ཡུན་རིང་ལ་བསམ་པའི་ཡུལ་དེར་འབྱོར་རྗེས།

ཚེ་རིང་རྡོ་རྗེ།

༡རྨི་ལམ་དང་འགྲུལ་བཞུད།

ཉིན་མོ་སྟོང་ལ་ཐོས་འཛིན་ཡངས་མོས་ཉན། །

མཚན་བརྒྱའི་ཡུན་ལ་རྨི་ལམ་གསེང་དུ་སྦྲུམ། །

གནས་འདི་བསམ་པའི་སྙིང་ཆུང་འཕར་ལྡིང་རྒོད། །

རེ་བས་འགྲུབ་པས་མཚན་མོའི་གཉིད་ཀྱང་ཡལ། །

 

ཞོགས་པ་དེ་ཡི་ཉི་ཟེར་ལྷག་ཏུ་མཛེས། །

དུས་ཚོད་འདི་ཡི་གོམ་འགྲོས་སྔར་བས་དལ། །

འགྲུལ་སྐྱེལ་རླངས་འཁོར་གོག་མ་ནུད་འགྲོས་ཀྱིས། །

ང་ཡི་གམ་དུ་དབུགས་རིང་འབྲིན་ནས་བསྡད། །

 

ཕ་ཡུལ་ཞེས་པའི་དག་ཞིང་ཡག་པོ་ཞིག །

ཤུལ་དུ་བསྐྱུར་ནས་རེ་བ་རྡོག་པོ་དེ། །

རི་དང་ཀླུང་གིས་སྙིང་ཡང་སྡོམ་པའི་སར། །

རེ་བའི་ས་བོན་ཞིང་ལ་འདེབས་པར་ཐོན། །

༢གདོང་ལེན།

རིང་དང་ཁང་བརྩེགས་བརྒྱ་བྱིན་གནས་དང་མཉམ།  །

སློབ་རའི་མཛེས་སྡུག་སུམ་རྩེན་ཡུལ་ལ་འགྲན། །

བློ་དང་སྤོབས་པའི་མེ་ལྕེ་རབ་འཕྱོ་བའི། །

སློབ་གྲོགས་གསར་བ་དྲུག་ཅུ་རྩ་བདུན་གྱིས། །

རེ་བའི་ཞིང་ལ་སྤོབས་པའི་གཡུར་ཆུ་དྲངས། །

༣ཡུལ་དྲན་པ།

མདང་དགོང་ཁ་པར་ལམ་ནས། །

ཁྱུང་མཁྱུའི་མཛེས་སྡུག་གླེང་བྱུང་། །

ཡུལ་དེའི་དཔྱིད་ཀ་དྲན་དུས། །

ལུས་འདི་ཁང་བར་བཀག་ཀྱང་། །

སེམས་པ་ཁྱུང་མཆུར་ལྡིང་གི །