ཇོ་ནང་དོལ་བོ་བ་ཤེས་རབ་རྒྱལ་མཚན་གྱི་གདན་ས་འདི་ནི་གཞིས་ཀ་རྩེའི་མངའ་ཁོངས་ལྷ་རྩེ་རྫོང་དུ་ཡོད།
རྩི་ནང་དབྱིངས་རིག
འདི་ནི་བདག་ཅག་གི་སྟོན་པ་རྒྱལ་བ་ཤཱཀྱ་ཐུབ་པས་མདོ་རྔ་བོ་ཆེ་དང་། གཙུག་ཏོར་རྣམ་པར་རྒྱལ་མའི་རྒྱུད་སོགས་སུ་རྡོ་རྗེའི་ལུང་གིས་ཡང་ཡང་བསྔགས་པའི་ཚད་མའི་སྐྱེས་བུ་དམ་པ༧ཀུན་མཁྱེན་དོལ་པོ་མཆོག་གིས། ངེས་དོན་ཆོས་ཀྱི་དུང་ཆེན་འབུད་ས་དང་། ངེས་དོན་ཆོས་ཀྱི་དར་ཆེན་འཕྱར་ས། ངེས་དོན་ཆོས་ཀྱི་རྒྱལ་རྔ་བརྡུངས་སའི་ཇོ་ནང་བསྟན་པའི་འབྱུང་གནས་བྱང་ཕྱོགས་ཤམ་བྷ་ལ་གཉིས་པ་ནགས་རྒྱལ་དབེན་པའི་རི་ཁྲོད་ཆེན་པོ་རེད།
འདི་ནི་ཇོ་ནང་ཀུན་མཁྱེན་ཆེན་པོའི་དངོས་སློབ་ཉེ་གནས་སངས་རྒྱས་རིན་ཆེན་སོགས་ཀྱིས་ཟབ་ལམ་སྦྱོར་དྲུག་བསྒོམས་ཏེ་འོད་གསལ་རྟགས་སྣང་ཉམས་ཀྱིས་རི་ལུང་གང་སྟེ། འཕར་གཡོའི་ཀི་རིང་འདེབས་ས་རེད།
འདི་ནི་ཉ་དབོན་ཀུན་དགའ་དཔལ་བཟང་གིས་ཀུན་རྫོབ་འཁོར་བའི་གྲོང་ནག་བསྐྱུར་ཏེ། དོན་དམ་ཡེ་ཤེས་རྒྱལ་ས་ནས་བདེ་སྟོང་ཉམས་ཀྱི་ཆང་གིས་བཟི་སྟེ། རྡོ་རྗེའི་གླུ་དབྱངས་གྱེར་སའི་གླུ་ཡི་གར་སྟེགས་ཆེན་མོ་རེད།
འདི་ནི་ཇོ་ནང་ཕྱོགས་ལས་རྣམ་རྒྱལ་གྱིས་ཀུན་གཞིའི་རྣམ་ཤེས་ཀྱི་སྟོད་ཕུར་བྱང་ནས་རིག་པ་བརྗེན་པར་ལྷང་ལ་བུད་དེ། སྤྲོས་པ་ཐམས་ཅད་དང་བྲལ་བའི་སྤྲོས་མེད་རིག་པའི་དོན་ལ་ཁོ་ཐག་ནང་ནས་ཆོད་སའི་ནགས་རྒྱལ་དབེན་པའི་ལུང་བ་རེད།
འདི་ནི་མཚལ་མིན་པ་བསོད་ནམས་བཟང་བོའི་དགོངས་པ་ཀློང་ནས་བརྡོལ་ཞིང་། མགྲིན་པའི་རྩ་མདུད་གྲོལ།
སྣང་སྲིད་དཔེ་ཆར་ཤར་ཏེ་ལེགས་བཤད་འདོམ་གྱིས་འཇལ་ས་རེད།
འདི་ནི་ས་བཟང་མ་ཏི་མཆོག་གི་རིག་པ་བརྟུལ་ཞུགས་ལ་སྤྱོད་ནས་རི་བྲག་སོགས་ལ་ཟང་ཐལ་དུ་བྱོན་ཞིང་། སྣང་བ་ཉམས་ཀྱིས་འུར་ཏེ་རྡོ་རྗེའི་བྲོ་གར་འཁྲབ་སའི་བྲོ་ར་རེད།
འདི་ནི་ཇོ་ནང་ཀུན་མཁྱེན་ཆེན་པོའི་རང་འདྲའི་བུ་སློབ་དག་ལ་སྦྱོར་བ་ཡན་ལག་དྲུག་གི་ཡན་ལག་སོ་སོའི་ཉམས་རྟོགས་ཐད་གར་རྫོགས་ཉིན། ཐུགས་དགྱེས་པའི་རྡོ་རྗེའི་ཚོགས་མཆོད་བཅག་སའི་མཆོད་ཁྲི་རེད།
འདི་ནི་ཇོ་ནང་བ་དག་གིས་མེ་ཏོག་ལྷ་བབས་ཀྱི་ལྷ་སྐལ་ཀུན་མཁྱེན་བླ་མའི་གདན་ས་དད་པའི་ཐལ་མོ་སྦྱར་ས་དང་། གུས་པའི་མེ་ཏོག་མཆོད་སའི་ཚོགས་ཞིང་ཐང་ག་རེད།
2014/3/15
|