ཁ་པར་བེད་སྤྱོད་ལེགས་ཉེས།
ཐེ་བོ་དཀོན་སེང་།
མཁས་བརྒྱའི་ལེགས་བཤད་འདི་ནས་ཀློག་ན་ཆོག།
མཁས་བརྒྱས་འཆད་ཁྲིད་འདི་ནས་ཐོས་པར་ནུས། །
མཁས་མང་ལད་ཟློས་འདི་ནས་བྱེད་ཀྱང་རུང་། །
འདི་དག་ཁ་པར་སྤྱོད་པའི་བཟང་ཆ་ཡིན། །
བླུན་པོའི་འཆལ་གཏམ་མང་པོ་འདི་ནས་གོ།
བླུན་པོའི་འཁྲབ་སྟོན་བརྙན་རིས་འདི་ནས་མཐོང་། །
བླུན་བཤད་ཚིག་རྩུབ་མཚོན་གྱིས་ཁོར་ཡུག་དཀྲུགས། །
འདི་དག་ཁ་པར་སྤྱོད་པའི་ནག་ཉེས་ལགས། །
རྒྱང་རིང་སྐྱེས་བུ་དམ་པའི་མཛད་བཟང་མཇལ། །
རྒྱང་རིང་མཛའ་བཤེས་སེམས་ཀྱི་གཏམ་བཟང་ཐོས། །
རྒྱང་རིང་འཇིག་རྟེན་མཛེས་སྡུག་འདི་ནས་མྱོང་། །
འདི་དག་ཁ་པར་སྤྱོད་པའི་ལེགས་ཆ་ཡིན། །
ཉེ་རིང་ངན་དགུའི་སྤྱོད་པ་འདི་ནས་ལོབ། །
ཉེ་རིང་སྡིགས་སྡུག་གཏམ་ངན་འདི་ནས་གོ།
ཉེ་རིང་ནང་འཁྲུག་འཁོར་ལོ་འདི་ནས་བསྐོར། །
འདི་དག་ཁ་པར་སྤྱོད་པའི་ནག་ཉེས་ལགས། །
གསར་རྙིང་ལོ་རྒྱུས་དཔེ་ཚོགས་འདི་ནས་མངོན། །
གསར་རྙིང་གསར་འགྱུར་སྣ་ཚོགས་འདི་ནས་གསལ། །
གསར་རྙིང་བླང་དོར་ཐབས་ལམ་འདི་ནས་རྙེད། །
འདི་དག་ཁ་པར་སྤྱོད་པའི་བཟང་ཆར་ངེས། །
ཆུ་བུར་མིག་གི་ནུས་པ་འདི་ཡིས་འཕྲོག།
གསེར་ལས་དཀོན་པའི་དུས་ཚོད་འདི་ཡིས་བརླགས། །
མཐོ་དམན་བར་མ་ཐམས་ཅད་འདི་ཡིས་གཡེངས། །
འདི་དག་ཁ་པར་སྤྱོད་པའི་སྐྱོན་དུ་སེམས། །
རྒྱུས་མེད་མི་དང་འབྲེལ་ལམ་འདི་ཡིས་མཐུད། །
འབྲེལ་ཡོད་བར་ལ་བརྩེ་བ་འདི་ནས་གསོ། །
ཚོགས་པ་མང་པོས་མཐུན་ལམ་འདི་ནས་འཛུགས། །
འདི་དག་ཁ་པར་སྤྱོད་པའི་ཡོན་ཏན་ཉིད། །
མཁས་པས་གྲུབ་མཐའི་ལ་རྒྱ་འདི་ནས་རྩོད། །
བླུན་པོས་འཚོ་བའི་ཁ་ཕྱོགས་འདི་ནས་རྩོད། །
བཟའ་ཚང་མི་མཐུན་འཐབ་རྩོད་འདི་ནས་བྱེད། །
འདི་དག་ཁ་པར་སྤྱོད་པའི་ཉེས་པར་མཐོང་། །
སྟབས་བདེའི་གཞུང་ལུགས་འཆད་ཉན་འདི་ནས་སྤེལ། །
སྟབས་བདེའི་ཉོ་ཚོང་ལས་རིགས་འདི་ནས་དར། །
སྟབས་བདེའི་སྐད་སྐུར་ཡོད་ཚད་འདི་ནས་འཕྲོད། །
འདི་དག་ཁ་པར་སྤྱོད་པའི་བཟང་ཆ་ཡིན། །
ཐོས་པ་ལམ་ལྷོངས་མི་འོང་བར་དུ་གཅོད། །
བསམ་པ་དོན་ཐོག་མི་གནས་གཡེངས་པར་བྱེད། །
སྒོམ་པ་གནད་ལ་མི་འཁེལ་ཟིང་ངེར་འགྱུར། །
འདི་དག་ཁ་པར་སྤྱོད་པའི་ཞེན་ཆར་གྱུར། །
སྣོད་ཀྱི་ཁོར་ཡུག་ཡག་བཙོག་འདི་ནས་མཐོང་། །
བཅུད་ཀྱི་མི་གཤེས་ལེགས་ཉེས་འདི་ནས་རྟོགས། །
སྣ་མང་ཤེས་རིག་སྡེ་ཚན་འདི་ནས་ཤེས། །
འདི་དག་ཁ་པར་སྤྱོད་པའི་ཁེ་སྤོགས་ཡིན། །
ལོག་སྨྲས་ལོག་པར་ལྟ་བ་འདི་ནས་སྤེལ། །
རྐུ་མས་རྐུ་འཕྲོག་བཅོམ་གསུམ་འདི་ནས་བྱེད། །
སྒྱུ་མས་མི་ཚོགས་མགོ་བསྐོར་འདི་ནས་གཏོང་། །
འདི་དག་ཁ་པར་སྤྱོད་པའི་སྐྱོན་ཆར་མཐོང་། །
སྒྲོ་འདོགས་འུར་པའི་བསྟོད་ཚིག་འདི་ནས་སྤེལ། །
སྐུར་འདེབས་དགག་ལན་མཚོན་ཆ་འདི་ནས་ངོམ། །
བཅོས་མའི་རྗེས་དྲན་སྣ་ཚོགས་འདི་ནད་བྱེད། །
འདི་དག་ལེགས་ཉེས་གང་གཏོགས་ཆ་མ་འཚལ། །
བེད་སྤྱོད་ཤེས་ན་དོན་སྙིང་འཐོབ་སྲིད་ཀྱང་། །
ལོག་པར་སྤྱོད་ཚེ་ཡོད་ཚད་བརླག་པར་ངེས། །
དེས་ཕྱིར་མཐོ་དམན་བར་མ་ཐམས་ཅད་ཀྱིས། །
ཁ་པར་བེད་སྤྱོད་ཕྱོགས་ལ་གཟབ་ན་ལེགས། །
ལོ་མང་ཁ་པར་སྤྱོད་པའི་ཉམས་མྱོང་ཁྲོད། །
བེད་སྤྱོད་ལེགས་ཉེས་སེམས་གཏམ་ཉུང་ཙམ་འདི། །
དགེ་བཤེས་གཟུགས་བརྙན་དཀོན་སེང་མིང་ཅན་གྱིས། །
ཉེ་རིང་མཛའ་གྲོགས་ཡོངས་ལ་སྐྱེས་སུ་སྦྱར། །
| 