རྒྱ་གར་དམག་གིས་ས་མཚམས་བརྒལ་བའི་ཐད་ཀྱི་ཀྲུང་གོའི་ལངས་ཕྱོཊ་ཡིག་ཆ།

　  མི་དམངས་དྲ་བའི་ཐོག་སྤེལ་བའི་གནས་ཚུལ།       སྤྱི་ཟླ་༨པའི་ཚེས་༢ཉིན།  ཀྲུང་གོའི་ཕྱི་འབྲེལ་པུའུ་ཡིས་༼རྒྱ་གར་མཐའ་སྲུང་དཔུང་སྡེས་ཀྲུང་གོ་དང་རྒྱ་གར་ས་མཚམས་ཀྱི་འབྲས་ལྗོངས་དུམ་མཚམས་བརྒལ་ཏེ་ཀྲུང་གོའི་ས་ཁོངས་སུ་འཛུལ་བའི་དོན་དངོས་དང་ཀྲུང་གོའི་ལངས་ཕྱོགས་༽ཞེས་པའི་ཡིག་ཆ་ཁྱབ་བསྒྲགས་བྱས་པ་དང་།   ༼ཡིག་ཆའི་༽ནང་།  སྤྱི་ལོ་༢༠༡༧ལོའི་ཟླ་བ་༦པའི་ཚེས་༡༦ཉིན།  ཀྲུང་གོས་དོང་ལམ་ས་ཁུལ་དུ་ལམ་བུ་བཟོས་པ་དང་།  སྤྱི་ཟླ་༦པའི་ཚེས་༡༨ཉིན།   རྒྱ་གར་མཐའ་སྲུང་དཔུང་སྡེའི་དམག་མི་༢༧༠ལྷག་ཙམ་གྱིས་གོ་མཚོན་ཁྱེར་ཞིང་ས་འཕུལ་འཕྲུལ་འཁོར་གཉིས་བཏང་ནས།    རྡོ་ཁ་ལའི་འབྲས་ལྗོངས་དུམ་མཚམས་ཀྱི་ས་མཚམས་ལས་རྨིད་༡༠༠བརྒལ་ཏེ། ཀྲུང་གོའི་མངའ་ཁོངས་སུ་འཛུལ་ནས་ཀྲུང་གོའི་ཕྱོགས་ནས་ལམ་བཟོ་རྒྱུར་བཀག་འགོག་བྱས་པ་དང་།  དུས་བབ་ཛ་དྲག་པོ་བཟོས་ཡོད།   རྒྱ་གར་མཐའ་སྲུང་དཔུང་སྡེའི་དམག་མི་མང་སྐབས་སུ་༤༠༠ལྷག་ཟིན་པ་དང་།   དེ་དང་ཕྱོགས་མཚུངས་ས་འཕུལ་འཕྲུལ་འཁོར་གཉིས་བཏང་བ་དང་སྦྲ་གུར་གསུམ་ཁྱེར་ནས།  ས་མཚམས་ལས་བརྒལ་ཚད་རྨིད་༡༨༠ལྷག་ཟིན་ཡོད།

　  སྤྱི་ཟླ་༧པའི་ཟླ་མཇུག་བར་དུ།  རྒྱ་གར་མཐའ་སྲུང་དཔུང་སྡེའི་དམག་མི་༤༠དང་ས་འདེད་འཕྲུལ་འཁོར་གཅིག་སྔར་བཞིན་ཀྲུང་གོའི་ས་ཁོངས་སུ་ཁྲིམས་འགལ་སྒོ་ནས་བསྡད་ཡོད་པ་རེད།  
  　ཀྲུང་གོའི་ཕྱི་འབྲེལ་པུའུ་དང་།  རྒྱལ་སྲུང་པུའུ།  རྒྱ་གར་དུ་བཅའ་སྡོད་ཀྲུང་གོའི་གཞུང་ཚབ་ཁང་བཅས་ཀྱིས་པེ་ཅིན་དང་རྡི་ལི་གསར་པར་སྔ་རྗེས་སུ་རྒྱ་གར་ལ་ཚིག་རྩ་ནན་པོས་སྐད་ཆ་ཐེངས་མང་བཤད་ནས།    རྒྱ་གར་གྱིས་ཀྲུང་གོའི་མངའ་ཁོངས་ས་ཆ་ཆ་ཚང་ལ་བརྩི་འཇོག་བྱེད་པ་དང་།   ས་མཚམས་ལས་བརྒལ་བའི་མཐའ་སྲུང་དཔུང་སྡེ་འཕྲལ་དུ་ཕྱིར་འཐེན་བྱ་དགོས་པའི་བླང་བྱ་དྲག་པོ་བཏོན་ཡོད་པ་རེད།

　  ཀྲུང་གོའི་ཕྱི་འབྲེལ་པུའི་མགྲིན་ཚབ་པ་ཀེང་ཧྲོང་གིས་སྤྱི་ཚེས་༢ཉིན་ཀྲུང་གོའི་ཕྱོགས་ནས་རྒྱ་གར་དམག་གིས་ཁྲིམས་འགལ་ངང་ས་མཚམས་བརྒལ་བའི་ཐད་ཀྱི་ལངས་ཕྱོགས་ཡིག་ཆ་ཡོངས་བསྒྲགས་བྱས་པའི་ཐད་གསར་འགོད་པའི་དྲི་བར་ལན་བསྐྱོན་ཡོད་པ་རེད། ཀེང་ཧྲོང་གིས། ཀྲུང་གོས་ཡིག་ཆ་འདི་ཁྱབ་བསྒྲགས་བྱས་པའི་དམིགས་འབེན་ནི་རྒྱལ་སྤྱིའི་སྤྱི་ཚོགས་ལ་ད་ཐེངས་རྒྱ་གར་དམག་གིས་རྒྱལ་མཚམས་བརྒལ་བའི་བྱ་དོན་གྱི་དོན་དངོས་གསལ་བཤད་སྔར་ལས་ལྷག་པ་བྱ་རྒྱུ་དང་། ཀྲུང་གོའི་སྲིད་གཞུང་གི་ལངས་ཕྱོགས་ཁྱོན་ཡོངས་ནས་རྒྱས་བཤད་བྱེད་ཆེད་ཡིན། ཀྲུང་གོས་འདི་ལྟར་བྱས་པ་ནི་རང་རྒྱལ་ཁབ་ཀྱི་མངའ་ཁོངས་ས་ཆའི་བདག་དབང་སྲུང་སྐྱོབ་བྱེད་ཆེད་ཡིན་ལ། རྒྱལ་སྤྱིའི་བཅའ་ཁྲིམས་ཀྱི་གཞི་རྩའི་རྩ་དོན་དང་རྒྱལ་སྤྱིའི་འབྲེལ་བའི་གཞི་རྩའི་རྩ་དོན་ལ་སྲུང་སྐྱོབ་བྱེད་ཆེད་དང་གཞུང་དྲང་དང་དྲང་བདེན་སྲུང་སྐྱོབ་བྱེད་ཆེད་ཀྱང་ཡིན། ཀྲུང་གོའི་ཕྱོགས་ནས་དཀར་ནག་བདེན་རྫུན་རིག་པས་དཔྱད་རྒྱུ་དང་། བདེན་པ་ཡོད་མེད་གཟུར་གནས་ཀུན་གྱིས་རྟོགས་རྒྱུའི་ཡིད་ཆེས་བྱེད་ཀྱི་ཡོད་ཅེས་བརྗོད་འདུག