སྐལ་བཟང་སྲོལ་རྒྱུན་གསོ་རིག་ལག་རྩལ་ལས་རིགས་སློབ་གྲྭ་འོས་སྦྱོར།
དེ་ཡང་མཚོ་སྔོན་ཞིང་ཆེན་རྨ་ལྷོ་ཁུལ་སོག་རྫོང་གི་སྐལ་བཟང་སྲོལ་རྒྱུན་གསོ་རིག་ལག་རྩལ་ལས་རིགས་སློབ་གྲྭ་ནི། ལྷག་བསམ་དང་སྙིང་སྟོབས་ཀྱི་གོ་ཆ་བརྟན་པའི་སློབ་དཔོན་དམ་པ་༧ཚེ་རིང་བཀྲ་ཤིས་ལགས་ཀྱིས་གོང་རིམ་གྱི་ཆོག་མཆན་བརྒྱུད། སྤྱི་ལོ༢༠༠༣ལོའི་བོད་ཟླ་༧ཚེས་༢༥ཉིན་ཁུལ་འཕྲོད་བསྟེན་སློབ་གྲྭ་དང་མཉམ་འབྲེལ་སྒོས་སྐབས་དང་བོའི་འཛིན་གྲྭ་ཐོག་མ་ཁོང་གི་ཁྱིམ་དུ་བསྒྲུབས། རབ་གནས་མེ་ཁྱི་ལོ༼སྤྱི་ལོ་༢༠༠༦༽བཙུགས་ཏེ། ལོ་དེའི་སྟོན་ཟླ་༨པའི་ཡར་ཚེས་ལ་དངོས་སུ་སློབ་མགོ་ཚུགས་པ་ཡིན། སྤྱི་ལོ་༢༠༠༧ལོའི་སྤྱི་ཟླ་༣ཚེས་༢༢ཉིན་གོང་རིམ་གྱི་ཆོག་མཆན་དངོས་སུ་ཐོབ། སློབ་གྲྭ་འདིའི་ས་གནས་ནི་རྨ་ལྷོ་ཁུལ་རྨ་ལྷོ་རྫོང་གི་གཡུ་སྒང་ཉིན་གྲོང་རྡལ་དུ་ཆགས་ཡོད། ཁོར་ཡུག་གི་རྒྱ་ཁྱོན་ལ་རྨིས་གྲྭ་བཞི་མ་༡༤༡༦༠ཡོད་ལ། དེའི་ནང་ནས་ད་ལྟ་ས་མུས་གྲུ་བཞི་མ་༣༥༡༧.༩སྟེང་སློབ་ཁང་དང་དགེ་སློབ་ཀྱི་མལ་ཁང་སོགས་འཛུགས་སྐྲུན་བྱས་དང་བྱེད་མུས་སུ་མཆིས།
དེར་བཞུགས་པའི་དགེ་རྒན་ནི་ཤིང་བཟའ་རིན་པོ་ཆེའི་རྗེས་འཛིན་པར་ཆེད་དུ་བསྔགས་པའི་རྒན་ཚེ་བཀྲ་དང་འཇིགས་མེད་རྡོ་རྗེ། ཨ་དབུས་བློ་བཟང་འཕྲིན་ལས། རྒན་མ་ཅིག་རྣམས་གཙོ་བྱས་ཏེ་དགེ་རྒན་བཅུ་ལྷག་བཞུགས། སློབ་མ་ནི་ད་ལྟ་བརྒྱ་ཕྲག་ལྷག་ཟིན། སློབ་མའི་ཡོང་ཁུངས་ནི་རང་ཞིང་གཙོ་བྱས་ཏེ་དབུས་གཙང་དང་ཁམས་ཕྱོགས།
སི་ཁྲོན། ཀན་སུའུ་སོགས་བོད་ཁམས་ཀྱི་ས་གནས་སོ་སོ་ནས་སླེབས་བཞིན་ཡོད། རེ་ཞིག་འཛིན་གྲྭ་གསུམ་དང་སློབ་ཡུན་ལོ་གསུམ་ཡིན། འཁྲིད་གཞི་ནི་རིག་གནས་ཆེ་བ་ལྔའི་ཡ་གྱལ་བོད་ཀྱི་སྲོལ་རྒྱུན་གསོ་བ་རིག་པ་དང་། རིག་གནས་ཆུང་བ་ལྔའི་ནང་གསེས་གནམ་རིག་སྐར་རྩིས་རིག་པ་གཉིས་གཙོ་བྱས་ཏེ་ཞོར་ལ་ཐོབ་ཐང་དང་། བརྡ་དག སུམ་རྟགས། འཕགས་ཡུལ་གྱི་སྒྲ་རིག་པའང་གང་འཚམ་ཞིག་དང་བཅས་གནའ་དེང་གི་འཆད་ཉན་བྱེད་ཚུལ་ཟུང་དུ་སྦྲེལ་ཏེ་ཐོས་བསམ་བྱེད་བཞིན་གནས། གཞན་ཡང་རང་ཞིང་གཙོ་བྱས་ཏེ་དབུས་གཙང་དང་སི་ཁྲོན། ཀན་སུའུ་སོགས་ས་གནས་སོ་སོ་ནས་མཁས་དབང་རྒན་རབས་པ་དུ་མ་གདན་དྲངས་ཏེ་གསོ་བྱེད་རིག་པའི་དབང་ལུང་ཁྲིད་གསུམ་གྱི་སྐོར་ཉམས་ཆག་ཏུ་སོང་དང་འགྲོ་བཞིན་པ་རྣམས་ཉམས་པ་སོར་ཆུད་དང་མ་ཉམས་གོང་འཕེལ་དུ་གཏོང་བའི་ཐབས་ལ་འབད་བཞིན་མཆིས། །
