ཉིན་ས་མཐའ་ཞིག་ཏུ་འཚིག་གིས་སྦྱར།
རྔ་བ་ན་ཡི་གེ་བ་དག་ལ་མཚོན་གྱིས་བསྣུན་གྱིན་ཡོད།
བློ་མིག
ཉིན་
ཁ་ཤས་ཀྱི་སྔོན་དུ་ཕ་ཡུལ་རྔ་བ་ནས་ན་གཞོན་བཞི་ཡིས་གཙོ་སྒྲུབ་མཛད་པའི་འབར་ཞུན་
ཚགས་པར་སྟེང་དུ་སྣང་ཞིག་དགོན་དང་ཅོག་ལོ་དགོན་གཉིས་ཀྱི་ཆོས་མིན་སྲིད་མིན་
གྱི་སྣང་ཚུལ་མཐའ་དག་ལ་དགག་སྒྲུབ་བྱས་པའི་རྩོམ་ཡིག་རེ་འགའ་ཞིག་བྲིས་ཏེ་སྒོར་
བཀྲམས་རྗེས།ཡུལ་དེའི་མང་ཚོགས་སྐོར་ཞིག་རྩོམ་པོ་གཅིག་གི་ཁྱིམ་ལ་ཡོང་སྟེ།ཁོ་
སྒོར་དྲུད་དེ་ཐོད་པའི་སྟེང་དུ་གྲི་མཚོན་གྱིས་ཁྲམ་རྟགས་བརྒྱབ་པར་མ་ཟད།གཅར་
རྡུང་ནན་མོ་བྱས་པས་ཁོ་སྨན་ཁང་དུ་ཉལ་དགོས་བྱུང་ཡོད།ཁོའི་རྩོམ་གྲོགས་གཞན་པ་
གསུམ་ཡང་རང་ཁྱིམ་དུ་འདུག་ཐབས་མེད་པར་བྲོས་བྱོལ་གྱི་ཉི་མ་གཏོང་དགོས་ཐུག་ཡོད་
པ་རེད།
དེ་ལྟར་དུ་བཙན་པོར་འཕྲད་ན་མགོ་བོ་སྒུར་སྒུར་དང་།གཉོམ་ཆུང་ལ་འཕྲད་ན་གྲི་མཚོན་
གྱིས་བསྣུན་པའི་འཇིགས་སུ་རུང་བའི་གཡུལ་ས་ཞིག་དང་འདྲ་བའི་ཡུལ་དེ་ལ་ཀུན་གྱིས་
འདི་ལྟར་བརྗོད་ཀྱིན་ཡོད་དེ།
རྔ་བ་རྫོང་གི་མངའ་ཁོངས་སུ་དགོན་ཁག་བཞི་བཅུ་ཞེ་གསུམ་ལྷག་ཡོད་པའི་བྱམས་སྙིང་རྗེ་དང་། ཆོས་བསོད་རྒྱུ་བསོད་ཡུལ་གཞན་དང་མི་འདྲ་བ་ཡིན་ཞེས་པ། རྔ་བའི་ཡུལ་མི་གང་
གིས་ཀྱང་མ་ཐོས་པ་མེད་པའི་གཏམ་ཞིག་རེད།
འོན་ཀྱང་། དེའི་ཤུགས་ནས་བོད་ཀྱི་དགོན་པ་དག་ཡོད་པས་བོད་མི་རིགས་ནི་ཆོས་ལུགས་ཀྱིས་བསྐྱེད་འབྲས་ཤིག་ཏུ་ངོས་འཛིན་བྱས་ཏེ།
ཡུལ་གང་ལའང་དགོན་པ་ཅི་ལྟར་མང་ན་དེ་ལྟར་དུ་འགྲོ་བ་སེམས་ཅན་ལ་བདེ་སྐྱིད་ཀྱི་ཆར་
ཆུ་འབབས་པ་དང་། བྱམས་སྙིང་རྗེ་ཟེར་བ་ནི་དགོན་པ་དང་ལྷ་ཁང་མང་པ་ཙམ་གྱིས་གྲུབ་པར་སྣང་བའི་འདུ་ཤེས་ཤིག་ཡང་དག་འཁྲུལ་མེད་དུ་ངོས་འཛིན་གནང་དང་གནང་མུས་སུ་
ཡོད།
དོན་དམ་དུ་དེ་ནི་ཁ་གཡང་དང་མིང་དོན་གྱི་སྟོང་བ་ཉིད་ཁོ་ན་ཡིན་པས། སྣང་ཞིག་དགོན་དང་ཅོག་ལོ་དགོན་སོགས་གཙོས་བྱས་པའི་དགོན་པ་གང་གི་རུལ་སུངས་ལམ་ལུགས་ལ་སྐྱོན་བརྗོད་དང་དགག་པ་བཏང་ན། ནག་ཉེས་ནག་ཉེས་སུ་གཡར་དམ་མི་བྱེད་པར། དངོས་ཤུགས་བརྒྱུད་གསུམ་གྱིས་རྩོམ་པོ་གང་ཉིད་ཚར་གཅོད་ཚུལ་དང་། རྩོམ་པོ་གང་ལ་གཞན་གྱི་
གྲི་ཡིས་བསྣུན་ཏེ་ཁྲམ་རྟགས་ཕབ་པ་དང་གཅར་རྡུང་ཚབ་ཆེན་བྱས་ཤིང་། སྨན་ཁང་དུ་ཉལ་དགོས་པའི་ཚད་དུ་བསྐྱལ་བ།
རྔ་བའི་དགོན་པ་དག་ནི་ཆོས་ལུགས་སློབ་སྦྱོང་གི་རྨང་མཐུག་ཅིང་ཆོས་ལུགས་ཉམས་ལེན་ཡོད་པའི་ཁོར་ཡུག་ཅིག་ཡིན་ནམ། ཡང་ན་དགོན་པ་དག་ནི་ཆོས་ཀྱི་མིང་ཐོག་ནས་ཐུབ་པའི་ཞལ་རས་ལ་དྲི་ནག་བྱུག་པའི་ཤེས་རྨོངས་གྲོག་རོང་གི་གཡང་དུ་ལྷུང་བའི་ཚོགས་སྡེ་
ཞིག་མ་ཡིན་ནམ།
མདོར་ན། རྔ་བའི་ཕྱོགས་ཀྱི་དགོན་པ་དག་གཙོ་བོར་གྱུར་བའི་དགོན་པ་མང་ཅག་གིས་སྔར་གྱི་
གྲུབ་མཐའ་འཐབ་རྩོད་ཀྱི་མེ་རོ་སླར་གསོ་ཡིས་འདུན་པ་ཇེ་ཆེར་རྒྱས་ཏེ།ཅིག་ཅིག་གི་ལྷ་འབངས་དང་ཉིག་ཉིག་སློབ་བརྒྱུད་ཅེས་བསྒྲགས་གཏམ་སྤེལ་བ་དང་།མང་ཚོགས་ཀྱི་
ཡར་རྒྱས་ཀྱི་ཆེད་དུ་ཞེས་དགོན་ཁག་བཞི་བཅུ་ཞེ་གསུམ་རེ་མཉམ་འབྲེལ་གྱིས་སྲིད་
གཞུང་དང་མཉམ་པོར་མང་ཚོགས་ཀྱི་འགྲོ་འདུག་སྤྱོད་གསུམ་ལ་བཀག་འགོག་གི་གྲིབ་མག་
ཇེ་འཐིབ་ནས་ཇེ་འཐིབ་ཏུ་གྱུར་ཡོད་པ་སོགས།
བོད་
བརྒྱུད་ནང་བསྟན་གྱི་མ་འོངས་མདུན་ལམ་ལ་འོད་སྣང་གིས་ཁྱབ་པར་བྱེད་པའི་ལས་གང་
ཡང་མ་ཡིན་པར།མུན་ནག་རབ་རིབ་ཀྱི་གནས་སུ་བསྐྱལ་བའི་རྒྱུ་རྐྱེན་ཉག་གཅིག་ཡིན་
པས།དེང་གི་དུས་སུ་བོད་ནང་དུ་དགོན་པ་དང་སྲིད་གཞུང་མཉམ་འབྲེལ་བྱས་ཏེ་སྨྲ་
བརྗོད་རང་དབང་གི་ཆུ་མོ་ཐད་ཀྱིས་བཀག་པའི་གྲོས་བསྡུར་དང་གྲ་སྒྲིག་བྱས་ཏེ།ལག་
ལེན་གྱི་ཉི་མ་ཞིག་འཆར་ལ་ཉེ་བ་ཆེས་འཇིགས་སུ་རུང་བ་ཉིད་དོ། །
དེ་བས་དེང་གི་དུས་སུ་དགོན་པ་གང་གིས་གཏན་ཕུད་བྱས་པ་དང་།དགོན་པ་གང་ལ་དགག་པ་བཏང་
བ།དགོན་པ་གང་གིས་ཆོས་སྒོ་བརྒྱབ་པ་སོགས།དོན་གྱིས་བོད་བརྒྱུད་ནང་བསྟན་གྱི་ལོ་
རྒྱུས་ཁྲོད་དུ་སྐར་འོད་བཞིན་འཚེར་བའི་སྐྱེས་ཆེན་གང་ལ་ཁྲེལ་མེད་བྱས་པ་མིན་པ་
དང་།བོད་བརྒྱུད་ནང་བསྟན་གྱི་ཉིང་བཅུད་དང་ཕྱིའི་ལྕགས་རི་ལྟ་བུ་ལ་ངོས་འཛིན་
གནང་གིན་ཡོད་པའི་ཚད་མ་རྣམ་འགྲེལ་གྱི་གཏན་ཚིགས་རི་མོ་ལ་ནག་བསུབ་ཅི་ཡང་བྱས་པ་མ་ཡིན་པས།
དེ་ལྟ་བས་ན། དགོན་པ་དག་ནི་དེ་དག་སྲུང་སྐྱོབ་བྱེད་པའི་གནས་ཤིག་མ་ཡིན་པར་དེ་དག་གཏོར་བཤིགས་གཏོང་བའི་གནས་ཁོ་ན་ཉིད་དུ་གྱུར་བས། གལ་ཏེ་སུ་ཞིག་གིས་བོད་བརྒྱུད་ནང་བསྟན་ལ་ལྷག་བསམ་གྱི་དོ་ཁུར་སོགས་བྱས་ན། ནང་བསྟན་རུལ་སུངས་ཅན་དུ་གཏོང་བའི་ལམ་ལུགས་གང་ལ་དགག་པ་བྱས་པའི་མི་དག་ལ་གྲི་ཡིས་བསྣུན་ཏེ། ཐོད་པའི་སྟེང་དུ་ཁྲམ་རྟགས་བྱས་པ་ཙམ་གྱིས་གང་ཡང་མི་ཁོག་ལ་ཅི་ཡང་མི་སོད་ལ། དེ་བས་བོད་ཀྱི་དགོན་པ་དག་ནི་ཐོས་བསམ་སློབ་གཉེར་བྱེད་སའི་གནས་ཤིག་མ་ཡིན་པར།དབང་བསྒྱུར་མེ་ཏོག་གི་འདབ་བརྒྱ་བཞད་པའི་གནས་ཤིག་ཏུ་ངོས་འཛིན་གནང་ན་ཆོག་ཆོག་རེད།
གོ་ཐོས་ལྟར་ན་རྔ་བའི་དགོན་པ་དག་དང་སྲིད་གཞུང་གཉིས་མཉམ་འབྲེལ་བྱས་ཏེ། སྐྱ་ཁྲིམས་སེར་ཁྲིམས་ཤིག་འཇོག་གི་ཡོད་པ་རེད་ཅེས་བཤད་ཀྱིན་ཡོད་ཀྱང་། ཁོ་བོས་ནི་ཁྲིམས་ལུགས་མི་ཤེས་པའི་གྲྭ་རྒན་སྐོར་ཅིག་དང་ཁྲིམས་ལུགས་མི་བརྩི་བའི་དཔོན་པོ་སྐོར་
ཅིག་གིས་རང་སྣང་གང་ཤར་དུ་ལོག་ཁྲིམས་དང་བཙན་ཁྲིམས་གང་ཞིག་བཟོས་རུང་། གྲྭ་རྐྱང་སྨྱུག་འཛིན་པ་བདག་གིས་གཏན་དུ་རྒོལ་བར་བྱའོ།།
2014。2。26。ཉིན་རྔ་བའི་ཇ་ཁང་ཞིག་ཏུ་བྲིས།
བདེན་པ་སྲོག་གིས་བསྲུངས་པའི་དགེ་ཕན།
དགེ་ཆོས།
ཡེ་ལོ་ཉིས་སྟོང་བཅུ་གཉིས་ལོའི་ཟླ་བཅུ་བའི་ཚེས་དགུ་ཉིན་པཱ་ཅི་སི་ཐན་གྱི་སཱཝཐཱི་ལུང་གཞུང་དུ་ཡ་ང་བའི་དོན་རྐྱེན་ཞིག་བྱུང་བ་ནི། བྱིས་པ་ཆུང་ཆུང་ཞིག་གི་མགོར་མེ་མདས་བརྒྱབ་ཅིང་གཞན་ཁ་ཤས་ལའང་རྨས་སྐྱོན་ཚབས་ཆེན་བཟོས་པ་དེ་རེད། ཁོ་མོ་ནི་ཕྱིས་སུ་ཡེ་ལོ་༢༠༡༣ལོའི་ནོ་འབེར་ཞི་བདེའི་བྱ་དགའི་འོས་མིར་ཚུད་པ་དང་འགྲོ་བ་མིའི་ཐོབ་ཐང་གི་བྱ་དགའ་ལེན་མཁན། རྒྱལ་སྤྱིའི་བྱིས་པའི་ཞི་བདེའི་གསོལ་རས་ལེན་མཁན་སྐྱེས་མའི་སློབ་གསོ་འདྲ་མཉམ་དུ་འཐོབ་པར་རེ་བའི་རྩོད་ལེན་པ་མཱ་ལ་ལ་ཟེར་བའོ།། ཁོ་
མོས་ང་ནི་མཱ་ལ་ལ་ཡིན་ཞེས་པའི་མིང་ཐོག་ནས་སྐྱེས་མ་སྤྱི་དང་བྱིས་པ་བུ་མོ་ཚོས་
སློབ་གསོའི་གོ་སྐབས་འདྲ་མཉམ་དུ་འཐོབ་པའི་ཉིན་ཐོ་མང་དུ་སྤེལ་བས། ཏལིསབྷན་གྱིས་ཁོ་མོའི་མགོར་མེ་མདས་བརྒྱབ་སྟེ་མེད་པར་གཏང་རྩིས་བྱས་མོད། འོན་
ཀྱང་སྟབས་ལེགས་ཏེ་ཚེ་སྲོག་གི་མཆོད་མེ་མ་གཟིམས་པར་མ་ཟད་ཁོ་མོ་འཛམ་གླིང་ལ་
སྐད་གྲགས་ཆོད་པའི་སློབ་གསོའི་ཁེ་དབང་རྩོད་ལེན་པ་ཞིག་ཏུ་ཆགས་ཤིང་མཉམ་འབྲེལ་
རྒྱལ་ཚོགས་ཀྱི་སྤྱི་ཁྱབ་དྲུང་ཆེ་སྐུ་ཞབས་བྷན་ཀི་མོན་སོགས་ཀྱིས་ལོ་རེའི་ཟླ་
༡༡པའི་ཚེས་༡༠ཉིན་ནི་མཱ་ལ་ལའི་ཉིན་མོར་གཏན་ཁེལ་བ་རེད།
སྣང་ཚུལ་འདི་ལས་བལྟས་ན། གཅིག་ནས་ཏལིསབྷན་གྱིས་སེམས་སུ་ཁོ་མོ་གཅིག་པུ་མེད་པར་བཏང་ན་ཡོད་ཚད་མཇུག་རྫོགས་སོང་བར་འདོད་མོད། དེ་ལས་ལྡོག་པའི་སྣང་བ་འདིས་བདེན་པ་ནི་དུས་ཀྱི་སྔ་གཞུག་ལས་སུས་ཀྱང་འགོག་ཏུ་མེད་པ་ཞིག་ཡིན་ཚུལ་ངོ་སྤྲད་ཅིང་། འཇིགས་སྐུལ་བ་ཁོ་རང་དང་དེའི་རྒྱབ་ལོགས་ཀྱི་གཞུང་ངམ་ཆེ་གེ་མོ་དེར་མགོ་ཡར་འགྱོགས་མི་ཐུབ་པའི་ཕམ་ཁ་སྤྲད་ཚུལ་ནི་ཤེས་ནས་བསམ་མཁན་ཞིག་ཡིན་ན་གསལ་ལེར་མངོན་ཡོང་།
གཉིས་ནས་ཤེས་ཡོན་ནི་རལ་གྲི་ལས་རྣོ་དབལ་ཚ་བའི་ལག་ཆ་མཆོག་གྱུར་ཅིག་ཡིན་པ་ཧ་མ་གོ་ཞིང་། བདེན་པ་ནི་དད་པ་དང་དུང་ཞེན་གྱིས་འགེབ་མི་ཐུབ་པའི་ནོར་བུ་འོད་འབར་ཞིག་ཡིན་ཚུལ་མ་རྟོགས་པས་ཡ་ང་ཞེ་མེར་གྱི་དོན་བྱ་སྣ་ཚོགས་བྱུང་བ་དང་།
གདུག་རྩུབ་སྦྱོར་ངན་གྱི་ལས་འདྲ་མིན་ཡང་བྱས་པ་རེད་བསམ་སོང་།
འབར་ཞུན་ཚགས་པར་ཁྲི་ལོར་ཤོག
བཙན་སྒྲ།
ཉིན་འདི་གར་སྐད་འཕྲིན་གྱི་བར་སྟོང་གང་ཞིག་
ཏུ་གསལ་འགྱུར་འདི་འདྲ་ཞིག་སྤེལ་འདུག
བོད་ཨ་མདོ་རྔ་བའི༼ཨ་ཁམས༽སྡེ་བའི་གྲྭ་གྲོང་འདྲེས་མའི་ན་གཞོན་སྐོར་ཞིག་གིས༼
འབར་ཞུན༽ཞེས་པའི་ཚགས་པར་ཞིག་ཕུད་དེ་སྤྱི་ཚོགས་སུ་བཀྲམས།
དེ་བཀྲམས་མ་ཐག་རྩོམ་པོ་དག་ལ་རྡུང་རྡེག་དྲག་པོ་བྱས་པར་མ་ཟད་གྲི་མཚོན་གྱིས་
གདོང་ལ་ཁྲམ་བརྒྱབ་པ་སོགས་ཐ་ན་རང་ཡུལ་ལོང་པ་ན་སྡོད་མི་བདེ་བའི་གནས་སུ་བཅལ་
འདུག
ཚགས་པར་དེའི་ལངས་ཕྱོགས་དང་བརྗོད་དོན་གཙོ་བོ་ནི་ཆོས་ལུགས་སྒེར་སྡོམ་རང་ལུགས་
པ་དག་གིས་ཉམས་ང་བའི་སྤྱི་ཚོགས་ཤིག་གི་སྟེང་ལ་འདྲ་མཉམ་མིན་པའི་སྤྱོར་བ་རྩོམ་
གྱིན་པ་སེམས་ཀྱིས་མ་བཟོད་པའི་འོས་ལངས་ཤིག་རེད་འདོད།
དེ་ལྟར་ན་མི་ཞིག་གི་གཞི་རྩའི་ཁེ་དབང་ལོངས་སུ་སྤྱོད་ནས་དགོན་པ་ཆེ་གེ་མོ་དང་
བླ་སྤྲུལ་ག་གེ་མོ་རེ་རེའི་གདོང་ལ་འཛུབ་མོ་ཀེར་སྟངས་འདི་ནི་མི་སོ་སོའི་ལྟ་བ་
གླེང་སྟངས་དང་བདེན་པ་བརྗོད་ཚུལ་ཞིག་ཡིན་ལ་ཡིན་ཡང་དགོས།
ད་ལྟ་རྩོམ་པོ་དག་གིས་རྡུང་རྡེག་དྲག་པོ་སྨྱོང་སྟེ་ཕ་ཡུལ་གྱི་ལུང་པ་དང་རྒྱང་
དུ་གྱེས་དགོས་ལ་ཉེ་ནའང་ཁྱེད་ཚོའི་ཕམ་ཁ་མིན་ལ་ཁོ་ཚོའི་རྒྱལ་ཁ་ཞིག་ཀྱང་ཡིན་
མི་སྲིད།
ནམ་ཞིག་དུས་རབས་ཀྱིས་དཔང་བོ་བྱས་ཏེ་ཁྱེད་ཚོ་ནི་ལོ་རྒྱུས་ཀྱི་རྡོ་རིང་རེ་རེ་
ཡིན་ལ་ཡིན་པར་སྨོན།
ཁོ་བོ་ནི་རྟག་པར་དགོན་པ་དང་བླ་སྤྲུལ་གང་རུང་ལ་དད་ཡིད་རྩ་ནས་མེད་པའི་སྤྱིར་
བཏང་གི་མི་ཞིག་ཡིན་པས་དགོན་པ་དག་གི་ལམ་ལུགས་དང་བླ་སྤྲུལ་ཚོའི་སྤྱོད་ལམ་
སོགས་ལ་སྐད་ཆ་ཅི་ཡང་བཤད་འདོད་མེད་ལ་བཤད་པའི་དགོས་པའང་རང་ལ་མཚོན་ན་མེད།
རྒྱུ་མཚན་རང་ལ་མཚོན་ན་ཁོ་པ་ཅག་ལ་དད་པ་དང་ཡིད་ཆེས་རྩ་ནས་མེད་པས་སོ།།
གང་ལྟར་ཐེངས་འདིར་རང་ཉིད་དང་ལངས་ཕྱོགས་གཅིག་པའི་གསར་བུ་སྐོར་ཞིག་ལ་འདི་
འདྲའི་དཀའ་ངལ་ལ་ཕྲད་སྐབས་སེམས་ཀྱིས་མ་བཟོད་པར་ང་ནི་ཁྱེད་ཚོ་དང་མཉམ་དུ་ཡོད་
ཞེས་པའི་བརྡ་ཞིག་དང་།
འབྱུང་འགྱུར་ཡང་འདི་ལྟར་འགྲོ་དགོས་པའི་འབོད་སྐུལ་དང་རྒྱབ་སྐྱོར་ཞིག་གི་ཚབ་
དུ་བྲིས་པ་ལགས།
2014/2/27 ཉིན་སྟོད་ཉི་མ་ལྷ་སའི་གྲོང་ཁྱེར་དུ་ཤར་མར་བྲིས།
སྨྲ་བརྗོད་རང་དབང་ཁྲི་ལོར་ཤོག
ཁྲག་ཐིགས།
ནུབ་གླིང་པ་དག་གིས་སྨྲ་བརྗོད་རང་དབང་ནི་རང་དབང་ཀུན་གྱི་མ་ཡུམ་དུ་བརྗོད་ན།སུ་ལ་
སྨྲ་བརྗོད་ཀྱི་རང་དབང་དང་བྲལ་ཚེ།དེ་ནི་མི་ཕྱེད་ཀ་ཞིག་ཏུ་གྱུར་ཚར་བ་མ་ཡིན་
ནམ།
རེད་
དེ།ཆོས་ལུགས་སྒེར་གཅོད་དང་ཆབ་སྲིད་སྒེར་གཅོད་གཉིས་ཀྱི་ངོ་སོ་མཐོ་ཞིང་དེ་ཡི་
བསྟན་པ་རྒྱས་པའི་ཡུལ་གྲུ་དག་ནི།རྗེས་ལུས་དང་རྨོངས་འཐོམ་གྱི་སྤྱི་ཚོགས་འབའ་
ཞིག་ཡིན་པས།ཡུལ་ལུང་གང་ནས་སུ་ཞིག་གིས་མི་བུ་སྒེར་ལ་ལྷན་སྐྱེས་སུ་མངའ་བའི་
སྨྲ་བརྗོད་ཀྱི་ཐོབ་ཐང་སྤྱད་དེ།མི་སྒེར་གྱི་ལྟ་ཚུལ་དང་བསམ་ཚུལ་བརྗོད་ན།དེ་
ནི་མ་རུང་བདུད་ཀྱི་ལྟས་སུ་བཞག་ནས།གང་དེ་གསོད་བཅོམ་གྱི་ཐབས་ལ་བརྩོན་པ་མ་ཡིན་
ནམ། ཏག་
ཏག་གཟའ་འཁོར་གཅིག་ཙམ་གྱི་ཡར་སྔོན་དུ།ལྷ་སྡེ་དག་གིས་ལེགས་སོ་ཞེས་ཏེ་མགོ་བོ་
སྒུར་རྐྱང་དང་།སྐྱབས་གནས་སོ་ཞེས་ཏེ་དད་པ་གནང་རྐྱང་གིས་མཆོད་བཀུར་བྱེད་པའི་
དགོན་པ་སྟེ།རྔ་པ་སྣང་ཞིག་དགོན་དང་ཅོག་ལོ་དགོན་གཉིས་ལ།ཡུལ་དེའི་ན་གཞོན་སྙུག་
འཆང་པ་བཞི་ཡིས་མི་སྒེར་གྱི་ཐོབ་ཐང་སྤྱད་ནས།དགོན་པའི་རྣག་ཐུམ་འགའ་ལ་ཁབ་ཀྱིས་
གཙགས་ཏེ།དེང་རབས་ཀྱི་འགྲོ་ལུགས་ལྟར་<<འབར་ཞུན>>ཞེས་
པའི་ཚགས་པར་ཞིག་འགྲེམ་སྤེལ་བྱས་པ་ལ།ཡུལ་དེའི་དམུ་རྒོད་ཀྱི་སྤྱོད་པ་འཛིན་
པའི་གསར་སྨྱོན་སྐོར་ཞིག་གིས།མི་བཞིའི་ཁྲོད་ཀྱི་སྙུག་འཆང་པ་ལྕེ་གསུམ་པ་ཟེར་
བ་མཚན་མོ་བཙན་ཁྲིད་ཀྱིས་ཐོད་པར་གྲི་ཡིས་ཁྲམ་རྟགས་བརྒྱབ་པ་སོགས་གཅར་རྡུང་
བྱས་འདུག་སྐད་ཐོས་ལ།གཞན་གསུམ་ནི་བྲོས་བྱོལ་དུ་ཡོད་པར་བཤད། རེད་དེ། ངོས་
གཅིག་ནས་བལྟས་ན།འདི་ནི་འཇིགས་ཤིང་སྐྲག་པའི་གནས་ཤིག་རེད་མོད།ངོས་གཞན་ཞིག་ནས་
བལྟས་ན།འུ་ཚོའི་སྤྱི་ཚོགས་ནི་མ་གཞི་ནས་རྨོངས་པ་ཁོ་ནས་བཅིངས་ཡོད་སྟབས།རྨོངས་
པ་དཀྲོགས་ཕྱིར་ཀི་འདེབས་པའི་མི་དག་གི་མགོ་ལ་འདི་འདྲའི་སྡུག་འོང་པ་
ཡང་"རྒྱུན་ལྡན་"ཞིག་ཏུ་མི་བལྟ་ཐབས་མེད་རེད།དེ་བས།ངས་ནི་ན་གཞོན་སྙུག་འཆང་པ་"
ལྕེ་གསུམ་པ་སོགས་"ལ་བྱུང་པའི་དོན་དག་འདི་ནི།ང་ཚོའི་སྤྱི་ཚོགས་འདི་ནས་ད་སོ་
མར་མགོ་བརྩམས་པ་ཙམ་ལས་མཇུག་བསྡུས་པ་མིན་པས།དགག་སྒྲུབ་ལ་དགའ་བའི་ན་གཞོན་དག་
གིས་"དོན་རྐྱེན་འདིའི་རིགས་"ལ་གྲ་སྒྲིག་སྔ་མོ་ནས་ཡོད་པར་བྱ་འོས་སོ་ཞེས་པ་
དེ་ཡིན་ལ།"རང་དབང་རིན་པོ་ཆེ་"ནི་ངལ་མེད་རྩོལ་མེད་རིན་མེད་དུ་འཐོབ་མི་སྲིད་
པས།ང་ཚོས་རང་དབང་རིན་པོ་ཆེའི་དོན་དུ་རྔུལ་ཆུ་མང་པོ་འཛག་དགོས་པའང་མ་བརྗེད་
ཅིག །
ཞེས་
བྲན་རྒོལ་པ་ཁྲག་ཐིགས་ཀྱིས་"འབར་ཞུན་ཚགས་པར་"གྱི་རྩོམ་པོ་དག་ལ་དཔུང་པ་མཉམ་
གཤིབ་ཀྱི་ཚུལ་དུ་བླ་བྲང་གི་མགྲོན་ཁང་ཞིག་ནས་མགྱོགས་པོར་ཁ་པར་དུ་སྦྱར་རོ།།
སྐྱུག་བྲོ་བའི་གསར་འགྱུར་རིག་མ་ཐག
རྭ་རྩེ་དམར །
བདག་གི་དྲྭ་གྲོགས་རེ་འགའི་དྲྭ་ངོས་ལས་ཐོན་པའི་གསར་འགྱུར་དེས་
རེ་ཐག་ཆད་པའི་དབུགས་རིང་གཉོམ་པོ་ཞིག་གིས་ཡིད་སེམས་དམར་བོ་ཉོབ་ཏུ་ལྷུང་སོང་།
དེ་ནི་ན་གཞོན་པ་རེ་འགས་གཉེར་བཞིན་པའི་<འབར་ཞུན་ཚགས་ཤོག>སྟེང་
དུ་སྣང་ཞིག་དགོན་དང་ལྕོག་ལོ་དགོན་པའི་ལམ་ལུགས་རེ་ཟུང་ལ་ལྟ་ཚུལ་དང་སྐྱོན་
བརྗོད་བྱས་པས།
རྩོམ་པ་པོ་ལྕེ་གསུམ་ལ་རྡུང་རྡེག་ཚད་མེད་ཅིག་བྱས་ཏེ(
ཐོད་པའི་སྟེང་ལ་ཁྲམ་རྟགས) ཕབ་པ་དང་།
འཇིགས་སྐུལ་སྣ་ཚོགས་ཤིག་བྱས་ནས་དགོན་གོང་འགབ་གཉིས་ཀྱི་ལ་རྒྱ་བཟུང་ཡོད་སྙམ་
པའི་གླེན་པ་གླང་རྒན་ལྟ་བུ་ཚོ་ལ་མི་རིགས་ཀྱི་ལྟ་བ་དང་ཤ་ཞེན་མེད་པ།
རུས་རིགས་དང་འབྱུང་ཁོངས་སོགས་ཡེ་ནས་བརྗེད་པ།
རང་མགོ་རང་ཐོན་ལས་བསམ་རྒྱུ་མེད་པ་དག་གླེང་རིན་མེད་ནའང་།
དེའི་རྒྱབ་ལོག་ན( ངན་སྐུལ་བྱེད་མཁན)
ནི་དེ་ལས་ཀྱང་འཇིགས་སུ་རུང་བ་ཞིག་ཡིན་པས་མི་གླེང་ཐབས་མེད་ཅིག་རེད།
སྤྱིར་དམངས་ཚོགས་བདེ་བའི་ཕྱིར་དུ་དགོན་པ་གནས་པ་ཡིན་པས་སྡུག་ལ་སྦྱར་མཁན་ཞིག་
ཏུ་འགྱུར་ན་དེར་གནས་པའི་དགོས་པ་ཡེ་ནས་མེད།
དེའི་ཕྱིར་དམངས་སེམས་ཀྱི་སྡུག་བསྔལ་བསྐོང་བའི་སླད་དུ་དགོན་པ་གནས་པ་ལས་དགོན་
པའི་དཔལ་འབྱོར་གྱི་ཆེད་དུ་དམངས་ཚོགས་གནས་དགོས་པ་མ་ཡིན་པའི་དབྱེ་བ་གསལ་བོ་
ཤེས་དགོས་ཀྱང་དེང་སང་དགོན་པ་ཕལ་ཆེར་གྱིས་དམངས་ཚོགས་གླེན་རྨོངས་དག
ལས་ཀྱི་གནང་བས་བྲན་གཡོག་ཏུ་འདོད་དེ་གང་འདོད་དུ་བཀས་བཀོད་རྒྱུད་འཛིན་གྱི་ལམ་
ལུགས་བཞག་པ་དང་།
རང་དགོན་དང་གཞན་དགོན་ཟེར་ནས་ཕྱོགས་ཞེན་གྱི་མེ་ལྕེ་སྤྱི་བོར་ན་འབར་བའི་དགོན་
པའི་དབང་འཛིན་པ་ཚོས་ཉེས་པ་གནམ་གྱིས་མི་ཤོང་བའི་ངན་སྐུལ་བྱས་ཏེ།
ཉམས་ཆུང་བའི་སྒང་བ་བོད་པ་ཚང་ཁ་འཐོར་དགུ་འཐོར་དུ་གཏོང་པའི་དམིགས་ཡུལ་གཏིང་
ཟབ་ཀྱང་སྦྱོར་བ་དངོས་སུ་མཐོན་གྱིན་པ་ནི་ཇི་འདྲའི་སྐྱི་གཡའ་བ་འཇིགས་གེར་བ་
ཞིག་མ་ཡིན་ནམ།
ཨ་ཙི་ཅིས་ཕྱིར་དུ།
ཡང་དགོན་པ་ལ་ལས་དམངས་ཚོགས་ཀྱི་འཚོ་བ་ལ་ལག་བསྲིངས་ཏེ་གནས་ལུགས་མེད་པའི་
ཁྲིམས་ཀྱི་གཉའ་ཤིང་སྐོན་པ།
ལ་ལས་དགོན་པའི་མིང་བྱང་རྫིག་པོའི་སྟེང་ནས་དམངས་ཚོགས་ཀྱི་ས་ཞིང་དང་སྒོར་ཁྲི་
ཕྲག་གཡོ་ཐབས་ཀྱིས་བླངས་པ།
ལ་ལས་འགྱེད་ཕོགས་ལྷ་སྡེའི་སྟེང་དུ་བགོས་ཀྱང་ཁ་ལ་མི་ཤོང་བའི་ཚད་ལས་རྒལ་ཏེ་
ཁྲལ་གྱི་ངོ་བོར་བསྒྱུར་ནས་འབྱོར་མེད་དམངས་ཚོགས་རྣམས་དཀའ་ཚེགས་ཤིན་ཏུ་ཆེ་བ་
ནི་བརྗོད་མ་དགོས་སོ།།
དམངས་ཚོགས་ཀྱི་དཀའ་ཁག་དང་ལུགས་མེད་ཀྱི་ངོ་བོར་རྟོགས་མཁན་ནི་དེང་གི་དགོན་
སྡེའི་ཁྲོད་ན།
གནམ་མཁའི་པདྨོ།
ས་ཡི་འཇའ་ཚོན་བཞིན་དུ་དཀོན་པ་ནི་དགོན་པ་ཡར་དར་ཡར་རྒྱས་སུ་མི་འགྲོ་བའི་སྔ་
ལྟས་ཤིག་ཀྱང་ཅི་ལ་མིན།
སྤྱིར་དགོན་པ་ཆེ་ཆུང་གང་ཡིན་རུང་ལམ་ལུགས་ཡོད་ཚད་ནོར་འཁྲུལ་མེད་པ་ཞིག་མ་ཡིན་
ཏེ་ལྷག་ཏུ་གཏན་འབེབས་བྱེད་པའི་དབང་འཛིན་པ་ཚོར་ཚད་མའི་སྐྱེས་བུ་ཡིན་པ་སུ་
ཞིག་གིས་བསྒྲུབ་དཀའ་བས་གང་ཞིག་ནོར་འཁྲུལ་ཡོད་པ་དེ་སྐྱོན་བརྗོད་དང་སུན་
འབྱིན་བྱས་ན་ད་གཟོད་ཡོ་བསྲང་བྱེད་པའི་གོ་སྐབས་ཆོས་ཉིད་བདེན་པའི་བཏགས་ཤིང་
ཡར་རྒྱས་འགྲོ་བའི་སྟ་གོན་ཞིག་ལོས་ཡིན་སྙམ།
དེ་ཙམ་དང་ལེན་མ་ཐུབ་ན་ཀླད་མེད་གླེན་པའི་རང་གཤིས་ཡིན་པས་ཚོགས་པ་དང་དགོན་པ་
གང་དང་གང་གི་གྱོང་གུད་དང་ཉེས་ཅན་དུ་འགྱུར་འགྲོ་བས་གཞན་སུ་ཞིག་ལ་ངན་ཁག་འགེལ་
ས་མེད་པར་དངོས་པོའི་གཤིས་ལུགས་ཤིག་ཡིན་པར་རྟོགས་སློའོ།།
དགོན་པ་རེ་ཟུང་གིས་ཁོང་ལ་སྨད་ར་བྱས་སོང་ཟེར་ནས་གླུ་བ་ཞིག་ལ(གྱོད་རྒྱབ་བ)།
མཁས་ཆེན་ཞིག་གིས་གསུང་ཉེས་བྱས་སོང་ཟེར་ནས(
དཔུང་བསྒྲིག་པ)། ཚགས་པར་སྟེང་དུ་སྐྱོན་བརྗོད་བྱས་སོང་ཟེར་ནས(
ཐོད་པར་གྲིས་ཁྲམ་རྟགས་རྒྱབ་པ)
སོགས་ཀྱི་གནས་ཚུལ་བྱུང་ནའང་། དོན་གྱིས་གླུ་བ་ཞིག་གིས་སྨད་ར་དང་།
ཚགས་པར་སྟེང་གི་སྐྱོན་མཚང་དང་།
མཁས་ཆེན་ཞིག་གི་གསུང་ཚིག་དང་བཅས་པས། དགོན་པ་འཇིག་འགྲོ་བ། ཞིག་འགྲོ་བ།
འཐོར་འགྲོ་བ།
ཁ་ལས་ལྷུང་འགྲོ་བ། མི་ཁ་ཕོག་འགྲོ་བ།
གཞན་ཡིད་མི་ཆེ་བའི་གནས་སུ་བསྐྱལ་ཐུབ་ན་དགོན་པ་དེ་དང་དེའི་རིག་གནས་དེ་ཙམ་
ཞིག་ལས་ཀུན་ཀྱིས་མཐོང་ཆེན་དང་དོ་སྣང་རྒྱག་དགོས་པ་ཞིག་མ་ཡིན་ནོ།།
ལྷག་ཏུ་གང་ཞིག་གནས་ལུགས་དང་རིན་ཐང་ཡོད་པ་གཞན་མི་མང་གིས་ཚུར་བསྔགས་བརྗོད་
ཐོན་པ་ལས་རང་གིས་རང་ཡ་མཚན་ཞིག་ཡིན་ལུགས་དང་རིག་གནས་རིན་ཐང་ཆེ་རབ་ལོ་རྒྱུས་
ཡོད་རབ་སོགས་ཀྱི་ཁྱབ་བསྒྲགས་ཅི་ཐུབ་བྱས་པ་ནི་ཆུང་བྱིས་བློའི་རྭ་བ་ནས་མ་ཐར་
བའི་རྟགས་ཤིག་མ་ཡིན་ནམ།
༢༠༡༤/ ༢/ ༢༨
ཀླད་རྙིང་གི་གྲིབ་གཟུགས་ད་དུང་ཡལ་མེད།
ཨ་ཀླུ་སྒྲུབ།
ཉེ་ཆར་རྔ་སྨད་ཨ་ཁམས་ནས་དོན་རྐྱེན་སེམས་ལ་མི་འཆར་བ་ཞིག་བྱུང་།དེ་ནི་ན་གཞོན་
རྩོམ་པོ་བཞི་ཡི་སྣང་ཞིག་དགོན་པ་དང་ཅོག་ལོ་དགོན་པ་གཉིས་ལ་དགག་སྒྲུབ་དང་དོགས་
སློང་།བསམ་ཚུལ་དང་ལྟ་ཚུལ་ལ་ཤས་བརྗོད་པས།དགོན་པ་དེ་གའི་ལྷ་སྡེ་ནང་གི་ཅི་བསམ་
འདི་བསམ་མེད་པའི་གསར་བུ་འཕྲག་འཛིན་ཅན་བཅུ་ཡས་མས་ཤིག་གིས་ན་གཞོན་རྩོམ་པོ་
ལྕེ་གསུམ་པ་ལ་གཅར་བརྡུང་དྲགས་པོ་བྱས་པ་མ་ཟད་དཔྲལ་པའི་ངོ་ལ་ཁྲམ་རྟགས་བརྒྱབ།
འདི་ནི་དམ་པའི་ལྷ་ཆོས་དང་འཇིག་རྟེན་མི་ཆོས་ལས་ལུགས་ཀྱིས་ཡོངས་སུ་བརྒལ་པའི་
སྤྱོད་ངན་ཡིན་ལ།འདི་ནི་བོད་ཀྱི་བདེ་སྡུག་གིས་འཕྲལ་ཕུགས་གང་ལ་གཞིག་ཀྱང་།མནོ་
བསམ་ཇི་ལྟར་བཏང་ཡང་།ཐན་ལྟས་དང་མ་རུངས་པ་ཡིན་པ་ལས་གཟི་བརྗིད་དང་མཛད་རྫེས་
ཤིག་ག་ལ་ཡིན།བདེན་པ་རྒྱང་ཐག་རིང་དུ་གྱེས་པའི་སྣང་དགོན་དང་ལྕོག་དགོན་གཉིས་
ཀྱིས་བཟོས་པའི་ནག་ཁྲིམས་ལ་བོད་མི་རིགས་ཤ་ཚ་པ་དང་བློ་དཀར་པའི་མི་ཞིག་ཡིན་ཚེ་
དགག་པ་མི་གཏོང་པའི་རང་དབང་ཅི་ལ་ཡོད་ཨང་།གཞོན་རྩོམ་པོ་གསུམ་རི་འགོར་བྲོས་
བྱོལ་བྱིན་ནས་ཁོ་ཚོའི་ལག་ཏུ་ཡོང་ཐབས་བྲལ།དངོས་ཤུགས་བརྒྱུད་གསུམ་ནས་ན་གཞོན་
རྩོམ་པོ་དག་གིས་ཕ་ཨ་དང་ཉེ་དུ་སོགས་ལ་གནོད་ཤུགས་ཐེག་དཀའ་པ་དགོན་པ་དང་ལྷ་སྡེ་
སོགས་ཀྱིས་སྤྲད་ཡོད་པ་གསལ་བཤད་གང་ནས་དགོས། 20/14/2/26/ཉིན་བླ་བྲང་ནས་མགྱོགས་པོར་སྦྱར་རོ།
ཁྲམ་རྟགས་དང་ཁྱིམ་པ་སུན་འབྱིན།
ལྕེ་གསུམ་པར་ཁྲམ་རྟགས་དོན་རྐྱེན་ལས་འཕྲོས་པ།
གསའ་རང་འབར།
ཏག་ཏག་ཁ་སང་དེ་རིང་ནི་དགོན་སྡེའི་ལམ་ལུགས་ཀྱི་ཉོག་འཛིང་གི་དབང་གིས་དགོན་སྡེའི་
ན་གཞོན་པ་གྲྭ་རྐྱང་དག་གིས་སེམས་ཀྱི་ན་ཟུག་སྲོན་མ་ཐུབ་པར་བདེན་པའི་སྐད་ཆ་ཡི་
གེར་བརྒྱུས་ནས་སྤེལ་གྱིན་ཡོད་པས། ཁོ་བོ་གྲོང་མི་ཕལ་བ་ཞིག་གི་གཉོམ་གཤིས་ཀྱིས་བལྟས་ན་དེ་དག་ནི་དངོས་གནས་དགོན་སྡེར་གཅེས་ཤེས་མཁན་ཞིག་ཏུ་སྙམ། འོན་ཀྱང་གང་ཞིག་ན་བདེན་པའི་ལམ་བུ་ཡོད་ན་དེ་རུ་གཡོ་དང་སྒྱུ་མའི་སྐྱོ་གར་ཡོད་པ་བཞིན་དུ། དེ་རིང་དྲྭ་ལམ་ཁག་ན་རྒྱུ་བའི་གནས་ཚུལ་ཡ་ང་དེ་ཡང་སྐྱོ་གར་ལས་ཀྱང་སྐྱོ་སྐྱུག་བྲོ་བ་ཞིག་མ་ཡིན་ནམ། གནས་ཚུལ་དེ་ནི་གང་ཡིན་སྙམ་ན། ཕ་
ཡུལ་ཨ་མདོ་རྔ་པའི་ཨ་ཁམས་ནས་ཡིན་པའི་གྲྭ་བཙུན་ལྕེ་གསུམ་པ་སོགས་ལོ་གཞོན་ཁ་ཤས་
ཀྱིས་༼འབར་ཞུན༽ཚགས་དེབ་ཏུ་མདོ་སྨད་སྣང་དགོན་གཙོ་བོ་བྱས་པའི་དགོན་སྡེའི་ལམ་
ལུགས་ལ་བསམ་ཚུལ་ཙམ་བཏོན་པས་ལྕེ་གསུམ་པ་ལགས་ཀྱི་གདོང་ལ་དམུ་རྒོད་ལྟ་བུའི་
དམུ་རྒོད་སྐོར་ཞིག་གིས་གྲིས་ཁྲམ་རྟགས་རྒྱབ་པའི་གནས་ཚུལ་ཡ་ང་བ་བྱུང་འདུག་ལ་
ད་དུང་དེ་དང་འདྲ་བའི་གྲྭ་གཞོན་འགའ་ཞིག་རི་བྱོལ་སོང་འདུག
གནས་ཚུལ་འདི་ལས་ང་ཚོར་ཅི་ཞིག་བསྟན་ཡོད་དམ། ཆོས་ལུགས་པར་རློམ་པའི་ཆོས་པ་དག་གིས་ཁྱིམ་པ་སུན་འབྱིན་པའི་ལས་ཞེས་ཁ་ན་མ་ཎི་འདོན་བྱེད་ཀྱིན་འདུག་ལ། ཁྱིམ་
པ་སུན་འབྱིན་པའི་ལས་ཞེས་པ་ནི་ཁོ་བོ་ཁྱིམ་པ་བ་ཞིག་ཡིན་པའི་ངོས་ནས་བལྟས་ན་
ཁྱིམ་པ་སུན་འབྱིན་པའི་ལས་བྱེད་སྟངས་དེ་ནི་དངོས་གནས་མང་བ་ལའང་། མི་ཞིག་ལ་ལྷན་སྐྱེས་ཀྱི་ཐོབ་ཐང་ངམ་ལྷན་སྐྱེས་སུ་མངའ་བའི་མགོ་ལུས་ཕུང་གསུམ་ཡང་
མི་དབང་བར་ཁྲམ་རྟགས་རྒྱག་དགོས་པ་འདི་ཁྱིམ་པ་སུན་འབྱིན་པའི་ལས་ཞེས་སློབ་གསོ་
གཏོང་ཡུལ་ཞིག་གི་ལས་ཀ་ཡིན་ནམ། ཁྱིམ་པ་གཉོམ་ཆུང་ཞིག་བལྟས་ན་དེ་ནི་རབ་བྱུང་བ་ཞིག་གི་ལས་ཀ་ཕར་ཟད་ཁྱིམ་པ་སྤྱིར་བཏང་བ་ཞིག་གིས་ཀྱང་སྒྲུབ་མི་བཏུབ་པའི་ལས་ཤིག་མ་ཡིན་ནམ།
གཏམ་ཁ་འཆར་སྐྱུར་མོ།
གློག་དམར།
ཉེ་བའི་ཉིན་ཁ་ཤས་ཀྱི་ཡར་སྔོན་དུ་གྲོགས་པོ་ཞིག་གིས་ང་ལ་ཁ་པར་བཏང་འོང་ནས་ཁ་བརྡ་
ཆུ་ཚོད་གཅིག་ལྷག་ལ་བྱས་པ་ཡིན་ལ།སྐར་ཆ་འདི་དག་གི་རིང་གི་བརྗོད་དོན་ནི།ཕ་ཡུལ་རྔ་སྨད་ཨ་ཁམས་ནས་ཡིན་པའི་སྙུག་འཛིན་པ་ལྕེ་གསུམ་པ་གཙོས་སྙུག་གུ་བདེན་ལུགས་
ཀྱི་ཆེད་དུ་འགུལ་བར་བརྩམ་པའི་ན་གཞོན་སྐོར་ཞིག་གིས་བརྩམས་བསྒྲུབ་མཛད་པའི"འབར་ཞུན"ཞེས་པའི་ཚགས་ཤོག་ཅིག་སྤྱི་ཚོགས་ལ་བཀྲམ་ཞིང་།ཚགས་པར་དེའི་ཁ་གཏད་
ཡུལ་དང་དམིགས་འཁོར་ཕྱོགས་ནི།བོད་མངའ་རིས་ཞང་ཞུང་ཡུལ་གྱི་འོལ་མོ་ལུང་རིང་དུ་
བྱུང་བའི་བོན་པོའི་སྟོན་པ་གཤེན་རབ་མི་བོ་ཆེ་ཡི་གཅེས་ཕྲུག་ཀུན་གྱི་ཡང་སྙིང་
དུ་འབོད་པའི"སྣང་ཞིག་དགོན་དང་།ད་དུང་ཅོག་ལོ་དགོན་པ་གཉིས་ཀྱིས་ལྷ་སྡེ་ཚོར་བཞག་པའི་ལོག་ཁྲིམས་ཤིག་སྟེ།གྲུབ་མཐའ་གཞན་དང་ཆོས་རྒྱུད་གཞན་པར་ཕོ་མོ་གཉེན་
སྒྲིག་མི་ཆོག་པ་དང་།དགོན་པ་དེ་ནས་གྲྭ་ལོག་བྱས་ན་གྲྭ་ཚབ་དགོས་པ་སོགས་ཀྱི་
མཚོན་པའི་ལོག་ཁྲིམས་གང་མང་ཞིག་ལ་རྒོལ་བའི་ཚགས་ཤོག་ཅིག་ཡིན་སྐད།
ཚགས་པར་ཏེ་བཀྲམ་པའི་ཉིན་དང་དེའི་ཕྱིར་ཉིན་གང་ཡིན་ཆ་མཆིས་མོད།གང་ལྟར་མཚན་མོའི་རྨི་ལམ་གྱི་དབྱིངས་ལ་འཐིམ་སྒང་ཞིག་ཏུ།གོ་ཐོས་ལྟར་
ན་དགོན་པ་དེ་ཁག་གི་ལྷ་སྡེ་མི་སྡེ་ཡི་རྒན་གཞོན་སྐོར་ཞིག་གིས་འཚོ་གནས་དང་
བདེན་ལུགས་ཀྱི་ཆེད་དུ་ཀི་རིང་འདེབས་མཁན་གྱི་ལྕེ་གསུམ་པའི་ཡ་ཐོད་དུ་ཁྲམ་
རྟགས་ཤིག་ཕབ་ནས་སྨན་ཁང་དུ་ཉལ་ཞིང་།
གཞན་པ་གསུམ་པོ་གནས་ཚང་དྲོན་མོ་དང་ཁ་མི་གྱེས་ཀ་མེད་བྱུང་སོང་ངོ་། དེ་རིང་དེ་ཙམ་གྱིས་འཐུས་པར་བྱས་ཏེ་ད་དུང་འདིའི་སྐོར་གྱི་གནས་ཚུལ་གོ་ཐོས་བྱུང་ཚེ། མུ་མཐུད་དུ་བྲི་བར་བྱའོ།། ༢/༢༦ཉིན་བླ་བྲང་ནུབ་ཕྱོགས་གཙོད་མགྲོན་ཁང་དུ་སྤྱར་བའོ།།
ལྕེ་གསུམ་པ་དང་ཁྲམ་རྟགས།
བདེན་པར་རྒྱབ་ཀྱིས་ཕྱོགས་ཤིང་སྨྲ་ལྕེ་བཙན་གྱིས་གཅོད་པའི་ནག་ཉེས་ཐེར་འདོན།
སོ་རུ་ཐོཊ་མེད།
ཉིན་འགའི་སྔོན་དུ་གྲོཊ་པོ་ཞིག་གིས་ཁོ་བོར་བཤད་རྒྱུར་ཨ་མདོ་རྔ་སྨད་ས་ཁུལ་ཏེ། ཨ་ཁམས་ནས་ཡིན་པའི་ན་གཞོན་རྩོམ་པོ་ལྕེ་གསུམ་པ་ཟེར་བ་ཞིག་གིས་"འབར་ཞུན་ཚགས་ཤོག"ཏུ་རྩོམ་ཡིག་ཅིག་སྤེལ་འདུག རྩོམ་ཡིག་ནང་དུ་རྩོམ་པོ་གང་གི་བཤད་བྱ་གཙོ་བོ་ནི་སྣང་ཞིག་དགོན་དང་ཅོག་ལོ་དགོན་གཉིས་ལ་དགག་པ་བཏང་བའི་སྐོར་ཞིག་ཡིན་ལུགས་དང་། ཚགས་པར་དེ་སྤེལ་ནས་ཅུང་མ་འགོར་བའི་མཚན་མོ་ཞིག་ཏུ་རྩོམ་པོ་ལྕེ་གསུམ་པའི་གུད་དུ་མི་བུ་སྐོར་ཞིག་སླེབས་ཏེ། རྩོམ་པོ་ཁོང་ལ་རྡུང་རྡེག་ཚབས་ཆེན་ཐེབས་པར་མ་ཟད། ཐོད་པའི་སྟེང་དུ་གྲི་ཡིས་ཁྲམ་རྟགས་ཤིག་ཕབ་ཡོད་ལུགས་བཅས་གནས་ཚུལ་ཡ་ང་བ་ཞིག་ལབ་བྱུང་། ཡིན་ནའང་། གནས་ཚུལ་དེ་དག་རྫུན་གང་ཡིན་ཁོ་བོས་རེ་ཞིག་གི་ཚེ་ཐག་མ་ཆོད་པར་བཞག་པ་ཡིན།
རྗེས་མར་གནས་ཚུལ་དེ་ནི་དག་མ་ཡིན་པའི་རྒྱུ་མཚན་གསལ་བོ་རྙེད་ཐུབ་བྱུང་པ་མ་ཟད་ཚགས་ཤོག་དེ་ཡང་ཁོ་བོའི་ལག་ཏུ་འབྱོར་ཐུབ་པ་བྱུང་། ཁོ་བོས་བམ་ཀློག་ཅིག་བྱས་པ་ན་རྩོམ་གྱི་ཁ་བྱང་ལ་"ཅོག་ལོ་གཙོས་སྣང་ཞིག་ཚང་ལ་དད་མོས་ཁེ་དབང་རྩོད་པ" ཞེས་བཏགས་ཡོད་པ་དང་བརྗོད་དོན་དགོན་པ་དེ་གཉིས་ཀྱི་དབང་འཛིན་པ་ཚོས་མི་དམངས་སམ་ལྷ་སྡེ་ཚོ་ལ། གང་ལ་དད་དང་མི་དད་ཀྱི་རང་དབང་འཕྲོག་ཚུལ་བཤད་ཡོད་པ་དྲན་གྱིན་གདའ།
གང་ལྟར། ཡ་ང་བའི་དོན་རྐྱེན་དེ་ནི་བདེན་པ་ཡིན་པས་དོན་རྐྱེན་དེ་དང་དེ་འདྲ་ང་ཚོས་སྣང་མེད་དུ་འཇོག་ཡེ་ནས་མི་ཉན།
ལྷག་པར་རྩོམ་པོ་གང་གིས་བཤད་པའི་སྐད་ཆ་བདེན་པ་ཡིན་པ་དང་ཁ་གཏད་ཡུལ་གྱི་གང་ཟག་ཚོས་འདི་ནས་འཆུག་འདུག གན་ནས་ནོར་འདུག ཅེས་
ཨ་ལན་གང་ཡང་མེད་པར་སྨག་རུམ་གྱི་མཚན་མོ་ཞིག་ཏུ་གདུག་རྩུབ་སྤྱད་དེ་དཔྲལ་བའི་
སྟེང་ཁྲམ་རྟགས་བཀོད་པ་ནི་ཆེས་འཇིགས་སུ་རུང་བའི་སྦྱོར་བ་ཞིག་ཏུ་མི་རྩི་རང་
རྩི་རེད།
སྦྱོར་བ་འདི་དང་དོན་རྐྱེན་འདིས་ནི་རྩོམ་པོ་ལྕེ་གསུམ་པའི་གཏམ་བརྗོད་རང་དབང་བཀག་ཡོད་པ་སྨྲ་ཅི། བདེན་པ་དང་གནས་ལུགས་རྡོག་རོལ་བཏང་བའི་སྤྱོད་ངན་ཡི་མུག་པ་བཟོས་ཡོད་པའི་བྱ་ངན་སུ་ལའང་གསང་ཐབས་བྲལ།
ཏག་ཏག་སྤྱོད་ངན་ཚབས་ཆེན་འདི་རིགས་ནི་ང་ཚོ་སྙུ་གུ་འཛིན་མཁན་དག་གིས་མུ་མཐུད་གླེང་དགོས་པར་མ་ཟད་ས་ཁྱབ་རྡོ་ཁྱབ་བཏང་སྟེ། བདེན་རྫུན་གྱི་ཕུ་ཐག་ཅིས་ཀྱང་གཅོད་དགོས།
མཇུག་ཏུ། གནའ་
ནས་ད་རག་ལ་ཐུག་གི་དབར་བོད་པ་ཚང་གི་ལུང་བ་རེ་རེའི་ནང་དུ་དོན་རྐྱེན་དེ་དང་དེ་
འདྲ་ནི་ཆར་ཤུལ་གྱི་ཤ་མོ་བརྡོལ་བ་བཞིན་མཚམས་མི་ཆད་པར་བྱུང་དང་འབྱུང་གིན་པ་
ཡིན་པས། འདི་རིགས་ནི་ང་ཚོ་གཞོན་རབས་པ་སྟེ། སྒང་བ་བོད་པ་ཚང་ལ་ཤ་ཚ་བློ་དཀར་ཟེར་བཞིན་ནག་ཉེས་ཐེར་འདོན་མཁན་ཚོས་མ་བཤད་ན།
མཁས་རྒན་དང་བགྲེས་སོང་ཚོས་ནི་ཁ་ཡོད་ལག་ཡོད་ཀྱི་བདེན་པ་དང་གནས་ལུགས་སམ་ནག་ཉེས་ཤིག་གླེང་ཨེ་ཡོང་གི་རེ་བ་ནི། རི་བོང་ལ་རྭ་ཨེ་ཐོགས་སྙམ་པ་དང་གཅིག་པ་གཅིག་རྐྱང་ཡིན་པས་འདི་གཉིས་ཀྱི་ཧེ་བག་ང་ཚོས་ཅིས་ཀྱང་མཁྱེན་གལ་ཆེ།
༢༠༡༤ ༢ ༢༦ཉིན་ཁ་པར་དུ་བྲིས་སོ།།
ཡ་ང་བའི་གསར་འགྱུར།
བློ་བཟང་རྒྱ་མཚོ།
ཡ་ང་བའི་གསར་འགྱུར་ཡ་མཚན་ཞིག་དྲྭ་ཐོག་གང་སར་ཚ་ཚ་འུར་འུར་གྱིས་སྤེལ་གྱིན་འདུག་ལ། གནས་ཚུལ་དེ་ལ་རྒྱུས་ལོན་ཞིག་བྱས་ཚེ། གནས་
ཚུལ་དེ་ཨ་མདོ་རྔ་བ་སྨད་ཀྱི་ཨ་ཁམས་ཟེར་བའི་ཡུལ་དེའི་ལྕེ་གསུམ་པ་ཟེར་པའི་ན་
གཞོན་ཞིག་གིས༼ཅོག་ལོ་གཙོས་བའི་སྣང་ཞིག་ཚང་ལ་དད་མོས་ཁེ་དབང་རྩོད་པ༽ ཞེས་
པའི་རྩོམ་ཡིག་ཅིག་གི་ནང་དུ་དགོན་ཁག་གཉིས་ཀྱི་དབང་འཛིན་པ་དག་གིས་སྤྱི་དོན་ཁ་
ལ་འཁྱེར།
རང་དོན་ཁོག་བཅུགས་བྱས་ཏེ་མི་སེར་དཀྱུས་མ་ཚོར་ཆོས་དད་ཀྱི་རང་དབང་འཕྲོག་ཚུལ་
སྐོར་གྱི་གནས་ཚུལ་ཞིག་བྲིས་འདུག མི་དམངས་ཀྱི་ཆོས་དད་རང་དབང་ནི་རང་དབང་ཡོངས་ཀྱི་སྐྱེད་མ་ལྟ་བུ་ཡིན་སྟབས།
དེའི་སླད་དུ་བསམ་ཕོད་པ་སོགས་ཕོད་པ་གསུམ་གྱིས་བདེན་དོན་གྱི་སླད་དུ་སྐད་ཆ་འགའ་བཤད་པ་དགོས་ངེས་ཀྱི་ལས་འགུལ་རླབས་ཆེན་ཞིག་རེད། ཡིན་
ན་ཡང་ཁོའི་ཡང་དག་པའི་བསམ་ཚུལ་དང་རྦད་དེ་གོལ་འཛོལ་ནས་མི་དམངས་ཀྱི་ཤ་ཁྲག་གིས་
སྐུ་ཤ་རྒྱས་པའི་སྒེར་གཅོད་པ་དག་གི་རྗེས་འབྲངས་རྒྱུགས་ཁྱི་བསམ་མེད་སྐོར་ཅིག་
གིས་ཁ་མ་ཐོན་གོང་ནས་ལག་བརྐྱངས་ཏེ་མཚན་མོ་ཞིག་ལ་ལྕེ་གསུམ་པའི་གདོང་ལ་གྲི་
ཡིས་ཁྲམ་རྟགས་བཀོད་པའི་བློ་ཡུལ་ལས་འདས་པའི་ངུ་ལྷུག་པའི་དོན་དག་ཞིག་བྱུང་
འདུག
ཡ་ང་བའི་དོན་དག་འདིའི་རྒྱབ་མདུན་ལ་ཅུང་ཙམ་བསམ་གཞིགས་བྱས་ཚེ། རྒྱ་
ནག་གིས་བོད་ལ་རང་དབང་འཕྲོག་ཅིང་བཙན་གནོན་གྱིས་སྡུག་སྦྱོང་མནར་གཅོད་མི་
སྤྱོད་ལས་འདས་པ་བཏང་དང་གཏོང་བཞིན་ཡོད་པའི་གནས་ཚུལ་ཐོས་པ་ལས་ཀྱང་བདག་གི་
སྙིང་ཁམས་སུ་ཟུག་གཟེར་གྱི་ཚོར་རླབས་དྲག་ཏུ་འཕྱུར། གཞན་
དག་གི་ལག་ནས་རང་དབང་ཐོབ་སོང་ན་ཡང་སྒེར་གཅོད་པ་དག་གི་ལག་ནས་རང་དབང་ད་དུང་
བསྐལ་བ་ཞིག་ལ་འཐོབ་པར་དཀའ་སྙམ་པའི་སྐྱོ་སྣང་ཞིག་དང་བཅས་ཏེ་འབྲི་མཚམས་འདི་
ནས་བཞག་གོ། དུས་ཀྱི་སྔ་ཕྱི་ཙམ་ལས་ང་ཚོ་གཞོན་རབས་དག་ལ་གོ་རྟོགས་ཤིག་སད་ངེས་ཡིན་ནོ།
རྔ་བ་རྫོང་ཨ་མ་ལགས་གསོལ་འགྲོན་ཁང་གི་སྒེའུ་ཁང་འགྲམ་ནས་ཤར་མར་བྲིས་པའོ། ། ༢༠༡༤/༢/༢༤
ཡི་གེ་བས་གཏམ་ཤོད།
ཁྲམ་རྟགས་རྒྱབ་ཀྱི་བདེན་པ་ལ་གློ་བ་ཉེ་བར་གཅར་བ།
གཤོག་ནག
འུ་ཚོའི་ཁ་སྐད་དུ་དྲང་མོ་བཤད་ན་མྱི་མི་དགའ།
དབྱུག་པ་འཕྱར་ན་ཁྱི་མི་དགའ་ཟེར་བ་ལྟར།
ད་ཐེངས་ཡང་གཞོན་པ་ཡིག་འབྲི་བ་བཞིས༼འབར་ཞུན༽ཞེས་པའི་ཚགས་དེབ་ཆུང་ཆུང་ཞིག་ཏུ་
གཏམ་དྲང་མོར་བཤད་པའི་ལེགས་སྐྱེས་སུ་གྲི་ཡིས་ཁྲམ་རྟགས་ཤིག་གཞོན་པ་ལྕེ་གསུམ་
པའི་ཐོད་ལ་ཕབ་འདུག
གཞན་དག་རི་བྱོལ་ལ་བུད་ནས་མཐོན་པའི་རི་རྩེ་རུ་ཁང་འཁྱག་དང་མཉམ་དུ་ཉིན་འགའ་ལ་
བསྡད་སོང་སྐད།
སྤྱིར་ན་འཛམ་གླིང་ཤེས་རིག་གི་འཕེལ་རིམ་དངོས་ནས་ལྟས་ན་སྐྱེས་བུ་སྒེར་གྱི་
གཏམ་བརྗོད་རང་དབང་ནི་རང་དབང་རིང་ལུགས་ཀྱི་བླ་རྐང་དང་།རང་དབང་རིང་ལུགས་ཀྱི་
མ་ཡུམ་ལགས་པས།
དེ་ལ་རྡོག་རོལ་གཏོང་བ་ནི་དེང་གི་སྤྱི་ཚོགས་ནས་ལོག་ཏུ་བུད་པའི་འཇིགས་རུང་
དམུ་རྒོད་ཀྱི་ལས་སྦྱོར་ཧང་སང་བ་ཞིག་རེད།
ཡིན་ཡང་ཁྱིམ་སྐྱོང་རིག་གནས་ཀྱི་དྲན་པ་མག་མོག་ལས་སད་མེད་ལ།
ལར་ལྷ་ཆོས་རིག་གནས་ཀྱི་རྨོངས་གཤིས་ཏིལ་ལ་ཏིལ་དམར་གྱི་ཚུལ་དུ་གནས་ཡོད་པའི་
རང་རེའི་སྤྱི་ཚོགས་འདི་ནས་གཏམ་དྲང་མོ་བཤད་མཁན་དག་ནི།
དབང་མེད་ཐབས་མེད་ཀྱི་ངང་ཚེར་མའི་ལམ་ཁ་ཞིག་ལ་གོམ་པ་སྤོ་དགོས་པ་ནི་སུས་ཀྱང་
བཅོས་སུ་མེད་པའི་ལོ་རྒྱུས་ཀྱི་ལས་ཀ་དམིགས་བསལ་བ་ཞིག་རེད།
འུ་ཚོའི་གཡས་གཡོན་ནས་གཏམ་ཡན་དང་མྱི་ཁའི་ཁང་སེར་ཅི་ལྟར་བབས་ནའང་།འུ་ཚོའི་
མདུན་རྒྱབ་ནས་དམོན་ཚིག་དང་འཕྱ་སྨོན་གྱི་ཆོམ་སྒྲ་ཇི་ལྟར་གྲགས་ནའང་།འུ་ཚོ་ཁ་
རོག་གེར་དྲན་པ་ལྷོད་ནས་འདུག་ཁོམ་ཞིག་གང་ན་ཡོད།
འུ་ཚོ་ཚོར་མེད་ངང་མལ་དུ་ལོག་རན་ཞིག་ཁྱོན་ནས་མིན།
རང་རེ་ཅག་ནི་ལྟོས་བཅས་ཀྱིས་ཡི་གེ་འབྲི་བའི་སྡེ་ཞིག་ཡིན་སྟབས།
བླ་འདར་བའི་ལས་སྤྱོར་འདི་འདྲ་མཐོང་ནའང་ཁ་རོག་གེར་བསྡད་པ་ནི་རང་ཉིད་དང་ཁོར་
ཡུག་ལ་འགན་མ་ཁུར་བའི་སྣང་ཚུལ་ཞིག་རེད་པས།
རིག་པ་གྲོང་གྲོང་དང་དྲན་པ་གསལ་གསལ་གྱི་ངང་དུ་གང་ལ་རྣག་ཐུམ་ཡོད་ན་དེ་རུ་ཁབ་
གཙག་བྱེད་པ་ནི་ཧ་ཅང་དགོས་ངེས་ཤིག་རེད།
དེའི་ཕྱིར་རང་རེའི་འབྱུང་འགྱུར་ལ་བློ་དཀར་ཞིང་འཚོ་བའི་བདེན་པ་ལ་སྙིང་ཉེ་
བའི་ཡི་གེ་བ་དག་གིས་ཁོར་ཡུག་གི་བཤད་ཡམས་ཙམ་ལ་འཇིགས་པ་མེད་པར་བདེན་པའི་གཏམ་
བཤད་རོགས།
དྲང་མོའི་མདའ་ཕེན་རོགས།
ང་ཚོ་ནི་དུས་ཀྱི་དཀྱོགས་མཚམས་འདིར་སྐྱེས་པའི་རང་ས་རང་ཡུལ་གྱི་ས་ཆའི་ཚོད་
ཀྱི་རི་དྭག་ཡིན།
ང་ཚོའི་སྙིང་སྟོབས་ལ་སྡར་གཤིས་ཡོད་མི་འོས།
ང་ཚོའི་དཔའ་སྐད་ལ་འགག་པ་ཡོད་མི་ཉན། ང་ཚོ་མུ་ནས་འབར་དགོས།
ཕྱི་ནང་གང་ལ་བསམ་ནའང་།རང་དབང་ནི་རྩོད་ནས་ཐོབ་རྒྱུ་ཞིག་ལས་སྒུག་ནས་ཡོང་རྒྱུ་ཞིག་ཁྱོན་ནས་མིན་པས་སོ། །
ཁྲམ་རྟགས་འདིས་ང་རང་སྒུལ་བྱུང་།
མ་ཎི་དོན་གྲུབ།
༼འབར་ཞུན༽ཚགས་ཤོག་དང་འབྲེལ་བའི་ཁྲམ་རྟགས་དོན་རྐྱེན་དེས་ནི་འུ་ཅག་གི་བསམ་པ་དང་རིག་གནས་ཀྱི་ཆུ་ཚད་ག་འདྲ་ཞིག་ཏུ་བསྟན་ཡོད་དམ།
གྲི་མཚོན་གྱི་ལས་ཀ་ནི་མིའི་ཐབས་ཤེས་ཡོངས་སུ་ཟད་པའི་ཐབས་ཤེས་ཤིག་ཡིན་པར་བསམ་ན།
ད་ནི་རང་རོགས་སུ་ཡང་ཁོ་ཆད་པ་ཞིག་མི་ཡོང་ངམ། ཁ་སང་གི་བྱས་ཉེས་མཐའ་དག་ནི་དེ་རིང་ལམ་ལོག་ཏུ་མི་འགྲོ་བའི་དྲན་ཐོ་རེ་རེ་ཡིན་སྟབས།
དེ་རིང་གི་ཉམ་མྱོང་སྟེང་ནས་སང་ཉིན་ཞེ་མེར་བའི་ལས་སྦྱོར་འདི་འདྲ་མི་ཡོང་བའི་སྨོན་ལམ་ཡང་ཡང་ཡོད།
རང་རེ་ཅན་ནི་ཕྱི་ནང་གང་གི་ཆ་ནས་ཧ་ཅང་དབུལ་ལ་ཤིན་ཏུ་གཉོམ་པས།
ང་ཚོ་ལ་རང་དབང་གི་བསམ་ཚུལ་འགྲོ་སའི་ལམ་བུ་ཞིག་ཅི་འདྲའི་མཁོ་ཨང་།
མུན་པའི་ནང་དུ་འོད་ཟེར་དགོས།
འབར་ཞུན་གྱིས་བསྒྲོན་པའི་མེ་ལྕེ།
རེ་ཀི
ཉེ་སྔོན་ན་གཞོན་བློ་འབྱེད་ཁ་ཅིག༼ འབར་ཞུན༽
ཞེས་པའི་ཚགས་པར་ཆུང་ཆུང་ཞིག་གི་འོད་ངོགས་ནས་འགྱིང་སྟེ།
ཞེ་ཕུགས་སུ་དྲག་ཏུ་མཆེད་པའི་བདེན་དོན་དང་དཔྱོད་ཤེས་ཀྱི་ངར་སྒྲ་ཐན་ཐུན་ཞིག་
སྒྲོག་སོང་སྐད།
ཁོ་ཚོ་ལ་དེ་གའི་མང་ཚོགས་ཀྱིས་བཙིར་གནོན་གྱི་ལས་དཀའ་ཚད་བརྒལ་མང་པོ་བྱས་སོང་
ཟེར།
ད་དུང་ནད་ཁང་ནས་བཅོས་དགོས་པའི་རྨ་ཁ་མང་པོའང་བཟོས་སོང་ཟེར།
གླེང་གཞི།
ཀྱེ་ཀྱེ་ས་དེའི་མང་ཚོགས་དང་དེའི་ངའི་རིགས་མཐུན་ཚོ།
དུས་ཀྱི་འགྱུར་བ་ནི་བསམ་པའི་འགྱུར་བ་མཚོན་པའི་སྒུལ་ཤུགས་ཤིག་ཡིན་པ་སྨྲོས་
སུ་མེད།
དེས་ན་རག་ཅག་གིས་ཀྱང་འགྲོ་བ་མི་སྤྱིའི་སྤྱོད་ཚུལ་དང་མཐུན་པའི་གོམ་པ་ཞིག་
སྤོ་དགོས་ན།
དུས་དང་འགྲོས་བསྟུན་པའི་རང་གི་གོམ་ཁ་འཚོ་བའི་བསམ་པའི་རྒྱགས་ཕྱེ་གྲག་དག་ཅིག་
ཅིས་ཀྱང་རག་དགོས་ན།
རང་ཉིད་ཚོགས་སྡེ་སུ་ཞིག་དང་ཚོགས་སྤྱི་གང་ཞིག་གི་སྤྱི་འབངས་སུ་གྱུར་བའི་འགན་
ཁུར་དགོས་ན། ང་ཚོས་མུན་ནང་དུ་འོད་ཅིག་བསྒྲོན་དགོས།
ང་ཚོས་བསམ་བློ་ཡི་ལས་འགུལ་ཞིག་ངེས་པར་བསླངས་དགོས་མ་གཏོགས།
འོས་ལངས་ཀྱི་གྲགས་འགུལ་ཅི་ཡང་མེད་པར་སྐྱིད་པོ་སྣང་བསོར་རྐྱང་རྐྱང་བཤད་ནས་
དེ་རིང་གི་དུས་ཀྱི་ཉག་ག་རུ་སླེབས་དུས།
དོན་དམ་དུ་རང་ཅག་ལ་དུས་ཀྱི་ལེགས་སྐྱེས་ག་རེ་ཐོན་ཡོད་དམ།
མེད་དེ་ཅི་ཡང་མེད།
འུ་ཚོ་ལ་ཐོབ་པ་ནི་ཁྱིམ་གྱི་ཆེད་དུ་ཁྱིམ་མཚེས་ལ་རྩོད་པ་དང་།
རང་གི་བདེ་བའི་ཆེད་དུ་གཞན་སྡུག་ལ་སྦྱར་རྒྱུ་དེ་རེད།
དམིགས་ཡུལ་མེད་པར་དུས་ཚོད་ཀྱི་རིན་ཐང་རང་བཞིན་མི་མཁྱེན་པ།
གཏད་སོ་མེད་པར་རིགས་ཀྱི་རང་ཚུགས་མེད་པ་འདི་དག་རེད། སོམས་དང་།
རང་གི་སེམས་ལ་སོམས་དང་།
ལྟོས་དང་།
རང་གི་ལུས་ཀྱི་སྤྱོད་པར་ལྟོས་དང་།
འདི་ནི་དངོས་ཡོད་འཚོ་བའི་ཆོས་ཉིད་དང་མཐུན་པའི་གནས་ལུགས་ཤིག་རེད་དམ།
དོན་དམ་དུ་འདི་ནི་རང་ལ་བསྣུན་པའི་མདུང་རྩེ་རྣོན་པོ་ཞིག་རེད་འདོད།
ཀྱེ་ཀྱེ།
ཨ་ཕ་དང་ཨ་མ་ཕུ་ནུ་སྤུན་སྲིང་།
ང་ཅག་གི་སྤྱི་ཚོགས་སུ་གནས་ལུགས་ཀྱི་གོ་ས་ཉག་ཕྲ་བ་འདི་སུ་ལན་ནམ།
བདེན་དོན་གྱི་ངོ་སོ་འདི་འདྲའི་དམའ་དྲགས་པ་མདོར་ན་སུས་བཟོས་སོང་ངམ།
དེ་ལྟར་ན་གཞོན་ཞིག་གི་བློ་འབྱེད་ཀྱི་སེམས་ཤུགས་ལ་འབུར་གཞོག་གི་གནོན་ཤུགས་
རྒྱབ་སོང་བས། ད་དུང་མུ་མཐུད་དུ་གོམ་པ་སྤོ་རྒྱུ་ཡིན་ན།
དུས་རབས་འཕེལ་ནས་རི་རྩེ་ནས་འགོས་སོང་ནའང་།
ང་ཚོ་དུས་གཏན་དུ་རྗེས་ལུས་ཀྱི་དུར་བྱང་བསྲུང་མཁན་དུ་ཏན་ཏན་འགྱུར་རྒྱུ་ཡིན་
པ་ཐག་གིས་ཆོད། འདི་ལྟར་ལག་པ་བྲང་ལ་སྦྱར་ནས་བསམ་རྒྱུ་ན།
ང་ཚོས་དུས་ཀྱི་ཟ་མ་ཞིག་ཟ་ཐུབ་ཀྱིན་མི་འདུག
དུས་ཀྱི་ཚོང་ལས་ཞིག་གཉེར་ཐུབ་ཀྱི་མི་འདུག
དུས་ཀྱི་ཤེས་ནུས་ཤིག་བཀོལ་ཐུབ་ཀྱིན་མི་འདུག་པ་ཚོར་བྱུང་།
འདི་ལྟར་བསམ་གྱིན་བསམ་གྱིན་དུ་ཚོར་བ་སྡུག་གིས་གཟིར་ནས་སྐད་ཆའང་བཤད་ཁག་པོ་
འདུག་པས་ད་ཆོག་ནི་བྱེད།
གསལ་བཤད་ཕྲན་བུ།
ཤེས་
ཡོན་པ་ནི་སྤྱི་ཚོགས་ཀྱི་འདྲ་མཉམ་མ་ཡིན་པའི་སྣང་ཚུལ་ལ་ཐེར་འདོན་དང་ལེགས་
བཅོས་བྱེད་མཁན་དུ་བརྩིས་ན་མི་འགྲིག་པ་ག་ལ་ཡོད།
དེ་ལྟ་བས་ན་བོད་ཀྱི་ཤེས་ཡོན་པ་དག་ནི་ལོངས་སྤྱོད་ལ་ཞེན་པ་ཆགས་སྟེ།
ལྕགས་ཀྱི་ཕོར་བ་ལ་དད་མོས་ཀྱི་འདུ་ཤེས་འཁྲུངས་ཤིང་བདེན་ལུགས་ཀྱི་མཁའ་དབྱིངས་ལ་ལོག་རྟོག་གི་སྤྲིན་ནག་འཕྱུར་བས།
ད་གཟོད་གནད་འགག་གི་སྐབས་སུ་སྨྲ་བ་མེད་པའི་སྡོང་སྐམ་ལྟ་བུར་གྱུར་སོང་བ།
ཅི་འདྲའི་ཕངས་སེམས་ཆེ་བ་ཞིག་རེད།
ལོ་ངོ་འདི་དག་གི་རིང་ལ་རྔ་བའི་ཤེས་ཡོན་པ་དག་གི་མགོ་ཐོག་ལ་འཇིགས་སྐུལ་གྱི་
རླུང་དམར་འུར་འུར་དུ་ལྡང་གིན་པ་སུ་ལ་མི་གསལ།
ད་རེབ་ཀྱང་ཡ་ང་བའི་དོན་རྐྱེན་འདིས་མི་ཀུན་གྱི་སེམས་པའི་ཡུལ་ངོ་ན་བསམ་ཡུལ་ལས་འདས་པའི་ཁྲམ་རྟགས་ཤིག་བཀོད་ཡོད་པ་གདོན་མི་ཟ།
དེ་དང་འབྲེལ་ཤེས་ཡོན་པ་ཀུན་གྱིས་འདི་ལ་དོ་སྣང་ཡོད་པ་རྐྱེན་བྱས་ཏེ།
བྲེལ་བྲེལ་འཚུབ་འཚུབ་ངང་རང་རང་གི་ན་ཟུག་དག་སྐབས་བསྟུན་གྱིས་ཕྱི་རུ་བཏོན་པ་ཙམ་ལས། ད་དུང་གཟབ་རྒྱས་དག་ནི་མུ་རུ་མཆེད་ཡོང་ངོ་། །
| 