དུ་ཞགས་ཀྱིས་གཡོགས་པའི་གངས་རི་ཞིག་དྲན་པ།
རྨ་སྟོད། ཚེ་རིང་རྒྱལ།
སྐར་མ་རབ་གསལ་གྱི་དབྱིངས་ནས་འཛུམ་ཞིང་། །
ཟླ་བས་སྔས་འབོག་གི་རྨི་ལམ་དཀྲོགས་དུས། །
བས་མཐའི་ཁང་མིག་གི་བཙན་རྫོང་གཏོར་ནས། །
དྲན་ཤེས་ཡབ་ཆེན་གྱི་པང་དུ་ལོག་འགྲོ །
ཡོད་ན་དེས་ཆོག་གི་སེམས་ཀྱི་ཚ་རུ། །
མེད་ན་དེས་ཕོང་གི་ཁྱིམ་གྱི་ཀ་བ། །
ན་ཆུང་རྨི་ལམ་གྱིས་འཁོར་བ་མྱུག་དུས། །
སྣང་སྲིད་ལེགས་ཉེས་ཀྱི་ས་མཁན་ཁྱོད་ཡིན། །
ཡར་གྱི་མཆོད་སྟེགས་ན་ལྷེམ་ལྷེམ་འབར་བའི། །
ཟངས་ཀྱི་མཆོད་ཀོང་གི་ཚེ་སྲོག་མཐོང་ན། །
མར་གྱི་གོད་ཁ་ན་གཡང་ལུག་བཙོག་སྟེ། །
མདོ་གདུགས་སྒྲོལ་འདོན་གྱི་ཕ་ལོ་དྲན་ཡོང་། །
དྲུག་གསུམ་བཅོ་བརྒྱད་ཀྱི་སྣང་བ་བསྣམས་ནས། །
ཁྲོམ་ཆེན་ཟིལ་གནོན་གྱི་དཔུང་བ་ངོམ་དུས། །
ཡང་ཆུང་མེ་ཏོག་གི་རྩེད་ར་བཤམས་པའི། །
བུ་ཆུང་སྨོན་པ་ཡི་ཞིང་ས་ཁྱོད་ཡིན། །
འཇིག་རྟེན་ཆོས་ཉིད་ཀྱི་བཀའ་ཆད་ཕོག་སྟེ། །
ཕྱི་མའི་ཏིང་འཛིན་གྱི་རི་ལ་བཞུད་དུས། །
དཔྲལ་བའི་གཉེར་རིས་ཀྱི་གསེང་ན་མངོན་པའི། །
བརྩེ་བའི་རྔུལ་ཐིགས་ཤིག་སྙིང་ལ་ལྷུང་བྱུང་། །
ཨ་ཕ་སྙིང་རྗེ་ཡི་ས་མཐར་སོན་པའི། །
བདག་གཞན་མཉམ་འཇོག་གི་བྱང་ཆུབ་ཅིག་ཡིན། །
སོང་ན་ཡ་ཆུང་གིས་ལྟ་ས་བུ་ཡིན། །
བསྡད་ན་ཤ་རུས་ཀྱིས་རེག་ས་བུ་ཡིན། །
༢༠༡༦.༥.༡༤ཉིན།
| 