ས་སྐྱ་ལེགས་བཤད། ༼༡༨༽
ཐབས་ལ་མཁས་ན་ཆེན་པོ་ཡང་། །
བྲན་དུ་བཀོལ་བར་ག་ལ་དཀའ། །
མཁའ་ལྡིང་མཐུ་རྩལ་ཆེ་ན་ཡང་། །
གོས་སེར་ཅན་གྱི་བཞོན་པར་འགྱུར། །
བྱ་བ་བསྒྲུབ་པའི་ཐབས་མཁས་དང་ལྡན་ན་ཆུང་ངུར་མ་ཟད། སྟོབས་ལྡན་ཆེན་པོའང་དབང་དུ་བསྡུ་ནུས་པས་ཐབས་མཁས་དང་ལྡན་པར་བྱ་དགོས་པ་དེ་བསྟན་པ་ཡིན། །
གང་ལ་གང་འདུལ་གྱི་ཐབས་མཁས་དང་ལྡན་ན་སྟོབས་ཆུང་ཆུང་སྨོས་ཅི་དགོས་ཏེ། སྟོབས་ལྡན་ཆེན་པོ་ཡང་རང་འདོད་ལྟར་བྲན་དུ་བཀོལ་བར་ག་ལ་དཀའ་སྟེ་དཀའ་བ་མེད་དེ། དཔེར་ན། ནམ་མཁའ་ལྡིང་སྟེ་བྱ་ཁྱུང་རྒོད་རྒྱལ་པོ་འཐབ་པའི་མཐུ་རྩལ་དང་ལྡན་ན་ཡང་། གོས་སེར་ཅན་ཏེ་ཁྱབ་འཇུག་གིས་ཐབས་ལ་བརྟེན་ནས་དེའི་བཞོན་པར་གྱུར་པ་བཞིན་ནོ། ཞེས་པའོ། །
དེ་ཡང་སྔོན་བྱ་ཁྱུང་དང་ཁྱབ་འཇུག་འཐབ་པ་ལས་ཁྱབ་འཇུག་གིས་བྱ་ཁྱུང་གི་འཐབ་ཟླ་མ་ནུས་པས། ཐབས་ཀྱིས་བསླུ་བར་བསམས་ཏེ། ཁྱབ་འཇུག་གིས། ཁྱོད་ཀྱི་ཕ་རོལ་གནོན་པའི་མཐུ་རྩལ་ལ། །ཁོ་བོ་མགུ་བས་ད་ནི་མི་འཐབ་ཀྱི། །ཁྱོད་ཀྱིས་ང་ལ་ཅི་འདོད་པའི་དངོས་གྲུབ་སློངས་ཤིག་སྦྱིན་ནོ་བྱས་པས། མཁའ་ལྡིང་ང་རྒྱལ་ཆེ་བས། ཀྭ་ཡེ། སྟོབས་དང་ལྡན་པས་སྟོབས་དམན་ལ་དངོས་གྲུབ་སློང་བ་ག་ལ་སྲིད། ང་ལ་སློངས་ཤིག ངས་སྦྱིན་ནོ་ཞེས་སྨྲས། ཁྱབ་འཇུག་གིས་ངས་སྦྱིན་ཞེས་ལན་གསུམ་སྨྲས་ཀྱང་། ཁོས་ངས་སྦྱིན་ནོ་ཞེས་མཐའ་བསྐྱལ་ཏེ་སྨྲས་པས། ཁྱབ་འཇུག་གིས་དེ་ལྟར་ན། ཁྱོད་ཤིག་ཏུ་མགྱོགས་ལ་མཐུ་རྩལ་ཆེ་བར་འདུག་པས། ཁོ་བོ་ཕྲག་ཏུ་ཁྱེར་ལ་འཇིག་རྟེན་ལ་སྐོར་བ་གྱིས་ཤིག་ཅེས་སྨྲས་པས། ཁོས་སྨྲས་པ་ལྟར་དེང་སང་གི་བར་དུ་ཡང་མཁའ་ལྡིང་ཁྱབ་འཇུག་གི་བཞོན་པར་གྱུར་ཏོ། ཞེས་གྲགས་པ་བཞིན་ནོ། །
|