ས་སྐྱ་ལེགས་བཤད། ༼༩༽
ཡོན་ཏན་ལྡན་ན་སྐྱེ་བོ་ཀུན།
།
མ་བསྡུས་པར་ཡང་རང་ཉིད་འདུ།
།
དྲི་ལྡན་མེ་ཏོག་རྒྱང་རིང་ཡང་།
།
བུང་བ་སྤྲིན་གྱི་ཚོགས་བཞིན་འཁོར།
།
རང་དང་གཞན་ལ་ཕན་སེམས་དང་རྣམ་དཔྱོད་ཀྱི་བློ་གྲོས་དང་ལྡན་པ་ཞིག་ཡིན་ན།
གྲོགས་དང་འཁོར་རང་བཞིན་གྱིས་འདུ་བར་བསྟན་པ་དེ་ཡིན།
དེ་ཡང་རང་ལ་གཞན་ཕན་གྱི་ལྷག་བསམ་ཁྱད་པར་ཅན་དང་ལྡན་ཞིང་།
གཞན་དོན་བསྒྲུབ་པའི་ཐབས་ལ་མཁས་པའི་ཡོན་ཏན་དང་ལྡན་ན།
ཡོན་ཏན་དོན་གཉེར་གྱི་སྐྱེ་བོ་ཀུན་མ་བསྡུས་པར་ཡང་རང་ཉིད་ངང་གིས་འདུ་བ་ཡིན་ཏེ།
དཔེར་ན། དྲི་བཟང་དང་ལྡན་པའི་མེ་ཏོག་རྒྱང་རིང་དུ་གནས་ཀྱང་།
དྲི་ཞིམ་དོན་དུ་གཉེར་བའི་བུང་བའི་ཚོགས་རྣམས་ད་ལྟ་མེད་ཀྱང་ད་ལྟ་འབྱུང་བ་སྤྲིན་གྱི་ཚོགས་བཞིན་དུ་འཁོར་བ་བཞིན།
ཞེས་པའོ། །
རང་ལ་མཁྱེན་བརྩེ་ནུས་པའི་ཡོན་ཏན་དང་ལྡན་ན།
སློབ་འཁོར་དྲི་བཟང་ལྡན་པའི་མེ་ཏོག་ལ་བུང་བ་ལྟར་འཁོར་བའི་ཚུལ་ནི། མཁས་གྲུབ་ཐམས་ཅད་མཁྱེན་པས།
བདེར་གཤེགས་བསྟན་པ་གངས་རིའི་སུལ་ན་གནས།
།གཞུང་ལུགས་འབུམ་ཕྲག་རལ་པའི་ཁུར་གྱིས་བརྗིད། །རིགས་པའི་མཆེ་སྡེར་མི་ཟད་སྟོབས་ལྡན་པ།
།མཁས་མཆོག་གདོང་ལྔའི་དབང་པོ་ཁོ་བོ་ཙམ།
།ཞེས་གསུངས་པ་ལྟར་རང་ཉིད་མཁས་པའི་རྩེར་སོན་པ་ཞིག་ཡིན་པས།
བདག་ཉིད་ཆེན་པོ་འདི་ལ་རྒྱུད་འཛིན་གྱི་སློབ་མ་ནུབ་ཛ་ལན་བྷ་ར་ནས་ཤར་རྒྱ་མཚོ་ཆེན་པོ་ལ་ཐུག་གི་བར་དུ་ཁྱབ་པར་བཞུགས་པས།
མཐའ་དག་བགྲང་བར་སུ་ཡིས་ནུས། ཞེས་ཡོངས་འཛིན་ཡེ་ཤེས་རྒྱལ་མཚན་གྱིས་གསུངས་པ་ལྟར་རོ། །
| 