ནང་མ།

ནང་མ་ཞེས་པའི་ཞབས་བྲོ་དེར་ཞིབ་འཇུག་གནང་མཁན་མང་བོ་བྱུང་ཡོད་ལ་དེའི་ཐད་ཀྱི་རྩོམ་ཡིག་ཀྱང་མི་ཉུང་བ་ཞིག་མཐོང་རྒྱུ་འདུག འབྲེལ་ཡོད་ཡིག་རིགས་སུ་གསལ་བ་ལྟར་ན་ནང་མ་ནི་རྒྱལ་བོའི་ཕོ་བྲང་ནང་དུ་གཏོང་བའི་གཞས་ཡིན་པར་ངོས་འཛིན་ཀྱང་དེ་ནི་ཡང་དག་པའི་ལྟ་བ་ཞིག་མ་ཡིན་ཞིང་། ནང་མ་ནི་གནའ་བོའི་དམངས་ཁྲོད་ཀྱི་རོལ་མོ་དང་ཞབས་བྲོའི་རྨང་གཞིའི་ཐོག་བསྒྱུར་བཅོས་གོང་འཕེལ་བྱུང་བའི་གླུ་གཞས་ཀྱི་རྣམ་པ་ཞིག་ཡིན་པར་ངེས། ནང་མའི་གླུ་གདངས་གནའ་ཉམས་དོད་པ་དང་གར་སྟབས་ཀྱི་ཉམས་འགྱུར་མཛེས་པ། མི་རིགས་ཀྱི་ཁྱད་ཆོས་ཟབ་མོ་ལྡན་པ་བཅས་ཡིན་པས་དབུས་གཙང་ཁུལ་དུ་དར་ཁྱབ་ཤིན་ཏུ་ཆེ།

ནང་མའི་གླུ་གཞས་ཀྱི་གྲུབ་ཆ་ཁག་གསུམ་དུ་དབྱེ་བ་སྟེ། དང་བོ་འཇོག་དང་བར་རྒྱང་གཞས། མཇུག་ཏུ་འཁྲུག་གཞས་བཅས་ཡིན།

འཇོག་ནི་རོལ་མོ་དཀྲོལ་བ་ལས་གཞས་དང་ཞབས་བྲོ་གཉིས་ཀ་མེད། དེ་ནི་གཞས་མགོ་འཛུགས་པའི་གདངས་དབྱངས་ཡིན།

རྒྱང་གཞས་ཀྱི་གདངས་དབྱངས་ནི་ནང་མའི་སྙིང་བཅུད་ལྟ་བུ་ཞིག་ཡིན་པས་གཞས་གདངས་སྙན་ཞིང་བག་ཕེབས་པ། ཞབས་བྲོ་དངོས་དེ་ཙམ་མེད་པ་ལ་གར་མཁན་གྱིས་ལུས་ཀྱི་སྟངས་སྟབས་ཀྱི་སྒེག་ཉམས་དང་གུས་ལུགས་ཀྱི་རྣམ་པ་མཚོན་བྱེད་དུ་སྐབས་རེ་ཕྱག་འབུལ་དང་ཐལ་མོ་སྦྱོར་བ་ལ་སོགས་ཀྱི་གུས་འབུལ་ཞུ་སྲོལ་ཡོད།

འཁྲུག་གཞས་ནི་མཚམས་ཚིགས་ཀྱི་འགྱུར་ཁུགས་མྱུར་ལ་སྤྲོ་སྣང་འཕེལ་བ་ཞིག་ཡིན་པས་དེ་ནི་ནང་མའི་གཞས་ཀྱི་ཆེས་འཁྲུག་ཤོས་སུ་གྱུར་པའི་མཚམས་དེ་ཡིན། སྟོད་གཞས་དང་ནང་མ་གཉིས་ཕྱོགས་མང་བོའི་ཐད་ཕན་ཚུན་ཤུགས་རྐྱེན་ཆེན་པོ་ཐེབས་ཡོད་པས། ནང་མའི་གཞས་ནང་གི་རྩ་བའི་སྟངས་སྟབས་མང་བོ་ཞིག་ཀྱང་སྟོད་གཞས་ལ་བལྟས་ནས་བྱུང་བ་དང་། ནང་མའི་གཞས་ཚིག་ཕལ་ཆེ་བ་དྲུག་ཚིག་ཡིན་པ་དང་ནང་དོན་ཡང་ཕུན་སུམ་ཚོགས་པོ་ཡོད་པས་གཏོང་བྱའི་རོལ་མོ་ནི་སྒྲ་སྙན་དང་། གླིང་བུ། ཡང་ཆེན། པི་ཝང་། ལིང་ཤང་། དལ་ཆེན། གན་ཆག་བཅས་ལས་རོལ་མོ་གཞན་སྤྱོད་སྲོལ་མེད།