མཛའ་གཅུགས་གྲོགས་པོ།

ཚིག  ཞི་བདེ་ཉི་མ།

གཞས་གདངས།  བདུད་བྷེ།

གཞས་པ། བདུད་བྷེ།

ཞིམ་མངར་འོ་ཇ་དཀར་པོ། །

གྲོགས་མཆོག་ཁྱོད་ཀྱིས་བཞེས་རོགས། །

ཁྱོད་དང་འུ་གཉིས་མཛའ་བརྩེ། །

འོ་ཇ་དཀར་པོའི་ངང་ཚུལ། །

ན་ནིང་ངེད་ཅག་འབྲལ་དུས། །

ས་གཞི་ཁ་བས་གཡོགས་འདུག །

དེ་རིང་འུ་གཉིས་མཇལ་དུས། །

གནས་འདིར་དཔྱིད་དཔལ་སླེབས་ཡོང་། །

ཁྱོད་རང་ཕེབས་པས་དགའ་སོང་། །

བདག་གཉིས་མཇལ་བས་སྤྲོ་སོང་། །

ཨེ་མ་མཛའ་གཅུགས་གྲོགས་པོ། །

སྙན་མོའི་གསུང་གཏམ་གསུང་རོགས། །

མཛའ་བརྩེ་ཁ་བཏགས་དཀར་པོ། །

གྲོགས་མཆོག་ཁྱོད་ལ་འབུལ་ལོ། །

ཁྱོད་དང་འུ་གཉིས་མཛའ་བརྩེ། །

ཁ་བཏགས་དཀར་པོའི་ངང་ཚུལ། །

ཁུ་བྱུག་གསུང་སྙན་གྲགས་དུས། །

གྲོགས་མཆོག་ཡིད་ལ་འཁོར་བྱུང་། །

སྤང་ལ་མེ་ཏོག་བཞད་དུས། །

གྲོགས་མཆོག་སྙིང་ནས་དྲན་ཡོང་། །

སྐྱིད་པའི་གར་ལ་རོལ་ནས། །

སྙན་མོའི་གླུ་ཞིག་ལེན་རོགས། །

དགའ་བའི་འཛུམ་མདངས་བསྟན་ནས། །

དུང་བའི་གསུང་ཞིག་བརྗོད་རོགས། །