དགེ་བཤེས་ཐུབ་བསྟན་ཉི་མ་མཆོག་གི་བཀའ་སློབ།
  ༄༅། །བཙན་པོའི་མགར་གྱི་དྲ་བས་ཁྱེད་ལ་དགའ་བསུ་ཞུ། དེ་རིང་ནི་སྤྱི་ལོ 2021 ལོའི་ཟླ 9 ཚེས 28 རེས་གཟའ་མིག་དམར་ཡིན། དྲ་གནས་ཉར་ཚགས།  གཙོ་ངོས་སུ་འགོད་པ། ནང་འཇུག འདི་ནས་ང་དང་གླེང་མོལ་བྱ།
གཙོ་ངོས།
ཆོས་ལུགས།
རྩོམ་རིག
ལོ་རྒྱུས།
རུས་རྒྱུད།
དམངས་སྲོལ།
སྒྱུ་རྩལ།
དཔལ་འབྱོར།
མི་སྣ།
སློབ་གསོ།
ཕྱོགས་སྟོན་་་་ གཙོ་ངོས།» ཆོས་ལུགས།» རྒྱུན་ཤེས། ཆོས་སྤྱོད། »དགེ་བཤེས་ཐུབ་བསྟན་ཉི་མ་མཆོག་གི་བཀའ་སློབ།
དགེ་བཤེས་ཐུབ་བསྟན་ཉི་མ་མཆོག་གི་བཀའ་སློབ།
རྩོམ་སྒྲིག་པ།  ཁཱ་ཤེས་རབ་རྒྱ་མཚོ། སྤེལ་དུས། 2021/3/9ལྟ་ཀློག (5392)རྩོམ་ཁུངས: ངེད་དྲ་བ།


དགེ་བཤེས་ཐུབ་བསྟན་ཉི་མ་མཆོག་གི་བཀའ་སློབ།

    སྟོང་སྐོར་དགོན་མདོ་སྔགས་སློབ་གླིང་དུ་ཕྱི་ལོ་༢༠༢༡ བོད་ཟླ་༡ ཚེས་༢༣ཉིན་དགེ་འདུན་ཡོངས་ལ་དགེ་བཤེས་རིན་པོ་ཆེ་ཐུབ་བསྟན་ཉི་མ་མཆོག་གིས་བསྩལ་བའི་བཀའ་སློབ།

ཐོག་མར་དགེ་བཤེས་མཆོག་གིས།

འོ་ལགས་སོ། །དགོན་འདིའི་སློབ་གཉེར་དགེ་བཟོ་སོགས་ཀྱིས་བཀོད་སྒྲིག་གནང་བ་ལྟར་དེ་རིང་ངས་སྐད་ཆ་ཚིག་ཁ་ཤས་ཞུ་རྒྱུ་ཡིན། སྐད་ཆ་མང་པོ་མི་བཤད་ཀུན་གྱིས་དཔེ་གཟིགས་གནང་དགོས་པ་རེད། དེ་ཡང་། དགོན་པ་གཞན་ལྟར་གུང་གསེང་ལྟ་བུའི་ངལ་གསོ་ནི་ཟླ་བ་གཉིས་ལྷག་སོང་ཡོད་པས་དེ་རིང་ནས་སློབ་སྦྱོང་མགོ་བརྩམས་པ་རེད། ད་ནི་སློབ་སྦྱོང་གི་གོ་སྐབས་ལ་ཀུན་གྱིས་དམ་འཛིན་བྱེད་དགོས། ཚང་མས་སློབ་སྦྱོང་ལ་ཁ་ཕྱོགས་ཏེ་དེའི་ཕྱོགས་ལ་སེམས་ཤུགས་བསྐྱེད་དགོས། སྤྱིར་ཚང་མ་མི་ཆེན་དང་བླ་ཆེན་གྱི་བྱ་བ་ལྟར་ལས་ཀ་ཆེན་པོ་ཞིག་བྱེད་དགོས་བསམ་མཁན་རྐྱང་རྐྱང་རེད། གང་ཡང་ཆེན་པོ་མེད་ནའང་རེ་བ་ཆེན་པོ་བྱེད་མཁན་རྐྱང་རྐྱང་རེད་ཨ། གལ་ཏེ་བྱ་བ་རླབས་ཆེན་ཞིག་བྱེད་བསམ་ན། ཐོག་མར་ཕོ་ཤེད་ཀྱིས་མགོ་བཞག་ཡས་དང་། ཚོང་ལས་ཀྱིས་མགོ་བཞག་ཡས་ཡོད་པ་མ་རེད། འོ་ན། ཐོག་མར་གང་གིས་མགོ་བརྩམས་དགོས་ཤེ་ན། སློབ་སྦྱོང་ནས་མགོ་བརྩམས་དགོས་ཏེ། མཁས་པ་ཀུན་གྱིས་དེ་ལྟར་བཞེད་པ་རེད། དེས་ན། སུས་བྱ་བ་རླབས་ཆེན་ཞིག་སྒྲུབ་བསམ་ནའང་སློབ་སྦྱོང་ནས་མགོ་བརྩམས་དགོས། གལ་ཏེ་སློབ་སྦྱོང་མེད་པའི་མི་ཞིག་ཏུ་གྱུར་ཕྱིན་ཆད་བྱ་བ་རླབས་ཆེན་ཞིག་སྒྲུབ་ཐབས་ཡོད་པ་མ་རེད། བྱས་ཙང་། ཀུན་གྱིས་སློབ་སྦྱོང་ཕྱོགས་ལ་ཤུགས་རྒྱོབས། སུས་བྱ་བ་རླབས་ཆེན་ཞིག་བྱེད་བསམ་ནའང་དེར་སློབ་སྦྱོང་མེད་ན་སྟོང་པ་རེད། དེས་ན། སློབ་སྦྱོང་ནི་རྩ་ཆེན་པོ་ཞིག་སྟེ་དེའི་རིན་ཐང་ཇི་བཞིན་ཞིག་བཤད་དགོས་ན་སུས་ཀྱང་བཤད་ཤེས་རྒྱུ་མ་རེད། སྤྱིར་ང་རང་ཚོས། བླ་མ་དང་། སྤྲུལ་སྐུ། དགེ་བཤེས་འདི་དག་ལ་རིན་པོ་ཆེ་ཞེས་འབོད་པ་རེད། བར་བར་དུ་ཅ་ལག་རིན་ཐང་ཅན་དང་གནའ་རྫས་ཀྱི་རིགས་ལའང་རིན་པོ་ཆེ་ཞེས་འབོད་པ་རེད། འོན་ཀྱང་། རྗེ་བླ་མ་ཙོང་ཁ་པ་ཆེན་པོས་འདི་དག་ལ་རིན་པོ་ཆེ་ཞེས་ཞེ་དྲག་ལབ་ཀྱིན་མི་འདུག  ཁོང་གིས། རིགས་ལམ་ཕྲ་མོ་འབྱེད་པའི་རྣམ་དཔྱོད་དང་། །གཞུང་ལུགས་གདམས་པར་ཤར་བའི་ཉམས་ལེན་དང་། །ཚིག་སྦྱོར་ཚུལ་ལ་མཁས་པའི་ངག་གི་དཔལ། །ས་སྟེང་འདི་ན་རིན་ཆེན་རྣམ་གསུམ་སྣང་། །ཞེས་ས་སྟེང་འདིའི་རིན་པོ་ཆེ་ནི་དེ་གསུམ་ལ་བྱེད་ཅེས་གསུངས་ཡོད་པ་རེད། ང་ཚོ་ཚང་མ་སློབ་གཉེར་བ་རྐྱང་རྐྱང་ཡིན་པས་གཞུང་འདིའི་དོན་ཇི་བཞིན་མཁྱེན་རྒྱུ་རེད། གཞུང་དོན་རྣམས་རེ་རེ་ནས་མ་བཤད་ནའང་ཆོག་གི །རིན་པོ་ཆེ་འདི་གསུམ་ནི་སློབ་སྦྱོང་བྱས་ནས་སོ་སོའི་རྒྱུད་ལ་གྲུབ་དགོས་ཡས་ཤིག་རེད་མ་གཏོགས། རྒྱུ་འབྱོར་བ་དང་། ཕོ་ཤེད་སོགས་ཀྱིས་སོ་སོའི་རྒྱུད་ལ་གྲུབ་ཐབས་ཡོད་པ་མ་རེད། བྱས་ཙང་། སློབ་སྦྱོང་གི་རིན་ཐང་དེ་འདྲ་རྩ་ཆེན་ཞིག་ཡིན་པས་ཀུན་ཀྱིས་དེའི་ཕྱོགས་ལ་ཤུགས་རྒྱོབས། སློབ་སྦྱོང་ནི་སློབ་བུ་སོ་སོ་ལ་རག་ལས་ཏེ། དགེ་རྒན་རྣམས་ཀྱིས་སློབ་མ་རྣམས་ལ་སློབ་ཁྲིད་བྱེད་པ་ཙམ་ལས་དེའི་སློབ་སྦྱོང་གི་ཚབ་བྱེད་པ་མེད། དཔེར་ན། སངས་རྒྱས་བཅོམ་ལྡན་འདས་ཀྱིས། ངས་ནི་ཁྱོད་ལ་ཐར་པའི་ལམ་བསྟན་གྱི། ཐར་པ་རང་ལ་རག་ལས་ཤེས་པར་གྱིས། ཞེས་པ་ལྟར་ཐར་ལམ་བསྟན་པ་བཅོམ་ལྡན་འདས་ལ་རག་ལས་ཀྱང་། ཐར་པ་འཐོབ་པ་ནི་ཁོང་ལ་རག་མ་ལས་པ་ཡིན། དེ་བཞིན་དུ་སློབ་ཁྲིད་བྱེད་པ་དགེ་རྒན་ལ་རག་ལས་ཀྱང་། སློབ་སྦྱོང་བྱེད་པ་ནི་དགེ་རྒན་ངོས་ནས་མིན་པ་སློབ་བུ་སོ་སོར་རག་ལས་པ་ཡིན། དགེ་རྒན་རྣམས་ཀྱིས་དཀའ་ལས་ག་ཚོད་བརྒྱབ་ནའང་སློབ་མའི་ངོས་ནས་བརྩོན་འགྲུས་མ་བསྐྱེད་ན་གྲུབ་འབྲས་གང་ཡང་འཐོབ་རྒྱུ་མེད། དངོས་གནས་བཤད་ན། ངས་ནི་ཁྱོད་ལ་རིག་གཞུང་སློབ་ཁྲིད་ཀྱི། །སློབ་སྦྱོང་རང་ལ་རག་ལས་ཤེས་པར་གྱིས། ཟེར་ནའང་མ་ཆོག་པ་མེད། དེས་ན། སློབ་སྦྱོང་ནི་གཙོ་བོར་སློབ་བུ་སོ་སོ་ལ་རག་ལས་པ་རེད། སུས་སློབ་སྦྱོང་ཡག་པོ་ཞིག་བྱེད་ནའང་གྲུབ་འབྲས་འཐོབ་རྒྱུ་ཡོད་དེ། རྒྱུ་ཕུན་སུམ་ཚོགས་པ་ལས་འབྲས་བུ་ཕུན་སུམ་ཚོགས་པ་འབྱུང་གི་རེད། ཀུན་གྱིས་སློབ་སྦྱོང་གི་གོ་སྐབས་བཟང་པོ་འདི་དམ་འཛིན་བྱོས། དེའི་ཕྱོགས་ལ་ཤུགས་རྒྱོབས། སྤྱིར་དགོན་པ་ཞེས་པ་ནི་སློབ་སྦྱོང་བྱེད་སའི་ཁོག་ཡུག་ཅིག་རེད། དགོན་པ་ཕྱག་བཏབ་ཡས་དང་རྒན་གསོ་ཁང་བཙུགས་པའི་དམིགས་ཡུལ་མི་འདྲ་བའམ་ཐ་དད་རེད། རྒན་གསོ་ཁང་བཙུགས་པའི་དམིགས་ཡུལ་ནི། རྒན་པའམ་བགྲེས་པོ་དག་ལ་གསོ་སྙོར་དང་ཞབས་ཞུ་བྱེད་བསམ་པ་དེ་རེད། དེ་ལ་སློབ་སྦྱོང་ཡར་རྒྱས་སོང་མིན་སྐད་ཆ་བཤད་རྒྱུ་མེད། དེར་བསྡད་པའི་རྒན་པ་ཚོས་ཁ་འདོན་དགེ་སྦྱོར་བྱས་ནའང་རང་དབང་རེད། མདོར་ན། དེར་བསྡད་པའི་རྒན་པ་རྣམས་ལ་ཟས་གོས་དཀའ་ངལ་མེད་ཙམ་གྱིས་འགྲིག་བསྡད་ཡོད། དགོན་པ་ནི་དེ་ལྟར་མ་རེད། འོ་ན། དགོན་པ་ཕྱག་བཏབ་ཡས་དམིགས་ཡུལ་གང་ཞེ་ན། སློབ་སྦྱོང་ཡོད་པའམ་དེ་ཡར་རྒྱས་འགྲོ་བ་དེ་དེའི་དམིགས་ཡུལ་རེད། བྱས་ཙང་། རྒྱལ་ཁབ་ནི་ཆབ་སྲིད་ཀྱི་སྟེང་ནས་སྐྱོང་དགོས་པ་ལྟར། དགོན་པ་ནི་སློབ་སྦྱོང་གི་སྟེང་ནས་སྐྱོང་དགོས། དཔེར་ན། ཆབ་སྲིད་དང་འགལ་བའི་མི་དེ་རྒྱལ་ཁབ་ཀྱི་ཉེས་ཅན་ཡིན་པ་བཞིན་དུ། སློབ་སྦྱོང་ལ་གནོད་པར་བྱེད་པའི་མི་དེའང་དགོན་སྡེའི་ནག་ཉེས་ཆེ་ཤོས་ཡིན། གལ་ཏེ་དགོན་པ་དེ་ལ་སློབ་སྦྱོང་ཡག་པོ་མེད་ན། གནའ་རྫས་ཅི་ཙམ་ཡོད་རུང་དགོན་པ་ཐམས་ཅད་ཀྱི་ཐ་མལ་དུ་ལུས་པ་རེད། དཔེར་ན། དེང་སང་རྒྱ་ནག་གི་ཡུལ་དུ་དགོན་པ་ཡིན་ཟེར་ནས་ལྷ་ཁང་འདྲ་བོ་ཞིག་ལས་སློབ་སྦྱོང་གང་ཡང་མཐོང་རྒྱུ་མེད་པ་མང་པོ་ཡོད། གལ་ཏེ་ངེད་ཅག་ལའང་སློབ་སྦྱོང་མེད་ན་དེ་དང་ཐག་ཉེ་བར་ཆགས་འགྲོ་ཡི་རེད། དེས་ན། ཀུན་གྱིས་སློབ་སྦྱོང་ཕྱོགས་ལ་ཤུགས་རྒྱོབས་ཟེར་ནས་སྐད་ཆ་གཅིག་ཡིན།

གཉིས་པ་ནི། སྒྲིག་གཞིའི་སྐོར་རེད། དེ་ཡང་ཁ་རྩང་ནས་དགེ་རྒན་རྣམ་པ་ཚོས་ཁྱེད་ཚོ་ལ་བཤད་ཡོད། དེ་ལས་ལྷག་ཏུ་ངེད་ལའང་ཅང་བཤད་རྒྱུ་མེད། རེད་དེ། རྩ་བའི་ཆ་ནས་སྔོན་ཆད་ངེད་ཅག་གིས་སྒྲིག་གཞི་འོས་འཚམས་ཤིག་གཏན་ཁེལ་བྱས་ཡོད། ཀུན་གྱིས་མཁྱེན་གསལ་ཡིན། སུས་ཀྱང་དེ་ལ་གནོད་པའམ་ཧམ་པ་བྱེད་དོན་མེད། ཁྱེད་ཚོས་དེ་བདག་པོ་ཡག་པོ་རྒྱོབས། གྲོང་ཆོག་སྐོར་ཡིན་ནའང་སྔོན་ཆད་ནས་ས་མཚམས་ཤིག་ཕྱེ་ཡོད། དཔེར་ན། དགོན་གཞུང་གིས་ཞབས་བརྟན་སྐུ་རིམ་བསྒྲུབ་དགོས་ཚེ་སློབ་གྲྭའི་ངོས་ནས་དང་ལེན་བྱེད་པའམ་ཕར་བརྟེན་ཚུར་བརྟེན་བྱེད་དགོས་རྒྱུ་ཡིན། མདོ་སྔགས་སློབ་གླིང་གི་ངོས་ནས་ཀྱང་ཞབས་བརྟན་སྐུ་རིམ་བསྒྲུབ་དགོས་ཚེ་དེ་དེ་བཞིན་རེད། དེ་མ་གཏོགས་རྒྱུ་ཆེན་ཡིན་ཟེར་བ་འདྲ་དང་། ངོ་ཆེན་ཡིན་ཟེར་བ་དེ་དག་གིས་གྲོང་ཆོག་འགྲོ་མི་འདོད་པའི་སློབ་མ་རྣམས་གྲོང་ཆོག་ཏུ་བསླུ་འཁྲིད་བྱེད་མི་ཆོག  ངེད་ཀྱིས་ན་ནིང་ནས་བཤད་ཡོད། གལ་ཏེ་དེ་ལྟ་བུའི་བསླུ་ཁྲིད་བྱས་ཚེ་གསེར་ཟངས་སྟོང་སྤྲད་ནའང་མི་འགྲིག་སྟེ། ངེད་ཀྱིས་སྒྲིག་ཁྲིམས་བདམས་པ་ལས་རྒྱུ་མི་བདམས། སྤྱིར་རང་ཉིད་རྒྱུ་ལ་དགའ་མཁན་ཞིག་ཡིན་རུང་སྒྲིག་ཁྲིམས་དང་རྒྱུ་གཉིས་ཀྱི་ནང་ནས་སྒྲིག་ཁྲིམས་བདམས་རྒྱུ་ཡིན། ཀུན་གྱིས་དེ་ཤེས་པར་གྱིས། ལྷག་པར་དུ་སྒྲིག་ཁྲིམས་ལྟ་མཁན་རྣམས་ཀྱིས་དེའི་ཐོག་ནས་གནོན་དགོས།

གསུམ་པ་ནི། ན་བཟའ་སྐོར་རེད། དེ་ཡང་། སྔོན་ཆད་ནས་ངེད་ཅག་གིས་གཏན་ཁེལ་བྱས་ཡོད། དེ་ལས་ལྷག་ཏུ་གང་ཡང་མི་དགོས། སྤྱིར་དེང་སང་སྟོང་སྐོར་དགོན་པ་ནི་ཀུན་གྱིས་སྤྱོད་ལམ་ཡག་གི་ཟེར་ནས་བཤད་ཀྱིན་ཡོད་པ་ལས། སྤྱོད་ལམ་ངན་པ་རེད་ཟེར་ནས་དམའ་འབེབས་སམ་མཐོང་ཆུང་བྱེད་མཁན་མེད། དེས་ན། དགོན་སྡེ་བཅུ་གསུམ་གྱི་ཐ་མལ་དུ་ལུས་མེད། སྐྱེས་བུ་འགའ་རེའི་སྐད་ཆ་དམིགས་བསལ་རེད། གཟུར་གནས་བློ་ལྡན་རྣམས་སུས་ཀྱང་སྟོང་སྐོར་དགོན་པའི་གྲྭ་བ་རྣམས་སྤྱོད་ལམ་ཡག་གི་ཟེར་བ་མ་གཏོགས་ངན་པ་རེད་ཟེར་ནས་བཤད་ཀྱིན་མི་འདུག །ད་འགྲིག་ཡོད།

བཞི་པ་ནི། སློབ་བུ་དག་གིས་སློབ་སྦྱོང་བྱེད་སྐབས་དགྲ་ཆེ་ཤོས་ནི་ཁ་པར་ནང་དུ་རྩེད་མོ་རྩེ་ཡས་དེ་རེད། སྤྱིར་དགོན་པ་གཞན་དག་ལ་གུང་གསེང་སྐབས་མ་གཏོགས་སོ་སོའི་ཁ་པར་གཞུང་ལ་ཡར་སྤྲད་རྒྱུའི་ལུགས་སྲོལ་ཡོད། འོན་ཀྱང་། ད་རུང་ང་ཚོ་ལ་དེ་ལྟ་བུའི་སྒྲིག་གཞི་བཞག་མེད། དགེ་རྒན་རྣམ་པ་ཚོས་ང་ལ་འདི་བཤད་དེ། འཛིན་གྲྭ་འོག་མ་འགས་ཁ་པར་མི་རྩེ་ཟེར་ནས་ཁོ་བོ་ཅག་ལ་བཤད་སོང་ཟེར། དངོས་གནས་ཡག་པོ་རེད། སློབ་བུ་དེ་དག་གིས་བཤད་པ་ལྟར་ཁ་པར་མི་རྩེ་བ་ཡིན་ན། ཕྱིས་སུ་དེ་དག་ལ་གཟེངས་བསྟོད་སོགས་སྤྲད་རྒྱུ་ཡོད། དེ་འོས་འཚམས་ཡིན། ངེད་ཅག་ཀུན་གྱིས་དེ་འདོད་ཡོད། སྤྱིར་སོ་སོས་ཁ་པར་མི་རྩེ་བ་ནི་རང་ཚོའི་རང་དོན་རེད། འོན་ཀྱང་། སློབ་སྤྱིའི་ངོས་ནས་དེ་ལ་བསྟོད་བསྔགས་ཡོད། ལག་སྟོང་མིན་ཟེར་རྒྱུ་ཡིན།

མདོར་ན། ཀུན་གྱིས་སྒྲིག་རང་འཁུར་དགོས། སྔོན་ཆད་ལའང་མདོ་སྔགས་སློབ་གླིང་གི་ངོས་ནས་སྒྲིག་གཞི་ཐམས་ཅད་སློབ་མ་རྣམས་ཀྱི་སེམས་ཁམས་དང་མཐུན་པ་ཞིག་ཨེ་ཡོང་བལྟས་ཡོད། མུ་མཐུད་ནས་དེ་དེ་བཞིན་ཡིན། སྒྲིག་གཞི་རྣམས་ཧ་ཅང་བཙན་ཐབས་བྱས་ན་མི་འགྲིག་སྟེ། ངེད་ཀྱིས་སློབ་གཉེར་དགེ་སོགས་ལ་འདི་བཤད་ཡོད། ཐབས་ཤེས་གང་ཡོད་གུ་ཡངས་ཐོག་ནས་སློབ་གྲྭ་འཚོགས་དགོས་ཟེར་ནས་བཤད་ཡོད། གུ་ཡངས་ཀྱིས་སློབ་བུའི་སེམས་ཁམས་ལ་མི་གནོད་པས་སློབ་གཉེར་ལ་དོན་གཉེར་ཡོད་རྐྱེན་ཕན་ཐོགས་ཆེན་པོ་ཡོད། འཇིག་རྟེན་གཏམ་དཔེ་ལ། ཆོས་ཁྲིམས་དར་གྱི་མདུད་པ་བསྡམས་ད་བསམ་དུས་ཇེ་ལྷོད། །རྒྱལ་ཁྲིམས་གསེར་གྱི་གཉའ་ཤིང་ལྷོད་ད་བསམ་དུས་ཇེ་བསྡམས། །ཞེས་བཤད་པ་ལྟར་ཆོས་ཁྲིམས་ནི་རྒྱལ་ཁྲིམས་དང་མི་འདྲ་བས་ཀུན་ཀྱིས་སྒྲིག་རང་འཁུར་བྱོས་དང་གུ་ཇེ་ཡང་ཇེ་ཡང་དུ་འགྱུར་བ་ཡོད།

རང་གིས་བཤད་པའི་སྐད་ཆ་ཐམས་ཅད་ལྷག་བསམ་ཡིན། ལྷག་བསམ་གྱི་སྐད་ཆ་ནི་མཇུག་གཡོག་པོའམ་སུས་བཤད་ཀྱང་གསེར་རེད། གཡོ་སྒྱུའི་སྐད་ཆ་ནི་མགོ་བླ་མས་བཤད་ནའང་དུག །བར་ནས་བཤད་ནའང་དུག །ཐ་ནས་བཤད་ནའང་དུག་ཡིན་པས་མཐོ་དམན་དྲག་ཞན་སུས་བཤད་ཀྱང་དུག་རེད། ལྷག་བསམ་གྱི་སྐད་ཆ་ནི་མཐོ་དམན་དྲག་ཞན་སུས་བཤད་ཀྱང་གསེར་རེད། ཀུན་གྱིས་དེ་ཐམས་ཅད་ཐུགས་ལ་བཟུང་། དེ་རིང་དེ་ཙམ་ཡིན།

སྟོང་སྐོར་དགོན་མདོ་སྔགས་སློབ་གླིང་འདིར་དགེ་བཤེས་རིན་པོ་ཆེས་བསླབ་བྱ་གནང་བ་འདི་དག་སློབ་བུ་ཡོངས་ཀྱི་སེམས་ཁམས་དང་མཐུན་ཞིང་ཕན་ཐོགས་ཤིན་ཏུ་ཆེ་བས། ཕྱི་ལོ་༢༠༢༡ བོད་ཟླ་༡ པའི་ཚེས་༢༣ ཉིན་ངེད་ཀྱིས་ཡིག་ཐོག་ལ་བཀོད་པ་ཡིན་ཡང་ནོར་བ་བྱུང་ཚེ་བཟོད་པར་གསོལ། འདིས་ཀྱང་བསྟན་འགྲོ་ལ་ཕན་ཐོགས་པར་གྱུར་ཅིག །

སྒྲ་ཕབ་མཁན་དགེ་བློ་སྦྱིན། དགེའོ། །


དྲྭ་ཚིགས་གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ། རྩོམ་སྒྲིག་པ། མགར་ཚེ་རིང་བཀྲ་ཤིས།
འདྲེན་བཀོལ:
61.4K

  དཔྱད་གཏམ ( 0 )ཡོད།
དཔྱད་གཏམ་སྤེལ་ས།
སྤེལ་མཁན།
བཤེར་གྲངས།
mkcq བཤེར་གྲངས་ཁ་སྐོང་བྱོས། ཡིག་འབྲི་བཞི་ལས་མང་མི་རུང་། ཡིག་འབྲི་བཞི་ལས་ཉུང་མི་རུང་།
ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་། ཡིག་འབྲི་སུམ་སྟོང་ལས་མང་བ་སྤེལ་མི་རུང་།
ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།    
མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།
ལྟ་ཀློག་གྲངས་ཀ
26393772
དྲ་ཚིགས་བཟོ་སྐྲུན།
 
འབྲེལ་གཏུག་བྱ་ཡུལ།   ཁ་པར།  15283703999    E-mail:tbmgar@163.com
པར་དབང་བཙན་པོའི་མགར་གྱི་དྲ་བ་ལས་གཞན་ལ་མེད།
蜀ICP备13002975号-1