༄༅།
།ཇོ་ནང་ཆོས་དར་ཆེན་མོའི་མཚོན་དོན་ཕྱོགས་ཙམ་གསལ་བྱེད་གཤམ་གསལ།
སྤྱིར་རྣམ་བཅུ་དབང་ལྡན་གྱི་བཤད་པ་ནི།
ཕྱི་དུས་ཀྱི་འཁོར་ལོ་ཉི་ཟླ་གཟའ་སྐར་སོགས་ཕྱི་སྣོད་ཀྱི་འཇིག་རྟེན་དང་།
ནང་དུས་ཀྱི་འཁོར་ལོ་ཁམས་དྲུག་ལྡན་གྱི་སྐྱེས་བུའི་རྩ་རླུང་ཐིག་ལེ་དང་སྐྱེ་འཆི་བར་དོ་སོགས་རྡོ་རྗེ་ལུས་ཀྱི་གནས་ཚུལ་དང་། གཞན་དུས་ཀྱི་འཁོར་ལོ་ནི།
དཔལ་དུས་ཀྱི་འཁོར་ལོའི་སྐུ་གསུང་ཐུགས་གསུམ་གྱི་རྟེན་བརྟེན་པའི་དཀྱིལ་འཁོར་སོགས་གསང་བ་ལམ་བསྐྱེད་རྫོགས་དང་། ཡང་གསང་དོན་ དམ་པའི་བདེ་གཤེགས་སྙིང་པོའི་སྐུ་གསུང་སོགས་མཚོན་པ་སོགས་ཡིན་པར་དཔལ་དུ་ཀྱི་འཁོར་ལོའི་རྒྱུད་སྡེ་རྩ་འགྲེལ་ལས་བཤད་པ་ལྟར་ཀུན་གྱི་ཐུགས་མངའ་ལྟར་རོ།
།འཁོར་ལོ་གསུམ་ཆོས་འཁོར་གསུམ་གྱི་མཚོན་དོན་ཡིན་ལ།
དེའི་མཐའ་སྐོར་གྱི་མདོག་སྣ་ལྔའི་བཤད་པ་ནི་སྤྱིར་ནང་ཆོས་ཀྱི་ཆོས་དར་ལྟར་རོ། །ཕྱོགས་ཀྱི་མདོག་ནི།
དཔལ་དུས་འཁོར་གྱི་རྒྱུད་ལས་བསྟན་པའི་ཕྱོགས་མདོག་ལྟར་ཡིན་ནོ། །དེའི་བཤད་པ་དུས་འཁོར་གྱི་རྒྱུད་ལྟར་རོ།
།དེ་ལ་ཆ་བཅུ་གཉིས་བགོས་པ་ནི་མ་དག་པའི་ནང་འཕོ་ཆེན་བཅུ་གཉིས། ཕྱི་དུས་སྦྱོར་བཅུ་གཉིས།
འཛམ་གླིང་ས་ཆེན་དུམ་བུ་བཅུ་གཉིས། གཞན་ཚེས་ལྷའི་དཀྱིལ་འཁོར་བཅུ་གཉིས། དོན་དམ་རྣམ་པ་བཅུ་གཉིས་སོགས་ཡིན་ལ།
རྟེན་འབྲེལ་གྱི་སྒོ་ནི། རྫོགས་ལྡན་ཕྱི་མའི་སྐབས་སུ་འཛམ་གླིང་ས་ཆེན་དུམ་བུ་བཅུ་གཉིས་ལ་རྫོགས་ལྡན་ཆོས་མཆོག་དབུ་མ་གཞན་སྟོང་དེ་དར་ཞིང་རྒྱས་པར་རྒྱུད་ལས་གསུངས་པ་ལྟར་འགྱུར་བའི་རྟེན་འབྲེལ་གྱི་སྒོ་ཆེན་ཁྱད་པར་ཅན་ཞིག་ལེགས་སྨོན་ནོ།
།པདྨ་དཀར་པོ་ནི། རིགས་ལྡན་པདྨ་དཀར་པོའི་རྣམ་སྤྲུལ། ཇོ་ནང་བསྟན་པའི་སྲོལ་འབྱེད་ཆོས་རྗེ་ཀུན་མཁྱེན་རིན་པོ་ཆེ་མཚོན་བྱེད་ཡིན་ལ།
དེའི་སྟེང་གི་འཁོར་ལོ་དང་རྣམ་བཅུ་དབང་ལྡན་ནི་དམ་པ་གང་གི་ཐུགས་རྒྱུད་ཀྱི་ལུང་རྟོགས་མཚོན་བྱེད་དང་།
ཡལ་ག་རྣམས་ནི་གང་གི་སློབ་བརྒྱུད་ཀུན་མཚོན་བྱེད་དོ། །མཁན་བླ་སྤྲུལ་དུ་མས་ཐུགས་གྲོས་བྱས་ནས་སྐྱབས་མགོན་རིན་པོ་ཆེ་ལ་ཇོ་ནང་གི་ཆོས་དར་སྨོན་ཚིག་ཞིག་དགོས་ཞེས་བསྐུལ་ངོར་ཇོ་ནང་བའི་ཆོས་བརྒྱུད་སྤྱི་དང་ལྷག་པར་དུ་དུས་འཁོར་གྱི་སྦྱོར་དྲུག་དར་རྒྱས་འབྱུང་བའི་སྨོན་འདུན་བཅས་ཞེས་པའི་སྨོན་ཚིག་དང་འབྲེལ་བ་དང་།
རྗེ་བཙུན་དམ་པ་ཁལ་ཁ་རིན་པོ་ཆེའི་རྣམ་བཅུ་དབང་ལྡན་ཞིག་བཞག་ན་ལེགས་ཞེས་གསུངས་པ་གཞིར་བཅས་ནས་རི་མོར་བཀོད་པའོ། །
དགེ་བཤེས་དངོས་གྲུབ་དཔལ་གྱིས།