དབྱངས་དཀར་མོ།
དབུ་འཇིཊ་མེད། མཚོ་ལྷོ།
ཟླ་འོད་དྭངས་ཤིང་གསལ་བའི་འགྲམ་ངོགས་སུ། །
མྱི་ཚོགས་སྤྲིན་དཀར་དུམ་བུ་འགུལ་འགུལ་བྱེད། །
དབྱངས་ཀྱི་ཚེ་སྲོག་ཕྲ་མོ་མ་འགགས་པར། །
མཚན་ལ་བཏབ་པའི་ཟློས་གར་ངག་ལ་སྦྱར། །
ཡིད་འོང་རབ་མཛེས་མཚན་མོ་འུག་པའི་མགུར། །
མི་རྟག་སྒྱུ་མའི་ཆོ་འཕྲུལ་བཞིན་དུ་སྦྱར། །
མཚན་མོ་རྨི་ལམ་རབ་རིབ་སེམས་སུ་འཁྱིལ། །
འཁྲུལ་སྣང་རྟོག་པའི་བཏགས་པ་མ་ཤེས་མོད། །
ཡིད་ཀྱི་མེ་ཏོག་འཛུམ་པའི་མུན་ནག་ཁྲོད། །
ཆུ་དང་ཆར་བ་འདྲེས་པའི་བར་མཚམས་ན། །
དགའ་སྐྱོ་འདྲེས་པའི་གཏམ་རྒྱུད་མང་ཙམ་གླེང་། །
ཟླ་འོད་མེད་པའི་མཚན་ལམ་རིང་མོ་བསྐྱལ། །
སེམས་པ་ནམ་མཁར་བཏེགས་ཏེ་ཟླ་བ་དྲན། །
སྣང་བའི་སྟོང་ཆེན་ཉི་ཟླའི་གཞེས་ཁྱིམ་ཡིན། །
དེ་ན་འཛོམས་པའི་ཉི་ཟླའི་སྨོན་ལམ་ཡག །
སྨོན་ལམ་བཀྲ་ཤིས་གཡང་དྲུང་རི་མོ་བརྟན། །
སྣང་བ་སྨོན་པར་བསྲེས་ཏེ་སྨིན་དྲུག་བསུ། །
སྟོང་ཆེན་གཡོ་བའི་རྨི་ལམ་དགུ་མཚར་ཞིག །
ངག་རིག་གཙང་བོ་བརྒྱུད་དེ་མདོར་ཙམ་གླེང་། །
མཚན་ལམ་རིང་མོ་ངག་གི་སྒོ་མོར་ཞུགས། །
སྐྱོ་བའི་ཟློས་གར་ཤིག་གིས་མཚན་ལམ་བསྐྱལ། །
ཟླ་མེད་ཤུགས་གླུ་རིང་མོས་རང་སེམས་གསོས། །
ལྷིང་འཇགས་མུན་པའི་ཁྲོད་ནས་དྲན་ཐོ་བྲིས། །
ཟླ་བོ་གཡུ་དཀར་ལྷ་མོར་བསྐུར་འདོད་བྱུང། །
ཡིད་སེམས་པདྨ་བཞིན་དུ་དཀར་ལ་ཡག །
བཅོ་ལྔའི་ཟླ་འདིའི་ཞལ་དཀྱིལ་ཡིད་ལ་འཛུམ། །
གཡུ་ཆུང་དཀར་མོ་འདི་ཡི་བརྩེ་བ་དེ། །
རི་ཆུ་སྟོང་གི་ཕྱི་ནང་ཡིན་སོང་ངམ། །
༢༠༢༠~༩~༢༦ཉིན་ལྔ་རིག་སློབ་གླིང་དུ་བྲིས།
རྩོམ་པ་པོའི་ངོ་སྤྲོད་མདོར་བསྡུས།
པིར་མིང་དབུ་འཇིགས་མེད། མིང་གཞན་གངས་རླུང་བུ།
༡༩༩༨ལོར་མདོ་སྨད་ཡུལ་གྱི་བོང་སྟག་སྡེ་བའི་འབྲོག་ཚང་དཀྱུས་མ་ཞིག་ཏུ་སྐྱེས།
༢༠༡༩ལོ་ནས་བཟུང་རང་གི་དགའ་ཕྱོགས་ལྟར་དུ་རྩོམ་རིག་གི་ལམ་ཁར་ཕྱོགས།
དེ་ནས་བཟུང་མུ་མཐུད་དུ་(མཆོད་མེ་བོད་ཀྱི་རྩོམ་རིག་དྲ་བ)(བཙན་པོའི་མགར་གྱི་དྲ་བ)
(ཁམས་པའི་གསར་འགྱུར་དྲ་བ)(ང་ཡི་རེབ་གོང་དྲ་བ)(ཁམས་པའི་ཚགས་པར)
(ཀན་ལྷོའི་ཚགས་པར)དུས་དེབ་བསྟོད་དབྱངས་ཀྱི་རང་སྒྲ་སོགས་ཚགས་དེབ་ཀྱི་སྟེང་དུ་རྩོམ་སྤེལ་མྱོང་།
| 
