ས་སྐྱ་ལེགས་བཤད། ༼༤༽
ལེགས་བཤད་མཁས་པའི་བློ་གྲོས་ཀྱིས། །
གོ་ཡི་བླུན་པོས་དེ་ལྟ་མིན། །
ཉི་མའི་འོད་ཟེར་ཤར་བ་ན། །
འབྱུང་པོའི་བྱ་རྣམས་ལོང་བར་འགྱུར། །
ལེགས་བཤད་ལེགས་བཤད་དུ་མཐོང་བ་ལ། ལེགས་བཤད་ཀྱི་ཚིག་དོན་རྟོགས་པའི་མཁས་པ་ཞིག་དགོས་པར་བསྟན་པ་དེ་ཡིན།
དེ་ཡང་གཞུང་གང་ཞིག་ལེགས་བཤད་ཡིན་མིན་ནི། ཚིག་དོན་གཉིས་ལ་སྦྱངས་པ་མཐར་ཕྱིན་པའི་མཁས་པའི་བློ་གྲོས་ཀྱིས་གོ་བར་ནུས་ཀྱི། བླུན་པོས་དེ་ལྟ་མིན་ཏེ་གོ་བར་མི་ནུས་ཏེ། དཔེར་ན་ཉི་མའི་འོད་ཟེར་ཤར་བ་ན། མིག་ལྡན་གཞན་ལ་གཟུགས་མཐོང་བའི་གྲོགས་སུ་འགྱུར་གྱི། འབྱུང་པོའི་བྱ་རྣམས་གཟུགས་མི་མཐོང་བར་ལོང་བར་གྱུར་པ་བཞིན་ནོ། ཞེས་པའོ།
སྔར་ལུང་པ་ཞིག་གི་རྒྱལ་པོ་དེ་རིག་པའི་གནས་ལ་མཁས་པའི་པཎྜི་ཏ་ཞིག་ཡིན་པས། རང་གི་མངའ་འོག་ལ་མཁས་པ་ཡོད་མིན་བརྟག་པའི་ཕྱིར། ཆུ་ཡི་ནང་གི་པད་མ་ལ། །འདར་བར་བྱེད་པའི་རྒྱུ་གང་ཞིག །ཅེས་རྒྱུ་མཚན་འདྲི་བའི་ཤོ་ལོ་ཀ་ཕྱེད་བྲིས་ཏེ། ཡི་གེ་དེ་གང་སར་བཏང་སྟེ་འདིའི་རྒྱུ་མཚན་ཤེས་པ་བྱུང་ན་བྱ་དགའ་ཆེན་པོ་སྟེར་རོ་ཞེས་དྲིལ་བསྒྲགས་བྱས། དེ་ལ་སྐྱེ་བོ་མང་པོས་ལན་བཏབ་ཀྱང་རྒྱལ་པོ་དགྱེས་པའི་ལན་མ་བྱུང་། དེ་རིམ་པས་པཎྜི་ཏ་ནག་མོའི་ཁོལ་གྱི་ཕྱག་ཏུ་འབྱོར་བས་ཚེགས་མེད་པར། བུང་བ་ཞུགས་ཚེ་ཉི་མ་ནུར། །འཕུར་བར་འདོད་པ་འདར་བའི་རྒྱུ། །ཞེས་མཚོ་ནང་གི་པད་མ་གཡོ་བའི་རྒྱུ་ངོས་བཟུང་བར་མ་ཟད། དྲི་བ་ཚིག་རྐང་གཉིས་ཀྱི་ལན་ཚིག་རྐང་གཉིས་ཀྱིས་བཏབ་པས། ཤོ་ལོ་ཀ་གཅིག་གི་ནང་དྲིས་ལན་གཉིས་ཀ་ཚང་བས་རྒྱལ་པོ་ཐུགས་ཤིན་ཏུ་དགྱེས་པ་བཞིན་ནོ།
| 