མཚོ་སྔོན་ཞིང་ཆེན་ཡུལ་ཤུལ་རྫ་སྟོད་མགར་སྐོར་དགྱེས་འཛོམས་ཐེངས་གསུམ་པའི་
གསར་འགྱུར།
རྫ་སྟོད་མགར་སྐོར་དགྱེས་འཛོམས་ཐེངས་གསུམ་པ 2019ལོའི་ཟླ8 པའི་ཚེས 31 དང་། ཟླ 9 པའི་ཚེས 1 སྟེ་ཉིན་གཉིས་ཀྱི་རིང་ལ་དཀར་ཟས་གསོལ་སྟོན་གྱི་སྒོ་ནས་ཉེ་བསྡུ་བྱས་ཤིང་། སྐུ་མགྲོན་གཙོ་བོ་རྭ་རྒྱའི་བཀའ་འགྱུར་ལས་སྒྲུབ་ཁང་གི་གཙོ་འགན་པ་ཁཱ་ཤེས་རབ་རྒྱ་མཚོ་དང་། ཨ་མདོ་བརྙན་འཕྲིན་ཁང་གི་སེར་བོ་གསེར་གྱི་གར་སྟེགས་ཀྱི་བརྗོད་དོན་གླུ་གཞས་ལེན་མཁན་གྲགས་ཅན་གླུ་པ་མགར་བསམ་འགྲུབ་ཚེ་རིང་། ནག་ཆུ་སྦྲ་ཆེན་རྫོང་ཅང་མེ་ཡུལ་ཚོའི་མགར་གྱི་རུས་མཛོད་ཁ་བ་དཀར་པོའི་ཞབས་རྗེས་ཀྱི་ས་བོན་འཚོལ་བསྡུ་མཁན་དང་པར་སྐྲུན་སྦྱིན་བདག་མགར་བཀྲ་ཤིས་དར་བཅས་གདན་དྲངས་ཤིང་། ཉིན་དང་པོའི་སྔ་དྲོར་སྐུ་མགྲོན་ངོ་སྤྲོད་དང་ཕན་ཚུན་ངོ་སྤྲད་རེས་བྱས་ཏེ་ལས་རྐང་སྟེང་གི་ཉམས་མྱོ་བརྗེ་རེས་བྱས། མ་ཚད་ཁཱ་ཤེས་རབ་རྒྱ་མཚོས་རང་གི་ཉམས་མྱོང་ལས་འཕྲོས་ཏེ་མགར་ཚང་གི་འདས་མ་ད་གསུམ་གྱི་བྱ་བཞག་ལ་ལྷག་བསམ་རྣམ་དག་གིས་བཀའ་མོལ་ལྷུག་བརྗོད་བྱས།
གུང་ཟས་ཀྱི་རྗེས་ནས་མགར་ཚང་གི་བུ་རབས་ཚ་རྒྱུད་ཀྱིས་བསྐྲུན་པའི་ཤེས་རིག་ཐོན་རྫས་དང་མིག་སྔར་རང་རང་གི་བྱ་བའི་གྲུབ་འབྲས་སྟོན་རྒྱུ་ཡོད་པ་དག་འགྲེམ་སྟོན་བྱས་ཏེ་གནད་ཡོད་མི་སྣ་དག་ལ་གཟིགས་འབུལ་ཞུས་པས་ཧ་ཅང་དགའ་བོ་བྱུང་།
དེའི་འཕྲོར་གྲགས་ཅན་གླུ་པ་མགར་བསམ་འགྲུབ་ཚེ་རིང་གི་གཙོས་མགར་ཚང་གི་ན་གཞོན་གླུ་པ་གླུ་མ་དག་གིས་གླུ་བྲོ་གཞས་གསུམ་གྱིས་མི་སེམས་སྐྱིད་ལ་སྐུལ།
ཉིན་གཉིས་པའི་སྔ་དྲོར་མགར་ཚང་གི་ལོ་ཆོས་ཀྱི་ཚུལ་དུ་བོད་ཀྱི་ལོ་རྒྱུས་དང་འབྲེལ་བའི་པདྨ་བཀའ་ཡི་ཐང་ཡིག་ཡི་གེ་ཤེས་ཚད་ཀྱིས་མཉམ་འདོན་བྱས། ཉིན་གུང་རྒྱུག་རྩེད་དང་ཐག་རྩེད། སྒ་ཞོ་སོགས་སྲོལ་རྒྱུན་གྱི་རྩེད་མོ་ལ་རོལ།
ཕྱི་དྲོར་ལོ་འདིར་མགར་ཚང་གི་ན་གཞོན་སློབ་ཆེན་དང་མཐོ་འབྲིང་དམའ་འབྲིང་གི་རྒྱུགས་ལོན་མཁན་ཚང་མར་བྱ་དགའ་དང་གཟེངས་རྟགས་སྤྲད་ནས་ཤེས་རིག་ཡར་སྐུལ་གྱི་ཕྱག་ལས་ཅུང་ཟབ་རྒྱས་སྤེལ་ཞིང་རྗེས་དྲན་གྱི་འདྲ་པར་བརྒྱབས་ཏེ་རྒྱལ་ཁ་དང་གཟི་བརྗིད་ངང་མཇུག་བསྡུས།
དགོང་མོར་རྫ་སྟོད་རྫོང་ཁོངས་ཀྱི་མགར་ཚང་གི་གནད་ཡོད་མི་སྣ་དང་ཁཱ་ཤེས་རབ་རྒྱ་མཚོ་སོགས་ཀྱིས་མ་འོངས་པའི་མགར་ཚང་གི་བྱ་བའི་མདུན་ལམ་ཐད་གྲོས་ཆོད་ནན་མོ་བྱས།
མགར་ཚང་གི་ཤེས་རིག་ཡར་སྐུལ་གྱི་བགྲོ་གླེང་ཡུལ་དངོས།
ཐེངས་འདིར་འཛོམས་པའི་མགར་ཚང་གི་དགེ་འདུན་པའི་སྡེ།
ཤེས་རིག་ཡར་སྐུལ་བྱ་འགུལ་ཁྲོད་བྱ་དགའ་ཐོབ་པའི་སློབ་བུ་དག་གི་མཉམ་པར།
མགར་ཚང་གི་དགེ་རྒན་འགའ་དང་ཤེས་རིག་ཡར་སྐུལ་བྱ་དགའ་ཐོབ་པའི་སློབ་བུ་དག་གི་མཉམ་པར།
ཤེས་རིག་ཡར་སྐུལ་བྱ་དགའ་ཕུལ་བའི་དྲན་རྟེན།
མགར་བསམ་འགྲུབ་ཚེ་རིང་གིས་གླུ་ངག་གི་མཆོད་པ་འབུལ་བཞིན་པ།
མགར་ཚང་གི་བུ་རབས་ཚ་རྒྱུད་ཀྱིས་བསྐྲུན་པའི་ཤེས་རིག་ཐོན་རྫས་འགྲེམ་སྟོན།
མགར་གྱི་རྒན་གཞོན་བར་གསུམ་རང་རང་གི་རྣམ་དཔྱོད་ཀྱིས་བསྐྲུན་པའི་ཐོན་རྫས་དང་གྲུབ་འབྲས་འགྲེམ་སྟོན།
གྲུབ་འབྲས་འགྲེམ་སྟོན་ལ་བལྟས་རྗེས་རང་རང་གི་བསམ་ཚུལ་ལྷུག་བརྗོད་བྱེད་བཞིན་པ།
ཤེས་རིག་ཡར་སྐུལ་དང་འཇོན་ནུས་སྔོག་འདོན་གྱི་ལས་རིམ་ལ་སྒུལ་ཤུགས་ལྡན་པའི་བགྲོ་གླེང་གནང་བཞིན་པ།
ཐེངས་འདིའི་འགན་འཛིན་པ་དག་ལ་བཀའ་དྲིན་མཚོན་པའི་ཁ་བཏགས་ཕུལ་བ།
མགར་ཚང་གི་མ་འོངས་པའི་བྱ་བའི་ཐད་གནད་ཡོད་མི་སྣ་འཛོམས་ཏེ་གྲོས་ཆོད་བཞག་པ།
༢༠༡༩ལོའི་མཚོ་སྔོན་ཞིང་ཆེན་ཡུལ་ཤུལ་ཁུལ་རྫ་སྟོད་རྫོང་གི་མགར་སྐོར་དགྱེས་འཛོམས་ཐེངས་གསུམ་པའི་ཤེས་རིག་ཡར་སྐུལ་གཟེངས་འབུལ་མཛད་སྒོ་རྒྱལ་ཁ་དང་གཟི་བརྗིད་ངང་མཇུག་བསྡུས།
གསར་འགོད་པ། མགར་ཆོས་འགྲུབ།
| 