མཚན་མོ།
མགར་རྐང་། རྫ་ཆུ་ཁ།
མཚན་མོ་ནི་གསུབ་ཐབས་བྲལ་བའི་ཁྲག་དྲོན་གྱི་དུས་ཚིགས་རེ་རེ་ལ་སྔར་བཞིན་འདས་ལོག་བརྒྱབ་ཆོག་པའི་སྐབས་ཤིག་གོ། ། ཁ་བྱང་གི་འགྲེལ།
མཚན་མོར།
མི་གཙང་བ་མཚོན་བྱེད་ཀྱི་ཐ་སྙད་སྒྱེ་གང་།
རུམ་ལ་བཅུག་ནས།
འདོད་སྲིད་ཀྱིས་བརླན་པའི་བརྡ་ཆད་དག་དཀྲུག་དཀྲུག་སྟེ།
ཚལ་བར་གཤགས་པའི་བྲང་ཁོག་ཏུ།
འཁྱག་སིབ་སིབ་ཀྱིས་གཏོར།
ཨུ་ཚུགས་ཀྱིས་མིག་ཟུང་ཅི་ཙམ་བགྲད་ཀྱང་།
ཆགས་སྡང་གི་སྡུག་བསྔལ་ལ་ཐོད་བརྒལ་བྱས་ཏེ།
ཧབ་ཆ་བརྒྱབ། འཆི་ཁར་བྱས།
ཡིན་ནའང་།
ཐང་ལ་ཟགས་པའི་རྣག་ཁྲག་གི་ཁུ་བ།
སྔོན་མར་བསགས་པའི་ལས་འབྲས་ཀྱི་སྐྱིད་སྡུག་སོགས།
འཆི་ནས་ཡང་བསྐྱར་འདས་ལོག་བརྒྱབ་ན་ཆོག
སྐབས་འདིར།
རྨི་ལམ་གྱི་འཁྲུལ་ཤེས་སམ།
བདག་དང་ཁོ་མོའི་ལེའུ་ཡིན་པས།
སྨྲེང་གཞས་རྒྱང་འཐེན།
མགར་རྐང་། ( རྫ་ཆུ་ཁ། )
སྟོན་དུས་སུ།
སྡོང་ལོ་འཐོར་བའི་མྱ་ངན་གྱིས།
ཁེར་རྐྱང་གི་སེམས་པ་སྔར་ལས་ལྕི།
ཡིན་ནའང་།
ཟླ་འོད་དབེན་པའི་མཚན་མོ་དེར་མཁྲེང་བཞིན།
འོ་ཟི་ནས་ལས་པའི་སྙན་ངག་དེ་དྲན་ཞོར།
དུངས་སེམས་ཀྱི་གཞས་ཆུང་མེ་ཏོག་ལ་སྤྲུལ་ནས།
དགའ་སྐྱོ་འདྲེས་པའི་སྙན་ངག་རེ་རེ་ལ།
ད་དུང་།
བསྐྱར་བརླག་བྱེད་ན་མི་འདོད།
འོན་ཏེ།
འཇབ་ཀྱིན་འོང་བའི་དུས་ཚོད་ཀྱི་ཐག་སྒྲ་ལ་སྐྲག་ནས།
སང་ཉིན་དང་མ་འོངས་པའི་འཚོ་བ་ལ་བློས་བསླང་བྱེད་ན་འདོད།
ཀྱེ་ཀྱེ།
བདག་གི་འཇིག་རྟེན་ལགས།
བོད་ལོ། ༢༡༤༥/༡༡/༢༢ཉིན་ཤེས་རིག་གླིང་ནས་སྦྱར།
རྩོམ་པ་པོ་ངོ་སྤྲོད།
ཕྲན་གྱི་མིང་ལ་ལེགས་ལམ་མམ་མགར་རྐང་ཟེར་ཞིང་།
སྤྱི་ལོ་༢༠༠༡ལོར་འཛམ་གླིང་གི་ས་ཁྲ་ལས་དམྱིག་སྐྱག་ཙམ་ཡང་མི་མཐོང་བའི་བྱང་འབྲོག་རྫ་ཆུ་ཁའི་སྡེ་ཞིག་ཏུ་སྐྱེས་པ་ཡིན།
སྐྱེས་ཏེ་མི་ཡུལ་དུ་ང་ཡོད་ཅེས་པའི་བརྡ་རྟགས་ཙམ་དུ་རྩོམ་འགའ་བྲིས་པ་དང་ད་དུང་བོད་ཀྱི་དུས་དེབ་དང་ཚགས་པར་སོགས་སུ་རྩོམ་འགའ་བཀོད་མྱོང་།
ད་སྐབས་གངས་ལྗོངས་ཤེས་རིག་ནོར་བུའི་སློབ་གླིང་ནས་སློབ་སྦྱོང་ཕྲན་ཚེགས་རེ་བྱེད་མོས་སུ་མཆིས།
| 