ཨ་མ་དྲན་པའི་གདུང་བ།
རལ་གྲི།
བློ་དང་ལང་ཚོའི་མེ་ཏོག་བཞད་སྟངས་འདི།།
ཨ་མའི་མཛུམ་མདངས་བསུ་བའི་ལེགས་སྐྱེས་ཡིན།།
ཨ་མའི་མཛུམ་མདངས་དྲན་པའི་གདུང་བ་འདི།།
ཚིག་གི་ཕྲེང་ལ་བརྒྱུས་པའི་མུ་ཏིག་ཡིན།།
དཔྱིད་གསུམ་སྦྲང་ཆར་སམ་སིམ་འཐོར་དུས་ན།།
ཨ་མའི་སྐུ་ལུས་གཉོམ་པོ་གང་ན་ཡོད།།
དབུ་སྐྲའི་ལན་བུར་ཆགས་པའི་ཟིལ་བ་དེས།།
དོ་ནུབ་བདག་གི་མཁུར་ཚོས་ཡང་ཡང་བརླན།།
རྨི་ལམ་རབ་རིབ་ཅིག་གི་མགོ་རྔ་དང་།།
འཇིགས་རུང་སྣང་བ་ཞིག་གི་བར་གསེང་ན།།
ཨ་མ་རྗེ་བཙུན་སྒྲོལ་མའི་གཟུགས་སུ་ཡོད།།
ཨ་མ་ཚར་དཀར་ཞིག་གི་དོད་དུ་ཡོད།།
ཨ་མར་གྱེས་པ་ཐེངས་གཅིག་ཐེངས་གཉིས་མིན།།
ཨ་མ་དྲན་པ་ཟླ་གཅིག་ལོ་གཉིས་མིན།།
ཨ་མའི་ཁ་ཏ་རུམ་ནས་བཞུད་སྟངས་ལ།།
མཆི་མའི་རབ་ཁ་བྲུགས་པའི་སྐྱོ་གར་ཡོད།།
ཨ་མའི་སྐུ་ལུས་བདེ་ཞིང་ཨེ་འཚམ་ལགས།།
བུ་ང་དྲན་པའི་གདུང་བ་ཨེ་ལྕི་ལགས།།
ལག་པ་ཐོད་ལ་ཀེར་དང་ལྷོ་ལ་ལྟོས།།
ང་ནི་ལྷོ་རིའི་རི་རྩེའི་འཇའ་དེ་ཡིན།།
དགོ་དགོ་བཞོ་གླུ་སྙན་མོའི་འགྱུར་ཁུགས་ན།།
བུ་ང་དྲན་པའི་སྨྲེང་བ་མཆིས་ལགས་སམ།།
ཨ་མའི་ཐུགས་སེམས་དེ་ཙམ་མི་སྐྱོ་རོགས།།
ང་ནི་འཕུར་ལྡང་རྩེན་པའི་ཕྱེ་ལེབ་ཡིན།།
གནག་ཕྱུགས་རྨིག་རྗེས་སྙེག་པའི་ལོ་ཟླ་ན།།
བུ་ང་དྲན་པའི་མཆི་མ་དཀུ་ཨེ་མྱོང་།།
ཨ་མའི་ཐུགས་སེམས་དེ་ཙམ་མི་སྐྱོ་རོགས།།
ང་ནི་མཁའ་ན་རྒྱུ་བའི་སྤྲིན་ཕུང་ཡིན།།
འདི་ནས་སྐྱོ་སྡུག་རི་བོའི་གཏོས་འདྲ་ཞིག །
ཟུངས་མེད་ཁོ་བོའི་ཕྲག་པར་བསྙིལ་གྱུར་ཚེ།།
སྐྱ་ཆད་སྔོ་སྡུག་འོག་གི་འཚོ་བ་འདིར།།
བསམས་ཤིང་ངུ་མ་དགོད་ཀྱི་ཚོར་འདུ་དྲགས།།
ལྷག་པར་ཨ་མ་དྲན་པའི་མེ་ལོང་དབུས།།
ཨ་ཧོ་ལན་བརྒྱར་ཤར་ལ་འགོག་པ་བྲལ།།
ས་མཐའི་བུ་ངའི་དྲན་པ་དམར་པོ་དེ།།
ཚིག་གི་ཕྲེང་ལ་བསྟར་ཏེ་ཁྱེལ་ལ་འབུལ།།
༡༦-༥-༨ལ་རྭ་རྒྱ་ནས་སྦྱར།
| 