ཁོང་དགུང་ལོ་དགུ་ལ་སོན་ཙ་ན་རྔ་བ་ཁུལ་སྟོད་མ་སློབ་ཆུང་ནས་སློབ་གཉེར་གྱི་དབུ་བཙུགས་ཤིང་། དགུང་གྲངས་བཅོ་ལྔ་ལ་ཕེབས་སྐབས་པན་ཆེན་སྣང་བ་མཐས་ཡས་བློ་བཟང་ཆོས་ཀྱི་རྒྱལ་མཚན་རིན་པོ་ཆེའི་གསུང་བཀོད་ལྟར་བླ་བྲང་བཀྲ་ཤིས་འཁྱིལ་གྱི་དགེ་བའི་བཤེས་གཉེན་ཆེན་མོ་དགེ་འདུན་རྒྱ་མཚོའི་སྤྱན་སྔར་དགེ་བསྙེན་གྱི་སྡོམ་པ་བླངས་ཏེ་ལོ་ལྔའི་རིང་དགེ་བའི་བཤེས་གཉེན་ཆེན་མོ་བློ་བཟང་གྲགས་པ་དང་སྐལ་བཟང་རྒྱ་མཚོ། ཤེས་རབ་རྒྱ་མཚོ་བཅས་ཀྱི་དྲུང་དུ་སྐྱབས་འགྲོ་དང་རྒྱུད་ལྔའི་རྩ་འགྲེལ། སྒྲ་རིག་པ་སོགས་རིག་གནས་སྣ་ཚོགས་ལེགས་པར་གསན། དེ་མིན་གུང་ཐང་བསྟན་པའི་དབང་ཕྱུག་དང་སྟག་ཚ་སྐལ་བཟང་འཇིགས་མེད་བསྟན་པའི་རྒྱལ་མཚན། མཁས་དབང་དམུ་དགེ་བསམ་གཏན། རྗེ་འཇིགས་མེད་དཔལ་ལྡན་རྒྱ་མཚོ་སོགས་སློབ་དཔོན་དུ་བསྟེན་ནས་བྱང་ཆུབ་ལམ་རིམ་དང་ཚད་མ། ཕར་ཕྱིན། མངོན་པ། འདུལ་ཁྲིམས་སོགས་གཞུང་ཆེན་མོ་དང་གསང་སྔགས་དང་དུས་འཁོར་བཅས་ཐུན་མོང་དང་ཐུན་མོང་མ་ཡིན་པའི་རིག་པའི་གནས་མཐའ་དག་ལ་སྦྱངས་བརྩོན་ཆེས་ཆེར་མཛད།

      སྤྱི་ལོ1994ལོ་ནས་སྤྱི་ལོ1995ལོའི་བར་ཐེན་ཅིན་ཡོན་ཀྲའོ་དགོན་པའི་མཚན་འཛིན་དགོན་བདག་དུ་གདན་དྲངས། སྤྱི་ལོ1997ལོར་སྟག་ཚ་དགོན་པའི་མགོན་ཁང་དང་རྗེ་རིན་པོ་ཆེའི་ལྷ་ཁང་སོགས་བསྐྱར་བཞེངས་བྱས་པ་མ་ཟད་བོད་བརྒྱུད་ནང་བསྟན་དགོན་པའི་རིག་གནས་ཆེ་བ་ལྔ་འདུས་པའི་རིག་གཞུང་དུས་དེབ་དང་པོའི་གཙོ་སྒྲིག་པའི་འགན་བཞེས་ཤིང་གཙོ་སྒྲུབ་མཛད། བོད་བརྒྱུད་ནང་བསྟན་གྱི་འཇིམ་བཟོའི་སྒྱུ་རྩལ་ཚ་ཚ་ཞེས་པའི་གཟུངས་སྔགས་རྒྱ་འགྱུར་མའི་ཕྱག་བཞེས་ལ། ནང་ལོགས་ཀྱི་ཚ་ཚའི་རིག་གནས་ལ་མོས་པ་ཡོད་མཁན་རྣམས་ཀྱི་སྤྱན་སྔར་མཛེས་ཆོས་སུ་ཕུལ། དེ་མིན་ཁོང་གིས་སྟག་ཚ་དགོན་པའི་གྲྭ་བ་རྣམས་ལ་རིག་གནས་ཟབ་མོ་སྦྱོང་པའི་གོ་སྐབས་སྩོལ་བའི་སླད་དུ་བླ་བྲང་དགོན་པའི་བཤེས་གཉེན་དམ་པ་དགེ་འདུན་རྒྱ་མཚོ་ཚང་དང་ཀན་སུའུ་ཞིང་ཆེན་ནང་བསྟན་སློབ་གླིང་གི་དགེ་རྒན་ཆེན་མོ་འཇིགས་མེད་དཔལ་ལྡན་རྒྱ་མཚོ་སོགས་སྟག་ཚ་དགོན་དུ་གདན་དྲངས་ཏེ་དགོན་པའི་གྲྭ་མང་ཡོངས་ལ་ཆོས་གཞུང་འཆད་ཁྲིད་བྱས།

      སྤྱི་ལོ2001ལོར། པེ་ཅིང་ཀྲུང་གོའི་གཅེས་ནོར་ཚ་ཚ་ཆེད་བཀྲམ་ཚོགས་འདུའི་སྟེང་འཇིམ་གོང་ཞབས་བདེ་རྩེ་རྣོའི་རྟེན་ཅི་རིགས་ངོམས་པས་ན་སྐབས་དེའི་རྒྱལ་ཁབ་ཆོས་ལུགས་ཅུས་ཀྱི་འགན་འཛིན་ཡའེ་ཞའོ་བིན་དང་ལྟད་མོ་བས་བསྟོད་བསྔགས་ཐོབ། སྤྱི་ལོ2002ལོར། ཐེན་ཅིན་ཚ་ཚ་རིག་གནས་སྒྱུ་རྩལ་ཞིབ་འཇུག་འགྲེམ་སྟོན་ལྟེ་གནས་ཀྱི་འགོ་འཛིན་གཞོན་པའི་འགན་བཞེས་ཤིང་དགོན་པས་དགོན་པ་སྐྱོང་བ་ཞེས་པའི་དགོངས་འཆར་བཏོན་ནས་སྤྱི་ལོ2003ལོར་གླིང་དཀར་སྟོད་མགྲོན་ཁང་གི་སྒོ་འབྱེད་མཛད་སྒོ་སྤེལ།

       སྤྱི་ལོ2005ལོར་གངས་ཅན་གླེགས་བམ་གྱི་གཏེར་མཛོད་སྟག་ཚའི་ཆོས་རིག་དཔེ་མཛོད་ཁང་འཛུགས་སྐྲུན་བྱས་པར་གྲུབ་སྟོན་ཆེན་པོ་བྱས་ཤིང་རང་གི་དགོན་པར་དོ་དམ་བྱེད་པའི་ཞོར་དུ་སི་ཁྲོན་ཆོས་ལུགས་དང་མཛོད་དགེའི་རིག་གནས་ལོ་རྒྱུས་ལ་ཞིབ་འཇུག་གཏིང་ཟབ་གནང་སྟེ་དགེ་ཆོས་ཞིབ་འཇུག་ཅེས་པའི་དུས་དེབ་སོགས་ཀྱི་སྟེང་དུ་བོད་རྒྱ་ཡིག་རིགས་གཉིས་ཀྱི་ལམ་ནས་དཔྱད་རྩོམ་དུ་མ་སྤེལ་བར་སི་ཁྲོན་ཞིང་ཆེན་མི་དམངས་སྲིད་གཞུང་གིས་མི་རིགས་མཐུན་སྒྲིལ་གྱི་དཔེ་བཟང་མི་སྣའི་མཚན་སྙན་ཕུལ།       སྤྱི་ལོ2007ལོ་ནས་བཟུང་། སྔ་གཞུག་ཏུ་སི་ཁྲོན་ཞིང་ཆེན་ན་གཞོན་ལྷན་ཚོགས་ཀྱི་སྐབས་དགུ་བ་དང་སྐབས་བཅུ་བ། སྐབས་བཅུ་གཅིག་པའི་ཨུ་ཡོན། རྔ་བ་ཁུལ་ན་གཞོན་ལྷན་ཚོགས་ཀྱི་སྐབས་ལྔ་བ་དང་སྐབས་དྲུག་པ། སྐབས་བདུན་པའི་རྒྱུན་ལས་ཨུ་ཡོན། མཛོད་དགེ་རྫོང་སྲིད་གྲོས་ཀྱི་སྐབས་བཅུ་བ་དང་སྐབས་བཅུ་གཅིག་པའི་རྒྱུན་ལས་ཨུ་ཡོན། ཁུལ་སྲིད་གྲོས་ཀྱི་སྐབས་བཅུ་གཅིག་པའི་རྒྱུན་ལས་ཨུ་ཡོན། རྔ་བ་ཁུལ་ནང་བསྟན་མཐུན་ཚོགས་ཀྱི་སྐབས་བདུན་པའི་རྒྱུན་ལས་ལས་འཛིན་དང་རྔ་བ་ཁུལ་ནང་བསྟན་མཐུན་ཚོགས་ཀྱི་སྐབས་དགུ་བའི་དྲུང་ཡིག་ཆེན་མོ་གཞོན་པ། མཛོད་དགེ་རྫོང་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། རྔ་བ་ཁུལ་ནང་བསྟན་མཐུན་ཚོགས་ཀྱི་ཚོགས་གཙོ། སི་ཁྲོན་ཞིང་ཆེན་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། སི་ཁྲོན་ཞིང་ཆེན་བོད་བརྒྱུད་ནང་བསྟན་ཡང་སྤྲུལ་ངོས་འཛིན་འགོ་ཁྲིད་ཚན་ཆུང་གི་འགོ་གཙོ་གཞོན་པ་སོགས་ཀྱི་འགན་བཞེས།

     ཁོང་གིས་ཏང་གི་ཆོས་ལུགས་དད་པ་རང་མོས་སྲིད་ཇུས་ཀྱི་མཛུབ་སྟོན་འོག་རྒྱལ་གཅེས་ཆོས་གཅེས་ཀྱི་དར་ཆ་མཐོན་པོར་བསྒྲེངས་ཏེ། འབྲེལ་བ་ཟབ་མོ་དང་ཆོས་དོན་དམ་འཛིན། ཞབས་ཞུ་ལེགས་སྒྲུབ་བྱེད་པ་དེ་རང་ངོས་ཀྱི་འོས་འགན་དུ་བརྩིས་ནས། ལོ་རེ་རེར་རྔ་བ་ཁུལ་གྱི་དགོན་སྡེ་ཁག་ཏུ་རྩ་འཛུགས་བྱས་ཏེ་རང་གི་ཆོས་བརྒྱུད་དུ་གཏོགས་པའི་བཅའ་ཡིག་དང་། རང་གི་མི་རིགས་ཆོས་ལུགས་ཀྱི་སྲིད་ཇུས། རྒྱུན་སྤྱོད་ཁྲིམས་ལུགས་དང་ཁྲིམས་སྲོལ་ཁྱབ་བསྒྲགས་བྱས། དེ་ཡང་སྡིག་པ་ཅི་ཡང་མི་བྱ་ཞིང་། ། དགེ་བ་ཕུན་སུམ་ཚོགས་པར་བྱ། ། རང་གི་སེམས་ནི་ཡོངས་སུ་འདུལ། །  འདི་ནི་སངས་རྒྱས་བསྟན་པ་ཡིན། ། ཞེས་པའི་ནང་ཆོས་ཀྱི་དགོངས་པ་བཏོན་པ་མ་ཟད། རྔ་བ་ཁུལ་ནང་བསྟན་སྡེ་ཁག་གི་ལས་འཛིན་རྣམས་དང་མཉམ་དུ་རྔ་བ་ཁུལ་གྱི་དགོན་པ་ཁ་ཤས་ལ་ཕྱིན་ཏེ་དཀའ་ངལ་ཅན་གྱི་གྲྭ་བཙུན་ལ་འབྲེལ་གཏུག་དང་། དམངས་གཙོ་དོ་དམ་ཁང་ལ་དེའི་ཐད་ཀྱི་གནས་ཚུལ་རྒྱུས་ལོན་དང་རོགས་དངུལ་བྱིན་ལ། ཁུལ་ཡོངས་ཀྱིས་སྤེལ་བའི་རླབས་ཆེན་ཀྲུང་གོའི་ཕུགས་འདུན་མངོན་འགྱུར་དང་མཛེས་སྡུག་དཔལ་གྱིས་ཕྱུག་པའི་འཆམ་མཐུན་སི་ཁྲོན་འཛུགས་སྐྲུན་གྱི་བརྗོད་དོན་སློབ་གསོའི་བྱེད་སྒོའི་ཁྲོད། ནང་བསྟན་མཐུན་ཚོགས་ཀྱི་ལས་དོན་ཆེ་ཆུང་ལ་དབུ་ཁྲིད་ནས་ཚགས་པར་དང་། རྒྱང་སྒྲོག ཆེད་སྒྲིག་ལེ་ཚན་སོགས་བརྒྱུད་དེ་རྐུ་འཕྲོག་བཅོམ་གསུམ་ལ་འགོག་རྒོལ་དང་། ཕྱིའི་ཁོར་ཡུག་དང་ནང་བཅུད་ཀྱི་སེམས་ཅན་ལ་སྲུང་སྐྱོང་། རྒྱལ་སྐུག་རྒྱན་འཇོག་གི་སྤྱོད་ངན་དོར་ཞིང་། 　གཞན་ཕན་ལྷག་བསམ་གྱི་སྤྱོད་བཟང་དང་དུ་ལེན་དགོས་པའི་ནང་ཆོས་ཀྱི་ཟབ་དོན་རྒྱ་ཆེར་སྤེལ། ཡང་རྔ་བ་ཁུལ་ཨུ་དང་རྫོང་གི་ནང་བསྟན་མཐུན་ཚོགས་ཀྱི་ཚོགས་གཙོ་དང་ཚོགས་གཙོ་གཞོན་པ།  དྲུང་ཡིག་ཆེན་མོ་དང་། ཁུལ་ནང་བསྟན་མཐུན་ཚོགས་ཀྱི་དྲུང་ཡིག་ཆེན་མོ་གཞོན་པ་ལ་འཚོ་བའི་ཁ་གསབ་སྤྲོད་དགོས་པའི་དགོངས་འཆར་བཏོན་ལ། ཁུལ་ཨུས་ཚད་མཐོན་པོས་མཐོང་ཆེན་བྱས་ཏེ་གོང་གི་ཁོངས་མི་དེ་དག་ལ་འཚོ་བའི་ཁ་གསབ་སྤྲོད་པར་གྲོས་འཆམ་བྱུང་།

        སྤྱི་ལོ2014ལོར། སི་ཁྲོན་ཞིང་ཆེན་བོད་བརྒྱུད་ནང་བསྟན་སློབ་གླིང་ལ་འབྲིང་རིམ་དཔང་རྟགས་སྟེར་བའི་རྔ་བའི་འཛིན་གྲྭ་བསྡུ་བའི་རེ་ཞུ་ཡི་གེ་ཕུལ་བར་ཆོག་མཆན་ཐོབ་པས། རྔ་བ་ཁུལ་གྱི་དགོན་པ་སོ་སོའི་གྲྭ་བཙུན་ལ་སློབ་གཉེར་བྱེད་སྟངས་ཀྱི་ལམ་བུ་གསར་བ་ཞིག་བསྐྲུན་ལ། རང་རེའི་ཞིང་ཆེན་དུ་བོད་བརྒྱུད་ནང་བསྟན་སློབ་ཁྲིད་ལ་སློབ་རྟགས་གནང་རྒྱུ་མེད་པའི་ལོ་རྒྱུས་ལ་རྫོགས་ཚིག་ཀྱང་བཀོད། དེ་མིན་རྔ་བ་ཁུལ་ཨུའི་ཧྲུའུ་ཅི་ལིའུ་ཙུའོ་མིང་གིས་བཀོད་སྒྲིག་ལྟར་ཁོང་ཚང་དང་ནང་བསྟན་མཐུན་ཚོགས་ཀྱི་ལས་བཟོ་བ་རྣམས་རྔ་བ་དང་མཛོད་དགེ འབར་ཁམས། ཆུ་ཆེན་སོགས་སུ་རྟོག་ཞིབ་ཏུ་ཕྱིན་ལ།  འཕྲལ་མར་རྔ་བ་ཁུལ་ཨུར་ཁུལ་ཁོངས་ཀྱི་ས་མཐའི་དགོན་པ་ཆུང་ཤས་ཁག་གི་དཀའ་ངལ་ཆེ་ཆུང་ལྟར་དགོན་པ་དེ་དག་ལ་རོགས་སྐྱོར་དང་། གྲྭ་པ་ཚོའི་འཚོ་བའི་ཆ་རྐྱེན་ཇེ་བཟང་དུ་གཏོང་བ། དགོན་པའི་རྨང་གཞིའི་སྒྲིག་བཀོད་ལེགས་བཅོས་བྱ་དགོས་པ་སོགས་ཀྱི་དགོངས་འཆར་ཡར་ཞུ་བྱས་པར།   རྔ་བ་ཁུལ་ཨུས་མཐོང་ཆེན་བྱས་ཏེ་དམངས་འཚོ་ཆེ་བས་དམངས་འཚོ་ཆུང་བ་ཁྲིད་པ་སོགས་ཀྱི་རོགས་སྐྱོར་ཐབས་ལམ་དོན་འཁྱོལ་བྱས།

        སྤྱི་ལོ2015ལོ་ནས་བཟུང་གཟའ་འཁོར་རེར་འཕྲིན་སྟེགས་དང་ཁ་པར་གསར་འགྱུར་གྱི་ལམ་ནས་རྔ་བ་ཁུལ་བྱང་ཆུབ་ཆོས་སྡིངས་གཏོང་འགོ་བརྩམས་ཤིང་བོད་བརྒྱུད་ནང་བསྟན་གྱི་རྨང་གཞིའི་ཤེས་བྱ་ཁྱབ་བསྒྲགས་བྱས་པས། དེང་སྐབས་རྒྱ་ཆེའི་མང་ཚོགས་ཀྱིས་ཆོས་ལུགས་ཤེས་བྱ་སྦྱོང་བར་ཆེས་སྟབས་བདེ་བ་དང་ཆེས་སྤྲོ་བ་ཆེ་སའི་ལེ་ཚན་ཞིག་ཏུ་གྱུར་ཡོད།  ཟླ8པར་དཀར་མཛེས་ཁུལ་ནང་བསྟན་མཐུན་ཚོགས་ཀྱི་རྟོག་ཞིབ་ཚན་ཆུང་ལ་སྣེ་ལེན་བྱས་ཏེ་ཕན་ཚུན་གྱི་མཛའ་བརྩེ་ཇེ་ཟབ་ཏུ་བཏང་ལ། རྔ་བ་ཁུལ་གྱི་ཚབ་བྱས་ཏེ་ཀྲུང་དབྱང་དྲིལ་སྒྲོག་པུའུ་ཡིས་རྩ་འཛུགས་བྱས་པའི་ཨོའོ་སི་ཁྲི་ལེ་ཡ་དང་ལུའུ་ཟེ་ལིན་དུ་རྟོག་ཞིབ་ཏུ་སོང་བར་གྲུབ་འབྲས་འབུར་དུ་ཐོན་པས་ཀྲུང་དབྱང་དྲིལ་སྒྲོག་པུའུ་ཡིས་གཟེངས་བསྟོད་ཐོབ། ཡང་རང་ཁུལ་གྱི་བོད་བརྒྱུད་ནང་བསྟན་གྱི་སྐུ་ཚབ་མི་སྣ་སྟེ་ཁོང་ཚང་དང་ཨ་ལགས་རྣམ་པ་གསུམ་ཞིང་ཆེན་འཐབ་ཕྱོགས་གཅིག་གྱུར་པུའུ་ཡིས་རྩ་འཛུགས་བྱས་པའི་ནང་ཆོས་རིག་གནས་འབྲེལ་འཛུགས་བྱ་འགུལ་དུ་ཞུགས་ཏེ་ཐའེ་ཝན་དང་ཞང་ཀང་སོགས་སུ་གཟིགས་ཞིབ་ཏུ་ཕེབས་ལ། མུ་མཐུད་དུ་རྔ་བ་ཁུལ་གྱི་བོད་བརྒྱུད་ནང་བསྟན་གྱི་དགོན་པར་འདུལ་ཁྲིམས་སློབ་གསོ་དང་འཆམ་མཐུན་དགོན་པ་འཛུགས་སྐྲུན་གྱི་ལས་དོན་ནན་གྱིས་སྤེལ་བས། གུང་གཞོན་ཚོགས་པ་སི་ཁྲོན་ཞིང་ཨུ་དང་སི་ཁྲོན་ན་གཞོན་མཉམ་ཚོགས་ཀྱིས་ཕུལ་བྱུང་ཨུ་ཡོན་ལ་བདམས། སྤྱི་ལོ2013ལོའི་གཡག་རྔ་ལུའུ་ཧྲན་དང་།   སྤྱི་ལོ2014ལོའི་དཀར་མཛེས་དར་རྩེ་མདོ།   སྤྱི་ལོ2015 ལོའི་བལ་བོ་དང་བོད་ལྗོངས་ཀྱི་ས་འགུལ་ཁྲོད་དང་དཀའ་ཁེག་ལྡན་པའི་སྨན་ཁང་དང་སློབ་གྲྭ། དུད་ཁྱིམ་དང་སློབ་མ་སོགས་ལ་ཁོང་གིས་སྐུ་དངོས་སུ་ཞལ་འདེབས་དང་བསྔོ་བ་སྨོན་ལམ་འཚོགས་པ་སོགས་ཀྱི་དགེ་བ་རྒྱ་ཆེར་སྤེལ། དམ་པ་ཁོང་གིས་དུས་རྒྱུན་དད་པ་བརྟན་ཞིང་ཀུན་སྤྱོད་གཙང་བ།  མི་སྣ་གསོ་སྐྱོང་།  སློབ་གཉེར་ལམ་ལུགས་སོགས་འདུས་པའི་རང་སྟེང་གི་འཛུགས་སྐྲུན་དམ་འཛིན་བྱེད་རྒྱུ་འགངས་ཆེན་དུ་བཟུང་ནས།   སློབ་གཉེར་བ་ཡོངས་ལ་དགོན་པ་དེ་རྒྱལ་གཅེས་ཆོས་གཅེས་དང་།  དོ་དམ་ཚད་ལྡན། སྒྲིག་ལམ་དམ་པོ།  གླིང་བར་དག་གཙང་། ཆོས་དད་མང་ཚོགས་ཡིད་ཚིམ་པའི་དཔལ་ཡོན་གྱི་ལྟེ་གནས་ཤིག་ཏུ་འཛུགས་སྐྲུན་ལ་མཛུབ་སྟོན་དང་སྣེ་ཁྲིད་བྱ་དགོས་ཞེས་སྐུལ་འདེགས་ཡང་དང་ཡང་དུ་གནང་བཞིན་ཡོད།

   དགོན་པ་སོ་སོའི་མཐུན་རྐྱེན་རོགས་རམ་འོག་ཁུལ་རྩོམ་སྒྱུར་ཅུས་དང་མཉམ་དུ་སྐུ་དངོས་སུ་ས་ཆ་སོ་སོར་ཕེབས་ནས་དམངས་གཙོ་བཅོས་བསྒྱུར་སྔོན་དུ་རྔ་བ་ཁུལ་གྱི་མཁས་དབང་རིམ་བྱོན་གྱི་གསུང་འབུམ་གྱི་ཟིན་བྲིས་འཚོལ་སྡུད་རྩོམ་སྒྲིག་ཁང་བཙུགས་ཤིང་། མིག་སྔར་གྲུབ་མཐའ་རིས་མེད་ཀྱི་གསུང་འབུམ་མང་བོ་དཔར་དུ་བསྐྲུན་ཏེ་དགོན་པ་དང་སློབ་གྲྭ་སོགས་ལ་གཟིགས་འབུལ་ཞུས་ཡོད་ལ་དམ་པ་ཁོང་གིས་རྔ་བ་ཁུལ་གྱི་ནང་བསྟན་བྱ་བཞག་ལ་མཛད་རྗེས་མི་དམན་པ་བཞག་དང་འཇོག་བཞིན་བཞུགས་སོ། །