ས་སྐྱ་ལེགས་བཤད། ༼༧༽

རིག་པའི་གནས་ལ་མཁས་པར་གྲགས་ཀྱང་དེ་ལ་བརྩད་པ་སྟེ་རྩོད་པ་དང་དཀའ་བའི་གནད་ལ་མ་དྲིས་པ་སྟེ་འདྲི་བརྩད་མ་བྱས་པ་དེ་སྲིད་དུ་མཁས་པའི་མཁྱེན་པའི་གཏིང་མི་དཔོག་སྟེ་དཔེར་ན། རྔ་ལ་དབྱུ་གུས་མ་བསྣུན་པ་སྟེ་མ་བརྡུངས་བར་དུ་དེ་དང་དབྱིབས་མཚུངས་པའི་སྒྲ་གྲག་རྒྱུ་མེད་པའི་དངོས་པོ་གཞན་དང་ཁྱད་པར་མེད་པ་བཞིན་ནོ། ཞེས་པའོ། །

མཁས་པ་བརྩད་ཅིང་མ་དྲིས་པའི་བར་དུ་གཏིང་མི་དཔོག་པའི་ཚུལ་ནི། དགེ་བཤེས་འཆད་ཁ་པས་བྱང་ཆུབ་སེམས་ཀྱི་གདམས་པ་ཡོད་པའི་དགེ་བའི་བཤེས་གཉེན་ཞིག་བརྩད་གཅོད་པའི་ཕྱིར། ཤ་ར་པའི་གདན་སར་ཕེབས་ཏེ། ཚོགས་ཆོས་གསན་པས་བྱང་ཆུབ་སེམས་ཀྱི་སྐོར་མང་པོ་མ་བྱུང་བས། ཐེངས་ཤིག་ཤ་ར་པ་བུམ་སྐོར་མཛད་པའི་དྲུང་དུ་ཕྱིན་ནས་ཁོང་རང་གི་ཕྱམ་རྩེ་སྟེ་གོས་ཀྱི་ཆ་ཤས་ཟླ་གམ་བཏིངས་ཏེ་དགེ་བའི་བཤེས་གཉེན་འདིར་བཞུགས་པར་ཞུ་ཞུས་པས། དེར་བསྡད་ནས་ཅི་བྱེད་གསུངས། གྲོས་ཤིག་ཞུ་བ་ལགས་ཞུས་པས། ངས་གྲོས་ཐག་ཐམས་ཅད་ཆོས་ཁྲིའི་ཁ་ནས་བཅད་པ་ཡིན། དེར་མ་ཆོད་པ་ཅི་ཡོད་གསུངས། བདག་གིས་མཐོང་བའི་དཔེ་ཆ་གཅིག་ན། ཁེ་དང་རྒྱལ་ཁ་གཞན་ལ་བྱིན། །གྱོང་དང་བུབ་ཁ་རང་གིས་ལེན། །ཟེར་བ་ཞིག་གདའ་བ་འདི་ཟབ་མི་ཟབ་ཇི་ལྟར་ལགས་ཞུས་པས། དགེ་བའི་བཤེས་གཉེན་ཤ་ར་པའི་ལ་ནས། ཟབ་མི་ཟབ་ཀྱི་ཁ་ན་ཅི་ཡོད། ཡང་དག་པར་རྫོགས་པའི་བྱང་ཆུབ་མི་སྒྲུབ་ན་ཕར་ཞོག བསྒྲུབས་ན་ཆོས་འདི་ལ་མ་བརྟེན་པར་འགྲུབ་མི་སྲིད་གསུངས། འོ་ན་བདག་ལུང་ཆོས་པ་ལགས་པས། དེ་ལ་ལུང་ཞིག་དྲང་བར་ཞུ་ཞུས་པས། མགོན་པོ་ཀླུ་སྒྲུབ་ལ་ཚད་མར་མ་འཛིན་པ་སུ་ཡོད། དེས་རིན་ཆེན་ཕྲེང་བར། བདག་ལ་དེ་དག་སྡིག་སྨིན་ཅིང་། །བདག་དགེ་མ་ལུས་དེར་སྨིན་ཤོག །ཅེས་བྱ་བ་གསུངས་པར་ལགས་གསུངས་པས། ནང་ན་རྟོགས་པ་ཁྱད་པར་ཅན་ཡོད་པར་མཁྱེན་ཏེ་དགེ་བའི་བཤེས་གཉེན་དུ་བསྟེན་པ་ལྟར་དགོས་པ་ལགས་སོ། །