དཔལ་ས་སྐྱའི་ཆོས་མཛོད་ལེགས་གྲུབ་ཀྱི་མཛད་སྒོ།
ཁྲོཾ་ལྗོངས་མཁན་པོ་འཇམ་དབྱངས་ཡོན་ཏན་རྒྱ་མཚོ་ལགས་ཀྱིས་གསུང་བཤད་གནང་འདུག
སྨིན་དབུས་པོ།
བོད་རབ་བྱུང་བཅུ་བདུན་ཤིང་རྟ་ལོའི་ཟླ་བ་དང་པོའི་གནམ་གང་སྤྱི་ལོ་༢༠༡༤ལོའི་ཟླ་གསུམ་པའི་ཚེས་༣༠ཉིན།
སི་ཁྲོན་ཁྲིན་ཏུའུ་བོད་ཁྲོམ་གྱི་ཛཾ་བྷ་ལའི་གསོལ་སྟོན་གླིང་ནས།
ལྷག་བསམ་དང་སྙིང་སྟོབས་ཀྱི་ཕྱུག་པའི་ཁྲོཾ་ལྗོངས་མཁན་པོ་འཇམ་དབྱངས་ཡོན་ཏན་རྒྱ་མཚོ་ལགས་ཀྱིས་སྤྱི་ལོ་ཉིས་སྟོང་དགུ་ལོ་ནས་བཟུང་ལོ་ངོ་ཧྲིལ་བོ་དྲུག་གི་རིང་།
དཀའ་ངལ་དང་གནོན་ཤུགས་ཀྱི་བརྒྱུད་རིམ་མང་པོ་གདོང་གིས་བསུས་ཏེ་འབད་པ་བརྒྱ་ཕྲག་གིས་གཉེར་བའི་སི་ཁྲོན་བོད་ཡིག་དཔེ་རྙིང་བསྡུ་སྒྲིག་ཁང་ཞེས་འཐུས་སྒོ་ཚང་བའི་དཔེ་རྙིང་སྲུང་སྐྱོབ་ཁང་ཞིག་དབུ་བརྙེས་པར་བྱས་ཤིང་།
བོད་དར་གྲུབ་མཐའ་རིས་མེད་ཀྱི་དཔེ་རྙིང་པོད་གྲངས་ཁྲི་ཕྲག་གཉིས་ལྷག་བསྡུས་ཏེ། ༡
གངས་ཅན་རིག་མཛོད། ༢ བྲིས་པོད་གཅེས་བསྡུས། ༣ ཐར་ལམ་གསལ་སྒྲོན། ༤
ཁྲོཾ་ལྗོངས་གནའ་རབས་དཔེ་ཚོགས། ༥ ཐུན་མོང་རིག་མཛོད། ༦ ས་སྐྱའི་ཆོས་མཛོད། ༧
བྱང་ཆུབ་ལམ་སྒྲོན། ༨ དཔེ་དཀོན་གཅེས་བཏུས། ༩ འཇིག་རྟེན་མིག ༡༠ རིག་ནོར་གཅེས་བཏུས།
༡༡
ཡང་དར་བསྟན་པའི་གསོས་སྨན་ཞེས་དཔེ་ཚོགས་ཆེན་མོ་ཁག་བཅུ་གཅིག་གི་ནང་དུ་ཚུད་པར་བྱས་ཤིང་།
བོད་ལྗོངས་དང་སི་ཁྲོན་སོགས་མི་རིགས་པར་སྐྲུན་ཁང་སོ་སོ་ནས་ཚད་ལྡན་དུ་བསྐྲུན་ཏེ་རྒྱ་ཆེའི་དཔེ་ཀློག་པ་རྣམ་པའི་སྤྱན་ལམ་དུ་ཕུལ་དང་འབུལ་བཞིན་པའི་ནང་ཚན།
དཔེ་ཚོགས་ཁག་དྲུག་པ་༼དཔལ་ས་སྐྱའི་ཆོས་མཛོད་ཆེན་མོ་ཐེངས་དང་པོ་ལེགས་གྲུབ་ཀྱི་མཛད་སྒོ༽སྔ་མོའི་ཆུ་ཚོད་༩པའི་སྟེང་ཟབ་རྒྱས་ངང་བསྡུས་སོང་།
མཛད་སྒོ་འདིའི་སྟེང་དུ་གདན་ཞུས་སྐུ་མགྲོན་གཙོ་བོ། སི་ཁྲོན་ཞིང་ཆེན་དཔེ་མཛོད་ཁང་།
སི་ཁྲོན་ཞིང་ཆེན་གནའ་རྫས་སྲུང་སྐྱོབ་ལྟེ་གནས། སི་ཁྲོན་མི་རིགས་དཔེ་སྐྲུན་ཁང་།
སི་ཁྲོན་བཀའ་བསྟན་དཔེ་བསྡུར་ཁང་། སི་ཁྲོན་ཅ་ཁྲོང་པར་འདེབས་འགན་འཁྲི་སྤྱི་གཉེར་ཁང་།
ལྷོ་ནུབ་མི་རིགས་སློབ་གྲྭ་ཆེན་མོའི་གངས་ཅན་གཙུག་ལག་ནོར་བུའི་ཕོ་བྲང་།
ཨ་རི་བོད་ཀྱི་ནང་བསྟན་ལྟེ་གནས། ས་སྐྱའི་དཔེ་རྙིང་བསྡུ་སྒྲིག་ཁང་།
ཡ་ཆེན་སྔ་འགྱུར་དཔེ་ཚོགས་ཁང་།ཁྲིན་ཏུའི་མེ་ཏོག་དཀར་པོའི་པར་སྒྲིག་ཁང་།
ལེགས་སྨོན་རི་མོའི་སྒྱུ་རྩལ་ཁང་། སི་ཁྲོན་གྲངས་ཉུང་མི་རིགས་འཕྲོད་བསྟེན་དར་སྐུལ་ཚོགས་པ།
རྫོང་སར་བོད་སྨན་ཁང་། མདོ་ཁམས་སྡེ་དགེ་དགོན་ཆེན་གྱི་བཤད་གྲྭ། རྔ་ཡུལ་དྷཱི་ཕུ་དགོན།
སྔ་འགྱུར་རྫོགས་ཆེན་དགོན་པ། དགེ་རྩེ་གྲ་ལག་དགོན། མགོ་ལོག་ལྕམ་མདའ་དགོན།
སྔ་ཡུལ་སྣང་ཞིག་དགོན། སྡེ་དགེ་འཁོར་མདོ་དགོན།
ཁྲོཾ་རྡོ་ཁོ་དགོན་སོགས་ཀྱི་དབུ་ཁྲིན་དང་། ཚོགས་གཙོ། མཁན་པོ། སྤྲུལ་སྐུ།
ལས་སྣེ།
ལྷག་བསམ་ཅན་གྱི་སྒེར་གཉེར་ཚོང་དཔོན་སོགས་བོད་མདོ་དབུས་ཁམས་གསུམ་ནས་ཕེབས་པའི་འབྲེལ་ཡོད་མི་སྣ་བརྒྱ་ཕྲག་གིས་གྲུབ་ཡོད་པར་མ་ཟད།
ད་དུང་མཁས་དབང་གཟན་དཀར་ཐུབ་བསྟན་ཉི་མ་མཆོག་དང་། མཁན་ཆེན་ཚུལ་ཁྲིམས་བློ་གྲོས།
སི་ཁྲོན་ཞིང་ཆེན་རིག་གནས་ཁང་གི་དབུ་ཁྲིད་ཚེ་པོ་སོགས་ཀྱིས་ཆེད་མངག་གི་སྐུ་ཚབ་ཀྱང་འདུག
མཛད་སྒོ་འདིའི་ཚོགས་ཁང་གི་ཕྱི་ནང་ཡོངས་ཐུན་མིན་བོད་ལུགས་མཛེས་སྤྲོས་ཀྱིས་ཡོངས་སུ་རྒྱན་ཡོད་པར་མ་ཟད།
འཚོགས་སྟེགས་སུ་ཚོགས་མི་རེ་རེའི་མདུན་དུ་བཀྲ་ཤིས་པའི་ཞོ་སར་དཀར་ཡོལ་གང་རེའི་སོལ་སྟོན་བསྒྲིགས་ཡོད་པ་སོགས་བོད་ཀྱི་སྲོལ་རྒྱུན་རྟེན་འབྲེལ་གྱི་སྒོ་འཕར་སླར་གསོའི་ཐད་སྔར་མེད་ཀྱི་རྣམ་པ་གསར་བ་རེ་མངོན་པར་བྱས་ཡོད་འདུག་པ་ནི་ཤིན་ཏུ་ཉམས་སྤྲོ་བའི་གནས་ཤིག་གོ།
མཛད་སྒོའི་ལས་རིམ་དང་པོ།
མདོ་འཛིན་པས་དཔལ་ས་སྐྱའི་ཆོས་མཛོད་ཆེན་མོ་བརྩེ་ཆེན་བསྟན་པའི་མཛེས་རྒྱན་ཡིད་འཕྲོག་ནོར་བུའི་ཕྲེང་བའི་མཛད་སྒོའི་སྟེང་གདན་ཞུས་སྐུ་མགྲོན་རྣམ་པ་རེ་རེ་བཞིན་ངོ་སྤྲོད་མཛད།
ལས་རིམ་གཉིས་པ།
དཔེ་སྒྲིག་ཁང་གི་དབུ་གཙོ་མཁན་འཇམ་དབྱངས་ཡོན་ཏན་རྒྱ་མཚོ་ལགས་ཀྱིས་དབུ་མཛད་དེ་བསྟན་འགྲོའི་ཕན་བདེ་རྒྱས་པའི་སྨོན་ལམ་རྣམ་པར་དག་པས་མདུན་བསུས།
སྡེ་དགེ་དགོན་ཆེན་གྱི་མཁན་པོ་སྐལ་ལྡན་སོགས་མཁན་པོ་རྣམ་པས་ཕྱག་ཏུ་དཔལ་འབར་བསྣམས་ཏེ།
ཆོས་མཛོད་ཆེན་མོའི་མདུན་དུ་མ་རིག་པའི་མུན་པ་སེལ་བའི་མར་མེའི་མཆོད་ཕྲེང་འོད་སྟོང་ལྡན་པ་སྒྲོན་པའི་མཛད་སྒོ་སྤེལ།
ལས་རིམ་གསུམ་པ།
ཆོས་མཛོད་ཆེན་མོ་གཙོ་སྐྲུན་སྡེ་ཁག་གི་ལས་སྒྲུབ་མི་སྣས།
བོད་བརྒྱ་དབྱིན་གསུམ་གྱི་སྐད་ཀྱིས་དཔལ་ས་སྐྱའི་ཆོས་མཛོད་ཆེན་མོའི་སྒྲིག་རིམ་བཞུགས་བྱང་ངོ་སྤྲོད་མཛད།
ལས་རིམ་བཞི་བ།
དཔེ་རྙིང་བསྡུ་སྒྲིག་ཁང་གི་ལས་སྒྲུབ་ན་གཞོན་ཕོ་མོའི་མེ་ཏོག་གི་མཆོད་སྤྲིན་དང་སྦྲེལ།
ཚོགས་གཙོ་མཁན་འཇམ་དབྱངས་ཡོན་ཏན་རྒྱ་མཚོ་ལགས་དང་།
དགོན་ཆེན་མཁན་པོ་སྐལ་ལྡན་རྣམ་པ་གཉིས་ཀྱིས་དཔེ་ཚོགས་ཆེན་མོའི་ཞལ་ཕྱེ་བའི་མཛད་སྒོ།
ལས་རིམ་ལྔ་བ།
དཔེ་སྒྲིག་ཁང་གི་དབུ་གཙོ་མཁན་འཇམ་དབྱངས་ཡོན་ཏན་རྒྱ་མཚོ་ལགས་ཀྱིས་དཔེ་སྒྲིག་ཁང་ཇི་ལྟར་དབུ་བཙུགས་པ་དང་།
ད་ལྟའི་གནས་བབ།
མ་འོངས་པའི་འཆར་གཞི་སོགས་དང་འབྲེལ་དཔེ་ཚོགས་བསྡུ་སྒྲིག་གི་བྱ་བའི་བརྒྱུད་རིམ་ངོ་སྤྲོད་མཛད།
ལས་རིམ་དྲུག་པ།
སི་ཁྲོན་ཞིང་ཆེན་དཔེ་མཛོད་ཁང་གི་དབུ་གཙོ་གཞོན་པ་དང་། ཞིང་ཆེན་གནའ་རྫས་སྲུང་སྐྱོབ་ཁང་གི་འགན་འཛིན་ཆེན་མོ་བང་ཅ་ལེན་ལགས་ཀྱིས་མཛད་སྒོ་འདི་བསྡུས་པར་སྤྲོ་སྣང་གིས་རྟེན་འབྲེལ་ཞུས་པ་དང་།
ཆོས་མཛོད་པར་བསྐྲུན་གྱི་ལས་རིམ་འདི་སི་ཁྲོན་ཞིང་ཆེན་དཔེ་མཛོད་ཁང་གི་མངའ་ཁོངས་ནས་ལུགས་མཐུན་དང་།
སྤུས་ཚད་ལྡན་པའི་སྒོ་ནས་གཉེར་བའི་བྱ་བཟང་དོན་བཟང་ཞིག་ཡིན་པའི་སྐོར་ནས་གསུང་བཤད་མཛད།
ལས་རིམ་བདུན་པ།
སྡེ་དགེ་དགོན་ཆེན་གྱི་མཁན་པོ་སྐལ་ལྡན་ལགས་ཀྱིས་ཆོས་མཛོད་ཆེན་མོའི་མཛད་སྒོ་དང་འབྲེལ།
འཇམ་མགོན་ས་སྐྱ་པཎ་ཆེན་ཀུན་དགའ་རྒྱལ་མཚན་མཆོག་གི་ཆེ་བ་བརྗོད་པའི་གསུང་བཤད་གནང་།
ལས་རིམ་བརྒྱད་པ།
སི་ཁྲོན་ལྷོ་ནུབ་མི་རིགས་སློབ་གྲྭ་ཆེན་མོའི་དགེ་རྒན་ཐུབ་བསྟན་ཕུན་ཚོགས་ཀྱིས་ཆོས་མཛོད་ཆེན་མོ་ལེགས་གྲུབ་ཀྱི་མཛད་སྒོར་བསྟོད་པ་དང་འབྲེལ། བོད་ཀྱི་རིག་གནས་ལ་མེད་དུ་མི་རུང་བ་ནི་དཔེ་ཚོགས་སྲུང་སྐྱོབ་ཀྱི་བྱ་གཞག་ཡིན་པའི་སྐོར་ནས་གཏམ་བཤད།
ལས་རིམ་དགུ་བ།
དཔེ་སྒྲིག་ཁང་གི་ལས་སྒྲུབ་མི་སྣ་ན་གཞོན་ཚོས་ཆོས་མཛོད་ཆེན་མོ་ལེགས་གྲུབ་ཀྱི་དགའ་སྟོན་དང་འབྲེལ་བའི་གནའ་དེང་གི་གླུ་གཞས་རྐྱང་ལེན་དང་།
མཉམ་ལེན། རྡུང་ལེན། བོད་ཀྱི་དམངས་གླུ་དབྱངས་རིང་མ་སོགས་ཀྱི་སྙན་འཇེབས་འོག་ཚོགས་ར་ཆེན་མོའི་ཁོར་ཡུག་ལ་ཉམས་དགའ་སྤྲོ་སྐྱིད་ཀྱི་གོ་སྐབས་རྒྱ་ཆེན་པོ་བྱིན།
ལས་རིམ་བཅུ་བ།
དཔེ་སྒྲིག་ཁང་གི་དཔེ་རྙིང་བསྡུ་སྒྲིག་གི་བྱ་བར་རྒྱབ་སྐྱོར་གནང་མཁན་གྱི་མི་སྣ་ལ་བཀའ་དྲིན་ཞུ་རྟེན་དང་།
གདན་ཞུས་སྐུ་མགྲོན་ལ་ལེགས་སྐྱེས་ཕུལ་ཞིང་།
ཚོགས་མི་ཡོངས་རྫོགས་ལ་ཕུན་སུམ་ཚོགས་པའི་གསོལ་སྟོན་གྱ་ནོམ་པ་དྲངས།
ལས་རིམ་བཅུ་གཅིག་པ།
ཆོས་མཛོད་ཆེན་མོའི་མདུན་དུ་ཚོགས་མི་ཡོངས་ཀྱི་བཞིན་ལ་མཛུམ་མདངས་རྒྱས་བཞིན།
དགེ་ཞིང་བཀྲ་ཤིས་པའི་བྱ་འགུལ་དེར་ཞུགས་པའི་དྲན་རྟེན་གྱི་མཉམ་པར་བླངས་ཤིང་།
ཕན་ཚུན་མཛའ་རྩེའི་ངང་མཇུག་ཡོངས་སུ་བསྡུས།
མཛད་སྒོ་འདི་ནི་བོད་ཀྱི་དཔེ་རྙིང་བསྡུ་སྒྲིག་བྱ་བའི་ལས་རིམ་ཐད་ནས་སྔོན་མེད་ཀྱི་བྱ་བཟང་རྟེན་འབྲེལ་གྱི་རྣམ་པ་མི་དམན་པ་ཞིག་ཡིན་པར་མ་ཟད།
བོད་ཀྱི་རིགས་གཞུང་དར་སྤེལ་གྱི་ལས་ཀ་ལ་མཐོང་ཆེན་དང་།
རྩི་མཐོང་ཚད་མཐོན་གནང་དགོས་པའི་མཚོན་དཔེ་བླ་ན་མེད་པ་ཞིག་གི་དབུ་ཁྱུད་ཀྱང་རེད་སྙམ་ཡོད་དོ།
།
|