༄༅། །ཨོཾ་སྭ་སྟི་པྲ་ཛ་བྷྱཿ ཕྱོགས་ཀུན་ཐ་གྲུ་ཡངས་པ་འོག་མིན་གནས། །
ལོངས་སྤྱོད་ལྷུན་འགྲུབ་སྟུག་པོ་བཀོད་པ་ན། །
མཐའ་ཀླས་འཁོར་ལ་ཐེག་པ་ཆེན་པོའི་ཆོས། །
རྒྱུན་དུ་སྟོན་པ་དྲུག་པ་རྡོ་རྗེ་འཆང༌། །
གང་དང་དབྱེར་མེད་ཐ་མལ་གདུལ་བྱའི་ངོར། །
གསུམ་ལྡན་ངུར་སྨྲིག་འཆང་བའི་རོལ་གར་མཁན། །
དཔལ་ལྡན་བླ་མ་མཆོག་གི་ཞབས་པད་མོ། །
སྤྱི་གཙུག་རྒྱན་དུ་བཞུགས་ལ་རྟག་སྐྱོངས་ཤིག །
རྣམ་དག་ཁྲིམས་ཀྱི་ཆུ་གཏེར་ཆེན་པོའི་ཀློང༌། །
གཟུངས་སྤོབས་ཏིང་འཛིན་རིན་ཆེན་བྱེ་བས་གཏམས། །
མ་རྨད་རྒྱལ་སྲས་སྤྱོད་པའི་པདྨ་དཀར། །
རིམ་གཉིས་སྦྲང་རྩིའི་སྙིང་བོ་འབུམ་འཇོ་བ། །
ཀུན་སྤངས་རྣལ་འབྱོར་དབང་བོ་ཁྱོད་ཉིད་ནི། །
དགེ་བཅུའི་དཔལ་གྱིས་བརྒྱན་པའི་ལྗོངས་འདི་རུ། །
རབ་ཡིད་ཟླ་བ་ལྔ་བའི་ཚེས་བཞིའི་ཉིན། །
དགེ་ལེགས་ལྟས་བཅས་འཁྲུངས་ལ་གསོལ་བ་འདེབས། །
བགྲང་བྱ་བདུན་སོན་དུས་སུ་དགེ་བའི་བཤེས། །
མ་ཏི་དྷརྨ་ཝརྟའི་ཞབས་དྲུང་དུ། །
པདྨ་གསུང་གི་དཀྱིལ་འཁོར་སྒོར་ཞུགས་ནས། །
རིགས་འཛིན་ཆེན་པོར་གྲུབ་ལ༝༝། །
བཅུ་གསུམ་བཀྲ་ཤིས་ཆོས་འཕེལ་གླིང་ཉིད་དུ། །
བསྟན་པའི་མངའ་བདག་མཁན་ཆེན་ནོར་བཟང་དྲུང༌། །
དགེ་བསྙེན་རབ་བྱུང་དགེ་ཚུལ་སྡོམ་པ་མནོས། །
ཚངས་སྤྱོད་དཔལ་གྱིས་མཛེས་ལ༝༝། །
དེ་ནས་བཟུང་སྟེ་བགྲང་བྱ་གསུམ་གྱི་རིང༌། །
སྡེ་དེའི་ཆོས་སྤྱོད་མ་ལུས་ཐུགས་འཛིན་དང༌། །
བཅུ་བདུན་ལམ་རིམ་འབྲིང་བོ་ཐུགས་བཟུང་ནས། །
དེའི་དོན་སེམས་པར་མཛད་ལ༝༝། །
མཁས་དབང་ཤིང་བཟའ་བློ་བཟང་དར་རྒྱས་ཀྱི།
།ཡང་སྤྲུལ་དྲུང་དུ་རྟ་མཆོག་རོལ་བའི་དབང༌། །
རྣམ་དག་མནོས་ནས་བསྙེན་སྒྲུབ་མཛད་པའི་ཚེ། །
དྲང་སྲོང་བྲན་དུ་བཀོལ་ལ༝༝། །
འཇམ་དཔལ་དུས་དགྲའི་དབང་བོའི་བསྙེན་པའི་སྐབས། །
མཁའ་དབྱིངས་འོད་ཀྱིས་འགེངས་པའི་མོད་ཉིད་ལ།།
ནོར་འཛིན་བུ་མོའི་ལྟོ་བ་ལས་ཐོན་པའི། །
སྣ་ཚོགས་བརྡ་རིས་གཟིགས་ལ༝༝། །
སྲིད་འབྱོར་མུན་པའི་སྨག་ན་གནས་འཆའ་བའི།།
སྡུག་བསྔལ་གློག་གི་བུ་མོའི་མཚང་རིགས་ཏེ། །
བསྟན་པའི་འབྱུང་གནས་དབུས་གཙང་གནས་བྱོན་ཚེ། །
རྐྱེན་ངན་ལམ་དུ་སློང་ལ༝༝། །
དེ་ནས་སེར་སྨད་ཐོས་བསམ་ནོར་གླིང་དུ། །
ཚེ་འདིའི་འདུ་འཛི་མཐའ་དག་རྒྱང་བསྲིང་སྟེ ། །
རྒྱན་འཇུག་ལམ་རིམ་ལ་སོགས་གཞུང་མང་བོ། །
ཐུགས་འཛིན་ཐོས་བསམ་མཛད་ལ༝༝། །
དེ་ཚེ་རྟ་མགྲིན་ཁང་དུ་ལྷག་པའི་ལྷར། །
མཇལ་སྐབས་བྱང་ཆུབ་སེམས་ཀྱི་ལེགས་དྲངས་པས། །
རླབས་ཆེན་སྤྱོད་པའི་བསྟན་དོན་ཆེར་འབྱུང་ལྟས། །
སྣ་ཚོགས་འོད་བརྒྱ་འགྱེད་ལ༝༝། །
སྙེ་ཐང་འཕགས་མའི་ཞལ་གྱི་གསེར་ལྡན་མར། །
མཆུ་སྒྲོས་མེ་ཏོག་འདབ་མ་ཆེར་བཞད་ནས། །
གེ་སར་སོ་འཕྲེང་རྒོད་པའི་སྦྲང་རྩིའི་རོས། །
བཅུད་ཀྱིས་ཚིམ་པར་མཛད་ལ༝༝། །
འཕན་ཡུལ་སྲོག་བདག་དམར་བོ་ལས་མཁན་གྱིས། །
དགྱེས་པའི་གསུང་གིས་གཟིངས་བསྟོད་དབུགས་དབྱུང་ནས། །
འཕྲིན་ལས་གཡེལ་མེད་བསྒྲུབ་པའི་དམ་བཅའ་དང༌། །
མ་འོངས་ལུང་བསྟན་གནང་ལ༝༝། །
སྣང་སྲིད་དྲེགས་པ་ཡོངས་ཀྱི་སྡེ་དཔོན་ཆེས། །
བཀྲ་ཤིས་གཡས་སུ་འཁྱིལ་བའི་སྡེ་ཆེན་པོར། །
འབྱོན་པར་བསྐུལ་ཞིང་གནས་དེར་ཕེབས་པའི་ཚེ། །
གསུང་གིས་དབུགས་དབྱུང་མཛད་ལ༝༝། །
མཁས་པའི་དབང་ཕྱུག་མཁན་ཆེན་སྒོ་མང་བའི། །
བཀའ་བཞིན་རིགས་འཛིན་སྨད་རྒྱུད་གྲྭ་ཚང་དུ། །
གསང་ཆེན་རྡོ་རྗེ་ཐེག་པའི་དགའ་སྟོན་ལ། །
དགྱེས་དགུར་རོལ་བར་མཛད་ལ༝༝། །
དེ་ཚེ་རྒྱུད་དང་དགོངས་འགྲེལ་མ་ལུས་པར། །
བསླབ་ཅིང་སྟང་སྟབས་འདུག་སྟངས་བཟླས་བརྗོད་སོགས། །
གང་ལ་སྦྱངས་ཀུན་བསྒྲུབ་པའི་མཆོད་པ་རུ། །
བྱས་ནས་བླ་མར་ཕུལ་ལ༝༝། །
དེ་ནས་བཟུང་སྟེ་ཀུན་མཁྱེན་མཆོག་ཉིད་ཀྱིས། །
དགྱེས་པའི་དབུགས་དབྱུང་གསང་བའི་གནད་དུ་མ། །
མ་སྦས་ལྷུག་པར་བསྟན་ཚེ་རང་ཉིད་ཀྱིས། །
སྐྱེས་རབས་དུ་མ་དྲན་ལ༝༝། །
འཇམ་དཔལ་བཀའ་སྡོད་ལས་ཀྱི་གཤིན་རྗེ་དང༌། །
དབྱངས་ཅན་དྲག་མོ་དཔལ་ལྡན་དམག་ཟོར་མ། །
ལ་སོགས་བསྟན་སྲུང་རྒྱ་མཚོའི་ཚོགས་རྣམས་ཀྱིས། །
བཀའ་བཞིན་འཕྲིན་ལས་བསྒྲུབས་ལ༝༝། །
གནས་འདིར་བསྒྲུབ་པ་མཛད་པའི་ཀུན་སྤངས་མཆོག །
མཉེས་པར་མཛད་ནས་ཟབ་ཆོས་མ་ལུས་གསན། །
ཚེ་དང་བསྒྲུབ་པ་སྙོམས་པའི་བཀའ་སྩལ་ཚེ། །
བཞེད་པ་ཇི་བཞིན་བསྒྲུབས་ལ༝༝། །
དེ་ཚེ་རྨི་ལམ་རོལ་བར་གནས་བརྟན་ཆེ། །
བ་ཀུ་ལ་དང་མཇལ་ཞིང་ཕྱིས་ཀྱི་ཚེ། །
ལན་གྲངས་དུ་མར་གནས་བརྟན་བཅུ་དྲུག་གིས། །
ཡང་ཡང་བྱིན་གྱིས་རླབས་ལ༝༝། །
སེམས་དཔའ་མཆོག་གི་དྲུང་དུ་ལམ་རིམ་ཁྲིད། །
གསན་པར་ཀུན་མཁྱེན་མཆོག་གི་བཀས་བསྐུལ་ནས། །
ཕེབས་ཚེ་དག་པའི་སྣང་བ་འབྱམས་སུ་ཀླས། །
ཐུབ་དབང་རྒྱལ་ཚབ་མཆོག་ལ༝༝། །
བཀའ་གདམས་ཐིག་ལེ་བཅུ་དྲུག་བསྙེན་པའི་སྐབས། །
ན་ཚོད་དར་ལ་བབས་པ་མི་མོའི་གཟུགས། །
འཛིན་པའི་དཔའ་མོ་ཟུང་གིས་གར་བསྒྱུར་ནས། །
གསང་བའི་ལུང་བསྟན་མཛད་ལ༝༝། །
བརྟན་བྱེད་དྲི་བཞོན་གཞོན་ནུ་ཁེངས་དྲེགས་ཅན། །
མི་བདག་གྲངས་ལྡན་བདེ་ཆེན་ལུས་ཕྲ་མས། །
འཇིགས་རུང་སྲིན་པོའི་ལྟོ་བར་བསྟིམ་པའི་བརྡར། །
དངོས་སུ་གཟིགས་པར་མཛད་ལ༝༝། །
རྨི་ལམ་རོལ་བར་དགའ་ལྡན་ཞིང་ཉིད་དུ། །
བྱམས་མགོན་དྲུང་དུ་ཆོས་གསན་ཀུན་མཁྱེན་མཆོག །
བྱམས་མགོན་དངོས་སུ་ངེས་ཤེས་ལེགས་ཐོབ་ནས། །
ཐུན་མིན་དད་པ་ཐོབ་ལ༝༝། །
འོད་གསལ་རོལ་བར་རྟ་མཆོག་རོལ་བའི་སྐུར། །
བཞེངས་ནས་པད་མ་འོད་ཀྱི་ཞིང་དུ་ཕེབས། །
ཟག་མེད་བདེ་ཆེན་ཆང་གིས་རབ་མྱོས་ཏེ། །
ངོ་མཚར་ལྟས་མང་མཐོང་ལ༝༝།།
ལྷ་ཡི་ལམ་ཀུན་འགེངས་པའི་གཉིས་སྐྱེས་རྒྱལ། །
རབ་དཀར་མདངས་འཛིན་གཟུགས་ཀྱིས་ཆོས་ཀྱི་རྒྱལ། །
འོངས་ནས་ལུང་བསྟན་དབྱར་གྱི་རྔ་བོ་ཆེ། །
བསྒྲགས་པས་ཐུགས་བཞེད་འགྲུབ་ལ༝༝། །
ཆུ་མིག་བརྒྱ་རྩར་ཕེབས་སྐབས་ལྷ་ལམ་ཀུན། །
ཡུ་བ་ལོ་འདབ་ལྡན་པའི་མེ་ཏོག་ཚོགས། །
རབ་སྔོན་ཚོགས་ཀྱིས་འགེངས་པའི་ལྟས་བྱུང་ཚེ། །
ཉམས་རྟོགས་གོང་དུ་འཕེལ་ལ༝༝། །
ཕྱོགས་འདིར་གནས་པའི་དགེ་འདུན་འདུས་པའི་ཚོགས། །
བསྟན་པའི་གཞི་མ་སོ་སོར་ཐར་བ་ལ། །
ཉམས་ལེན་སྙིང་བོར་མཛད་པའི་སྲོལ་བཙུགས་ཏེ། །
བསྟན་པའི་རྒྱལ་མཚན་བསྒྲེངས་ལ༝༝། །
བསྟན་པའི་གཞི་མ་སོ་སོར་ཐར་བ་ནས། །
ཆེས་ཟབ་རྡོ་རྗེ་ཐེག་པའི་བར་གྱི་ལམ། །
དམན་མཆོག་ཀུན་གྱིས་བསྒྲུབ་པའི་སྲོལ་བཙུགས་ཏེ། །
འགྲོ་དོན་རླབས་ཆེན་མཛད་ལ༝༝། །
ཕྱི་རུ་འདུལ་བའི་ཀུན་སྤྱོད་ལ་གནས་ཤིང༌། །
ནང་དུ་རིམ་གཉིས་རྟོགས་པ་གདེངས་མཐོན་པོར། །
སླེབས་པས་ཐུགས་ཀྱི་བཞེད་དོན་མ་ལུས་པ། །
གེགས་མེད་ལྷུན་གྱིས་འགྲུབ་ལ༝༝། །
དེ་ལྟར་ཏིང་འཛིན་མཆོག་ལས་གཡོ་མེད་ཅིང༌། །
བཀའ་གདམས་རྣམ་ཐར་གཙང་མ་ལྷུར་བཞེས་ཏེ། །
དང་བོའི་ལས་ཅན་རྣམས་ལ་ཕན་པའི་ཕྱིར། །
བསགས་སྦྱངས་གཙོ་བོར་མཛད་ལ་གསོལ་བ་འདེབས། །
དེ་ལྟར་དང་བའི་ཡིད་ཀྱིས་གསོལ་བཏབ་པས། །
ཚེ་རབས་ཀུན་ཏུ་ཐེག་མཆོག་དགེ་བའི་བཤེས། །
ཁྱོད་ཀྱིས་འབྲལ་བ་མེད་པར་རྗེས་བཟུང་སྟེ། །
ཐེག་མཆོག་ཆོས་ཀྱི་བདུད་རྩིས་འཚོ་བར་ཤོག །
མི་རྟག་འཆི་བ་དྲན་པས་རྒྱུད་བསྐུལ་ཏེ། །
ཡོན་ཏན་ཀུན་གྱི་གཞི་མ་ཚུལ་ཁྲིམས་ལ། །
ཉམས་ལེན་སྙིང་བོར་མཛད་པ་གཞིར་བཟུང་ནས། །
སྒྲུབ་པའི་རྒྱལ་མཚན་བསྒྲེངས་པར་བྱིན་གྱིས་རློབས། །
བདག་པས་གཞན་གཅེས་བྱང་ཆུབ་སེམས་མཆོག་དང༌། །
ཆོས་ཀུན་དེ་ཉིད་གཟིགས་པའི་ཤེས་རབ་སོགས། །
རླབས་ཆེན་རྒྱལ་སྲས་སྤྱོད་པ་མ་ལུས་ལ། །
སློབ་པས་ཉིན་མཚན་འདའ་བར་བྱིན་གྱིས་རློབས། །
མཚན་ལྡན་རྡོ་རྗེ་སློབ་དཔོན་ཞབས་བསྟེན་ཏེ། །
མཉེས་པ་གསུམ་གྱི་ཆེས་ཆེར་མཉེས་བྱས་ནས།།
རྣམ་དག་དབང་གི་རྒྱུད་སྨིན་དམ་ཚིག་སྡོམ། །
སྲོག་དང་བསྡོས་ཏེ་སྲུང་བར་བྱིན་གྱིས་རློབས།།
དབེན་པའི་གནས་སུ་ཚེ་འདིའི་བྱ་བཞག་ཀུན། །
ཡལ་བར་བོར་ནས་ཟབ་ལམ་རིམ་གཉིས་ལ། །
བརྩོན་པས་བསྒྲུབ་པ་སྙིང་བོ་ལྷུར་བླངས་ནས། །
མྱུར་ཏུ་ཟུང་འཇུག་ཐོབ་པར་བྱིན་གྱིས་རློབས། །
ཞེས་ཀུན་སྤངས་རི་ཁྲོད་དབང་བོའི་རྣམ་ཐར་གསོལ་འདེབས་སྐལ་ལྡན་དད་པའི་འཇུག་ངོགས་ཞེས་བྱ་བ་འདི་ནི། ཡུལ་ལྷོ་ཕྱོགས་ཀྱི་རྒྱུད་དུ་བྱུང་བའི་རོལ་མོ་མཁན་གཡེངས་པ་ཅན་ཞེས་བྱ་བས་བྲིས་པའོ། །
ཁྲོ་ཁོའི་གད་སྐྱའི་རི་ཁྲོད་པ་སྔགས་སྒྲུབ་ཚང་གི་རྣམ་ཐར་འདི་ཡག་སྐྱའི་ཨ་ཁུ་ཚུལ་ཁྲིམས་ཚང་ནས་མཁོ་སྤྲོད་བྱས་པ་ཡིན།
རྩོམ་པ་བོ་སུ་ཡིན་མ་ངེས།
༢༠༡༠ལོའི་རིག་གནས་ཡར་སྤེལ་ལས་བཤུས།
|