གཏོར་མའི་དབྱེ་བ་དང་མཚོན་དོན་གྱི་ཁྱད་ཆོས་བཤད་པ།
གཏོར་མའི་དབྱེ་བ་ལ་ཀུན་མཁྱེན་འཇམ་དབྱངས་བཞད་པ་མཆོག་གིས།
གཏོར་མ་ལ་ཕྱིའི་གཏོར་མ། ནང་གི་གཏོར་མ། གསང་བའི་གཏོར་མ།
བླ་ན་མེད་པའི་གཏོར་མའམ་དེ་ཁོ་ན་ཉིད་ཀྱི་གཏོར་མ་བཅས་བཞི་དང་།
རྗེ་དགེ་འདུན་གྲུབ་ཀྱིས། ཕྱིའི་གཏོར་མ། ནང་གི་གཏོར་མ། གསང་བའི་གཏོར་མ།
བསམ་གཏན་གྱི་གཏོར་མ། མཚོན་བྱེད་ཀྱི་གཏོར་མ།
དེ་ཁོ་ན་ཉིད་ཀྱི་གཏོར་མ་སྟེ་དྲུག་ཏུ་དབྱེ་ཡོད།
ཕྱིའི་གཏོར་མ་ནི་རྩ་བ་ལྔ་དང་། འབྲུ་ལྔ། སྨན་ལྔ།
ཁུར་བ་དང་ཟན་སོགས་ཅི་རིགས་ལས་གྲུབ་པ་ཡིན། ཕག་རྡོར་གོས་སྔོན་ཅན་གྱི་ཆོ་ག་ལས།
རྩ་བ་ལྔ་དང་ཡན་ལག་ལྔ།། འབྲུ་དང་ཤིང་ཏོག་སྨན་རྣམས་དང་།།
ཆག་ཐུག་ཁུར་བ་ལ་སོགས་པ། ཞེས་པ་ནས། དེ་དག་ཐམས་ཅད་ཕྱིའི་ཡིན་ནོ།།
ནང་གི་གཏོར་མ་ནི་ནང་མཆོད་བདུད་རྩིར་བྱིན་རླབས་པའི་མཐུ་ལས་ཏིང་ངེ་འཛིན་གྱིས་ངང་ནས་སྙིང་གའི་ལྷ་ལ་འབུལ་དགོས་ཏེ།
ཕག་རྡོར་གོས་སྔོན་ཅན་གྱི་ཆོ་ག་ལས། ནང་གི་སྙིང་ཀའི་ལྷ་རྣམས་ལ།།
གཏོར་མ་ཟས་རྣམས་ཡིན་པས་ན།། བདུད་རྩིར་བྱིན་བརླབས་བྱས་ནས་ནི།།
ལྷ་ལ་ཏིང་ངེ་འཛིན་གྱིས་དབུལ།། ཞེས་གསུངས།
ངེས་པ་དོན་གྱི་དཔའ་བོ་དང་མཁའ་འགྲོ་མ་ཐམས་ཅད་ཐུགས་དགྱེས་པར་བྱེད་པའི་བྱང་སེམས་དཀར་དམར་གྱི་རྒྱུ་ལས་བྱས་པའི་གཏོར་མ་ནི་གསང་བའི་གཏོར་མ་ཡིན།
འདི་ནི་གཙོ་བོ་ལྷ་ཡབ་ཡུམ་གྱི་བདེ་སྟོང་དབྱེར་མི་བྱེད་པའི་སྦྱོར་བ་ལས་བྱུང་བ་ཡིན་ལ།
འདིའི་ནང་དོན་ནི་ཤིན་ཏུ་ནས་གསང་བ་ཡིན་པས་འདིར་བཤད་ན་གསང་བ་བསྒྲགས་པའི་ཉེས་པ་འབྱུང་སྲིད་པས་གསལ་བོར་བཀོད་མེད།
བླ་ན་མེད་པའི་གཏོར་མའམ་དེ་ཁོ་ན་ཉིད་ཀྱི་གཏོར་མ་ནི།
ཐུགས་ལྷན་གཅིག་སྐྱེས་པའི་ཡེ་ཤེས་ཀྱི་རོལ་བ་ལས་བྱུང་བའི་བདེ་བ་དང་།
བདེན་འཛིན་དང་གཟུང་འཛིན་གྱི་སྤྲོས་པ་ཐམས་ཅད་དང་བྲལ་བའི་སྟོང་བ་སྟེ།
དེ་གཉིས་དབྱེ་བ་མེད་པར་དབྱེར་མེད་དུ་སྦྱོར་བའི་ཏིང་ངེ་འཛིན་དེའི་ངང་ལ་རྩེ་གཅིག་ཏུ་འཇོག་པ་ལ་ཟེར།
འདི་ལ་ནད་གདོན་འགལ་རྐྱེན་བར་ཆད་ཐམས་ཅད་ཞི་བའི་ཆེད་དུ་ཞི་བའི་ལས་འགྲུབ་བྱེད་ཀྱི་གཏོར་མ།
ཚེ་དང་བསོད་ནམས་ཁ་རྗེ་དབང་ཐང་རླུང་རྟ་དར་བ་དང་།
རྒྱུ་ནོར་ལོངས་སྤྱོད།དཔལ་འབྱོར། རིགས་རྒྱུད།
ཤེས་རབ་རྒྱས་ཆེད་དུ་འབུལ་རྒྱུ་རྒྱས་པའི་གཏོར་མ། མཛད་པ་དང་འཕྲིན་ལས།
དབང་སྡུད།
ཁམས་གསུམ་སྣོད་བཅུད་ལེགས་ཚོགས་མ་ལུས་པ་ཐམས་ཅད་དབང་དུ་བསྡུ་བྱེད་དབང་གི་གཏོར་མ།
དགྲ་བགེགས་གནོད་བྱེད་མ་རུང་བ་ཐམས་ཅད་ཚར་གཅོད་པར་བྱེད་པ་དྲག་པོའི་གཏོར་མ་བཅས་ཡོད།
ཡང་གཏོར་མ་ལ་དབྱེ་བ་མི་འདྲ་བ་དུ་མ་ཡོད་དེ།
ལྷ་བཤོས། ཡི་དམ་གཏོར་མ། ཆོས་སྐྱོང་གཏོར་མ། གཞི་བདག་གཏོར་མ། བགེགས་གཏོར།
ཟོར་གཏོར། འབྱུང་བཞི་གཏོར་མ། གཏོར་མ་ཆ་བཞི། བརྒྱ་རྩ་གཏོར་མ་བཅས་སོ།།
ལྷ་བཤོས་ནི།
ཡར་དཀོན་མཆོག་ལ་འབུལ་རྒྱུའི་གཏོར་མ་སྟེ།
ཕར་ཕྱིན་དྲུག་གི་རང་བཞིན་ལྟ་བུ་མཚོན་དགོས་གསུངས།
སྦྱིན་པའི་རང་བཞིན་མཚོན་ཕྱིར་གཏོང་སེམས་སམ་འབུལ་འདོད་ཀྱི་སེམས་དང་ལྡན་དགོས།
ཚུལ་ཁྲིམས་མཚོན་ཕྱིར་ལྷ་བཤོས་མར་ཁུས་ཡོངས་སུ་བྱུག་དགོས།
བཟོད་པ་མཚོན་ཕྱིར་ལྷ་བཤོས་བཟོ་བའི་སྐབས་ཀྱི་དཀའ་ཁག་བཟོད་དགོས།
བརྩོན་འགྲུས་མཚོན་ཕྱིར་རྒྱུན་དུ་ལྷ་བཤོས་འབུལ་རྒྱུ་དང་མཆོད་གཏོར་གཏོང་དགོས།
བསམ་གཏན་གྱི་རང་བཞིན་མཚོན་ཕྱིར་ཞབས་བརྟན་པོ་ཡིན་དགོས།
ཤེས་རབ་མཚོན་ཕྱིར་ལྷ་བཤོས་རྩེ་མོ་རྣོ་དགོས།
དཀར་གཏོར་ནི།
ཕྱོགས་བཞི་ལ་བཅད་གམ་བཞི་སྦྱོར་དགོས། དེ་ནི་ཞི་བའི་ལས་དང་། རྒྱས་པའི་ལས།
དབང་གི་ལས།
དྲག་པོའི་ལས་སྟེ་ལས་བཞི་འཕྲིན་ལས་འགྲུབ་རྒྱུའི་ཆེད་དང་མཚོན་དོན་ཡིན།
ཡང་ན་གཙོ་བོ་རྒྱས་པའི་ལས་འགྲུབ་ཆེད་དུ་ཡིན།
འདི་ལ་དཀར་གཏོར་ཟེར་བ་ནི་བཟོ་བྱེད་ཀྱི་རྒྱུ་གཙོ་བོ་ཚང་དགོས་པ་ནི་ཀ་ར།
བུ་རམ། སྤྲང་རྩི་བཅས་མངར་གསུམ་དང་། ཞོ། འོ་མ།
མར་བཅས་དཀར་གསུམ་གྱིས་གྲུབ་པ་ཡིན་པས་དཀར་གཏོར་ཟེར།
ཡི་དམ་གཏོར་མ།
ཡིད་ལ་བཅངས་པའམ་སྙིང་ལ་བཅངས་ནས་འདུག་རྒྱུར་དམ་བཅས་པའི་ལྷ་ལ་ཡིད་དམ་དང་།
ཡང་ན་ཡིད་ལ་བཅངས་ནས་དམ་ཚིག་གསང་མར་གནས་པའི་ཡི་དམ་གྱི་ལྷ་ཟེར་བ།
རང་ཉིད་ཀྱི་ཚེ་འདི་ཕྱིའི་མགོན་སྐྱབས་སུ་ཡིད་ནས་དམ་བཅས་པར་འཛིན་པའི་ལྷ་དེ་ལ་ཡི་དམ་ཟེར།
ལྷ་དེ་ལ་འབུལ་རྒྱུའི་གཏོར་མ། དཔེར་ན།
འཇིགས་བྱེད་ལྟ་བུར་གཏོར་མ་ཡུན་རིང་དུ་བཞག་ཀྱང་མི་རུལ་བའི་ཕྱིར་མར་ཁུས་བརྫིས་པའི་ཟན་གཙང་མར་དཔལ་གཏོར་སྙིང་གཟུགས་གཤོག་པ་ཅན།
རྩེ་མོ་མེ་རི་ཉི་ཟླ་བྲང་རྒྱན་ཅན།
གཡས་སུ་ཕྱོགས་སྐྱོང་གི་གཏོར་མ་བཤོས་བུ་ཟླུམ་པོ་རིལ་བུས་བསྐོར་བ།
ཡི་དམ་རང་རང་གི་མཚོན་དོན་ཐུན་མོང་མ་ཡིན་པ་རེ་ཡོད།
ཆོས་སྐྱོང་གཏོར་མ།
སངས་རྒྱས་ཐུགས་རྗེ་ཅན་དང་སྐྱེས་བུ་དམ་པའི་མདུན་དུ་སངས་རྒྱས་ཀྱི་བསྟན་པ་ཚུལ་བཞིན་དུ་སྐྱོང་བར་ཁས་བླངས་པའི་ལྷ་ལ་ཆོས་སྐྱོང་ཟེར།
དེ་ལ་མགོན་པོ། ཆོས་རྒྱལ། ལྷ་མོ་སོགས་ཡོད་ལ།
དེ་དག་ལ་འབུལ་རྒྱུའི་གཏོར་མ་སྟེ་ཤ་གཟུགས་མའམ།
མདུན་ལེབ་ཏུ་གྲགས་པ་མེ་རི་ཉི་ཟླ་རྩེ་རྒྱན་བྲང་རྒྱན་མར་ཚེག་གི་ཕྲེང་བ་སོགས་གང་མཛེས་དང་གང་ལེགས་བྱ།
འདི་དག་ལ་དམར་རྩིའམ་འབྲི་མོག་བྱུག་དགོས་ལ།
གཞི་བདག་གཏོར་མ་ལ་དམར་རྩི་འམ་འབྲི་མོག་བྱུགས་མི་རུང་།
འབྲི་མོག་གམ་དམར་རྩི་བྱུགས་མི་བྱུགས་ནི་ཐོབ་གོ་ས་ལྟ་བུའི་མཚོན་དོན་ནམ།
ཡང་ན་འཇིག་རྟེན་ལས་འདས་མ་འདས་ཀྱི་ཁྱད་པར་རེད།
རང་རང་གི་ཡུལ་ལུང་ཆུང་ངུ་རེ་དང་ཁྱིམ་གཞིའི་ས་བདག་ལྟ་བུར་མཛད་པས་གཞི་བདག་ཟེར་བ་དེ་ལ་འབུལ་རྒྱུའི་གཏོར་མ་ལ་གཞི་བདག་གཏོར་མ་ཟེར།
འདི་ཡང་གཙོ་བོ་རྒྱུ་དཀར་གསུམ་མངར་གསུམ་ཡིན་དགོས།
ཟོར་གཏོར་རམ་འཕེན་གཏོར་ཡང་ཟེར། དེ་ནི་རྩ་བ་བརྟན་པ།
རྩེ་མོ་རྣོ་བ་གནམ་ལྕགས་ཀྱི་ཐོག་གམ་མདེའུ་རྩེ་མོ་ལྟར་རྣོ་བ་དགོས་ཟེར།
ཐོག་མར་ཟོར་གཏོར་དེ་ཡི་དམ་སོགས་ལྷ་དེ་དང་དེ་བསྐྱེད་ནས་བསྐང་བཤགས་དང་འཕྲིན་ལས་བཅོལ་བ་བསྐུལ་བ་སོགས་བྱས།
རང་ཉིད་ཀྱིས་བདེ་བ་འདོད་པ་དང་སྡུག་བསྔལ་མི་འདོད་པའི་གནས་ཚུལ་གང་ཡིན་ཐམས་ཅད་ལྷ་དེ་དང་དེ་ལ་བཅོལ།
ལྷ་དེ་དང་དེ་ལ་ཞུས། ཞུ་ཚུལ་ཐམས་ཅད་ཆོ་གའི་ནང་ལྟར་དུ་གསལ་བོར་ཡོད།
མཆོད་བསྟོད་སོགས་བྱས།
གཏོར་མ་འཕེན་ཁར་རམ་ཡང་ན་གཏོར་ཁུང་དུ་ཕེབས་ནས་ཡེ་ཤེས་པའམ་ལྷ་དེ་དང་དེ་ནམ་མཁར་བཏེགས་ནས་གཏོར་མ་དེ་ཐོག་དང་།
མཚོན་ཆ།
མེ་དཔུང་དུག་མཚོན་སོགས་སུ་བསྐྱེད་ལ་དུག་མཚོན་སོགས་དངོས་ཡིན་སྙམ་དུ་བསམས་ནས་དགྲ་ཕྱོགས་སུ་འཕེན་དགོས།
དྲུག་ཅུ་བ་ལྟ་བུ་ལ།
དབྱུ་གུ་དྲུག་ཅུ་རྩ་བཞི་ཡོད་པ་རེད།
དབྱུ་གུ་རེ་ལ་དབུགས་ཁུག་པ་སུམ་བརྒྱ་དང་ཕྱེད་སོ་བརྒྱད་རེ་ཡོད་ལ།
དེ་ཡང་ཉིན་ཞག་རེ་ལ་དབུགས་ཁུག་པ་ཉི་ཁྲི་ཆིག་སྟོང་དྲུག་བརྒྱ་རེ་ཡོད་ཅིང་།
དེ་ཆ་དྲུག་ཅུ་རྩ་བཞིར་ཕྱེ་ན་ཆ་རེ་རེ་ལ་དབུགས་ཁུག་པ་སུམ་བརྒྱ་སུམ་ཅུ་ཕྱེད་སོ་བརྒྱད་རེ་ཡོད་པ་དེ་རེ་རེ་ལ་དབྱུ་གུ་རེ་རེ་བརྩི་བ་ཡིན་ནོ།།
བགེགས་གཏོར་ནི།
རང་ཉིད་ཀྱིས་ལས་དོན་གང་དང་གང་སྒྲུབ་པའི་སྐབས་སུ་ལས་དོན་དེ་འགྲུབ་མི་འཇུག་པའི་བར་ཆད་གཏོང་མཁན་གྱི་ལྷ་འམ་འདྲེ་གདོན།
ཤ་ཟ་འབྱུང་བོ་གང་རུང་ཞིག་ཡོད་ངེས་པས། དེ་ལ་བར་ཆད་སོགས་མ་གཏོང་རོགས།
ཁྱེད་ལ་ཁ་ཟས་དང་འགྲོ་སའི་ལམ་གསལ་སྒྲོན་མེ་ལྟ་བུ་ང་རང་གིས་ཕུལ་ཞེས་བཤད་ནས་གཏོར་མ་ཕུལ་བ་དེ་རེད།
གཏོར་མ་ཆ་བཞི་ནི།
གནོད་སྦྱིན་སྲིན་པོ་སོགས་ལ་འབུལ་རྒྱུའི་བགེགས་གཏོར།
ཕྱོགས་སྐྱོང་བཅུ་ལ་འབུལ་རྒྱུའི་ཕྱོགས་སྐྱོང་གཏོར་མ།
མཚན་མོ་རྒྱུ་བ་སོགས་འབྱུང་པོ་གདོན་ལ་འབུལ་རྒྱུའི་གཏོར་མ།
སེམས་ཅན་བཀྲེས་ཤིང་སྐོམ་པ་རྣམས་ཏེ་ཡི་དྭགས་ལ་འབུལ་རྒྱུའི་གཏོར་མ་བཅས་སོ།།
གཏོར་ཆོག་རྣམས་སུ་རྒྱུ་སྐར་ཉེར་བརྒྱད་དང་།
སྨེ་བ་དགུ སྤར་ཁ་བརྒྱད། བརྟན་མ་བཅུ་གཉིས་སོགས་མཐོང་ཡང་མི་རྙེད་པ་དང་།
དངོས་གནས་ཡོད་ཀྱང་མི་སྣང་བའི་གནས་ཚུལ།
རྩི་ཤིང་དངོས་ཟོང་གི་རིགས་རྙེད་སླ་བ་དགོས་པར་བསྟན་པ་ལ།
གསེར་དངུལ་དང་རྙེད་དཀའ་བ་དག་དངོས་སུ་རྙེད་ན་རབ་ཡིན་ལ།
དེ་ལྟར་མ་རྙེད་པ་དང་རྙེད་པའི་ནུས་པ་མེད་ན་དཔེ་འདྲ་བ་དང་མཚོན་དོན་ལྟ་བུས་དོད་ཐུབ་ཀྱི་གཏོར་གཟུགས་འདི་དག་བཟོ་བ་རེད།
ཚེ་གཏོར་རང་རང་གི་ཚེ་གཅིག་ལ་འདང་ངེས་པའི་གཏོར་མ་བཟོས་ནས་འཇོག་མཁན་ཡང་ཡོད།
འདི་མང་ཆེ་བས་རྩིག་སྲིབ་སོགས་ལ་འཇོག
ཟླ་གཏོར་ཟླ་བ་རེ་རེའི་ནང་ལ་བརྗེ་གསོར་བྱེད་རྒྱུའི་གཏོར་མ། དེ་དང་འབྲེལ་བར་ལོ་བསྐང་ཟླ་བསྐང་འདོན་རྒྱུ་ཡོད།
རྟེན་གཏོར་ནི། གཏོར་མ་དེ་ཉིད་དུ་ལྷ་རུ་བསྐྱེད་ནས་ལས་བཞིའི་འཕྲིན་ལས་བཅོལ་བ་དེ་རེད། ལྷ་གནས་སའི་རྟེན་ཡིན་པས་རྟེན་གཏོར་ཟེར།
དབང་གཏོར་ནི། སློབ་མ་ལ་དབང་དང་རྗེས་གནང་སོགས་བསྐུར་སྐབས་གཏོར་མ་ལ་བརྟེན་ནས་བསྐུར་བ་དེ་ལ་དབང་གཏོར་ཟེར།
ཐུན་གཏོར་ནི། ཐུན་མཚམས་དང་ཐུན་མཐར་འཕེན་རྒྱུའི་གཏོར་མ་སྟེ་གློ་བུར་འཕྲིན་ལས་བཅོལ་བ་དང་དགྲ་བགེགས་བསྒྲོལ་བ་ལ་འཕེན་པའི་གཏོར་མ།
ཆུ་གཏོར་ནི།
ཆུ་སྦྱིན་དང་འབྲེལ་བར་འབུལ་རྒྱུའི་གཏོར་མ།
མཚན་གཞི་ནི་གཏོར་མ་བརྒྱ་རྩ་ལྟ་བུ་རེད། ཆབ་གཏོར་ཡང་ཟེར།
བརྒྱ་རྩའི་གཏོར་མ་ལ་རིལ་བུ་བརྒྱ་དང་བཅུ་ཡོད་པས་གཏོར་མ་བརྒྱ་རྩ་ཟེར།
བརྒྱ་རྩ་འབུལ་སའི་མགྲོན་ལ་མགྲོན་ཚན་པ་བཅུ་ཡོད། བཅུ་ལ་ཡར་མགྲོན། བར་མགྲོན།
མར་མགྲོན། ལྷག་མགྲོན་བཅས་བཞི་ཡོད།
ཀླུ་གཏོར་ནི།
ཀླུ་སྨན་དང་དཀར་གསུམ་མངར་གསུམ་བསྲེས་ནས་ཀླུ་ལ་འབུལ་རྒྱུའི་གཏོར་མ་ལ་ཟེར།
ཀླུ་ལ་བརྟེན་ནས་བྱུང་བའི་ནད་ཞི་བ་དང་ཀླུ་ལ་བརྟེན་པའི་དངོས་གྲུབ་སྒྲུབ་པའི་ཆེད་དུ་ཀླུ་གཏོར་གཏོང་བ་ལ་ཟེར།།
| 