སི་ཏུ་རིན་པོ་ཆེས་སྡེ་དགེའི་བཀའ་འགྱུར་ཞུ་དག་མཛད་སྟངས།

བོད་འདིར་སྔ་བའི་སྣར་ཐང་བཀའ་འགྱུར་དང་། །སི་ཏུ་དགེ་བློའི་ཚལ་པ་བཀའ་འགྱུར་དང་། །རྒྱལ་རྩེ་ཐེམས་སྤང་གྲགས་པའི་བཀའ་འགྱུར་རྒྱུན། །རྒྱ་ནག་ཏཱ་མིང་རྒྱལ་པོའི་བཀའ་འགྱུར་རྒྱུན། །འཇང་ཡུལ་རྒྱལ་པོས་བཞེངས་པའི་བཀའ་འགྱུར་པར། །དེང་སང་ལི་ཐང་བཞུགས་པ་འདི་ཉིད་དང་། །ཨ་གཉེན་པཀྵིའི་ཐུགས་དམ་བཀའ་འགྱུར་དང་། །རྒྱལ་དབང་ལྔ་པའི་དགོངས་བཀོད་ལྷོ་རྫོང་གི། །བཀའ་འགྱུར་བཅས་དང་འདུལ་མདོ་ཤེར་ཕྱིན་དང་། །གསང་སྔགས་རྒྱུད་འབུམ་བཅས་པ་སོ་སོ་ཡི། །དཔེ་ཁུངས་བཙུན་པ་རྣམས་དང་གོ་བསྡུར་ཞིང་། །ཁྱད་པར་སྙིགས་དུས་བསྟན་པའི་སྒྲོན་མེ་མཆོག །མཁས་པ་ཆེན་པོ་བུ་སྟོན་རིན་ཆེན་གྲུབ། །གང་གིས་དཀར་ཆག་བཏབ་པ་ཚད་མར་འཛིན། །གཞན་ཡང་བྲིས་པ་ལས་འཛིན་ལེ་ལོ་ཡིས། །ནོར་འཁྲུལ་སོར་ཆུད་ལོག་དཔྱོད་བསྒྱུར་ཉེས་རྣམས། །འཕགས་ཡུལ་རྒྱ་དཔེའི་སྟེང་ནས་བསྒྱུར་ཞིང་ཞུས། །གཏན་ལ་ཕབ་ཅིང་ཐེ་ཚོམ་བྱུང་བ་རྣམས། །རྒྱ་འགྲེལ་དང་བསྟུན་ཚད་མ་ཉིད་དུ་བཅོས། །སྔགས་བཏུ་ཡོད་པ་དེ་ཉིད་དག་དང་བསྟུན། །ལེགས་པར་ལེགས་སྦྱར་སཾ་སྐྲྀ་ཏ་ཡི་སྐད། །འགྲོ་ལྡིང་སྐད་དང་པི་ཤཱ་ཙི་ཡི་སྐད། །ཟུར་ཆག་ཨ་བ་བྷྲཾ་ཤའི་སྐད་དང་ནི། །གསང་བ་བརྡ་ཡི་སྐད་སོགས་སྒྲ་སྐད་རྣམས། །ཀུན་ལ་ཐོགས་མེད་མ་ཧཱ་པཎྜི་ཏ། །འཇམ་མགོན་ཟུར་ཕུད་ལྔ་པ་གཞན་དུ་གང་། །མཁས་པ་གཞན་རྣམས་ནེ་ཙོའི་ཀློག་ཙམ་ལགས། །དཔེར་ན་ནོར་བུ་ཀེ་ཏ་ཀ་ཞེས་པས། །ཆུ་རྣམས་རྙོགས་བྲལ་བགྲུང་ཞིང་དྭངས་པར་བྱེད། །དེ་བཞིན་ཆོས་ཀྱི་སྤྱན་ལྡན་སི་ཏུ་པས། །རྒྱལ་སྲུང་དམ་ཆོས་སྐྱོན་རྣམས་སྦྱོང་བར་མཛད། །དེ་ནས་བོད་ཀྱི་བརྡ་དག་སྡེབ་སྦྱོར་རྣམས། །འཇམ་དབྱངས་ཐུ་མིའི་སུམ་རྟགས་དགོངས་དོན་ཏེ། །འདི་ལ་མཁས་པ་འགའ་ཡིས་དཔྱད་པ་ཡི། །བརྡ་དག་བསྟན་བཅོས་སྣ་ཚོགས་བཞུགས་པ་ལས། །འདུལ་མདོ་རྒྱུད་གསུམ་བརྡ་དག་མཚུངས་པར་མཛད། །ཡུལ་སྐད་མ་མྱ་ས་སྩོགས་ད་དྲག་བསྡུས། །འགྱུར་ཆད་བསྐང་ཞིང་བསྒྱུར་ཉེས་དག་པར་ཕབ། །འདི་ནི་བསྲེག་བཅད་བརྡར་བའི་གསེར་བཞིན་གཙང་། །ལེགས་ཆ་ཀུན་རྫོགས་ཉ་རྒྱས་ཟླ་བ་འདྲ། །གོང་འོག་སྡེབ་ལེགས་རི་རབ་ལྷུན་པོ་འདྲ། །དགོས་འདོད་ཀུན་འབྱུང་དཔག་བསམ་ལྗོན་ཤིང་བཞིན། །དེ་ཕྱིར་བོད་དང་བོད་ཆེན་མཁས་གྲུབ་ཚོགས། །ཐུགས་དགོངས་མཉམ་པས་མགྲིན་གཅིག་སྨྲ་བ་ལྟར། །སྡེ་དགེ་ཆོས་རྒྱལ་བཀའ་འགྱུར་རིན་པོ་ཆེ། །སྔོན་གྱི་ཆོས་སྦྱིན་ཀུན་གྱིས་འགྲན་ཟླ་མེད། །ཅེས་པའི་གྲགས་པས་ས་སྟེང་ཀུན་ལ་ཁྱབ། །
ཅེས་རབ་བྱུང་བཅུ་གསུམ་པའི་ལྕགས་ཕག་སྤྱི་ལོ༡༧༩༡ལོར་སྡེ་དགེའི་ཆོས་རྒྱལ་ཆེན་པོའི་དྲུང་འཚོ་བ་གུ་རུ་འཕེལ་གྱིས་བྲིས་པའི་སྡེ་དགེའི་རྒྱལ་རབས་ཁམས་གསུམ་ཟིལ་གནོན་འབྲེལ་ཚད་དོན་ལྡན་ལས་སི་ཏུ་པཎ་ཆེན་གྱིས་བཀའ་འགྱུར་ཞུ་དག་མཛད་སྟངས་སྐོར་ཁོལ་དུ་ཕྱུང་བའོ། །

གཙོ་སྐྱོང་བ་དང་དོ་དམ་པ། ཁཱ་ཤེས་རབ་རྒྱ་མཚོ།
རྩོམ་སྒྲིག་པ། མགར་ཚེ་རིང་བཀྲ་ཤིས།


	འདྲེན་བཀོལ:	61.4K

དཔྱད་གཏམ ( 0 )ཡོད།

དཔྱད་གཏམ་སྤེལ་ས།

སྤེལ་མཁན།

བཤེར་གྲངས།

gd6k བཤེར་གྲངས་ཁ་སྐོང་བྱོས། ཡིག་འབྲི་བཞི་ལས་མང་མི་རུང་། ཡིག་འབྲི་བཞི་ལས་ཉུང་མི་རུང་།

ནང་དོན་བྲི་རོགས། ཡིག་འབྲི་གསུམ་ལས་ཉུང་བ་སྤེལ་མི་རུང་། ཡིག་འབྲི་སུམ་སྟོང་ལས་མང་བ་སྤེལ་མི་རུང་།

ནང་དོན་ཡིག་འབྲི་སུམ་སྟོང་ལས་བརྒལ་མི་རུང་། བྲིས་ཟིན་ཡིག་འབྲི།

མིག་སྔར་འདི་རུ་དཔྱད་གཏམ་སྤེལ་མཁན་མ་བྱུང་།

ལྟ་ཀློག་གྲངས་ཀ

41660179

དྲ་ཚིགས་བཟོ་སྐྲུན།

འབྲེལ་གཏུག་བྱ་ཡུལ། ཁ་པར། 草原梦想15283703999 E-mail:tbmgar@163.com

པར་དབང་བཙན་པོའི་མགར་གྱི་དྲ་བ་ལས་གཞན་ལ་མེད།